أعطوني رايكم ومعلوماتكم =)

[Ideal Dr.]

انا صراحه كنت افكر زيك اوقف سنه وبعدين اكمل بس دحين جالس احمد ربي مليون الف مره عشان كملت وماوقفت


لأنو بصراحه مافي اي فرق بين الدروس اللي حتاخديها في التحضيري واللي اخدتيها في الثانوي الا انو التحضيري كلو انقلش فيعني لما تكملي ممكن بعض الدروس تكوني لسه فاكرتها ويصير كأنك جالسه تراجعي مع الدكتوره مافي اي شي جديد اما لو وقفتي ممكن تنسي كل شي ومو كل الدكاتره يفهمو زي الناس !

وفي كم ماده لازم تذاكريها اول بأول من بداية السنه عشان تجيبي درجات طيبه ان شاء الله زي ال فيزيا والاحياء والاحصاء

اتوكلي على الله وكملي ترى التحضيري اتفه سنه ممكن تمر عليكي بس اذا اجتهدتي اما بدون اجتهاد راح تكون اصعب سنه !

[twixx]

مممممممممممششششككوووريين ككلللكككم
وكلامكم عسسل ويريح البال
وأهم شي إنكم قلبتو بقاله هنا وكوره ههههههههههههه
..

أنا خلاص سجلت بالقبول الالكتروني وأستنى القبول والله يجيب اللي فيه الخير
أدعولي أختباراتي تبدا السبت
وبعده التحصيلي

[3zzouzz]

خير ما فلعتِ
المعلومات دحين في راسك " حار بنااارو "
ولو كنتِ ثانوية محترمة مدرساتها يخافوا الله ،
سواء كانت حكومية او اهلية ( مع ان الاولى افضل )
راح تقدري تمشي ان شاء الله ، كلنا تخوفنا من الدراسة بالانجليزي
لكن الان الحمد لله الامور متيسرة ، ما تحتاجي الا وقت قليل فقط للتعود
بالنسبة لكورس الانجليزي ، نصيحة لكِ خذي توفل وشيلي الانجليزي نهائيا
لأن الانجليزي في التحضيرية سبب رئيسي لأمراض القلب والشرايين !! الله يجيرني واياكِ والجميع منها !!

[الانس]

....للرفع

[Dr.Raghad]

-



نصيحة من مجربه < ياليت احد نصحني فيها من قبل , الحمدلله على كل حال
وانصح فيها اختي اللي في الثانوية كمان
خذي التوفل في الاجازة وقدميه عشان ماتدرسي انجليزي ابدآ ولاتروحي اختبار تحديد المستوى
واذا عالمعدل انا مجربة قدامك لو جايبة أي بلس في المواد كلها الانجليزي نحيس لازم ينزل المعدل
لانه مو بس اختبار , ملف , رايتننق , وسبيكننق , وتعععب ووقت طويل
فضي وقتك للمواد الثانية احسن تجيبي الـ 5 بالراحهه
واذا تبغي تخصص تصاميم انصحك بالمسار الأداري موادهم عربي واسهل
فحاولي تحددي التخصص اللي تبغيه من الآن عشان تشوفي مسار علمي ولا إداري
ويمديكي تغيري حتى لو مع اخر لحظة وانتي بموعدك في الجامعه
بالتوفيق ~

[طـالـب !]

اناا فكرت مثللك بالبدايه لكن ماجا رمضاان الا وانا طفشاان هههههههه

ترى التحضيري سهل للمجتهد ابد ماهي صعب

نصيحه لوجه الله لك ولأي طالب بيدخل الجامعه حاول بأختبار تحديد المستوى حق الانقلش تاخذ المستوى الرابع لو تقدر!
لأنه الانقلش يخرب الحيااه ههههههه

[ReRe.H]

ايوا صحيح كلامهم لا تقعدي في البيت
انتي بس اتذكري انوا صحباتك حيتخرجوا قبلك :)
وانا انصحك كمان بالمذاكرة لاختبار تحديد المستوى
يعني اذا تبغي دورات انجلش خذي ذحين الفترة هذي يصير لما
تنقبلي في الجامعة بإذن الله وتاخذي اختبار تحديد المستوى
تكون انجليزيتك كويسة ولا تتخيلي انو احنا طول الكلاسات
نرطن انجلش عشان كذا تبغي تدرسيه سنة كاملة ! لا عادي مرة
نتكلم عربي وفي كلاس الانجلش جملة جملتين وأخطاء قد الدنيا وممشين حالنا الحمدلله :)
كلية التصاميم والفنون اتوقع مقر الكلية نفسه في الرحاب مو في السليمانية .. بالتوفيق

[szoza]

اشبكم ع الانقلش والله احححححححلى مادة بالجامعة واحلى كلاس واحلى جمعة وفلة صح الوقت مبالغ فيه بس له طعم غير عن باقي الكلاسات ،،

نرجع لمحور الحديث فكرة انك تبطلي سنة ما انصحك وزي ما قالوا لك قبل بس في نقطة حبيت انبهك عليها
اذا تبي تخصص موجود بالادبي ادخلي ادبي لا تغلطي غلطتي وتدخلي علمي وتكرفي بعدين تخصص ادبي الادبي موادهم بالعربي واسهههل بكثير مننا شوفيني الحين تخصصي اللي اباه ادبي وماكلة هوا عشان تعثرت بمواد بالعلمي وحملتها

[szoza]

^
التصاميم والفنون بالرحاب

[رَزَان]

حبيبتي أنا شايفة صحباتي اللي ماتوفرت لهم فرصة إنهم يدخلوا جامعة
صحيح في البداية يكونوا مرتاحين ومبسوطين ، لكن بعد كدا خلاص يطفشوا من قعدة البيت
عندك الإجازة تريحي فيها :)
كمان التحضيري مهو صعب
يبغاله مخ مفتح وفهم ومذاكرة سريعة وبسيطة أول بأول
وفوق كدا تدرسي فيه إنجلش وحاسب يعني مايحتاج تاخذي دورات
صحيح دراسة المواد العلمية بالإنجلش ، لكن مع الأيام تتعودي ع المصطلحات المهمة
سلايدات الأحياء كل سطر فيها مترجم ، لكن يبغالك تتدربي ع المصطلحات قبل الاختبار بفترة
ومافيه صعوبة إن شاء الله
..
نصيحتي ::
لا تضيعي سنة من عمرك ع الفاضي !