اسئله واستفسارات واتمنى الخبره والنصيحه من اخواني المتخصصين

[ЯąмY]

السلام عليكم ورحمة الله وبركاته

كيفكم اتمنى تكونوا في احسن حال وعافيه

طبعا موضوعي وقته شويا غلط عشان الناس في وسط شهر رمضان لكن سامحوني صراحه في شوية توتر وما اعرف ارتاح الا لمن اعرف الجواب عن كل اسئلتي

ولكن قبل هذا اسأل الله ان يعيننا ويعينكم عن صيام الشهر وقيامه وان يجعله في موازين حسناتكم وتكفير عن ذنوبكم

الحمدالله انقبلت في كليتكم وطبعا زي اي طالب في السنه الاولى عندي اسئله واستفسارات كثيره بعضها لقيت جوابها من الاخوه الاعضاء وبعضها لا

واتمنى منكم تتحملوني عشان خبرتي قليله وآسف على الإطاله وكثرة الاسئله مقدما

نبدأ على البركه

حضرت الاسبوع الارشادي التعريفي با أقسام الجامعه وسمعت عميد كليتنا الدكتور يوسف نيازي يتكلم عن افتتاح قسمين جدد غير الجيوماتكس ويقول السنه الجايه او الي بعدها وحاب اعرف نبذه عنهم لو عندكم خلفيه

وكمان انا داخل الكليه عن رغبه حمدالله يعني مو مجبور او معدلي مايساعد وبكون صريح معاكم عشان كذا حاس بحماس فوق الطاقه البشريه لدرجه اني حطيت جدول ب18ساعه لترم و18 لترم ثاني

وانا عارف اني بجيب العيد وبرسب في كل الي المواد فحبيت تساعدوني قبل الكارثه

وبالنسبه للمواد العامه لو ماقدرت اخلصها في اول سنه بتلحقني في سنوات التخصص صح ؟ وماشاءالله الاحظ بعض الاعضاء يعرفون مواد عامه كثيره وما اعرف من فين يعني هل من موقع الكليه ؟

وفي سؤال خاص عن مادة phys281 هل ندرسها ولا خاصه لطلاب الهندسه ؟

وبالنسبه لتخصص كيف اتخصص في قسم وهل يجب على الطلاب انو يعملو مقابله شخصيه او اختبار تحدده الكليه ولا مجرد كلام روتيني كما في موقع الكليه ؟ انا عارف نظرتي المستقبليه بعيده بس حاب

اطمن

وحاب اعرف عن قسم الجيوماتكس وكم وقف معدله السنه الي فاتت يعني اقل طالب عشان صراحه شفت خطته وعجبتني المواد وكل الناس قالو ماله وظايف وجديد ولكن معليا خليهم في حالهم هوآ رغبتي ؟؟ وهل

المسمى الوظيفي هوا مهندس جيوماتكس او مهندس مساحه ؟؟

وهذا جدول سويته على نصايح بعض الاخوان في المنتدى

الترم الاول
La121
La141
Ar190
urp211
isis101
Arab101

16 hours

الترم الثاني
Ar191
Ar210
urp130
La222
isls201
Arab201 وفي فكرة اخلي العربي المستوى الثاني في الصيفي مع ثقافه المستوى الثالث

16 hours

حاب نصيحتكم ورأيكم الكل بدون استثناء وانا اتقبل جميع الاراء ومصيري ان شاءالله اتعلم منكم

يعني هل يوجد تضارب في الجدول هل الجدول ثقيل او هل احذف او اضيف ؟؟

وبصراحه انا خايف من قصة المشاريع الي في كل ماده اول مرا وخايف تخرب بيتي

وآسف على الاطاله وعلى الكلام الكثير ولكن حبيت اكون صريح عشان اسئلتي تكون واضحه وانا عارف ومقدر انو وقتكم ضيق واتمنى لكم التوفيق في دراستكم