.,~ دفتر الأيام ~,. ملاذ بوح صامت

[الصقر 02]

^

خلال هذا الشهر

الشيف الصقر 02 صمّم إلّا يسوي قهوة
صكّت في رآسي ذاك اليوم إلّا اشرب قهوة ولا فيه أحد يعرف يسوّيها

والله وأجهز البرّاد وأطرّف ثلاجة القهوة
وأحط المويه في البرّاد وأحطّها على النار وخليتها الين بدأت المويه تغلي
وأحطّ لي ملعقتين بن وملعقة هيل مطحون

بصراحة نَفَسي انقطع من كثر ما نفخت
كل شوي تطفر القهوة وانفخ وانفخ ولا في أمل ترجع
تقريبا 5 مرّات انطفى الغاز علي

المهم سلّكنا الوضع الين خلّصت القهوة وحطيتها في الثلاجة
وخليتها تركد شوي على اساس انّي بشرب قهوة

والله بعد ما ركدت جيت أشرب ويا ليتني ما شربت
جالس أشرب في مويه حـآآرهـ ما في طعم قهوة

قلت بس عرفت المشكلة أكيد انّي قللت البن

والله واطالع يمين يسار ما شفت أحد وأزيد ارجّعها مرّه ثانية ع النار
واخليها الين تغلي وأزوّد ملعقة ثالثة من البن خليتها شوي وطفّيت عليها

وقلت خلاص يا ولد جتك القهوة
وأحطّها في الثلاجة وخلّيتها الين بردت شوي وجيت أشرب
والّا والله انّه نفس الطعم الأوّل

ناديت ولد عمّي قلت يمكن الذوق عندي معدوم
قلت له ابشر بالقهوة وانا اخوك وجلست اهايط عليه
و قلت له ذوق القهوة بالله

ما أمداهـ بعد يشرب والّا وجهه يعتفس
قلت بس بس لا تحطّمني الله يرحم والديك
هات الفنجال وروح ارتاح وان شاء الله خير

وأزيد ارجّعها مرّه ثالثة على النّـآر قلت يمكن باقي ما طبخت زين
واخلّيها تقريبا 5 دقايق وطفّيت عليها

وارجّعها للثلاجة على أمل انّي راح اشرب قهوة
وتركتها شوي الين ركدت وبردت وجيت اجرّب وشربت لي فنجال

وإلّا الوضع مثل ما هو فـ أخذت الثلّاجة ودسّيتها على جنب
وقلت " اعط القهوجي قهوته حتى لو عجن فيها ساعه "

ولا عرفت وش سبب عدم نجاح هالتجربة ؟!