بلييييز ساعدوني الله يوفقكم بخصوص الايلتس ورفع المعدل

[سام2022]

السلام عليكم اتمنى احد يرد له خبره والله اتلخبطت من كثر اللي سالتهم يقولوا لي كلام غير عن الاخر

انا طالب سنة تحضيريه الان خطة أ وناوي ان شاء الله ادخل هندسة مدنية

السؤال هنا هو انه معاي شهاده الايلتس ايش رايكم اقدمها لهم ويعفوني او ادرس الانجلش
سالت بعض الناس قالوا قدمها بيرفع معدلك كثيير بس لمن رحت معهد اللغة قالي الموظف بتنحذف الماده فقط مانحط لك درجات يعني ماتدخل في المعدل ومافي لها درجات ,,,, ياريت تكفووون تنصحوني ادرس او لا مع اني ابغى احط كل تركيزي على ع الفيزياء والرياضيات عشان اجيب معدل فيهم كويس

هل لو عطيتهم وحذفت اللغة حينرفع موزوني الخاصة او العامه او لا

يارررييييت تجيبوا لي الخبر الاكيد اللله يسعدكم والله محتار متلخبط

[moturson]

هلا ياخوي انا حدفت الانجليزي بالنسبة لسوالك ما تغير حاجة بس انك ما تاخذ انجلش بس صراحة فيها ايجيابيات وسلبيات انت فكر واستخير وسوي الي يريحك

[Eng.Fahood]

انا نصيتحي لا تحذفها وانت ابخص

كثير من الشباب خبصوا في الماث والفيزيا لكنهم ابدعوا في الانجليزي ودخلوا كلية الهندسة لأنها رفعت الموزون الخاص

[zelme]

نصيحتي انك ما تحذفها لانها سهلة بجميع مستوياتها
خاصة وما شاء الله انك ممتاز في الانجليزي فما حتاخذ جهد في فهمها ودراستها

ثم مثل ما قال الاخوان يمكن تخبص في بقية المواد العلمية او تقول اني حاشد حيلي فيها ولكن تتفاجأ باسئلة صعبة فينزل معدلك وانت ما عندك مواد ثانية تقدر توزنلك المعدل وما تخليه ينزل بقوة منها: الانجليزي2 و3 ومهارات الاتصال والحاسب

فرايي انك تخليها واستفيد من هذه الشهادة في المستقبل ان شاء الله ،، في الوظيفة والسيرة الذاتية ووو...

بالتوفيق

[AbsolutioN]

بما انك متقن للغة فخليها افضل عشين تساعدك في رفع معدلك و غير كذا الانجليزي ما حياخد من وقتك و من وقت المواد الثانية

[AlSAbEi]

المشاركة الأصلية كتبت بواسطة سام2022 السلام عليكم اتمنى احد يرد له خبره والله اتلخبطت من كثر اللي سالتهم يقولوا لي كلام غير عن الاخر انا طالب سنة تحضيريه الان خطة أ وناوي ان شاء الله ادخل هندسة مدنية السؤال هنا هو انه معاي شهاده الايلتس ايش رايكم اقدمها لهم ويعفوني او ادرس الانجلش سالت بعض الناس قالوا قدمها بيرفع معدلك كثيير بس لمن رحت معهد اللغة قالي الموظف بتنحذف الماده فقط مانحط لك درجات يعني ماتدخل في المعدل ومافي لها درجات ,,,, ياريت تكفووون تنصحوني ادرس او لا مع اني ابغى احط كل تركيزي على ع الفيزياء والرياضيات عشان اجيب معدل فيهم كويس هل لو عطيتهم وحذفت اللغة حينرفع موزوني الخاصة او العامه او لا يارررييييت تجيبوا لي الخبر الاكيد اللله يسعدكم والله محتار متلخبط

وعليكم السلام ورحمة الله وبركاته

إذا كان مستواك كويس بالرياضيات والكيمياء والفيزياء في الثانوي، وواثق من نفسك وحاس إنك بتجيب درجة عالية فيها فتوكل على الله واحذف الانجليزي لأنه غثيث مررررة بالدوام بشكل ما تتصوره !
رح يكون دوامك مريح جداً ويمكن يكون عندك يومين أوف بعد! وبتملك وقت كبير لمذاكرة المواد الثانية..

وترى المواد كلها إعادة للي درسته بالثانوي مع زيادات بسيطة ولو تجتهد فيها تجيب درجة عالية بالراحة، ما يبغالها ذكاء ولا عبقرية.. =)

أما إذا ما كنت تكره أحد هالمواد أو متعقد منها ودرجتك بالثانوي كانت طايحة فيها، فأنصحك تخلي الانجليزي وتحمله دوامه الله يعينك..

وعلى فكرة، ما رح تستفيد من الانجليزي إلا في حالة وحدة، وهي انك تجيب درجات طايحة في المواد الثانية - لاقدر الله -
أما لو درجاتك كانت عالية.. فوجود الانجليزي بيكون مثل عدمه..

أعطيتك الزبدة.. والقرار راجع لك =)

[Al-Thaqafi]

شوف أخوي , إنت الآن لو قدمت الآيلتس راح تحذف الانجليزي من عندك بالكامل وما تدرسها ,
إذا ما قدمتها فإنت عندك خيارين , إما تختبر تحديد المستوى وغالباً بتجيك درجة تؤهلك للفل 4 , أو إنك ما تختبر وتبدأ من لفل 1 ,
أنا أنصحك وبناء على تجربتي بتقديم الآيلتس والتخلص من الانجليزي من البداية .
الوقت الوقت الوقت ! تقريباً كل يوم أربع ساعات وهذا غير الاختبارات والواجبات , وانت عندك مواد ثانية تعتبر أهم من الانجليزي , أتمنى أخوي انك تتصور الوضع قبل ما تتسرع , انك تداوم من الساعة 8 الى الساعة 4 ثلاثة أيام في الاسبوع , وتدوام من 8 إلى 12 تقريباً يومين في الاسبوع ,
صحيح إنه الانجليزي بيرفع معدلك , لكن انت كذا بتحط نفسك في ضغط انت في غنى عنه !!
ما راح تستفيد ذيك الفايدة الكبيرة إذا درجاتك في المواد الثانية نازلة , والمواد الثانية أهم , بحذفك للانجليزي انت تسهل على نفسك كثير في مذاكرة المواد الثانية بأريحية تامة ,
بالإضافة إنه أشوفه نوع من الملل ومن غير المقنع إنك تداوم وتدرس لشيء إنت عارفه !!
إذا انت تبي معدل ركّز في المواد الثانية , وإن شاء الله ما راح تحتاج إلى درجات الانجليزي .
إذا انت تبي تختبر مستوى وغالباً بتجيب لفل 4 ان شاء الله , فهذا صح شيء كويس وممكن تسويه
لكن انك تعيد من لفل 1 , أبعد عنه بعد نهائي ! خصوصا انك انت بتضيع دوام شهرين بدون أي فايدة لأنه لفل 1 ما يدخل في المعدل .

وفي النهاية أنصحك باستشارة وسؤال طلاب السنة التحضرية في قسم السنة التحضيرية قسم المسار العلمي ,
هم حالياً عايشين الوضع وراح يفيدوك أكثر .

بالتوفيق.

[zelme]

معليش يا اخوان

لكن بالنسبة لدوام السنة التحضيرية انا من الناس اللي يأيده
خاصة اذا انت تبغى هندسة او طب

لانك اذا ما اتعودت على الدوامات الطويلة وقعدت مرتاح ما تداوم الا 4 الى 5 ساعات في اليوم فقط،، فصدقوني حتتعبو خاصة لمن تدخلو الهندسة وحتنصدم بدوام جامد الين الساعة 6 احيانا توصل وبعدها يكون عندك اجتماع مع الشباب لمشروع او لبحث تسوونه (وهذا الدوام الطويل ليس في اخر السنوات، بل حتواجه من اول سنة عندما تاخذ الرسم الهندسي والتصميم الهندسي)

فانا اعتبر الدوام الطويل والسنة التحضيرية بشكل عام بكل اللي فيها زي اللي صفعني في وجهي وصحاني من الدلع والنوم اللي كنت عايشه 12 سنة من عمري صراحة

فرايي يا صاحب الموضوع انك ما تحط وقت الدوام سبب لاختيار القرار

ولا تنسى اهم شئ وهي الاستخارة،، مرة مرتين... الف

[Al-Thaqafi]

^

فرق يا اخي الكريم بين ساعات دوام فعلاً تكون نشطة وتاخذ فيها مواد ونشاطات مختلفة في الهندسة
وبين ساعات تكون مملة على الأغلب وفيها مثل ما تقول لطعة على غير فايدة كبيرة في التحضيري .

في النهاية وجهة نظرك جيدة بخصوص التعود على الدوامات الطويلة , لكن مو معقولة إنها تكون لدرجة دوام لين العصر بشكل يومي طوال السنة !! وبنفس الرتم غالباً .