كيف طريقة اختبار بديل التوفل

[jode2008]

الاسئله اختياري .. بيعطونك اوراق اسئله و ورقة اجابة اللي بالتظليل .. سمي بالله وابدأ
أول جزء استماع .. شريط مسجله فيه محادثات تسمعها ورا كل محادثة وقت فاضي يمديك تظلل اجابتك بورق الاجابة ويكمل الشريط للمحادثة اللي بعدها , المحادثات تبدأ بالاقصر وتطول بالتدريج
يلزمك سرعة قراءه السؤال وسرعة بإيجاد الاجابة وانت تسمع , انتباه وتركيز
الجزء الثاني قرامر .. جمل فيها كلمات تحتها خط وتصححها من الاختيارات .. وتجاوب على طول
الجزء الثالث القراءه .. تجيك قطع وتحتها اسئله اختياري .. لازم تكون سريع لان القطع كثيره على الوقت
يعني هو اختبار مهارة ولغه
طبعا كل قسم له وقت محدد , المحادثات تبع الاستماع ما تعاد ابدا يعني لازم تركز لانه لو وقفت عند واحده بتروح عليك اللي بعدها , اذا وقفت بشي وماعرفت تحله , اختار عشوائي او اقرب شي فبالك لانه فيها حظ المهم تكمل للي بعده
بكل الاقسام اللي ماتعرفه لا تتركه فاضي اختار اي اجابه احتمال تطلع صح .. لا توقف على اي سؤال وتطول فيه لانها كثيره والوقت محدد ومايسمح .

من ناحية الكتب او المواقع اللي تراجعها .. سهله بالنت تلقى مواقع كثير لاختبارات توفل وتمارين تدريب لها
وتلقى بقوقل كتب توفل بعد كثيره .. انت بس تعرف القرامر وتجرب تسمع محادثات وتحل اسئله لها وتقرا قطع طويله بأسئله .. يعني تعرف طريقة الاسئله .. وبالمكتبات كتب كثيرة خاصة بالتوفل .
موفق خير و بإذن الله الكل يعدي من أول مره .