مشكلة في حياتي ، واحتاج مساعدتكم

[RHF]

السلامو عليكم

يا جماعة اخواني و اخواتي ،،

قبل ما ابدأ ، دي مشكلة ، انا ما ابا رد بسيط ، ابا احد يناقششني ، اللي يبا يكتب رد ، اتمنا يكون قري اللي انا كاتبتو بتركيز مو يمر مرور الكرام بس ،

ممممم باكتبلكم مشكلة تواجهني ، او مرحلة انا بمر بيها ، مع العلم انها بدأت معايا من سنوات ، لاكن كل مالها بتتزايد ، وحاسة اني مني قادرة اتصرف ، والغريب انو محد من ( المقربين ) معتبرها مشكلة ,,

حابدأ ..

ممممممم انا ما ابا اتكلم عن حياتي بصفة عامة ، ولاكن عن هادي المشكلة ، وهي اني ما ابا افكر في احد ولا ابا اشيل هم احد ، يادوب نفسي نفسي

بدأت المشكلة لمن كنت اولى سنوي ، كنت اعرف البنات كلهم تقريبن في المدرسة ، ورطت في مشكلة بسيطة وطبعن لانو مالي فيها ، ما سارلي شي ، لاكنو كان درس

من وقتها ، انا قطعت علاقتي مع اغلب البنات ، وسار عندي ( صاحبات ) لاحظو ، مو صديقات ،
معدودات ،، والباقين بعدت عنهم وكانت البداية عشان اتجنب مشاكل البنات في مرحلة المراهقة ،

سارت حياتي تعتمد على مين ، انا و امي واخواني و الوالد ، وصاحباتي ،

عبال اخلص السنوي اكتشفت انو عندي ( صديقة واحد فقط هي pinkberry ) مع اني كنت اعرف اغلب بنات المدرسة ،

//

دخلت الجامعة ، عرفت بنات كتيييييييييييييير ، ولاكن زي ما قولت المشكلة ما احب افكر في البنات ، واشيل هم دراستهم مع دراستي ، واسمع مشاكلهم و همومهم ، فكنت اخلي معرفتي بيهم سطحية ، وسرت اقعد لوحدي و ما اكلم احد ، لدرجة انو البنات سموني ( البنت الغامضة ) مع اني ( كتاب مفتوح )

//

وطبعن كنت اعرف بنات من منتديات تانية ، تخيلو اني في لحظة ، احزفهم من الماسنجر مسلن ، او في سواني اكسر الشريحة حقتي ،، وكلو عشان خلاص احس اني انغميت من الناس ، ما ابغا اتكلم مع احد ابا احس اني مرتاحة بدون اي شخص

//

مع الوقت ، زادت المشكلة ، سرت احس اني مهمومة كل ما سمعت عن خالاتي و بزورتهم و المشاكل في حياة كل شخص ، ونفس الشي مع اعمامي و حريمهم و بزورتهم ،

اقعد حزنانة على الواقع الي كل شخص عايشو ، وطول الوقت مهمومة و ابكي على حال الناس كأنو ناقصني انا

ايش عملت ؟

قطعت علاقتي مع اهل الوالد كلهم ،، مو مسألة انا مضاربة معاهم ابدن مافي مضاربة
لاكن عشان ما افكر فيهم او اعملهم حساب في حياتي و تفكيري ،

مع الوقت ، بطلت اتكلم مع خالاتي ، وبزورتهم ، وحتى الماسنجر ما سرت افتحو ، عشان ما اتكلم معاهم ، وما يحتاج اقول اني البي بي ما افعل الخدمة ، تجنبا للتواصل ، ولاني ما احب احس بانو في اشخاص كتير حولي ،، والجوال دايمن ما ادري عنو ، يتصلو مليون مرة ، وانا ما ادري عن الدنيا

//

سرت مع مين ؟ امي الله يعطيها العافية و اخواني فقط ،

حياتي كلها امي و اخواني + pinkberry + سكاو ،

مع العلم اني كنت مقطوعة عن بينك بيري مدة 7 شهور تقريبن ، يعني تخيلو كنت مع امي و اخواني بسسسسسسسسس

الود ودي لو اقدر ، كان دمجت امي و اخواني و بينك بيري ، مع بعض ، وخليتهم شخص واحد ، حاحس براحة اكتر ،،

//

ناقشت امي في الموضوع ، ما لاحظت فيه اي استغراب ، لانها نوعا ما ، زي كدا ، حياتها كلها ، انا و اخواني واخواتها فقط ، وحتى اخواتها مو كتير مرة ، يعني باختصار انا و اخواني بس فطبيعي ما تشوفو شي غريب

وكلمت اخوية في الموضوع ، كان مستغرب ، بس لاسباب مراهقة ، يعني هو شايف انو لازم يكون عندي صاحبات كتير ونخرج مع بعض ونتكلم ( لانو هو تفكيرو كدا ) ،، وانا عمري ما كان عندي الصديقات اللي اكون طول الوقت معاهم اشوفهم واخرج معاهم او حتى اكلمهم بالتلفون نتحكى

//

ترا انا مرة اجتماعية ، واتكلم مع الناس كلهم و مرة تمام ، بس المشكلة كلها سايرة اني ما ابا ( ارتبط ) ابدنننننن بناس كتير ، ابا احس بالحرية ، اقصد بالحرية يعني مافي احد افكر فيه و اسأل عنو غير امي و اخواني وبينك بيري ،، يعني ممكن اكون مية مية مع الناس ، وفجأة احس بكئابة ، اقوم اتركهم كلهم ، واقطع علاقتي بيهم كلهم :(

//

قولولي ايش رأيكم في الموضوع دا ؟ يعني دي حاجة طبيعية ؟ عادية ؟ ايش الحل ؟ ايش اسوي يناس :(

معليه انا احب الكلام الكتير والتفاصيل ،طولت عليكم

( مدري مسموح بزي دي المواضيع هنا ، ولا ينحزف ،، يلا اهم شي قولت الي في قلبي )

ومعرفة المشكلة نص حلها ،

رهف