الله يسامحه سحب ورقة الاسئلة وباقي لي عشر اسئله

[FrEeMaN]

الصراحه حسيت اني مو في جامعه ولا اختبر بمستوى جامعي ..
1 - الوقت فيه اجحاف للطلاب كنت اول شخص بالثانويه اطلع من الاختبار والحين بالميت الحق اضلل الاجابه .
2- تدخل القاعه وتجلس ربع ساعه مابين ياشباب اسمعوا شرح التضليل كل يوم كذا وفيه واحد بالنسبه للقاعه الي فيها الله يستر عليه فرحان بالمايك انتبهوا ركزو وش عليه ماادري ...!!! بعدين من جد ازعجوناا ذا المراقبين(( البطاقه الجامعيه - الايصال )) بالاختبار الواحد يجي ثلاثه اربعه نفس السؤال ..؟؟
طيب المفروض من باب الدخول يسألون ثانيا يكون فيه شيء اسمه مراعاة للمعلومات الي يحفظها الطالب .. انا اراهن ان جميع طلاب الانتساب اصحاب قدره على الحفظ مؤقته يعني من ندخل من الباب المفروض بسرعه الاسئله لان المسأله حشو ذهني من بدايه الاسبوع الي قبل الاختبارات وبعض المواد والله ماشفتها الا ليله الاختبار ... يعني ماادري من يشاركني الرأي في ذا النقاط .. بس الصراحه الانجلش كنت متخوف منه بس طلع من جنبها والحمد لله ابسط من ماكنت متصور ... اتمنى للجميع التوفيق يارب ...

[tariq_101]

اهااااااااااااا يعني مو بس انا .... تمام اذا انتم خلصتو الوقت المحدد ... احنا قبل الوقت بنصف ساعه
الدكتور جاه اتصال وسحب الأوراق .. قال بالحرف الواحد ..( بسرعه يبق 10 دقائق) نظرت في
الجوال ولا يبقى 35 تقريبا والشباب وعارضنا لا كن لا حيات لمن تنادي مع ان الأسئله سهله
بس يبغالها شوي تركيز وياليت ماركزت ....

[ابو الجوري]

الله يعييييييييييين
ههههههههههههههههه

[السفيرـر]

اجـــل كل الطلــبه نفس المشكله
اليوم خاصة اختبار الانجليزي الكل تقريبا يادوب لحقوا يخلصون
اي كلام اهم شي يكملون التضليل
فعلا الوقت مرـر سريع باختبار الانجليزي

[بدر11]

صارت لي في الانجليزي وحصلت مشادات لأني حليت الأجوبة في ورقة الأسئلة وسحب الأوراق وباقي 15 جواب ماضللتها،عموما رجعوا لي الورقة وعطوني 15 دقيقة إضافية

[Diro]

حتى انا سحبوها مني حسبي الله والله شوي وابكي من القهر
والمراقبة فوق راسي قبل الوقت بعشر دقايق قلقتني وهيا تقول يالله حرام عليكي حرااااااااام لا تأخريني بروح بيتي

طيب الانجليزي وعدا لكن المشكلة الكبيرة في الاحصاااااااااااااااااء

[الوثلاني]

انا ادري مو انا لوحدي القاعة كان فيها 7 غيري والحين اتضح ان الجميع يعاني من نفس المشكلة

ياليت من المسئولين في الجامعة اعطاء وقت كافي خصوصا انهم جعلو المواد الصعبه متاخره

والوقت يساعدهم لاعطاء اكثر من نص ساعة ..

[منوور]

حتى انا سحبو مني الورقه وانا ماخلصت الله لايوفقهم لو احمل الماده

تسمع صوت الكعب تك تك والصراخوالتوزيع ياخذ منهم ساعه

واخر دقيقه من الوقت يعدون لك العد التنازلي باقي 5 دقائق 4 دقائق يوترون الللي مايتوتر

[t.h.m2004]

اول ماجلست تحاشيا لبربرة المراقبين الايصال والبطاقة الجامعيه بطاقة الاحوال مسدوحه على الطاوله لنهاية الاختبار ومن عطوني ورقة الاجوبه ابداء بالتضليل وراعي المايك يقرق مدري وش يقول انا يوم سحب المايك وقالوا انتبهوا دقيقه قلت الرجال جايه ولد وبيعزم الشباب بالاستراحه وعطيته ( اشكل يعني طنش ) وقعدت الون ذكرني بمجلة ماجد صدق يقولون بيلغون التظليل وبيخلونك ترسم شعار الجامعه على الجواب الصحيح ...... ويقولون السنه الجايه تجيب معك الوان خشبيه عشان التنسيق بالالوان ...
والله المستوى اللي نشوفه بقاعة الاختبار لايدل على انك تختبر اختبار جامعي وبس هذا اللي اقول

[Abadi Alharbi]

أنا أبي أعرف شيء واحد ، ليش مصممين على حكاية التظليل

طوعوا كمبيوتركم الأدلخ ببرامج تقليديه للتصحيح

وفكوا العالم من هالمهزله .

الله يعين بس ،،،

الله يوفق الجميع