دفعة بنات التمريض الجديدة 2012 ^____^ مبارك عليكم ونورتونا

[ضحكة بريئه]

المشاركة الأصلية كتبت بواسطة دره جده smart idea .. الله ينور دربك وكلامك ع العين والراس وايش الي اسفه ع اطاله .. يختي طووولي مو هو دا الي انا ابغاه قرقر كتيير ومفيد =).........بس بسألك سؤال .. اش حيكون وظيفتهم الممرضات ؟؟ <صح يغيرو الشراشف حق المرضى ؟؟ .. لاتضحكو بس والله هدا الي نسمعو .. وان شاءالله بستخير وبرضو ياليت الممرضات الباقييين يعطوني رأيهم ع تحويلي !!

أول شيء لازم تعمليه ياعسل عشان يوصلك المعنى الحقيقي والتعريفي والصح للتمريض
تبطلي تسمعي من أي أحد لأنوا حيودوكي في دهيه .. أسمعي من الناس الي بتدرس بتشتغل في مجال التمريض والأفضل كمانه من المواقع والكتب سواء أجنبيه أو عربية ...

أما حتدرسي 5 سنين وبالنهاية كل الوظيفة تغيري سرر
لا شوفي حتكلم معاكي بكل صراحة
أنتي هنا من الجامعة متخرجة بكالوريس تمريض ..وفيه دبلوم أو مساعد/فني تمريض الي يكون تحت اشرافك ومساعد لك في مهام هوا يعملها منها تغير السرر ودا مو كل شيء في التمريض في اشغال تانيه بس نظرا لأنوا فيه نقص شدييييييد في التمريض فسار الكل بيعمل دا الشيء واشياء تانيه ماتحضرني دحين

بس هذا مو كل الشغل التمريضي حتتعلمي وحتعرفي أنوا أي خطوة حتعمليها حتى الكيفيه تغير السرير للمرضى لها حكاية ومعتمدة على أشياء علميه وكيف ممكن ترتيب السرير غلط يأذي المريض والمريض الي يكون فاقد الوعي لازم كل بعد فترة يتقلب بطريقة معينه
حتدرسيها بالتفصييييييل الممل في مادة أساسيات التمريض

أنتي لمن حتدرسي حتعرفي أنو كل شيء بتعمليه معتمد على نظريات وأشياء علميه بحته
على الرغم من سهولة الشكل العام ..إلا أنه مو سهل ابدا...

فيه من المهام الأخرى أنك تعطي الأدويه ..ودا شيء بسيط بالشكل الخارجي لكنه خطير
فلنفرض أنوا أعطيتي جرعة غلط بعيد الشر أو أنك ماعندك خبره بالأدوية ...أوالدكتور وصف دواء غلط للمريض يمديكي تناقشية والخطة العلاجية كمانه للأدوية
نظرا لأنك درستي بكالوريس تمريض مادة فارما
وتعرفي الادوية وايش الي مفروض تستعمل وايش الأدوية الي ماتنعطى سواء أو خطر على المريض ....الخ

بجد فيه اشياء كتيره ممكن الناس تقول دا بسيط
بس ابدا مهو بسيط ..أنتي حتتعلمي كمانه الأماكن الصحيحة للإبر أنتي تعرفي لو ماكنتي
دارسة او متعلمة الخطورة الي ممكن تحصل لو ضربتي عصب ممكن تسببي شلل للمريض بعيد الشر ..فيه اشياء كتييره بتتعمل

عشان إعطاء الدواء دا ابدا مو بالشيء الساهل حساب الجرعات والأشياء دي للدرجة لازم يكون معاكي أحد من الممرضين أثناء إعداد الدواء عشان تتأكدو مع بعض

وفيه عملية تثقيف المرضى دي من المهام كيف يعتني بنفسو كيف يأخذ الدواء وليش؟؟ ..الخ
كلها أحنا بنعملها وفيه قسم للبعد التخرج الناس الي حابة تكون مثقفة اجتماعيه دي تكون حاملة للبكالوريس تمريض تعمل زي الفلونق للمرضى السكري والضغط ...الخ في المستشفيات والمراكز الصحية

وفيه أخذ الفايتل ساين الي هي العلامات الحيوية
الضغط ودرجة الحرارة والنبض والتنفس دي الأشياء لو أقولك قد ايش تكشف
بلاوي ومصايب ..الناس ممكن تشوفها تقول بس تأخذ ضغط ومدري ايش مره سهل
لكن ماشاف السهوله وعدم الأهمية بشيء

لكن بسب ملاحظتك أنتي وأخذك للفايتل ساين حيخليكي تكتشفي لو المريض عندو اشياء
زي ارتفاع درجة الحرارة لها اسباب كتيره واخطار حتنبهي الدكتور يصرف دواء وغير كدا حتعملي إجراءات تمريضيه وتثقيفيه للمريض عشان تنزل درجة حراراته
وأشياء كتيرره ماتعرفي قد ايش ممكن تكشف لك أنوا المريض ممكن عندو تعقيدات خاصة لو كان دوبه خارج من العمليات ...الخ


أنتي حتكوني أقرب شخص من الي يشتغلو بالصحة للمريض فتعرفي من ايش يعاني وايش عندو وأوقات المريض حيلاقي راحة أكتر أنوا يقولك عن اشياء بيعانيها أو بتضايقهم نظرا للتواجدك معاه وتعاملك معاه اكتر من الناس التاينه في المجال الطبي غير كدا حيستشيريك المريض في اشياء مثلا الدكتور قله لازم نعملك عمليه معينه او شيء تاني ..وهو سألك هنا من واجبك كممرضة تبيني له
عن الخيارين بكل شفافيه وبكل صدق ووضوح وتتركي الخيار له طبعا من دون ماتتدخلي
حتدرسي بالتفصيل الممل اش شغلك كممرضة

احلى شيء بالتمريض التنوع يعني حتكوني مثقفه حتكوني زي المحاميه للمريض أنك تحامي لو شفتي اي شيء غلط او خدمة طبيه بتتوجه له بشكل سيء حتراقبي الدايت والأكل حقة
أنتي الي حتخبري مثال مجال التغذيه أنو واللهي المريض حقي يعاني من السكري الدايت حقتو تكون للمرضى السكر
أشياء جدا كثيييييرة على الرغم أنو باين كلامي كتير
الي قلتلك هوا مجرد أساسيات ودي الأشياء ابسط شيء ممكن يعملو الممرض


واصلا سنة ثانيه حتتعلمي أشياء جدا كثيرة وحتتشكل الصورة عندك بشكل أوضح وأفضل
أنا ممكن بتكلم أكثر تحديد على الاشياء الي موجودة وحتدرسيها سنة ثانيه في مادة أساسيات التمريض الي حيتبني عليها اشياء كثيرة..

شوفي فيه أشياء كتيييييييييييره وكتييييييره لا تستعجلو حتتعلموها بس بقولك شغله ثقي تماما أنوا كل شيء حتتعلميه أساسه علمي ...

والله يوفقكم ويختارلكم ويكتبلكم الي في الخير

بس بجد ترى لمن تتعاملي مع المريض وتساعديه ويقولك الله يسعدك يابنتي
ماتصدقي كيف حيكون شعورك .. أصلا أنتي حتعطي بدون ماتحسي التمريض بيتعامل مع جميع المرضى بمساواة وبحق الجميع أنهم يتعالجو ...حتلاحظي التمريض يعطيكي أكتر وأكتر منك أنك تاخذيه منه ... سواء في تعاملك مع الناس ولا حتى في البيت حتستفيدي وأهلك حيستفيدو منك من جد أقولكم هههههه

الناس الي تشوف خدمة الناس وخدمة المرضى تذلل او اهانه دا خلل عندها بالعكس ..حلو انك تكوني بتشتغلي في خدمة انسانيه وغير أنها كوظيفة تعتبر لو أخلصتي النيه لوجه الله ماتدري قد ايش الأجر الي ممكن يجيكي بسبب مهنتك دي ...

وأقرئو عن فضل العناية بالمريض اذا مجرد زيارته لكي الأجر فكيف العنايه بيه ...


والله يوفقكم ياااارب ويسهل امركم