ًًصدمة !

[Flamenco]

بسم الله الرحمن الرحيم

السلام عليكم ورحمة الله بركاته

بعد الفترة اللي عدت, فترة الاختبارات

قعدت مصدوم فترة طويلة, صراحة ما كنت متوقع هذا الشئ من طلاب قد ملأ الشعر وجوههم ويقال عنهم رجال المجتمع او هم على مقولة الناس عماد الأمة ..

صراحة مسألة قوية وانا ما اتوقعت اني الاقي هذا العدد الكبير منهم اللي يقوموا بهذا الشئ والله صارت مهزلة !!

شوية طفشتكم وطولت عليكم لكن صراحة ما اخفي عليكم الشئ اللي صدمني هوا الغش !

يعني انا اتوقع الغش من الصغار ومن المراهقين لكن ما اتوقعه من ناس رجال قد يصل فيهم الشخص بعمر والدي !

بالله فين الأمانة ؟!

وفين الناس اللي بياخدوا بكلام الرسوال (صلى الله عليه وسلم) "من غشنا فليس منا" ؟؟

يعني انا بتعب طول الترم بذاكر في كل يوم. وبحس بقيمة العلم وتعبه ..

وبكل سهولة يجي واحد جنبي ينسخ ورقتي عنده ! لا وكمان يطلب مني اني اعلمه الاجاباات الصحيحة في ورقته !

وين وصلت فيهم الجرأة !

حسبي الله ونعم الوكيل .. والله اني في فترة الاختبارات كنت بحاول اتخبى واتجنب مواجهتهم لانه اول ما يشوفني يجي عندي يقولي غششني ونقلني واليوم كيف وما اعرف ايه من العبارات هذي !

والله اني ما اقدر اواجههم يا ناس لانه يجي الواحد فيهم أكبر مني سنا وانا انسان صاحب أخلاق وما احب اتكلم معاهم بأسلوب مو حلو !

وأزيدكم من الشعر بيتين انه واحد فيهم كان انسان ملتزم ! اتخيلوا ملتزم والله اني ما اكذب وربي يشهد !

الحمدلله انا مؤمن بإني متوكل على ربي في كل اختباراتي وحتى لو وصلت فيا اني ما اعرف الحل فأنا أفضل انه تنقص درجاتي على اني اصير غشاش واخد درجات انا ما استحقها !

الصراحة الموضوع هذا قاهرني من يوم ما خلصت الاختبارات الى يومنا هذا ومرة مو مصدق اللي شفته !

وخاصة في اختبار التحليل الكمي والله لو كنتوا مكاني لا تحسوا بالقهر اللي حسيته ! يعني الأخ اللي كان جنبي جاي وحتى ما معاه آلة حاسبة ونسخ ورقتي عنده وانا والله زي المجنون بحل من جهة واحسب بيدي وبالآلة الحاسبة وبتعب وهوا ما يخاف ربه بكل سهولة ينسخ اجاباتي !

اترك لكم مجال لتتناقشوا معايا في هذا الموضوع لانه صراحة انا انسان عندي أمانة وما أحب الغش !

تقبلوا موضوعي البسيط

..