تجمع للمتقدمين والمتقدمات على ماجستير إدارة الأعمال عام 1438/1437

[najmah]

المشاركة الأصلية كتبت بواسطة mram1436 أهلا نجمه.. بما إن لك خبرة سابقة عندي كم سؤال: 1/لو سويت الجدول إلكتروني يمديني أغيره بعدين لارحت هناك ولا خلاص الي سوت جدولها ما حينظرولها فيه؟ ولا تفضلي أحذف الجدول بالمرة ولا رحت هناك هما يسووه ليا زي ما أبغى؟؟ 2/أخذت أساسيات التمويل عند هازلينا و مبادئ المحاسبة عند لاريسافون ومبادئ الإدارة عند نادية.. هل عندك خلفية عن الدكاترة ذولي أو إذا في دكاترة أفضل منهم آخذ عندهم ذي المواد؟ 3/ الإنقلش أعتبر مبتدئة هل تفضلي آخذ عند ناس يدرسوا بالإنقلش ولا بالعربي؟ < لاريسافون أخذت عندها عشان تدريسها بالإنقلش قلت آخذ خلفية قبل أدخل في الماستر لأن الي سمعته إنو حيكون بالانقليزي نو عربي> بما إنك مجربة هل تشوفي وجهة نظري ذي حتفيدني ولا حتضرني وتديني نتيجة عكسية؟؟ 4/ البلاك بورد والتست بانك ممكن تديني شرح مبسط عنهم؟ وكيف الدراسة حتكون كتب ولا ملازم ولا عروض ولا سلايدات يرسلوها عالإيميلات؟ ويعطيك العافية يارب

هلا حبيبتي
بجاوب على أسألتك وإن شاء الله أفيدك :)
1/ إذا إنتي عندك مواد تكميلي ماراح يفتح معك الحذف والإضافة وكل موادك بتضيفيها بمبنى 66 الدور الثاني عمادة الدراسات العليا قسم الشؤون الأكاديمية لكن بطاقتك تآخذينها من وحدة القبول . ولو انتي مو تكميلي أو قدرتي تضيفي مواد وضبطتي جدولك بأي وقت تقدري تحذفيها خلال المدة المسموحة وأظن لغاية اسبوعين من بداية الدراسة .
2/ المواد اللي أخذتيها مع هالدكتورات صراحة ما أعرفهم وماسمعت فيهم وإن شاءالله غيري يفيدوكي شوفي التمويل إذا نزل مع د. خديجة حريري أنصحك وبقوة تآخذي معاها لأني كنت آخذتها معاها ومرره تفهم .
3/ بالنسبة للغة الانجليزية أنا كنت مثلك مبتدئة وناسية أغلب الكلمات الحمدلله كل اللي أخذت معاهم يشرحوا عربي انجليزي انبسطت لأنه بالعربي بفهم وبالانجليزي بتعود على مصطلحات وأحاول أحفظها ومع المواد الباقية راح تتكرر معك كلمات كثيرة وتبدأي تحفظيها .. وطبعا الترم الأول كنت اترجم أغلب السلايدات أو بالاصح أستخدم تصوير الشاشة اللي بترجمة قوقل فادني كثير والكلمات الرئيسية أحفظها عشان أعرفها والماستر قالوا لي البنات انه عربي انجليزي وفي دكتورات بيعملو أسأله مقالي وممكن تحلي بالعربي برضوا الحمدلله كنت شايلة هم ... على العموم لازم نطور نفسنا خلال هالاشهر وفي موقع جدااً رائع لتعليم اللغة كأنك بمعهد وبيفيدك أنا بدأت فيه وكلمة ممتاز قليله هذا هو للفائدة http://www.usalearns.org/ سجلي وأدخلي كل يوم ولو ساعة وماراح تندمي ما تبدئين الجامعة الا وانتي بمستوى كويس يعلمك كل شيء من البداية ومجاني وممكن تاخذي مع دكتورة لمادة وحده انجليزي ولو حسيتي نفسك تمام كملي معاها واذا لقيتي صعوبة ممكن تغيري الشعبة من ثاني كلاس عادي .

انا لاني كنت مو مره بالانجلش فأخذت مع دكتورات يشرحوا عربي بالذات أول ترم وثاني ترم عربي انجليزي وكمان قراءة السلايدات أاصلا بتكون انجلش.

4/ البلاك بورد برنامج للطلاب والطالبات تدخلي فيه من الاودس بلس وممكن تحمليه من المتجر وحملي كمان برنامج الجامعة MYKAU مهم جدا بتجيك عليه رسائل الدكتورات وفيه أشياء مهمه مثل صورة بطاقتك وجدولك
البلاك بورد لما تحمليه بجوالك وتدخلين عليه بتجيك تنبيهات من الدكتورة إذا نزلت واجبات أو كويزات وممكن ترسلكم عليه السلايدات واسم الكتاب والخطة الدراسية ..
من خلاله تحلون الواجبات مثلا تحلي الواجب بملف وورد وتفتحي صفحة تسليم الواجب وترفقيه وبعدين تحطي ارسال والكويزات هي إختبارات قصيرة ممكن تكون بالكلاس وممكن تكون عن طريق البلاك بورد وانتي ببيتك تختبري
بيكون فيه وقت محدد للإختبار حسب الدكتورة مثلا 10 أسئلة بنص ساعة أو ربع ساعة أو ساعة فلا تخافون عادي بتكوني مذاكرة ونفس الوقت مسموح تفتحي الكتاب بس اللي مابتكون مذاكرة بيضيع وقتها وهي تتصفح الكتاب أو السلايدات.
بالنسبة للتست بانك أغلب المواد بيكون لها تست بانك (بنك الأسئلة) هذا عبارة عن أسئلة محلولة إختياري وصح وخطأ ومقاالي بيفيدك كثير تعرفين طريقة أسئلة الإختبار وبعض المواد بيجي منه بالاختبار حسب الدكتورات برضوا
لما تكوني بالكلاس ويكون معاكم قروب اسألي البنات أو ابحثي بالمنتدى بتلاقي ان شاءالله أنا أستفدت منه اني عرفت طريقة الاسئلة وفادني كثير هو طوووويل جدا ممكن 100 - 130 سؤال وكلها من الكتاب كنت أترجم السؤال وأترجم الاجابة فقط عشان أحفظها وما اتلخبط بباقي الفقرات :)
اذا لقيتي مواد مالها تست بانك ركزي ع المحاضرات والسلايدات ... والكتاب حسب الدكتورة بعضهم بيقولو لازم ترجعي للكتاب وبعضهم بيعطوا اسم الكتاب اللي تبغا تتطلع عليه حسب البنت وشطارتها ولغتها.

وحاولي كمان تسألي بنات أخذوا الماادة قبلك وتسألي كماان الدكتورة قبل الامتحان عن التست مهم ولا لا لأنه أحيان هي اللي بتحط الأسئلة..

بالتوفييق حبيبتي وإن شاءا الله أكون افدتك .. وأي شيء ماتعرفيه إسألي كثير بنات متعاونين ... وبخدمتك في أي وقت

شدو حيلكم وبالتوفيق للجميع .......