✿!{.. آراءكم في الدكتورات |{للطالبات}ﾟ¨ﾟ*

[Frish flower]

بسم الله نبدا

مبادئ التسويق / د.أسماء زاهر : طيبة وشرحها عادي مو مرة .

مبادئ التمويل / د.سحر مهران :شرحها مره هادي تجيب النوم ،احيانا تفهم واحيان لا .

نظم المعلومات الإدارية / د.شيماء: شرح+أخلاق +تعامل قمة في الروعة .

تحليل كمي / د.غادة جمعة :شرحها حلو بس سريع وطيبة .

بالتوفيق للجميييييييع .

[ωâяd âlјσσяŸ]

المشاركة الأصلية كتبت بواسطة سوسآ يااربي :( طيب مين في غير رنا تدي مبااديء ادارة و كويسسا

نصيحة لوجه الله ,, خذي معاها لانو اصلا ما في وحده تشرح دي المادة كويس

عالاقل راح تعطيكي حقك وتساعدك في الدرجات كثييير

راح يكون عليكي مذاكرة المادة .. وتمسكي التست كوووويس وبتجيبي درجات كويسة

وابعدي كل البعد عن فرانشيسكا .. أنا أخذت معاها ونددددمت

لي عودة ان شاء الله بكتابة التفاصيل عن هاذي الانسانة

[ضياءالروح]

محاسبة 213 : د.هيام
شرحح رائع وتوصل المعلومه كمجمل وانتي بعدين دوري في السلايدز اللي شرحتو واللي ماشرحتو
اسلوبها ماكان يعجبني لانها ماتتحمل السؤال يعني احيانا اضطر اسكت وانا جد ابغى استفسر على معلومه
التحضير مايهمها ابدا .. التركيز عندها اههههههم شي
ممممممنوع الكلام واللبان والجوال
نتضايق من غيابها من غير خبر بس الصراحه تراعي اذا كان عندنا اختبار واكثر من وحده طلبتها تلغي المحاضره ماتمانع
انضغطنا معاها نهاية الترم واكستتترا ..
عملتلنا كويز جدا سهل عليه ال10 اللي فيدها ومعاه 3 بونس
تراعي في التصحيح ..
الماده ماتقارن ب117 لانها اسههل بكثير
الحمدلله عدت على خير
معليش فصلت بزياده بس عشان الماده مهمه

[ωâяd âlјσσяŸ]

^

أوافقك الرأي ..
وأضيف انها تهتم بالشرح النظري أكثر من العملي , يعني عليك تطبقي وتحلي تمارين وتشوفي الأفكار
وكمان انسي فكرة انك تراجعي ورقتك حتى لو كنت بس تبغي تعرفي خطأك , جربتها في الدوري الثاني والفاينل تعطيك موعد وتسحب عليك

اقتصاد كلي / حنان الجشعم
توزيع الدرجات : 25 دوريين اول وثاني .. 10 أسايمنت .. 40 فاينل
الاستاذة كويسة .. شرحها سريع .. في البداية حتحسي انك ماشيه معاها تمام لانو المادة اسهل
من الاقتصاد الجزئي بكثير .. كذا مره صار انها سحبت علينا "
واحنا نستنى في الكلاس اصلا عاااادي .. غير انو اخر محاضرة قالت بسوي لكم
مراجعة واحل الأسايمنت كلها وجينا عشانها و سحبت علينا
واعطتنا تكليفين قالت عليهم بونس .. وتعبنا وسوينا وما شفنا البونس .. غير انها ما ترد عالايميل
وفي الاختبار ما تحب أحد يسألها .. صح انو المادة ما تحتاج بس عالأقل تكون متعاونة مع طالباتها
المادة حلوة وسهلة و مو متعبه في المذاكرة ابدا خصوصا انو اغلب الأسئلة تجي مقاربة للتست بانك بشكل صح او خطأ او اختيارات ويجي كم سؤال عملي ويكون تطبيق مباشر وسهل وراح تضمني ان شاء الله فيها درجة كويسة .. يعني لا تسووا زيي وتلخبطوا كل جدولكم عشان هذي الأستاذة
ولا أقولكم انها سيئة بالعكس راح تآخذي حقك معاها

انقلش 202 / مس أميرة << جديدة
توزيع الدرجات : 15 دوري اول وثاني , 10 كويزات , 10 رايتنق , 10 بروجكت , 40 فاينل
كانت كل ربوع تسوي لنا كويز عليه 10 وراعتنا في الأخير في مجموعهم

الشرح ما تحسي انو في شي اتطور منك لأنك حتذاكري لنفسك , بس الله يجزاها خير كانت تدربنا كثير عالرايتنق
طول الترم واحنا نكتب رايتنق وتصحح لنا ,, ولمن يجي الاختبار نكون متدربين على أغلب الأفكار
وكمان قالت بعطيكم 3 بونس على تكليف سويناه ولا حياة لمن ينادي
^
مسحوب علينا في البونس .. بس الحمد لله أخذنا درجات بتوفيق من الله ثم بمجهودنا وتعبنا


مبادئ إدارة / فرانشيسكا
توزيع الدرجات : 30 دوري أول , 20 بروجكت , 10 واجبات , 40 فاينل
الأسئلة كلها جت من التست بانك و في هاذي المادة ذاكري كل شي تقول عنه أستاذتك ولا تسمعي كلام الاستاذة الثانية
الدكتورة هادية وطيبة وما تعطي المادة أكبر من حجمها
مع العلم انو الشرح كلو انقلش ومرات كثير بتملي ويجيكي نوم
وماراح تستفيدي منه كثير في المذاكرة
خسفتنا في الواجب وأعلى وحده اعطتها 8 والباقين 4 او 5 من 10
وظلمتنا في التصحيح الله يسامحها وطلبنا منها إعادة تصحيح
يعني راح يوجعك قلبك اذا أخذتي معاها
أنصحكم تآخذوا مع أي انسانه غيرها


ثقافة 2/ مع هدى باجبير ,, طيبة ومتعاونة حتى كنا نسألها في أشياء خارج المنهج بعد المحاضرة وتتقبل مننا الله يسعدها فين ماكانت

دعواتكم ربي يوفقني الترم الجاي مع أستاذات أفضل

[ما أصعب الحياة]

مرحبا صبايا
من تجربتي
محاسبة 213 مع د هيام شرف الدين ماشاء الله تبارك الله ربي يذكرها بالخير شرح تمام وحضور وغياب ما بتاخد أسلوبها أكتر من رائع في توصيل المعلومة وقبل كل اختبار تسوي مراجعة تكون تقريبا هي أسئلة الاختبار وكان في 10 درجات لنا عندها آخر السمستر سوت كوز من 13 الي هي 10 درجات الي لنا عندها و3 كانت بونس صراحة جزاها الله ألف خير بل كل الخير انسانة جدن رائعة ومخلصة .
التمويل 230 د نسمة تشرح شرح أكتر من رائع لكن كتيييييييييييييييير صعبة في الحضور والغياب وكان معها 20 درجة انخسفنا طبعا المادة مو كتير سيئة بس دكتورتنا كانت تفهمنا انو كل شي مهم اتوقع د خديجة يمدحوها شرح ودرجات .مبادئ الادارة bus220 هاي المادة من أصعب المواد الي مرت علي في حياتي واتوقع ما حيمر أصعب أخدتها عند رنا ديفيا طبعن ما حتفهمو منها ولا كلمة لأنها بتشرح بالهندي وحتكتئبو في البداية من المادة بس كان في معها 10 درجات سوت كوز من أسهل ما يمكن تقريبا الكل أخد 10 فيه والبروجكت أعطت الكل 20 لكن الاختبار الفاينال كان من عند البنين حسبي الله عليه د سجاد حيدر جاب بس 20 سؤال من التست بانك والباقي من الكتاب طبعا حتقول لكم ذاكرو من الكتاب وانتو ما حتذاكروه وحتجازفو وغير تست بانك ما حتذاكرو بس فعلن بيجي من الكتاب فنصيحة ذاكروا الكتاب . الانجلش 202 أخدتو مع مس صايمة جدا كويسة بس أنا مو بيرفكت في الانجلش فما كنت أحب كلاسها أبدن بس حرام مخلصة وما تظلم أحد بس في نفس الوقت ما تعطيكي أكتر من حقك أبدن .
العربي 2 أخدتو عند د عزة رشاد وطبعن كان أغلس كلاس بالنسبة لي كنت أشيب لما أحضرو بالبداية شديدة في الحضور والغياب بس بعدين ما عندها مشكلة بس لازم تكلميها قبل وبعدين اعطتنا 3 درجات بونس .
نيجي لاقتصاد كلي 203 أخدتو مع د لبنى أبو العلا كانت تمام بس باردة في الشرح مووووووووووووووت تطفشي وانتي في الكلاس بس بعدين شافت درجاتنا في الاختبارين وحطت الاختبارين على أحسن درجة فيهم يعني أنا كنت ماخدة 24.75 في المد الاول والتاني 20 حطتلي الاختبارين 25 وأعطت 2 بونس في الفاينال يعني تضمني A+ بالراحة وبس هاي كانت تجربتي أتمنى اني افدت احد فيها .
بالتوفيق للكل

[لمحة إحساس]

بنات لو سمحتي ابغى رايكم بجدولي لاني مرررا محتارة و خايفة
محاسبة 213 مع سحر
ثقافة 201
عربي 201
سيرة الخلفااء الراشدين مع فوزية الشمري
انجليزي 201
احصاء اعمال مع عبير الثبيتي

[ضياءالروح]

تمام .. بالتوفيق ان شالله
بس لو تحذفي الماده الحره وتضيفي اقتصاد بيكون افضل

[لمحة إحساس]

الله يسعدك ياقلبي و مرا يسلموو ... انا اخذت الاقتصاد سويت ذكاء و اخذت الجزئي و الكلي مع بعض

[Bayan.J.S]

محاسبة 213 : د. لاريسا ، الألمانية
شرحها كله إنجليزي ، إزا خلفيتك في اللغة ماهي قوية ، أنصحك ما تاخدي معاها
أنا حبيتها مرة و أنبسطت بشرحها المبسط الحلو ، حسيتها تسهل المادة جداً
حبيت المحاسبة عشانها بس :Pp

مبادئ تسويق 260 : د. نوريزان
شرحها عايدي ، غالباً لانها مش متعودة تشرح حاجات بالبساطة دي على قولتها هع
المادة بالنسبة لي يبالها حفظ و فهم من لحالك ، يعني ما يحتاج تجي هي و تفهمك نقطة نقطة
دقيقة جداً في الواجبات /: !
و على حسب كلامها أدت بونس -.-"

مبادئ نظم معلومات إدارية 250 : أ. صباح الصومالي
شرحها جميل و تحسيها تحاول قد ما تقدر إنها تفهمك ، طيبة
بس لا تتأخري لمحاضراتها ، حتبهدلك !

علوم القرآن الكريم 212 : درسونا 3 أستازات من النحاسة أستغفر الله هع
أ. رقية السعودي <- تصحيحها للتكليف ماعرف كيف بصراحة ، ينرفز /: !
أ. دينا أو دنيا
أ. جمانة بيما

كلهم التلاتة شرحهم حلو و يحمس ،
غالباً لأن المادة ممتعة ، بس كتيرة شوية
الحمدلله إنه في النهائي ما خلونا نزاكر كل الكتاب

أسئلة أ. جمانة و أ. دينا أو دنيا " بصراحة ألخبط هع "
كانت مرة سهلة و جميلة ، بس لاااااازم تركززززي مزبوط لانها دقيقة

[نوونيتا]

المشاركة الأصلية كتبت بواسطة لمحة إحساس نصيحة د.لاريسااا ابدااااااا لااااااا... هيا جديدة بدات ذي السنة المانية كل شرحها انجليزي ...

بالعكس مرآ كانت تجنن والمحاسبه معاها كانت بسيطه وسهله
بس المهم الي بياخد معاها يكون عندو انقلش مرآ قوي
مع انها بتتكلم بالانقلش المبسط الي سهل الواحد يفهمو