هل يوجد وظائف بالصيف للبنات ؟

[Eva160]

المشاركة الأصلية كتبت بواسطة أم حبلص يعطيكي العافية بس عندي سؤال ، يوم المهنة اللي كتبتي عنه .. عادي اروح ولا لازم اكون متخرجة ! وايش حستفيد من خبرتك بهذا اليوم ؟ اخر شي ... ايش الشروط عشان اروح ؟ وشكرا يا حلوة

يوم المهنه اللي بجامعه عفت مفتوح للجميع، مو لازم تكوني متخرجه او على وشك التخرج.

بالصراحه انا ولامره روحت يوم المهنه اللي في دار الحكمه ولا اللي في عفت. اتمنى اروح لهم يوم من الايام.

معظم يوم المهن اللي روحت لهم انا في امريكا. كل شركه لها شروط عن قبول الموظفين او الموظفات من التخصص والمهارات ومعدل. اديكي مثال في يوم المهنه في جامعتي كان في شركه IBM وقتها انا كنت في المستوى التاني المهم كلمت مع مقدمه من الشركه قلت لها انا طالبه في الهندسه كيميائيه وسالت لها ايش من البرامج الكمبيوتريه والمواد التقنيه اللي حابين من موظفي مستقبل لشركتكم؟ ردت عليا قالت الشركه حابين من موظفي مستقبل انو يكون عندهم فكره عن البوليمرات وبرنامج , MATHCAD ASPEN. بعدها سالت ازا عندهم وظايف او تدريبات صيفيه للطلاب والطالبات لغير المتخرجين والمتخرجات قالت ايوا عندهم. وانا الان الحمدلله في مستوى الرابع والجامعه عملوا يوم المهنه كده قبل شهرين وشركه IBM الحمدلله موجوده ونفس مقدمه الشركه موجوده متزكرتني وانبسطت وسلمت عليها وقلت لها عملت مشروع اكاديمي "AIChE Chem-E-Car" واخدت دورات برنامج , MATHCAD ASPEN للاسف مالحقت ادرس البوليمرات قالت مو مشكله واديتها سيرتي الذاتيه. ان شاء الله يجيني رد منهم. وازا ماانقبلت في التوظيف صيفي معاهم عندي السنه الجايه.

صدقيني ماراح تخسري شيء ، لانو دي خطوات تساعدتك في تكوين روابط جيده مع كده شركه ويدوكي فكره ايش المهارات والبرنامج وتخصصات ومواد مهتمين فيها، يسير وقتها تقدري تنمي مهاراتك

سامحيني على الاطاله

الله يوفقك