فضفضه وسط الاختبار

[طالب@2010@]

كتبت هذا الموضوع عشان افضفض شوي

بالنسبه للانتساب انا بصراحه افكر اتركه ومتردد رغم اني الحمدلله ما حملت ولا ماده ومعدلي فوق اربعه ...
بس نرجع لنفس الاسطوانه القديمه الرسوم اللي تعبتنا ولا شفنا مقابل حتى الكتب نشتريها
حتى الجامعه حقتهم ماعرف شكلها ..

يعني ركزوا على كلمة المقابل وش الفايده لما ياخذونها

ليش المبتعثين لبرا مدفوع كل مصاريفهم ..واحنا هنا انتساب مانعرف الجامعه الا في اسبوع اختبار
وعلى حسابنا حتى اختبار المناطق الف ريال مع العلم ان جامعة الاحسا ببلاش
ولاطعينا في الشمس حتى ماوفروا لنا صالة نراجع فيها
قبل الاختبار وكأننا طرارين


غير اننا نثني ركبنا عند المدرسين الخصوصين لطلب العلم وهم يثنون جيوبنا بمبالغ كبيره
يعني يكلف الترم من سته الى سبعه اللاف واخرتها الشهاده مكتوب فيها منتسب
ومعدل مشي حالك ... وتعب على الفاضي

طبعا يوم شافوا المطالبات كثرت قالوا خلاص قدموا اعفاء
طيب اللي مو مسجل في التأمينات ولا في التقاعد يعني مو موظف المفروض من اول معفي

بعدين يقولون لازم الموظف تكون ظروفه تعبانه يعني اروح اتدين عشان تعفوني
واصنع لي ظروف ...صعبه بلله هذا عذر يعني بدل ما تخففون عنا تطفورنا

ليش ما يرجعونها زي اول ادفع اول ترم فقط ...؟ واختبار المناطق كل ماده بميه وتخب


لييش هذا الاستغلال بشكل عام

مطالباتنا لو وصلت للملك راح يعفينا ولكنها تقف فييتجمد الموضوع

ويعطونا من البنج اللي متعودين عليه

وكأننا ماحنا من ابناء وطن واحد كل واحد ياكل الثاني


عموما انا ز....معي واذاحملت اي ماده ماتوقع اني باكمل

ولا بارك الله فيهم ولافي جامعتهم ولا في المدرسين الخصوصيين


وياروح ما بعدك روح كل شي صار بالدراهم عموما الكلام يمكن سمعتوه كثير

بس عشاني تعبان الحين ونسيت اكثر الكلام ولا كان ...




عموما شي مهم
احب اشكر في النهايه كل الاخوان المتطوعين ومن يقفون مع زملائئهم الطلبه بلامقابل
يسوون ملخصات وغيرها ..ويصرفون الكثير من الوقت والمجهود من انفسهم

ونقول الله يجزاكم خيروانتم من الاشخاص النادرين في هذه الايام
قد لا تعني لكم كلمة شكرا شي ولكن الله يعوضكم عن تعبكم بتوفيق ترونه في حياتكم واخرتكم


والمنتدى هذا استفدنا منه كثير ...مشكورين

ودق الزير ياولد
يعني فوضوها سيره