أطباء الأسنان ~ خطوتكم الأولى بالقسم تبدأ من هنا ..

[DreamY CaT]

^^

أكثثثثثثثر شي متحمسة له معمل الفآنتومـ ..

الله يسسسسعدك يآرب ,, دآئمآ بآنتظآر اتحآفك لنآ بخبرآتكـ وموآقفكـ

[Dr~NanoOok]

المشاركة الأصلية كتبت بواسطة DreamY CaT ^^ أكثثثثثثثر شي متحمسة له معمل الفآنتومـ .. الله يسسسسعدك يآرب ,, دآئمآ بآنتظآر اتحآفك لنآ بخبرآتكـ وموآقفكـ

أحلى شي الحماااااس للشي اللي حتعمليه ^_^
يلا تعالولنا السنة الجاية وادخلوا معمل الفانتوم.. واذا شفتوا أحد يشتغل فيه
أقعدوا اتفرجوا وأسألوا.. وإن شاء الله محد حيقضّر معاكم

ربي يسعدك على دعوتك ^^

وهنا جبتلك تجربة تانية ليا.. برضو ردّا على عضوة هنا

<< يعني ما أهرج وأقول شي .. غير لما أحد يسأل ولا يستفسر مثلا =p


وأحب أنبه مره تانية.. أي أحد عنده أي سؤال أو استفسار عن التخصص
اتفضلووووا ^_^


_______________________

تصدقي.. انك زيي وتشابهيني في نقاط كثير
فأنا حلم حياتي كان الطب البشري.. و الجراحة بشكل خاص..
مرررره كنت أحب اتفرج على العلميات في التلفزيون..وبكل مكان ابحث عنها
وكان عندي كتب للأطفال عن جسم الانسان و عن الأعضاء الداخلية و تشريحها
و كتب مبسطة عن الجراحة أهدتني هيا عمتي
وعمتي جرّاحة وتحب تحكيني عن شغلها وعملياتها
وكنت أقعد عندها واسمعها بذهول واستمتاع كبيييييييييير

والعاب تُحاكي الجراحة والعمليات

باختصار.. كنت مهووسة بدا المجال.. وبحبه من قلب

’

و زي ما ذكرت قبل كده
اني أول لما دخلت الجامعة ربي ما قدّرلي أدخل الطب البشري.. ودخلت علوم طبية تطببقية
بعدين طلبت التحويل إلى الطب البشري برضو كرغبة أولى.. وطب الأسنان كرغبة ثانية

لكن سبحان الله.. ربي اختارلي طب الأسنان
بالرغم انها رغبتي الثانية.. وغالبا طب اللأسنان ما تقبل أي أحد يحطها كرغبة تانية حتى لو معدله يحقله دخولها !
وسبحان الله فعلا.. كل دا صار وحتى بدون أي واسطة.. و واسطتي كانت ربنا العليّ العظيم

وفعلا أنا اعتبر حكاية دخولي لطب الأسنان "القسم اللي ابدا ما اتوقعت نفسي فيه"
اعتبرها كمعجزة !
وأكثر لما صرت أحبه بالشكل دا وتعلقي الكبير بيه

<< حتى صحباتي بالأسنان.. لما عرفوا اني ابدا ما كنت حاطه ببالي اني ادخل أسنان وكده
مررررررره استغربوا !
وقالوا مو معقول ! ابدا ما نشوفك في غير الأسنان !

سبحاااان الله.. شوفتي كيف
مع اني بالبداية كنت معترضة.. ومو حابة القسم ومدري ايش
لكن ليقين في نفسي.. بأن ربي اختارلي الخير.. وعمل كل شي لي وسهّلي الأسنان
كله لحكمة من عنده لا يعملها إلا هو..

وشوية شوية.. ربي يبيّنلي حكمته.. وسبب وضعي بهذا المكان والتخصص

والله.. كل لما يحكوني صديقاتي في الطب البشري عن حياتهم وعن دراستهم
في نفسي أقول.. الحمدلله اللي ما خلاني معاهم << امكن هذا شعور خاص فيا.. لكني بداخلي ما ارتحت لوضعهم ولا لدراستهم

لكن بالأسنان.. كـ نظام دراسة.. وكمواد.. وطبيعة عمل وكل شي
حسيتها مناسبة لي جدا..
أنا أحب الفني بشكل كبيييير.. والأشغال اليدوية و الرسم من أكتر اهتماماتي زمان << ومازال ^^
وما تتصوري قد ايش فادني دا الشي في الأسنان
بسنة ثانية وأول لما اشتغلنا على الشمع.. والنحت عليها وكده
ما واجهت فيها صعوبة كتير..
وفي معمل الفانتوم بسنة ثالثة والحفر على الأسنان واللي فيه الكثير من الدقة وحركة اليد

غير اني بحب آخد من كل شي.. وأعرف عن كل شي وان بشكل مبسط
وهذا الشي لقيته في الأسنان ..
طيب حتسأليني كيف ؟

لأننا باختصار بندرس مواد بشري + مواد أسنان
و أخدت التشريح ودرسته ومسكت جثث وشرحتها
اخدت فسيولوجي ودرست وظائف جسم الانسان واتعلمت كتير عن الجسم البشري بشكل شامل
بالاضافة للتركيز على الجزء الخاص بالوجه والرقبة اللي هو بطب الأسنان

وكل مواد البشري بسنة ثانية أنا درستها زيهم
و بسنة ثالثة اخدت مادة الباثولوجي ودرست كل أمراض الجسم.. كل سيستم بكل مافيه
وكمان أخدت اورال باثولوجي.. الخاصة بأمراض الفم واتعمقت فيها

حتى بمعمل الفسيولوجي بسنة ثانية.. اتعلمت كيف أقيس الضغط واسمع نبضات القلب بالسماعة
و سحب الدم وتحليل فصيلة الدم.. وطريقة عمل و وضع جهاز تخطيط القلب

وبعد دا كله ..
هل عشت الطب البشري و الحاجات اللي كان نفسي فيها ؟

ولسه السنة الجاية .. في رابع.. حناخد جراحة عامة وحدرسه بالتفصيل.. بالاضافة لمادة الباطنة medicine
و بكده أظني كمّلت لستة الحاجات اللي كنت أبغى أعيشها "^^

ولسه حعيش حلم أسناني جديد اتكون..
وهو وجود عيادة خاصة بيا.. و بالمرضى الخاصين بيا وتحت اسمي
وبيدي هادي.. أقدر أساعد وأخفف آلام ناس كتير
والله مافي أحلى من كده شعووور ^^ ويارب اجعل نيتنا خالصة لك وحدك


~

أنا ما ذكرتلك قصتي وشعوري حتى أحببك أو اغصبك على القسم
بس حبيت تتعرفي على الأسنان عن قرب

وصدقيني مهما سمعتي كلام ناس.. وحاولوا يقنعوكِ بالتخصص ومدري ايش
أهم شي انتِ وقناعتك من جوا
وسبحان الله .. ربي اخترالك دخول الأسنان لحكمة
امكن حتكملي فيه.. وامكن يكتبلك التحويل لتخصص تاني وكان يبغاكِ تتعلمي شي من دخولك الأسنان

ففي كلا الأحوال انتِ الربحانه بما أنه ربي اخترالك..
سواءً هنا او في الطب البشري


وربي يسهّل ويوفق الجميع آمين
^_^

____________________________

[وِردْ ..~]

واثق الخطا Glamor Mada Kaira shahoda

نسِيتِيني =(

رجِعنَـإلكْ ثأني

عندي سُؤإل / بِ الكُورسِ وَحدة مِن الدكُتورإت بِ تُقول لِ بنَـإت الطِب البَشرِي ، إنُو فِيه أسِئلة مَقـإلية بِ الإختِبـإرأتْ ، بَس مُو ذإك الشَي يعنِي ، أقصِد قَصيرة ومَـإيبغَـإلهَـإ عَكّ ، يعَنِي كَم سَطر بِ الكثَير ، مُو essay زَي مَـأ الأغلبِية بِ تُقولْ ، سَـألتَهإ عَنَنِـأ لِ الأسَف مَـإعنِدهَـإ خَبرْ ،

سُؤإلي هُو ، إحِنَـإ زيهُم ولا لأ ؟

ومشُكُورة مُقدمَـاً =)

[Dr~NanoOok]

ورد
عزيزتي اعذريني.. سقط سهوّا بالكتابة
لكن بالقلب طبعا لأ ^_^

واهو يا ستي.. خصصنا رد ليكِ ولا يهمك =)

~

أسئلة الـ essay زمان كانت عبارة عن أكثر من صفحة
ولكن دحين الأسئلة المقالية الي بيعطونا هي ما تتعدي صفحة واحدة أو نص صفحة بس
وعشان كده يسموها الدكاترة short notes

بس احنا برضو نتعبرها essay "^^

وغير انه لما تطلعوا ثالث.. في النوعين الاتنين بالاختبارات

short notes
اجابتها عبارة عن 4 أسطر بالكتير.. وممكن تجي تعداد

essays
تكون طويلة وتوصل الصفحة

~

لكن بسنة ثانية.. كانت مواد قليلة اللي فيها essays

الاناتومي = هذه المادة أم الـ essay
X_X
و عبارة عن 10 essays كل سؤال يحتاج صفحة كاملة
وغالبا يجيبولنا أسئلة طويلة.. عن شريان رئيسي بالجسم.. وتذكري تفرعاته وأهم الأعضاء اللي يعملها تغذية وكده

وبقية الاختبار بحدود 50 MSQ's

وعندك كمان مادتي الـ Histology & embryology
فيهم أسئلة essays لكن اجابتها اقصر من الاناتومي

وكميتها أقل.. تقريبا 6 أسئلة بالكتير.. والباقي كله <MCQ's

~

مادة الدنتال اناتومي

فيها essay وغالبا تكون رسمة للسّنة ..
ومافيها كلام كتير زي المادتين التانيين

~

أما بقية المواد زي الفسيولوجي و البيوكيمي و غيرها
فكلها عبارة عن MCQ's


=)
واهلا بيكِ دايما

[وِردْ ..~]

^

هههههه يَ مِلحِك يَ إخِتي ^^

المُشكِلة تدِلعنَـإ بِ التحضِيريْ كُلهَـإ MCQ's ،

الله يعِينْ =|

وُ يسِعدكْ رَبيْ ، كَفيتِي وُ وفَيتِي =)

[Dr~NanoOok]

نبذة عن السنوات الأولى في طب الأسنان
<< اللي مريت بيها إلى الآن .. وعقبال لما أتخرج واحكيكم من سنة أولى إلى سادس أسنان باذن الله ^_^


السنة الثانية

http://www.skaau.com/vb/showthread.php?t=94958

~

السنة الثالثة

http://www.skaau.com/vb/showthread.php?t=241992

~

السنة الرابعة


http://www.skaau.com/vb/showthread.php?t=415988

~~~~



هذا الموضوع هو موضوع جامع لأهم المعلومات في القسم ..
وأي شي ثاني تحتاجوه اتفضلوا وشاركوني هو

[M!Šs JỏJỏ]

جزاك الله كل خير :)

[DR.D]

شكراً لك بحجم السسسماء و عمق الأرض ,

[shosh10]

Dr~NanoOok عن جد موضوع راااائع بدد مخاوفي <<ههههههههه
جاوبتي على اكتتتر اسالتي بالتوفيق لكي..

[ψφψφ вèĐéяi]

مشكـــورهـ على الموضوع .. الي منجد من القلب

سهلتي عليـــآ كتير من التساؤلات

مــآقصررتي والله .. ربي يسعدك ويوفقك ..

بسس عتب بسـسيط .. الموضوع ليـهـ موجه للبنــآت بس؟! =PpP احلى شي (معآكِ) الكسسرة!!