قبول الطلاب والطالبات الغير سعوديين

[hind98]

السلام عليكم

حبيت اسال الحين انا قدمت ع عبدالعزيز الرغبه الاولى انتظام
وبالتدريج الرغبات لين الانتساب والتعليم عن بعد طيب لو ماحصل انتظام
وقبلوني انتساب بيجي القبول على الترم الاول ولا كيف ؟!
لاني سمعت القبول للاجانب ع الترم الثاني !!

[حيــــــاة]

المشاركة الأصلية كتبت بواسطة alkozy حياة من هول اللي قريته ماني عارف كيف ارد وايش اقول او ايش اسوي كل اللي جاء ببالي جميع انواع السبات + شرط التقديم ع الجامعة وحدة الكلب دا ليه ماحطوه ضمن الشروط ؟ يعني لو انا مابحثت كنت باقول مابحثت كفاية ،، لكن انا بحثت كثير وماشفته الا بشروط الدمام قلت شكلها الجامعة الوحيدة اللي حاطته وربي قهرررر مو طبيعي تمنيت انهم مافتحو باب الاجانب دا من الاساس ساعتها كان شفنا لنا اهلية باي طريقة كانت او السفر او جلسنا بالبيت وارتحنا وربي مرمطة مابعدها مرمطة زي لما واحد غني بيتصدق ع الفقير عشان الناس تمدحه ورياء،، ويذل اهل اهل اهل اهله عليها حسبنا الله ونعم الوكيل بس نجي لاسالتك الاسلامية طلبت مراجعتنا قبل 8 ايام تقريبا وكان لازم تحضر وكان يوم واحد انا رحت وكان يوم مخصص للاجانب رحت على اساس قبول عزوز يتاخر ترم قلت بادرس عندهم الترم الاول واذا جاني قبول بالترم الثاني انتقلت رحت عشان اسال اذا ممكنة الطريقه اللي اقولها سالت دكتور حولني على واحد ثاني قالي هو المتخصص شايب مكشر يكلمك من غير نفس بكلمات محدودة ، باختصار اقرب فرصة ممكن يقولك فيها " لا " يدورها سالته قلت ابغى اسوي كذا اني ادرس ترم وبعدها انقل على طول قالي مايصير لان اسمك بيسقط حاولت استفسر عنه متى يسقط وفحالتي لما جاني قبول بالاسلامية هل اسقط او لا حتى هادي ما جاوبني عليها كانه يقول اللي بعده وبنفس اليوم كان عندي موعد بالمستشفى الساعة 8 وهم فتحو الجامعة ع ال8 اصلا اتصلت ع المستشفى قلت باتاخر شويتين هم راعو تاخري نص ساعة بعدها جتني تلفونات بسرعه بسرعه ولا الموعد بيروح وماكنت اقدر افوته والشايب رفع ضغطي قمت اخدت ملفي وخرجت ،، قلت باستنى قبول عزوز لان اسلامية اصلا دوبها فاتحة الكلية العلمية وماتدري كيف مستقبلها وايش وضعها اما ينبع الجامعية انقبلت وانا مادري لاني مستني رسالة جوال وهم ما ارسلو امس دخلت باشيك وش صار عليها فجأة لقيتهم قابليني وهادي الرسالة اللي ظهرت لي " تهنئة عزيزي الطالب المستجد يسر كلية ينبع الجامعية أن تهنئك بمناسبة قبولك في الكلية للعام الدراسي 1434/1435هـ الفصل الدراسي الأول ، متمنين لك دوام التوفيق والنجاح في مشوارك العلمي . ولإتمام عملية قبولك ينبغي عليك اتباع التالي : 1- طباعة نموذج الطلبة المستجدين . 2- تجهيز جميع المستندات الموضحة في النموذج . 3- إجراء الكشف الطبي في أقرب مستشفى أو مستوصف حكومي منك بناءً على النموذج الموجود في الموقع . 4- مراجعة أقرب فرع للبريد السعودي من الثلاثاء إلى الخميس 23-25/8/1434هـ الموافق 2-4/7/2013م لتسليم الوثائق والكشف الطبي حسب التعليمات المذكورة في نموذج المستجدين. مواعيد هامة جدا: 1- موعد إجراء تحديد مستوى اللغة الإنجليزية يوم الأثنين 12/10/1434هـ الساعة 12.30ظهرا بالصالة الرياضية بكلية ينبع الصناعية . 2- موعد استلام البطاقة الجامعية يوم الأثنين 12/10/1434هـ بالصالة الرياضية بكلية ينبع الصناعية . 3- موعد تحديد السكن للطلاب القادمين من خارج محافظة ينبع يوم 16/9/1434هـ علما بأن الرابط لاختيار السكن سيكون على الموقع الإلكتروني لكلية ينبع الجامعية www.yuc.edu.sa 4- موعد بدء الدراسة الفعلية يوم الأحد الموافق 25/10/1434هـ ." زي مانتي شايفه اخر موعد تسليم الاوراق كان يوم الخميس قبل اربع ايام وانا دريت السبت الحين الطامة الثانية اللي بتخليني انفجر النت والتليفون مقطوعين لان صاحب الفخامة اخوي يماطل بالتسديد ومو هامه وضعي نهائي !! :/ الحين اول مايصحى باخد بطاقته واسددها بنفسي >< ينبع الجامعية برضو ناس ع تويتر اعرفهم نصحوني ما اروحها عشانها جديدة ومو مضمونه :( والصناعية انا غلطت ماقدمت عليها الحين اول شيء لازم اسويه ادق ع الوزارة واشوف وضعي وانتي بايش تنصحيني ؟ اراجع الاسلامية واشوف لو في اي طريقة ممكن يقبلوني حتى لو جديدة او ينبع الجامعية ؟ وتعتقدين في امكانية ؟ انا لو ادري ان هالدراما بتصير لي كان قدمت في عزوز وعزوز فقط اريح لي واضمن لي بس الشكوى لله :( اضافة اخيرة انا ربي بيمتحني بمرض وراثي (فقر الدم) اعيش طبيعي جدا زيي زي غيري بس اني احتاج مراجعة المستشفى شهريا وعلاجاتها مكلفة جدا وافضل مركز موجود بالسعودية فالمدينة وبرضو جدة مستشفى الجامعة مدري اي مستشفى يمدحوه يعني كاني ماخرجت من المدينة عشان هالسبب انا كنت مركز ع عزوز اكثر شيء طيبة تاخر ومشاكلها كثير وغير عزوز وطيبة برا كل مابعدت باواجه مشاكل في مراجعتي للمستشفيات لو مو هالمرض ورب الكعبة ماجلست بالسعودية بكبرها دقيقة وحدة صحيح ابوي جاي عشان المدينة مخصوص وانا كمان اعرف فضلها وكنت صابر ع كل مشاكلها لحد الان بس الحين وصلت لمرحلة استغفر الله مابغى اكمل ض1 يمكن المرض خيره من رب العالمين عشان ما اخرج برا السعودية وبالذات المدينة الحمد لله على كل حال

شوف يا خوي ،،

* اول شيئ ،، ربي يعافيك من كل شر وقدامك الف عافية : )
.،.

* شرط التقديم لاكثر من جامعه دا مو مكتوب في ولا جامعه ،، واول مره يتطبق العام وماعرفنا الا لم قلت لك بتجربة الي كانوا مقدمين معاي ،
.،.
* مسألة دراستك ترم او سنة في جامعه وبعد كذا تنقل لجامعه ثانية .. فدا الشيئ صعب في حد ذاته للسعوديين واذا كان قبولنا احنا معقد فما بالك بالتحويل !!
هو مو مستحيل بس اوضح لك انه صعب ،،

* شوف ،، اول شيئ تتصل عالوزارة زي ماقلت وتسألهم عن وضعك ،،
مع اني اعتقد ان الي بيصير انه قبولك في الجامعتين مابيأثر على قبولك في عبدالعزيز " زي ماصار مع طلاب الدمام " مدري ليه الي فهمته من الموضوع ان الجامعات الي طلع قبولهم ترم اول عادي تدخل الاسماء للجامعات الثانية حتى لو طلع القبول ،، واتمنى هذا الي يصير معاك ،


* في نفس الوقت مهم جدا تراجع الاسلامية وينبع وتشوف اذا بيستقبلوك ويتمموا قبولك بالرغم من تأخرك 8 ايام ،،
لاتصدق اي جواب واسأل واسأل واسأل وراسأل ولف من مكتب لمكتب الي تلقى الجواب الي يريحك ،
ممكن ليش لا انهم يقبلوا يتمموا ،، اذا كان في شاغر .
اعتقد انك تضمن شيئ على امان افضل من انك تنتظر على قلق ترم كامل ،

* كمان ترا لو صار بجد انه اسمك انلغى من عبدالعزيز لانه جاك القبول في احد الجامعات ،، مانتهت المسألة ولسى في حل ،
العام الي انلغى اسمه من عبدالعزيز لانه طلع في طيبة " الحين يدرس معانا " : ) : )
راح اقولك كيف ،،
بعد ماعرف من الوزارة انه اسمه انلغى من هنا وراح هناك ،،
راح عبدالعزيز وحكاهم الحكاية انه مقدم هنا وهناك وجاه القبول ،،،، الخ ،، <<طبعا تكلم مع عميد القبول او مدير القبول >>
وقله انه موزونه عالي ويقبله اصلا في عبدالعزيز <كان موزونه 91 >
قله بما ان موزونك يأهلك للقبول عندنا ، فراح نقبلك عندنا بســ
جيب خطاب من طيبة انك انسحبت من عندهم وبنعطيك خطاب من عندنا انه موافقين نقبلك وتودي الخطابين للوزارة عشان يوافقوا على مسألة تحويل القبول من جامعه لجامعه ،،
وصار ،،
الوزارة ماكان عندهم اي مشكلة ،، بعد ماوصلهم الخطابين جلس متواصل معهم عالتليفون وجاه القبول وداوم قبلنا الي جانا القبول بعده <فكانت هذه الحسنة والشيئ الاجابي >
احنا جانا القبول بعده بعد ماجات الاسمآء من الزارة ،،بس هو لانه اصله قبوله كان موجود في طيبة وبس تحول اسمه فتمت اموره قبلنا
يعني ،،
لازم في حل حتى لو صار معاك كذا ،، مو معناته راحت عليك ، ويبقى بصيص الامل ^ـ^

* وبالنسبة ان ينبع جديدة ،،
مافي جامعه ماكانت يوم من الايام جديدة ،، وانت تبغى تدرس وراح تثبت دراستك حسب جهدك وين ماكنت ،

.،.،.،.

* اضافة اخيرة *
اشياء نمر بها ونكون قمة في الانفجار ومو قادرين عالتحمل ،، ونشوف انه كل شيئ يمشي عكسنا ومو في صالحنا ،،
بس بعـــد فتـــــرة راح تكتشف انه كل هذا الي صار معك هو الخير وهو الافضلك في كل الاحوال ،،
صدماتك من الكلام الي قلته لك هذه زي الاسهم نزلت عليك ،، بس بعد فترة راح تكتشف قد ايش صرت خبير وعندك معلومات


حلقة حطها في اذنك " كل شيئ في وقته حلو "
المطبات الي نمر بها يكون لها طعمها الخاص ،،

حاسة فيك وادرك انك شاب وطموح ونفسك توصل في اسرع وقت للي تبغاه وتدري بدا الكلام كله ،،
بس هذا واقعك الي لازم تتماشى معاه وهذا قدرك الي ربنا حطك فيه ،،
مافيك تعمل شيئ غير انك :
ـــ ترضى ،،
ـــ تسعى وماتجلس مكانك وتبحث وتدور وتسأال الف مره ومره وتتصل وتراجع حتى لو تعيد نفس السؤال كل يوم على نفس الشخص مو مشكلة ،، اهم شيئ تسعى ورا نفسك لتحس بقيمة الشيئ الي تسعى له وتحس بتفردك انك مو زي اي احد وان الي وصلت له كان بفضل ربي ثم بإجتهادك انك سعيت وسعيت وسعيت الين وصلت وماتخاذلت وماجلست عند اول مطب ،
ـــ بدراستك 12 سنة قطعت مشوار كبيــــــــــر .. الحين باقي لك بس خطوة ،،
صح انها خطوات قليله بس يبالها بس بريال صبر قطعت الكثير ومابقي لك الا القليل صبرت 12 سنة عشان توصل لدي المرحله وصار باقي لك صبر بريال فقط ،، وراح تعدي ،،

.،.،.،.
مسألة دوشات التقديم بإذن الله غمامة وبتنجلي .. وراح يكون لها حل وبتنحل بسهوله اكثر مما تتوقع وبتشوف نتائجها ، بس يبالها سعي ...
الي صار مع صاحبنا الي انقبل في طيبة ،، ماحد من قبله صارت معاه دي المشكلة وماحد شار عليه بالي يسوي ،
بس راجع وسأل ودور جا جدة وراح طيبة وبعدها الرياض وجلس اسبوعين وبعدها ارتاح .

زي ماقلت لك ،، بتندوش ،، بتقلق ،، بتحس انك جالس على وهم ،، هذا كله شعور طبيعي ،
بس الي لازم تتأكد منه .،،
ربي مابيضيع لك تعب
حقك بيجيـــــك الي عندك بس اسعى له وصبر شويتين ،،

.،.
1ـ الحين بتتصل بكرة عالوزارة وتفهم منهم اش تسوي ،،
2ـ وتراجع الجامعات وتشوف وضعك ،،
3ـ تنتظر لـ 7 رمضان ونشوف اش يصير مع عبدالعزيز يجي القبول او لا ،
4ـ ممكن تنتظر للترم الثاني وهذا بإذن الله مايصير وتخلص من بدري ،

.،.،.

تعبت وانا اكتب واندوش دماغي مدري اش كتبت واش لا ،
اعتذر عالهذرة الزايدة ><

والله يكتب لك الخير وين ماكان ..

القادم اجمل : )

[حيــــــاة]

المشاركة الأصلية كتبت بواسطة hind98 السلام عليكم حبيت اسال الحين انا قدمت ع عبدالعزيز الرغبه الاولى انتظام وبالتدريج الرغبات لين الانتساب والتعليم عن بعد طيب لو ماحصل انتظام وقبلوني انتساب بيجي القبول على الترم الاول ولا كيف ؟! لاني سمعت القبول للاجانب ع الترم الثاني !!

وعليكم السلام ورحمة الله وبركاته
لو قبول الانتظام بيجي الترم الثاني ماراح تدرسي انتساب الترم الاول ،، وراح تجلسي للترم الثاني ،
لو انقبلتي انتظام كان وبها ،
ولو ما انقبلتي اذا فيه تقديم انتساب الترم الثاني بتقدمي او انك تنتظري للسنة الجاية وتقدمي من جديد لانتساب او تعيدي قدرات وتحصيلي وترفعي موزونك وتقدمي انتظام ،

موفقه : )

[حيــــــاة]

المشاركة الأصلية كتبت بواسطة جودي12 اسفة كثرت عليكم الاسئلة :/ ان شاء الله تكون اخر مرة :) بس ابغى اسال منح بقشان تكون للجامعات الاهليه ولا الحكوميه !؟

حكوميه ...

.،.
ترا اتضايق لم احد يقول كثر اسأل ،،
لو ما ابغى اجاوب بكل بساطه ما بدخل هنا ومابرد ،، بس انا هنا عشان افيدكم لاني في يوم من الايام كنت مكانكم وكنت محتاجه حتى لو كلمه تبرد خاطري وتفيدني .

: )

[حيــــــاة]

المشاركة الأصلية كتبت بواسطة el haouzi السلام عليكم بالنسبة لقبول الأجانب هل بيرسلوه للطلاب على الموقع ولا لازم تزور الجامعة عشان تعرف إذا قبلوك ولالا ؟ ( اتحدث على فرض أن القبول في الترم الثاني ) وإذ تم القبول إن شاء الله , هل فيه تسكين للأجانب ؟!

وعليكم السلام ورحمة الله وبركاته

بالنسبة للقبول للـ غير سعودديين ،، ممكن ماتجي رساله والملف في الموقع مايتغير فيه شيئ ،،
حسب كلامهم هالسنة لو صدقوا 7 رمضان وفرزوا راح يبان في الموقع ،
لو ماصار شيئ في رضمان وقالوا لكم الترم الثاني ،، لازم تراجعهم كل فترة والثانيه على نهاية الترم الاول وبين الترمين ،
ولو ماتقدر تراجع اتصل عالعمادة ،، اتصل عالوزارة ،، خليك متابعنا هنا عشان تعرف كل جديد ومايفوتك شيئ ،
واو ماتدرى بالقبول تروح لهم وماتتأخر ،

اظنك تقصد بالتسكين " السكن " اي في سكن جامعي ،، لم تتم قبولك في العمادة قلهم انك تبي تقدم على سكن وبيخبرونك بالمطلوب ومتى وكيف واجرائات السكن ومن ذا الكلام ،

اتمنى اني افدتك ..
موفق : )

[hind98]

مافي احد يرد على سؤالي :( ليش ؟!

[حيــــــاة]

^^
اطلعي ودوري ،،
رديت : )

[hind98]

لحظه حياه تحطمت
طيب اذا هم عارفين انو ماراح انقبل انتظام
ليش مايقبلوني اوردي ع الانتساب بدل مايضيع وقتي
لانه انا كنت بدرس ع حسابي بس وقفت هالسنه بسبب وفاة والدي
فأتاخرت بما فيه الكفايه صارلي ثلاث سنوات من تخرجت وبالنسبه للقدرات والتحصيلي انخبص مخي
ع ماجبت فيهم 78
اعيدهم تاني احس معلوماتي طارت
وكم اجيب عشان انقبل
الله يسعدك وضحي لي

[alkozy]

حياة
ياشيخة ربنا يفتحها بوجهك دنيا واخره 😄
ماتدرين كلامك عن اللي انقبل قد ايش ريحني
انا من الصباح على اعصابي وبقمة اليأس، والحين بس اكتشفت انه وقت اليأس ممكن تسوي شيء انت متاكد مليون بالمية انه غلط بس من قوة اليأس حتسويه لانك كارهه الشيء خلاص
ارسلت ايميلات للجامعات مع انهم لسه ماردو علي
اما راعي الوزاره من تسعة الصبح وانا اتصل لين لقيته ع الساعة 12 رد علي وقالي دق بعد الصلاة وبعد الصلاة اختفى ثاني
بس معليه ان شاء الله بادق بكرا ثاني وثالث

بالنسبة للي حصلت له نفس مشكلتي
يعني انتظر اعلان قبول الملك عبدالعزيز ولا قبلوني ساعتها اروح للاسلامية او ينبع الجامعية اللي جاني فيها قبول واخد منهم الخطاب وبعدها خطاب عزوز واروح للرياض وزاره التعليم العالي ؟
وهالكلام اسويه الحين ولا عند اعلان النتائج سواء 7 رمضان ولا الترم الثاني ؟ وحتى لو كان اسمي ملغي دام نسبتي اعلى من اللي قبلوها وجبت لهم العذر راح يقبلو ؟

ادري تعبتك كثير بس محد ساعدني للان قد ماسعاعدتيني او شرحتيلي فمالي غيرك بعد الله 😁

اللي انا كنت خايف منه ان اسمي ينحذف من عزوز عشان جاني قبول بجامعات ثانية والجامعات الثانية رت علي برضو لاني ما استكملت اجراءتها
وبكذا باضطر اسجل من جديد في عزوز او عغيرها السنة الجية وبطبيعة الحال القبول يتاخر ترم او اكثر
هنا كانت بتجيني الجلطة يوم اوصل بتفكيري لدي المرحلة
لاني الريدي نتاخر بدراستي من الابتدائي اكثر من 3 سنوات
فماعندي اي استعداد اضيع وقت اكثر :(
بالنسبة انه كل مصيبة خيرة هالشيء مؤمن فيه ولله الحمد وتاخري من الابتدائي نفسه كان خيره
بس خفت انه الخيرة دي المره اني اتحطم وما اكمل هههه
كلامك ريحني شوي، او كثير بالاصح 😂
ربي يرزقك الجنة
الحين ننام < مواصل من امس وماقدرت انام

[حيــــــاة]

المشاركة الأصلية كتبت بواسطة hind98 لحظه حياه تحطمت طيب اذا هم عارفين انو ماراح انقبل انتظام ليش مايقبلوني اوردي ع الانتساب بدل مايضيع وقتي لانه انا كنت بدرس ع حسابي بس وقفت هالسنه بسبب وفاة والدي فأتاخرت بما فيه الكفايه صارلي ثلاث سنوات من تخرجت وبالنسبه للقدرات والتحصيلي انخبص مخي ع ماجبت فيهم 78 اعيدهم تاني احس معلوماتي طارت وكم اجيب عشان انقبل الله يسعدك وضحي لي

اولاً ،،
" رحمة الله عالوالد واسكنه فسيح جناته "
.،.

لانه مفروض انتِ من البداية دام عارفه موزونك اقل من 90 مفروض تحطي انتساب وماتنتظري الانتظام ،
خريجة متى ؟
لو خريجة 30/31 هذه السنة اخر فرضه كانت للقبول انتظام ،
يعني السنة الجاية كمان ماتقدري <<لانه من شروطهم انه مايعدي على تخرجك اكثر من ثلاث سنين >>
بس الانتساب ماله وقت يقبل اي سنة تخرج .

انتظري لـ 7 رمضان ،، ممكن يكون الفرز بجد ويقبلوكي انتساب طالما نسبتك ماتدخلك انتظام ،
كلها كم يوم ونعرف كل شيئ ،

موفقه : )