يعني لازم يكون طموحي كلية الطب ولا اصير انسان بلا هدف ؟

[stu2010]

صباح الخير
كيف حالكم ان شاء الله بخير

الاختلاف من السنن الكونيه التي سنها الخالق عز وجل في هذه الحياة
حيث أن الله سبحانه وتعالى خلقنا بألوان مختلفه وبنيات جسمية مختلفه وطباع مختلفه
وبطبقات مختلفه ومستويات مختلفه
حتى النباتات مختلفه ، والحيوانات -اجلكم الله- مختلفه
ونفس القاعده تُطبق على ميولاتنا وطموحاتنا
فهذا يهوى الطب وذاك يعشق الهندسه وذاك يميل للفن التشيكلي وآخر تستهويه مادتي التاريخ والجغرافيا
والكل يعلم أنه لو كان الجميع ذوو ميولات متشابهه وطموحات متطابقه على سبيل المثال لو كان جميع الناس مولعون بالطب لأصبح كل المجتمع أطباء
إذاً فمن سيزرع ؟ ومن سينير لنا الشوارع والطرق ؟
ومن سيحلق لنا شعورنا ( شطحه قويه ) ؟ ومن سيصمم المباني ؟ .... إلخ

اقول لكم بلاش اتكلم عربيه فصحى احس ان فكي بيطيح

ما ادري ليه الغالبيه في مجتمعنا ينظرون للتخصصات غير الطب والهندسه انها تخصصات فاشله
وان الطالب المتفوق لازم اما يكون طبيب او مهندس

مع العلم ان جميع التخصصات ما هي الا علوم حالها حال الطب والهندسه
مثلاً اللغه العربيه ما ادري ليه الغالبيه حاقرينها ويشوفون انها ولا شي مع العلم ان اللغه العربيه من أصعب اللغات ومو اي احد يقدر يتقنها
وكذلك نفس الحال مع التخصصات الدينيه ، تخصص الحديث بالذات يقلب الراس

يعني مثلاً انا الحين احب اتعامل مع المتوحدين والاطفال ذوي النشاط المفرط اعشق التعامل معهم .. اوكي ؟
امس وانا اسولف مع ولد عمي قلت له انا ودي ادخل اما تربيه خاصه او تمريض
قال لي وعععععع الله يحوم تسبدك هذي تخصصات اوادم ؟
قلت ليه هو فيه تخصصات اوادم وتخصصات جن ؟
قال لا بس التخصصات هذيك حقت الناس اللي موب مره وبعدين فيه احد عاقل يبي يصير ممرض يعني شغاله ؟
.
.
.

وباقي المحادثه مو لازم

( الناس اللي موب مره )
يعني صار الميول مقياس للذكاء

طيب مثلاً واحد ذكي بس يحب يتعامل مع الاجهزه والكومبيوترات يعني ميوله حاسب آلي وما يحب الطب
خلاص يصير غبي وما عنده مخ ؟

بضرب لكم مثال .. عيال عمي اثنين
واحد كلن يشهد له بالذكاء بس ان الولد مخه سيارات × سيارات
يجيب السياره القديمه ويهندس فيها ويطلعها جديده .. هوايته كذا
والثاني هوايته انه يشتري الجهاز بـ 3000 وبعدين يبيعه بـ 3500 وهكذا يعني يحب التجاره والتجاره فن
بس المشكله ان الكل يضحك عليهم ويسمونهم ( الشريطيه ) !

لا وتخصص إدارة الاعمال هذا عاد مرررره طايح من عيون الناس
مع العلم انه يعتبر من اصعب التخصصات
ببساطه .. كم عدد المدراء الناجحين ؟ او اعيد صياغة السؤال كم عدد الشركات الناجحه ؟

ولا ننسى ايضاً نظرة الازدراء لمهنة التدريس والتمريض وكذلك تصفيف الشعر والطبخ .... الخ

قمة النجاح انك تعرف انت وش تحب ووش المجال اللي راح تبدع فيه
ما يعتبر ناجح اللي يدخل طب عشان بس يتميلح واسمه يُسبق بلقب دكتور لانه مستحيل يبدع

الحب اهم شي
بدون حب .. ما نقدر نحقق اي انجازات

( طبعاً اقصد بالحب يعني الميول .. مو الحب الوسخ هذاك )


واخيـراً

متى نتطور ونعقل ونحترم كل التخصصات ؟
متى نقتنع ان الناس ميولات وهوايات ؟
متى نبطل حقران الناس على الفاضي والمليان ؟