نـصـيـحـة بـخـصـوص جـدولـــك

[ضيدان]

كثير من المواضيع هذي الايام تتكلم وتطلب الرأي في الجدول والمواد

نصيحة للجميع
جدولك خليه ماشي مع الخطة
وخصوصا للمواد اللي تكون متطلب لمواد ثانية
ومواد التخصص نادر ما يتغير دكتورها.. لدرجة ان بعضهم تحس انه اضاف المادة معه بدفتر العائلة
لذلك
استمر بجدولك حسب الخطة
ولا تدور الهين وتعمل تأجيلات وتلغي مواد خصوصا مواد تكون متطلب
واحرص على البدء بالاطلاع على موادك ومذاكرتها من أول الترم
وابحث عن مدرس خاص لبعض المواد اللي تحتاج لمدرس من اول الترم وابدأ معه
اولا يكون ارخص ثانيا يكون معك وقت اذا ما اعجبك تغيره

ولا يمنع هذا من بعض الاستثناءات بخصوص حذف واضافة وتعديل مواد الجدول
المواد الاختيارية والحرة
تسأل عنها وعن دكتورها وتتأكد ان منهجها ما تغير وتطلع على بعض ملخصاتها قبل لا تقرر تختارها وتضيفها لجدولك
وان قررت وتوكلت على الله واضفتها ما يمنع انك تقوم بتجميع بعض المعلومات عنها من خلال انطباع الطلاب بالمواضيع اللي كتبوها بعد الاختبار مباشرة (ولا تركز عليه بزيادة اكثر الطلاب يكون دخل الاختبار وهو ما ذاكر ويسب ويشتم في المادة ويمكن دكتورها) وجمع لك كم نموذج اسئلة لها على شان تطلع على اسلوب الدكتور وكيفية اسئلته والمواضيع اللي يركز عليها وبالمرة تختبر نفسك

والاستثناء الاخير
بعض مواد التخصص لما تحصل فرصة ويتغير دكتورها المشهور والمعروف بصعوبة التعامل معه وبصعوبة اسئلته.. لا مانع من اقتناص هذي الفرصة... بشرط تكون على حساب احد مواد الحرة والاختيارية

وصدقني بعد ما توصل مستوى متقدم مثلا خامس او سادس تلقى نفسك انهيت مواد تخصص ويمكن بعضها من مستويات متقدمة (بسبب اقتناص بعض الفرص) وتلقى نفسك اخر ترمين تلعب بالجدول لعب .. ويكون باقي لك المواد الحرة والاختيارية وبعض مواد التخصص وتجلس تتفنن بتقسيم جدولك على اخر ترمين وهذا اكيد يخليك مرتاح نفسيا اخر مشوارك الجامعي وله اثر كبير راح تشوفه بالنتائج اللي تحققها بالاختبارات

ونصيحة
لما تطلب المشورة حط في بالك هذي الاعتبارات
الطالب مقدم النصيحة واللي تستشيره في مادة ما
يمكن يكون من نوعية الطلبة اللي يكون تفضيله لبعض المواد عكسك تماما
مثلا تلقاه يحب مواد الحفظ وتكون سهلة بالنسبة له
ويمكن انت عكسه اكره ما عليك مواد الحفظ ... وتطلع بنتيجة لما تاخذ برأيه عكس ما كنت تتوقع
ويمكن تلوم من قدم لك النصيحة مع انه لما قدمها لك كان صادق وهي بالنسبة له من اسهل المواد
وبعضهم يحب المواد العلمية ولا عنده أي مشكلة فيها.. وينصحك بمادة علمية
والنتيجة تجي على راسك .. واحتمال ترسب فيها
حط في بالك ان مدى سهولة وصعوبة المواد تختلف من طالب الى طالب
حسب ميول الطالب ( فهم – حفظ – علمية – لغوية )
لذلك .. قبل تقرر تدرس المادة ابحث عنها وعن بعض معلوماتها
وهي بالتأكيد تكون جديدة بالنسبة لك لانك ما قد درستها قبل كذا
ونزل ملخصات لها بعد ما تتأكد ان المنهج ما تغير وشوف الاسئلة وشوف انطباع اغلب الطلاب
وبعد كذا انت قرر .... لان اللي راح يختبر المادة انت .. والنتيجة لك انت!

وفي النهاية .... صدقني اذا ما نفعت نفسك بنفسك.. ما راح احد ينفعك بالاختبار
الا مجهودك وتعبك ومذاكرتك والتوفيق اولا واخيرا من رب العالمين

وأخيرا هذي نصيحتي لكل من كتب موضوع يطلب فيه الاستشارة
ولكثرتها حبيت يكون الرد بهذا الموضوع

واكيد ما هي ملزمة لاحد هذي النصيحة ولا فيه احد مجبور يتبعها
لكن حبيت انقل لكم بعض المشاكل اللي واجهتنا قبل بخصوص حذف واضافة بعض المواد وتعديل الجداول وكانت سبب في احباط بعض الطلاب لدرجة ان بعضهم قرر يترك الجامعة بسبب ان المواد كل ما تقدم تزيد صعوبة عليه وكل هذا بسبب انه اجل المواد الصعبة الين ما تراكمت عليه وتورط

واتمنى لكم والله كل التوفيق والنجاح باعلى الدرجات ان شاء الله
ولا تنسوني من دعواتكم