اصحاب تخصص قانون احتاج نصايحكم :(

[قـوت]

السلام عليكم ورحمة الله وبركاته ..

أول مشاركة لي بالمنتدى ، أتمنى تقدمون لي نصايح بالتخصص

حلمي من الصغر أكون محامية وتبقى لي ترم تقريبا وأتخرج من تخصص رياض الاطفال
وابي اقدم على تخصص قانون بعد ما اتخرج بإذن الله واكمل ،
ولكن أقدر ادرس هذا القسم عن بعد ؟
وش الجامعات التي اقدر ادرس به عن بعد تخصص قانون ؟
بخاطري ادرسه ولكن ما يتوفر هالتخصص بالجامعات القريبة مني ..

- ابي الاشياء اتعلمه و تساعدني قبل ادخل التخصص ؟

[حبيبة دانش]

وعليكم السلام ورحمة الله وبركاته
أهلاً فيكِ،

بما إني من طالبات جامعة الملك عبدالعزيز يقتصر علمي عليها، ممكن تطّلعي على مواقع الجامعات القريبة من مدينتك و تقرأي عن التخصص و اذا متوفر تعليم عن بعد .

أولاً: تخصص القانون بنظام التعليم عن بعد متوفر في جامعة الملك عبدالعزيز - فرع رابغ، و يدرج التخصص ضمن كلية الأعمال برابغ، وليس ضمن كلية الحقوق المستقلة الموجودة في الفرع الرئيسي . لذلك راح تلاحظي فرق بين المواد اللي ندرسها في الفرع الرئيسي و اللي يدرسوها في رابغ، أهمها إن في رابغ يدرسوا المواد باللغة الإنجليزية بينما ندرسها بالعربية، و بما إنها ضمن كلية الأعمال فتوجد مواد من الإدارة تدرس ضمن التخصص عكسنا ندرس كل المواد قانونية بغض النظر عن المواد الاختيارية والحرة، ولكن عند التخرج يكتب في الوثيقة تخصص القانون – كلية الأعمال، ما عندي علم إذا يفرق عند التوظيف ولكن ما أتوقع.
• الخطة الدراسية كلية الحقوق – تخصص الأنظمة (القانون) – الفرع الرئيسي :
https://law.kau.edu.sa/content.aspx?...g=AR&cid=37895
• الخطة الدراسية كلية الأعمال – تخصص القانون – فرع رابغ :
https://fbr-law.kau.edu.sa/Pages-law-new-plan.aspx

اطّلعي على المواد عشان تشوفي الاختلاف .

ثانياً: نظام التعليم عن بعد أغلق من سنتين في الجامعة عندنا، ما أعرف اذا راح يفتحوا التسجيل فيه قريب أو لا ، ولكن نقول ان شاء الله.
• أشياء مهمة لازم تنتبهي لها مثل شروط القبول (اذا فتحوا التسجيل) ، إن الشهادة الثانوية لازم تكون في حدود سنين معينة مو أكثر (ممكن تشوفي الشروط في موقع الجامعة) .
• إنك تسجلي في المسار الإداري/الأدبي إذا راح تسجلي في الفرع الرئيسي، و مسار علمي (يتطلب شهادة ثانوية علمية) اذا بتسجلي في كلية الأعمال برابغ.
• اذا مسارك في الثانوية أدبي، ممكن تتبعي طريقة معينة إنك تسجلي عن بعد في المسار الإداري/الأدبي طبعاً، و تجتازي السنة التحضيرية بعدها تتخصصي في كلية الآداب والعلوم الإنسانية تخصص الدراسات الإسلامية – فرع الفيصلية ، تدرسي تيرم مع مراعاة إنك تاخدي مواد مشتركة بين القانون و الشريعة مثل الأحوال الشخصية – أصول الفقه، و تاخذي مواد اختيارية وحرة عشان ما يضيع التيرم، وتحافظي على معدلك بما يقارب الـ4.5 لأنه معدل القبول في الكلية أو معدل التحويل لها يكون غالباً في حدود هذا المعدل أو أقل بشيء بسيط. و في التيرم الثاني تحولي لكلية الحقوق – الفرع الرئيسي (السليمانية) . طبعاً هالحركة لأن تخصص القانون في التعليم عن بعد في كلية الأعمال – رابغ مسار علمي، ما راح تقدري تدخلي من البداية للمسار العلمي اذا كان مسارك في الثانوية أدبي . و كلية الحقوق – الفرع الرئيسي متوفرة فقط للانتظام. و قلت لك تخصص الدراسات الإسلامية لأن بينه وبين القانون مواد مشتركة و متوفر في التعليم عن بعد.

ثالثاً: الله يوفقك يارب و يكتب لكِ الخير وين ما كان، قرار دراسة البكالوريوس من جديد يبغى له تفكير جدي، خصوصاً اذا كنتِ تفكري في تخصص القانون لأنه تخصص يحتاج دراسة و فهم و اجتهاد، مو صعب ولكن عميق و مفصل، القانون يدرس نظام الدولة و القوانين من جميع مناحي الحياة لذلك اطّلعي على المواد أعلاه في الخطة الدراسية واقرأي عنها هنا في المنتدى أو أي مصدر آخر و شوفي لها ملخصات عشان تعرفي محتواها قبل ما تقرري الدراسة، وسواء درستِ في جامعة الملك عبدالعزيز أو أي جامعة ثانية المواد تتشابه بشكل عام ، ضروري تكون عندك خلفية جيدة .

أخيراً ،
ان شاء الله تكون اتكونت عندك الصورة بشكل واضح، و مثل ما قلت لك اذا ناوية تدرسي بعد تخرجك مباشرة حاولي تزوري مواقع الجامعات القريبة من مدينتك و تقرأي عن التعليم عن بعد وعن توافر تخصص القانون، لأن التعليم عن بعد مغلق مثل ما نوهت سابقاً .
بالتوفيق .. دمتِ بخير .