ما رايك في كلية الصيدلة

[شقاوة طفلة]

السلام عليكم ورحمة الله وبركاته
كيفكم اخباركم ان شاء الله تمام ؟؟


انا طالبة حتخرج دي السنة ان شاء الله
و حابة احط في بالي تخصص محدد يعني عشان يكون دافع ليا اني اجتهد



ايش رايكم في التخصص ؟؟
و كيف الدراسة فيه (ما حسالكم من حيث الصعوبة لان كل صعب بالاجتهاد يصير سهل )
يعني ايش تدرسو و ايش طبيعة المواد ؟؟
و ايش حتكون الوظيفة بعد التخرج ؟؟
و هل التخصص مطلوب ومرغوب فيه ولالا ؟؟
و بالله كيف القسم يستاهل الواحد يدخلوا ولالا ؟؟

يعني حرام الواحد يدرس ويكرف و ما يدخل قسم عليه القيمة

اسفة طولت عليكم بس دا مصير لازم الواحد يفكر في تمام

[الغامدي 320]

بصــراحة مشكلة الناس بشكل عام
ماخذين فكــرة سيئة عن كلية الصــيدلة والمعتقد من الغالبية
أنها هي الصيدله التي نسمع عنها في الاخبار ( بدون وظايف )
اللـي هي صيدلة الدبلومــات ،، لكن الدبلومات ولى زمنها ولم تعد تسوى أي شيء وفي اي مجال
لكن من رأيي ان الصيــدلة في مرحلة البكالوريس ومايتجاوزها من أفضل وأهم الأقســام الطبية
ولازالت الحاجة ماسة لهذا النوع وأقسامها عديدة...مثل الصيدلة الاكلينيكية التي ابتدأت في العالم قبل أقل من 30 عـام..
حتى أن الجامعات السعودية بها قلة من المعدين في هذهـ الكلية.


وجامعة الملك عبدالعزيز لم يتخرج منها إلا دفعة واحدة من الــ pharm.dوهي دفعة العام الحالي...


الخلاصة أن المستقبل كبير لدكتور الصيدله بإذن الله
وأن الواجب علينا أن نبدأ بتغيير نظرة الناس حول الصيدله التي نعرفها والني يعرفونها !!!


اعتذر عن الاطالة بس جاني حمآآس :)

واتمنى لك التوفيق،،

[أهـ منك يازمن]

وعليكم السلام ورحمة الله وبركاتة

يلا مبروك التخرج والله يعينك علا التحضيري



ايش رايكم في التخصص ؟؟


تخصص الصيدلة جدا ممتع ويخليكي تطبقي عملي كل يوم هدا لو تحبي التطبيق

و كيف الدراسة فيه (ما حسالكم من حيث الصعوبة لان كل صعب بالاجتهاد يصير سهل )

بكل أمانة انا لسع توي خلصت التحضيري فما عرفت طريقة الدراسة لسع بس أحب انبهك انه تخصص صحي يعني راح يكون الكتاب فى يدك أغلب الوقت فلازم يكون فية تنظيم للوقت الصيدلة بنفس تقل الطب فى الدراسة فلا تتسهليها بس لمن تكون دفعتك متعاونة وحبوبة راح يمشي الوقت بدون طفش وهادا الشي حسيتة من ردود الدفع ألا قبلنا الله يوفقهم حمسونا علا القسم



يعني ايش تدرسو و ايش طبيعة المواد ؟؟



فية موضوع مثبت فى القسم عن مواد سنة أولي صيدلة شوفية ألا مسوية ماقصر


و ايش حتكون الوظيفة بعد التخرج ؟؟



ههههه لأ تحطي الوظيفة هدف دحين ولا راتب ولا كلام من هادا الخرابيط فى بالك علا العموم بما أنك سالتي فية وظايف كتيرة للصيدلي منها تصنيع الأدوية فى المصانع والمستشفيات
فية صيدلي مستشفيات يكون مع الفريق الطبي فى المستشفي وهوا ألا يوصف الأدوية للمريض فيه اشياء كتيرة كمان أقري عنها فى المواقع بس خلي الوظيفة بعدين لسع 6 سنين قدامك



و هل التخصص مطلوب ومرغوب فيه ولالا ؟؟



لصيدلة تخصص قديم ولكن مابدينا نهتم فية ألا فى وقت قريب وطبعا التخصص يعتبر جديد عندنا وهو تخصص طبي فهوا مرغوب



و بالله كيف القسم يستاهل الواحد يدخلوا ولالا ؟؟



يعني حرام الواحد يدرس ويكرف و ما يدخل قسم عليه القيمة

هههههه عجبتني ومايدخل قسم علية قيمة حبيتي شئ واحد يكون فى بالك سواء جيتي صيدلة ولا لا التخصصات كلها لها قيمتها لو كل الناس صاروا مهندسين ودكاترة ومافي صيادلة = مافي دواء يعني الله يعين المريض وهادا الشئ يسري فى كل التخصصات فكل شي له قيمتة حتا عامل البلدية فى الشارع لو ماكان موجود أقول لك الله يرحم الشوارع من الزبالة

نصيحة أخيرة <<<زودتها صح

أقري عن كل التخصصات وشوفي ألا يناسبك والصيدلة حلوة ولا ما كان شفتي ناس دخلوها فكري مظبوط وخلي كل خياراتك مفتوحة والله يوفقك أن شاء الله



اسفة طولت عليكم بس دا مصير لازم الواحد يفكر في تمام



ماعليكي أسئلي أحسن من ما تتدخلي شي ما يناسبك

[ُزمرد]

المشاركة الأصلية كتبت بواسطة شقاوة طفلة السلام عليكم ورحمة الله وبركاته كيفكم اخباركم ان شاء الله تمام ؟؟ انا طالبة حتخرج دي السنة ان شاء الله و حابة احط في بالي تخصص محدد يعني عشان يكون دافع ليا اني اجتهد ايش رايكم في التخصص ؟؟ و كيف الدراسة فيه (ما حسالكم من حيث الصعوبة لان كل صعب بالاجتهاد يصير سهل ) يعني ايش تدرسو و ايش طبيعة المواد ؟؟ و ايش حتكون الوظيفة بعد التخرج ؟؟ و هل التخصص مطلوب ومرغوب فيه ولالا ؟؟ و بالله كيف القسم يستاهل الواحد يدخلوا ولالا ؟؟ يعني حرام الواحد يدرس ويكرف و ما يدخل قسم عليه القيمة اسفة طولت عليكم بس دا مصير لازم الواحد يفكر في تمام

اهلين وعليكم السلام والرحمه
الحمدلله تمام انت كيفك ياعسل

رآيي في التخصص ما ادري ايش اقول وايش اخلي بصراحه سؤال صعب ح اكتفي اني اقلك انه تخصص "واو" !

من ناحيه مطلوب في التوظيف ف الحمدلله مرررره ماشي وكتييييير قطاعات محتاجين صيادله واحلى شي فيه التنوع الوظيفي يعني يمديكي تتوظفي في اماكن كتير مو بس مستشفيات < دا كان من الاسباب الرئيسيه اللي خلاني احب الصيدله لاني مااحب جو المستشفيات


القسم يستاهل ولا لا - اكاد اجزم لك ان دا التخصص بالذات المفروض ما يدخله اي احد عملنا مره دقيق يتطلب مهاره يتطلب تفكير وذكاء تحسي نفسك عبقريه لما تفكري تفكري وتوصلي للحل
القسم الحمدلله جداً جميل وماعرفت اجاوب تماماً علر سؤالك دا انه "قيم" ولا لا ح اخليكي انتي تجاوبي على نفسك اقري شويه عن التخصص وحتعرفي الجواب .. وشوفي وعلى فكره زمان كانوا يسموا الصيدلاني "حكيم" > لحكمته وبراعته


احلى شي في التخصص لما دخلته اني كل شي ادرسه اشوفه قدامي في اللابات ودا الشي ماتحصليه في اي تخصص اغلب التخصصات تدرسي تدرسي بعديييين تطبقي او تتدربي . اما احنا لا دايركت عندنا معامل نشتغل فيها ونخبص الدنيا لذلك من بين كل الكليات الصحيه تلاقي في الجدول الدراسي ان الصيدله لها اكثر عدد ساعات من بين كل التخصصات ، عندنا معامل ،وتطبيق كثيييير

احلى شي لما سوينا الادويه كنت حموت


الله يوفقك ياعسل لالاعادي لا طولتي ولا شيء اسألي زي ماتحبي ياقمرر 3>

[بسمة تشرين]

المشاركة الأصلية كتبت بواسطة الغامدي 320 وجامعة الملك عبدالعزيز لم يتخرج منها إلا دفعة واحدة من الــ pharm.dوهي دفعة العام الحالي... ،

بس حابه اصحح السنة الي فاتت كانت الدفعة السادسة نحن اول جامعة تطلع فارم دي

[بسمة تشرين]

المشاركة الأصلية كتبت بواسطة شقاوة طفلة السلام عليكم ورحمة الله وبركاته كيفكم اخباركم ان شاء الله تمام ؟؟ انا طالبة حتخرج دي السنة ان شاء الله و حابة احط في بالي تخصص محدد يعني عشان يكون دافع ليا اني اجتهد ايش رايكم في التخصص ؟؟ و كيف الدراسة فيه (ما حسالكم من حيث الصعوبة لان كل صعب بالاجتهاد يصير سهل ) يعني ايش تدرسو و ايش طبيعة المواد ؟؟ و ايش حتكون الوظيفة بعد التخرج ؟؟ و هل التخصص مطلوب ومرغوب فيه ولالا ؟؟ و بالله كيف القسم يستاهل الواحد يدخلوا ولالا ؟؟ يعني حرام الواحد يدرس ويكرف و ما يدخل قسم عليه القيمة اسفة طولت عليكم بس دا مصير لازم الواحد يفكر في تمام

تخصص جميلة وممتع بصراحة في اول سنة وعلى الي سمعته على قدام عجبني ومقتنعة بيه 10000%
المواد تدرسي فيها الدواء اول سنة في التخصص تعتبر مشتركة مع اغلب التخصصات بعدين ندخل بقوة في الدواء والاعشاب والسموم يعني عالم جميل
في وظائف متعددة وهذا الي يمزينا انه مو بس في المستشفى .. صيدلي مجتمع صيدلي في مستشفى صيدلي في مصنع ادوية صيدلي في هيئة الغذاء والدواء بس دي للاولاد وكمان اكاديميا ممكن
لو نجي نكلم تخصص مطلوب بصراحة يعتبر جيد البطالة فيه دام انه مو دوبلوم قليلة جدا
امم والله اخر سؤال مااقدر اجاوبك مافي تخصص مايستاهل لكن في شخص يتعب على نفسه وشخص مايبغى يتعب وينتج وممكن مايكون في هذا التخصص
وشكرا

[شقاوة طفلة]

جزاكم الله خيييرر

احس اني احترت كل قسم يقولو قسمنا ممتع و حلو

بس لازم اتعمق اكتر في الاقسام عشان اشوف اللي يناسبني

و ع فكرة ترى انا لسى ما تخرجت دي اخر سنة ليا ان شاء الله

الله يوفقنا و يوفقكم كولكم