السنة التحضيرية , خلاصة تجربتي كطالب فيها

[ًًWaleed117]

السلام عليكم ورحمة الله و بركاته

انا كنت خطة أ الترم الأول بدأت : برياضيات111 للتخصصات النظرية و عرب101 و مهارات حاسب و ثقافة إسلامية-1 و إنجليزي المستوى ال4 نزلوه لي في نهاية الترم الأول

الرياضيات كانت كالتالي : درسنا دكتور إسمه عبدالمعين كبير في السن شوية و لحيته بيضاء ما شاء الله , دكتور طيب حقيقة البعض يشوفه شديد في المنهج ومشكلته لو سألته سؤال يرد عليك بإجابة طويلة غالبا ما تحتاجها لكنه طيب القلب و يحضر في جميع محاضراته , الإختبار الدوري الأول جبت 17 من 30 درجة سيئة صراحة و السبب إني في لغة الأرقام 0 على الشمال و كنت أذاكر مع مدرس خصوصي إتضح لي أن ما عنده سالفة , دلوني الشباب على مدرس خصوصي هم يروحون له لبيته إسمه "سيد" أقسم أفضل مدرس خصوصي جربته في حياتي , يعيبه بيته في منطقة بعيدة شوي إسمها أم السلم لكن اللي جرب شرحه تهون عنده المسافة , الحمدلله خلصت المادة معاه و جبت درجة عالية

باقي المواد ما يحتاج أتكلم عنها كلها سهلة بس العربي ركزوا عليييه يا شباب أكثر من الثقافة الإسلامية لأن لو تطالعون في الجدول يفرق في المعدل أكثر هذي غلطة كبيرة أثرت شوي في معدلي لكن درس مهم إنه لا تذاكر كل المواد بنفس الجهد فيه مواد عليها 3 نقاط و مواد نقطتين2 .


الترم الثاني : الحمدلله نزلت لي باقي ال3 مواد اللي هي :
إحصاء
مهارات تفكير
مهارات إتصال

بتكلم عن الإحصاء أول : بدأت المادة مع دكتور إسمه عمر أحمد عمر الغامدي الدكتور هذا يا طويلين العمر و السلامة أسمر و قصير و سمين شوية , ما أخفيكم شرحه عادي ما هو سيئ لكن المعضلة الكبرى عنده و مشكلته الكبيرة في تسجيل الحضور ! جدا غريب في هذا الشأن , محاضرتين ما يحضر ومحاضرة يحضر و 3 ما يحضر و مرة يحضر و 10 ما يحضر بعدين يقرر يرجع يحضر , الطلاب إتلخبطوا , البعض إستمر في الحضور لشرحه و الأخرين سحبوا لأن بنظرهم ما فيه فائدة , أنا شخصيا قلت شكله الدكتور ما يبغى وجع رأس خلاص أحضر الإختبارات و أذاكر و أموري تمام ماله داعي أجي إذا ما فيه تسجيل حضور و لا أنا قاعد أستفيد من الشرح , سحبت على المحاضرات فترة طويلة و أنا مطمأن , سألني والدي عن المادة فقلت له السالفة فأصر علي أحضر لعل الدكتور رجع يسجل حضور , رحت يوم من الأيام و أنا أقول في نفسي بحضر و كالعادة ما راح يسجل حضور , و هنا جات الصدمة ! الدكتور سجل الحضور و لمن سألته عن إسمي قال إني محروم لوصولي 6 غيابات , حاولت مع الدكتور كذا مرة ما قال لي إيش وضعي بالضبط , جيت له في محاضرة بعدها و قلت له وضعي كامل و أني أول سنة هذه لي في الجامعة و معدلي طيب و حرام يصير في الشئ هذا و لا هي عادتي أغيب في أي مادة قال خلاص منت محروم ,
المستفاد هنا للطلاب اللي بيبدأون على خطة ب أو طلاب خطة أ اللي بياخذون المادة في الترم الثاني إحذروا و حتى لو شفتم دكتور ما ياخذ تسجيل حضور لا تغيبون أبدا أبدا ممكن يضيع عليكم تعب 10 أشهر في 6 أيام والله غبنة

مهارات الأتصال : مادة سهلة و بسيطة لكن ركزوا تجيبون كل الأعمال اللي يطلبها دكتوركم = إحنا طلب مقال و طلب نطلع نلقي عن اي موضوع لمدة دقيتين أمام طلاب الشعبة و طلب ننقد مقال من جريدة محلية و أخيرا طلب كتابة cv , و أيضا المادة هذي الغياب فيها يأثر على 30 درجة اللي هي المشاركة , يعني اللي يغيب حتى لو ما جاه حرمان بينقص كم درجة

سبحانك اللهم و بحمدك أشهد أن لا إله إلا أنت أستغفرك و أتوب إليك .