نداء لكل طالبات وطلاب الطب

[m-science]

السلام عليكم ورحمه الله وبركاته

انا طالبه سنه تحضيريه خطه ب

حاليا بدأ التسكين في الكليات بالنسبه لنا

انا الحمد لله معدلي في الترم الاول مره حلو يعني زي ماهما طالبين

والترم الثاني الله يعين ويوفق واجيب شي كويس كمان

الموضوع ومافيه ان امنيتي من زمان اني ادخل طب

الحمد لله بالنسبه لأمي وابويه ما عندهم مانع

المشكله فيا انا اللحين

لمن صار وقت الأختيار ترددت

تذكرت ان الطب سبعه سنين وبعدها التخصص اقل شي اربعه سنين

يعني 11 سنه دراسه

انا ما أقول انه انا ما راح اتحمل لا ان شاء الله عندي القدره وربي يسهل

بس جلست افكر .. طيب وحياتي الأجتماعيه

انا بنت يعني بكره أم وزوجه يارب بس هل من جد في مجال للجمع بين الأثنين

انا فكرت في طب الأسنان مع انه مو ميولي بس تقبلته عشان بعد سبع سنين خلاص اكون عارفه

طريقي واسمي دكتوره ..

رجائي الوحيد ان لو في من طالبات او حتى طلاب الطب

من اللي يقدروا يجاوبوني كيف الدراسه معاكم .. هل من جد سرقتكم من أهلكم ..

هل تنصحوني احط الطب رغبه اولى

ولكم مني وعد بدعوه في ظهر الغيب

قولوا اي شي ممكن يساعد .. ينور .. يخليني احدد مصيري ,, اي فكره اي اقتراح

وتكونوا فرجتوا عني كربه والله

جزاكم الله خير مقدما

[masha3er]

السلام عليكم ورحمه الله وبركاته ..

هلا أختي .. كيفك يـارب طيبه ..

اولا عزيزتي .. ابغاكِ تحطي فبـالك ان اللي قاعد يصير معاكِ شي طبيعي جدا ..
انا كمان _ على الرغم من حبي ورغبتي في دا التخصص_ الا اني فكرت نفس تفكيرك .. وشلت هم وترددت ..
بس بعدين فكرت من نواحي ثانيه وسألت _ زي ما انتي حاليا بتسألي وتفكري _ والحمد لله ربك سهلها ..

لاتفكري انها 7 سنوات وبعدينا 4 _اقل شي_ عشان تتخصصي ..
ترى الموضوع مو بالصعوبه اللي انتي متصورتها ابدا .. الايام تمشي بلمح البصر ..
انتي مجرد انك تطلعي من سنه اولى وتدخل فـ تانيه .. تكون باقيه لك 4 سنوات دراسه + سنه امتياز والتخصص تدرسي وانتي بتشتغلي يعني ماراح تكون بنفس الروتين حق البكلريوس .. :)

انا ما اقولك مافي ضغط ولا اقولك الدراسه سهله وبرضوا ما اقولك ان حياتك الاجتماعيه بتكون زي دحين ..
بس برضوا لقب ( طبيبة) مايجي بالساهل ولا ؟
صدقيني على الرغم من الضغط والتعب وكل الاشياء دي .. راح تحسي بمتعه دامك حابه التخصص ..
وبالنسبه للحياة الاجتماعيه مو مشكله رح تتأقلمي وبعدين ماراح تشيلي هم الحياة الاجتماعيه لانك بتكوني مشغوله بدراستك وكدا ..

واخر شي اقولك هوا .. استخيري ثم استخيري ثم استخيري .. ما خاب من استخار ..
واذا عندك اي استفسار ثاني انا في الخدمه .. :)

والله يسهلك ويلهمك اللي فيه الخير ان شاء الله ..

يارب اكون افدتك ..

أختك..

[dr.CILIA]

وعليكم السلام ورحمة الله وبركاته
كيف الحال؟

ماشاءالله الاخت مشاعر كفت ووفت
وزي ماقالت لا تفكري في المدة وانها طويله ترى تمشي ان شاءالله طالما إنتِ حابة الشي اللي تبغيه والدراسه ماهي صعبة بس تحتاج منك شوية مجهود ويمكن تحسي شوية انك بعدتي عن اهلك بس الله يخلي الإجازات :-)

عالعموم زي ماقالت الأخت مشاعر
عليكِ بالإستخاره ثم الإستخارة
لأنه ربنا سبحانه مايكتب لأحد إلا اللي فيه الخير

الله يوفقكِ وييسر أمورك ويشرح صدرك
وإحنا في الخدمه

والسلام عليكم ورحمة الله...

[m-science]

جزاكم الله خير على الرد اولا

وعلى التشجيع .. مرا شكرا من كل قلبي

والله دعيت لكم الله يوفقكم ويسعدكم وينور لكم

عموما أنا استخرت واستخرت واستخرت ألين أخيرا حطيت الرغبه الأولى طب اسنان والثانيه طب بشري

الله يوفقكم من جد اسعدتوني بردودكم

واذا عندي اي سؤال اكيد راح ارجع لكم .. احمد الله لقيت أخوات مثلكم ..