أول أسبوع في الدراسة ليس للغياب (للمستجدين)

[الباسل3003]

بسم الله الرحمن الرحيم

السلام عليكم و رحمة الله و بركاته

اخواني و أخواتي المستجدين كثير مانسمع اسئلة هل الأسبوع الأول مهم ؟ نغيب ولا نحضر؟ ايش راح يصير في أول اسبوع و كثير من الإستفسارات.

اكبر فكرة خاطئة سمعتها في الجامعة (أول أسبوع مو مهم و والغياب عادي)

ايش أهم من أول يوم في الجامعة؟؟؟ و كلنا نتمنا اننا مانتعب في هذا اليوم وما نتلخبط و فوق هذا راح تتذكر هذا اليوم طول دراستك الجامعية (مثل أول يوم في المدرسة)

كثير يقولون الأسبوع الأول مافيه دراسة , طيب هذي الفرصة المناسبة للتعرف على الجامعة و المباني اللي بتدرس فيها عشان ماتتعب و تفوت محاضرات الأسبوع الثاني والسبب (ما أدري وين المبنى) أو (ضيعت المبنى) .

اذكر الأسبوع الثاني طلاب يدخلون المحاضرة متأخرين و اذا سألهم الدكتور عن السبب يقولون ضيعت الطريق !!!

-----------

و أهم مافي الأسبوع الأول بالذات من يوم الأثنين يبدأ بعض الدكاترة بالحضور و هذي فرصة لإثبات نفسك مو شرط بالشطارة لو بس تتكلم مع الدكتور و يعرف أسمك لأن الطلاب راح يكونون قليل في هذي الفترة و هنا فرصتك

-----------

و أيضا فرصة للتعرف على أصدقاء جدد في الجامعة .
أول يوم كان عندي انجليزي و ماحضر في المحاضرة الا أنا و واحد ثاني تعرفنا على بعض وسوالف و في الأخير اكتشفنا ان جداولنا متطابقة في جميع المحاضرات و كسبته أخ و صديق لباقي الترم .

----------

يوم الثلاثاء غبت عشان ماكان في دراسة و فاتني درس و تسجلت غياب , تخيلوا

---------

خلاصة كلامي الأسبوع الأول مهم و مفيد ولو ماكان فيه دراسه مو شرط تحضر كل المحاضرات يوميا بس أهم شيء لا تغيب عن يوم كامل.

أتمنى أتمنى تستفيدون من الموضوع .