رحلتـــي باختصار!!

[dr.CILIA]

العفو يادكتوره مايلي احنا في الخدمه ^_*

[د/ روميو]

مشكورة يادكتورة سيليا ...انا كان تفكيري بعيـد ..هههههههههه

على قولت مايلي ...نسيت انه احنا في السعوديهـ ..

تحياتي ...

[د-فوفه]

د.فوفه الدكتوره القادمه #2 حياكِ الله الدم ماهو مشكله كبيره انت ادخلي الطب والباقي علينا شكلي حأعمل درس لكل اللي حيدخلو السنه الجايه كيف تقضي على شبح الدم؟!! الله يوفقك وينور دربك وتصيري دكتوره قد الدنيا

امين د-فوفه القادمه >>عجبتني ه الكلمه

الله يسعدك يارب ويسعد اختك العسوووولهـ
مهما كان فيه دم تشريح جثث خوف درجات طايره لسى متمسكين والامل موجود داااائمااا
إن شاء الله نشوفك اكبر دكتوره بالمملكه تتحدين الربيعه
هههههههههههه

[dr.CILIA]

الله يسلمك دكتوره فوفه
اهم شي الامل موجود وربنا فوق كل شي
الله يوفقكم ويفتح عليكم وان شاءالله كل واحد يدخل الكلية اللي يبغاها
مانبغى نتحدى الربيعه بي ان شاءالله نكون زييه..

[bint aboha]

السلام عليكم ورحمه الله وبركاته

د.سيليا بصراحه عندي أسأله كثيره ودي إنك تجاوبيها من بعد إذنك ومعليش بنخرب إجازتك بأسإلتنا

السؤال الأول : موقف محرج حصل معاكي ف تخصصك سواء ف المستشفى أو ف الكلاس ؟

السؤال الاثني : موقف محزن حصل معاكي ف المستشفى و غير مجرى حياتك ؟

السؤال الثالث : موقف مبكي حصل معاكي ف المستشفى بسبب إحدى المرضى ؟

السؤال الرابع : موقف مفرح حصل معاكي أيضا و من هنا بدأتي تتغيري للأحسن ؟

السؤال الخامس : هل الطب كان سببا ف تعرفكي ع صديقات جدد و هل عرفكي أيضا ع

الناس وصفاتهم ؟

السؤال السادس : هل تعرضتي للظلم سواء من الدكتور أو من المريض ؟

السؤال السابع : نصيحه تنصحيها للأخواتك وإخوانك المتقدمين للطب بإذن الله ؟

ومشكوره مقدما وعذرا ع الإطاله وإن شاء الله مايكون ضغط عليكي يارب فديتك وربي مستحيه

منك سلميلي ع أختك الحلوه فديت قلبها الطيب والله طالعتلك موفقه غلاي وعقبال الإمتياز يارب

تقبلي مروري

[dr.CILIA]

اهلا من جديد بنت ابوها
كيف امورك ان شاءالله تمام
اجازتي خربانه بالدوام من بداية الاسبوع الله يعين ويساعد
طبعا كثييييييييييييره المواقف اللي عدت علينا بس حأذكر بعضها
ان شاءالله بجاوب على كل اسئلتك بس احب ابدأ بسؤالك الثالث

السؤال الثالث : موقف مبكي حصل معاكي ف المستشفى بسبب إحدى المرضى ؟

طبعا مواقف كثير عدت عليا وخلتني ابكي وبعضها ابكاني بحرقه اصلا من بداية الاسبوع هذا وانا ابكي على حال مرضانا انا دحين في قسم الباطنه والمرضى اللي فيه غالبا امراضهم مزمنه وبلا مبالغه اغلب المرضى في الفريق اللي انا معاهم في غيبوبه واللي بكاني انه من قبل كم شهر وهم على دا الحال احنا اخذنا اجازه الاسبوع اللي فات وكنت جايه يوم السبت على اساس انهم اتحسنوا وصعقت ان كل شي زي ماهو او اسوأ من جد حالتهم جدا سيئه واغلبهم من رباط ومافي اهلهم معاهم يعني شي خلاني من جد اكتئب الله يشفي عن كل مريض.
انا بدأت بهذا السؤال عشان في موقف حصل معايا اليوم لسه طازج!!
المهم اليوم كنا في وحدة غسيل الكلى -الله يعافينا ويعافيهم- كان مطلوب مننا نتعلم كيف يوصلوا اجهزة الغسيل وشوية معلومات عليها الخلاصه دخلنا القسم وكان الوضع مأساوي كأننا داخلين مكان مافيه احد حي من كثر الصمت والملل اللي هم فيه
انتو اتخيلوا واحد موصلين بعرقه جهاز يسحب ويرجع دمه واقل شي يجلس 3 ساعات لمدة 3 مرات في الاسبوع!! الله يصبرهم ويكتب اجرهم
وكان في مريض دووبه جاي جديد فلازم يحطوا في واحد من الاورده زي الانبوب عشان يوصلوه بالجهاز وكان الدكتور يدخل الانبوب بدون بنج وكمان طريقة ادخال الانبوب مرره شنيعه والمريض ميييت من الالم
لاحول ولاقوة الابالله
ايش موقفك لمن رجال كبير من سن ابوي ولاجدي يصرخ من الالم لا وفي كل غسيل على ذا الحال؟!!
من جد كان الوضع مأساه ماقدرت امسك نفسي عن البكاء قدام المريض ......

[dr.CILIA]

شوفي انا حأجاوب بدون ترتيب
حسب ماافتكر :-)

هل الطب كان سببا ف تعرفكي ع صديقات جدد و هل عرفكي أيضا ع الناس وصفاتهم ؟

طبعا اكيييد اتعرفت على عدد كبير من الصديقات اللي كان لهم السبب بعد الله سبحانه في اني مستمره الى الآن لأنه اوقات يحس الواحد ان الدنيا قفلت معاه بالذات ايام الامتحانات فيحتاج اللي يوقف جنبه ويسانده صحيح انه الاهل مايقصروا بس مو زي الاصدقاء عشانهم معانا في نفس المجال نشد على بعض ونواسي بعض
بالنسبة للناس وصفاتهم:شي طبيعي لأن الواحد بتعامل مع عدد من المرضى وكل يو مرضى جدد بس في ناس مررره قد مانحاول مستحيل يزبط معانا واصعب الناس في التعامل المرضى الكبار في السن!!

[dr.CILIA]

موقف مفرح حصل معاكي أيضا و من هنا بدأتي تتغيري للأحسن ؟

من اكثر الاشياء اللي تفرحني لمن احد يرفع من معنوياتي سواء دكتور ولا مريض ولا حتى زميلاتي
على مستوى لدكاتره عندنا دكتوره لببه يذكرها بالخير انسانه ودكتوره واخت وكل شي انسانه فوق الروعه في التعامل رُقي لأبعد الحدود -د.سوزان عطار-
في السنة اللي فاتت طبعا كانت سنه كبيسه وكان مافي وقت حتى اني اتذكر المعلومات القديمه مو عاد اقرأ شي جديد بالذات في ماده زي الباطنه المهم اخذت حالة مرضيه اخذتها في زمن قياسي لانه ماكان في وقت يومها ووقع الاختيار علي اني اقدمها للدكتوره وهي اسلوبها اني اقوم على السبوره واشرح وانا ماكنت متمكنه مرره لاني اخذتها بسرعه وكمان ماني فاكره معلومات كتير وبمساعدة صديقتي العزيزه في ترتيب المعلومات اتشجعت ووقفت وشرحت ومع اسلوب الدكتوره الرائع حسستنيان الموضوع جدا بسيط ووصلتني السماء عشان اخذت كم معلومه مهمه بصراحه رفعت معنوياتي مرره بالذات بعد سنه انا كنت فيها منهكه وماني محصله نتيجه هذا الكلام كان على اخر السنة الماضيه ومن كثر ماحمستني بدأت اجازتي بعدها بتدريب في الصيف في نفس تخصصها
حبيتها وحبيت تخصصها
الله ييسر أمورها وينور طريقها ويجزيها خير

المرضى دايما يرفعوا المعنويات اصلا كل الناس يحبوا اللي يهتم بأمرهم ويسأ عنهم وطبعا هذا شغل الطبيب وحتى طالب الطب فكثيييير المري يرفعوا المعنويات ودعواتهم دايما تكون حوافز لنا مع كل التعب اللي نكون فيه

بالنسبة لزميلاتي-الله يخليهم ليا- مايقصروا في رفع معنوياتي بالعكس احيانا يكون هذا الشي مو في صالحي من ناحية انهم مايقولولي على عيوبي بس اصلا كل انسان مايحب احد يقوله ايش عيوبه^_*

[dr.CILIA]

quote]هل تعرضتي للظلم سواء من الدكتور أو من المريض ؟
[/quote]
من المرضى ابدا ومااتوقع تحصل لأن المرضى مساكين غلبانين بالذات قدام دكاترتهم.
من الدكاتره حدث ولا حرج -الله يصلحنا ويهديهم-
مااعرف يمكن بحكم كبر سنهم وانهم خلاص طفشوا من الطلبة والتدريس ولا احنا في نظرهم مهملين ومو زي ماكانوا هما وبعضهم تحس الشغله عقد نفسيه مااعرف ايش الاسباب ورا كدا
وطبعا هذا يظهر اكثر في الامتحانات النظريه والعمليه
انا عن نفسي ماقد حسيت بدرجة الظلم بس شوية مضايقات يمكن عشان انا دايما احمل نفسي المسؤليه كامله في حال انه دكتور اساء لي الناس اللي حولي يقولوا انه غلط بس انا مقتنعه بدا الكلام لأني ماني كامله ولازم عندي اغلاط واحيان اغلاطي تتعدى المقبول فمن حقهم بس ماوصلت لدرجة انهم يظلموني
لكن مو بعيد عن عيني مظاهر جبروت بعض الدكاتره على بعض من زميلاتي -الله يهديهم-

[pharm.d .s]

الصراحة انبسطت لما قريت الموضوع اتمنى لك التوفيق من كل قلبي
وحابة اعلق على كم شغلة :
الفزيكس كانت اسوء المواد في النظام القديم وكتير ناس مرا يرسبوا فيها لانها بطاله والصراحة النظام الجديد مرا استفادوا منوا ناس كتير ودي من فوايد السمسترات <<<< الصراحة اولى كانت دمار ومن اسواء السنوات الي مرت عليا
البايوكمستري صراحة مادة سيئة بس لما تغيرت طريقه الاسئلة من الاسي الي الاختيارات صارت نسبة الرسوب قلية ويعني من زمان كنا نحفظ السايكل وكدا بس دحين لا مشكلة دا القسم الكروتة وانو المنهج مرا كبير الصراحة انا اكرة كل الاقسام الي في مبنى 5

النقطة الاخيرة :
اناحابة اسئل من جد القلب يقسى لانو من جد تعبت نفسيا فترات الراوند والبشينت كونسيلنق من الاشياء الي شفتها وماقدرت انام ؟؟؟؟ اعمل اية انا مادخلت طب عشان الاشياء دي ولحقني حتى في صيدلة بسبب الكنيكل ؟؟؟