على قد فلوسك مد لحاف تخصصك ..<<ياوزارة التعليم العالي ...يامسؤلين ....الى متى هالحال

[حلم وامال وطموح]

السلام عليكم ورحمة الله وبركاااااااته

مساكم /وصباحكم ...ورد

حيام الله فردا فردا ,,,

ياجماااااعه ..الخير ..بكلمكم بكل اريحيه وبعيد عن كل التنميقات ..ولا التكلف ...

اللي دفعني لفتح الموضوع الحالة النفسيه الرهييييييييبه اللي اعانيها مع وزارة التعليم العالي <<اوخس ...

الحين محدثكم اللي هو انا <<<اخلصي علينا
قدمت في 3 جامعات ...علما باني خريجة العام الماضي ...وتخصصي تربوي ..وتقدير مرتفع ...ومعي دبلوم حاسب ..ودورت سكرتارية ...ولغتي جيدة بعد ...<<قصة حياتك ذي ياخاله

المهم مالكم بالطويله جامعتين من 3 ماسوت مقابله الاختيار كان نهائي بعد الاختبار ..نظرا لظيق الوقت ...ووحده جامعه ترشحت من بين 400 وكنت من اخر 30 طالبه ....دخلو المقابله ..وربي ماكتب لي قبول مع انهم اخذو النص ...
طيب ..الحين تعالو باقولكم ...ماتلاحظون ان جامعاتنا صايرة بقمة التعقيدات ؟؟؟في اجراءاتها ..وفي شروطها ..وفي انظمتها ...
المصيبه ..فيه تباين غريييييب بين الجامعات المملكة...وكانها تتخذ قرارات عشوائية ..مالها اي مرجع في وزارة التعليم العالي ...
انا اقولكم شلون ؟؟......الحين جامعاتنا تفرض للقبول بديل التوفل على تخصصات تعليم الماستر فيها باللغة العربيه .....؟والمصيبه ان هالشرط ضروري حتى للدكتوراه ...يعني الواحد يخبر مرتين يمكن الاول يعدي بالحظ...وبالثانيه ..يقعد فيها !!
يعني دام وصل لها المرحله من العلم ..المفروض يكون فيه تقدير لها الشئ..
كله كووووووووووم واختبارات القبول للجامعيين كوم ثاني ....بالله وش نسوي بعمرنا .؟؟
تعبنا وسهرنا وجبنا معدلات...وتخرجنا ..ولقينا اكبر عواااااائق في وجيهنا لتكميل العلم ...مانبي وظايف ...اذا هي عثرة بوجة المسؤليين او الدوله ؟؟<<دقه على خفيف
نبغى فرصة وحق مكتسب لاي مواطن في افقر دوله على سطح الارض ..مو عاد في بلد زي السعوديه؟؟؟..!!

وين المشكلة مايكو ن التعليم للجميع ..؟؟؟!!!.....في أغلب دول العالم يحق للطالب اكمال دراسته ...بدون تعقيدات ....مو بس اصحاب المعدلات العاليه...يعني حتى المادة ممكن تلعب دور بس بأسعار رمزيه ....في مصر ...اللي نص الشعب عندهم دكاتره مشاءالله عليهم ..تكلفة الماجستير مع قيمة الكتب للطالب المصري طبعا ماتجاوز اربعة الاف ريال سعودي ..
واحنا حضرت المسؤلين يتفنون بقيمة الماستر حسب نوع التخصص ...يعني التخصص المرغوب في سوق العمل ب92 الف ....والثاني ب72 الف ريال ...والنوع الثالث ب42 الف ريال ...؟؟

وش هالابتزاز النفسي التعليمي اللي حاصل عندنا .؟؟؟
ياعالم خلونا نرتقي بانفسنا وبمجتمعنا ..؟؟لمتى ندفع هالقيم الخياليه ...عشان ناخذ فرصة لحقنا اصلا في التعليم؟؟؟
ابغى احد يبرر لي بأي وجة حق انا اخذ تخصص ماابيه عشان امكانياتي ماتسمحلي اخذ ابو 92 الف ريال ؟؟؟
من المسؤل عن الوضع المأساوي الي حاصل بالعملية التعليمية للتعليم العالي؟؟
جامعة تفرض الاختبارات والتعقيدات ..وجامعه ثانيه الماستر سنتين مع التحضيري صارو ثلاثه ...وجامعه مفتوحة لعيال المسؤلين ...وجامعه لعيال الطبقة الفقيرة هذا اللي ناقص ؟؟؟
لا تزعلون مني ...والي عنده كلمة حق يجي يقولها ...واللي ماعنده .؟؟يوفرها؛<<اخلاقها خربت من الاضطهاد...
نبي ندرس ....تعبنا ...بنشيب واحنا مانعطينا حق ...
تكفون انتخبوني وزيرة للتعليم ...هع <<احلامها ورديه

المهم مدو لحافكم على قد تخصصكم...اللي عنده فلوس لا يقصر على عمرة ...واللي ماعنده خله يموت بحسرته ...
المهم

احد عنده سلف 72 الف رياااااااااال <<صدقوني بأردها لكم بعد سنتين ...وعد رجال ...هع <<راحت علومكم ..بس ..

سامحوني طولت عليكم ..