مشورة من اهل الخبره في مستقبلي!

[ندى محمد القحطاني]

السلام عليكم


احترت اسأل بأي منتدى

واستقريت اخيرا على منتدى الجامعه



ان شاءالله القى اجابات شافيه

موضوعي حيكون فضفضه واستشاره بنفس الوقت


تحملوني لو طال الكلام

واتوقع الكثير هنا يعرفني لاني خبرة في التقديم للماستر والرفض المستمر

انا خريجة اقتصاد منزلي - قسم دراسات طفوله


بصراحة هالقسم كانت دراستي له لمجرد المتعه ... مافكرت ابدا في (الوظيفه المستقبليه لهالقسم) لان زوجي كان رافض العمل وقتها


بعد تخرجي مريت بفترة صرعات زوجيه لين ماوافقت الحكومة الزوجيه بإني اكمل مسيرتي واتوظف


توظفت معلمة رياض اطفال في مدرسة اهليه


واستمريت سنه ولا كملت

وتعقدت من سيرة التدريس والتحضيرات والموجهات وكل شي يخص كلمة ( معلمة)

خلال هالفتره اخذت دورات كمبيوتر في الجرافيك و icdl

بدأت بعدها ابحث عن عمل اداري في اي مدارس اهليه او جمعيات خيريه او مراكز فئات خاصه


وللاسف مجرد مايعرفون تخصص البكالوريوس يصرون على تعييني معلمة رياض اطفال او معلمة فئات خاصه او يقولون مافي احتياج


قررت بعدها اني اغير مجالي الوظيفي بدراسة الماستر


قدمت على ماستر حاسبات ...قدمت على ماستر ادارة اعمال ..قدمت على ماستر تقنيات ..

ولا تم القبول والحمدلله

درست 5 مستويات لغة انجليزيه وطورت لغتي ماشاءالله تحسنت كثير

اجتزت اختبار الستيب واختبار بديل التوفل

وجبت في القدرات 67 وناويه اعيده بإذن الله


الحين طموحي اني بعد هالحوسه ابغى تخصص مرموق وبنفس الوقت يكون مكتبي وبنفس الوقت مايكون كريه على قلبي


وبنفس الوقت ابغى وظيفة حاليا تسد شعوري بإني مالي اي دور بين الناس

اكون متحمسه واقول خلاص يابت كفاية نوم في البيت واقدم على المدارس ويقبلوني كمعلمة واقول خلاص راح اكمل فيها

لكن الصباح انواااااااااااااع التحطيم والكره للتدريس والشعور بالكسل وعدم الرغبه في الوظيفه
وانام و يستمر مسلسل النوم في البيت


طيب انا فعلا تحطمت وكرهت حالي واتمنى اصل لوظيفه احس فيها بانتماء وراحة



غلطتي الكبيره والفادحه اني درست في الجامعه لمجرد المتعه .. وماكان عندي طموح وقتها


المشكله حتى وظيفة عميده بالجامعه راحت علي لانهم الان مايقبلون غير اللي عمرها اقل من ال30

وانا افتتحت العقد ال30 قبل سنه يعني فقدت الامل في وظيفة معيدة

فكرت في عدة اتجاهات ...


اول شي فكرت في دبلوم تخاطب ونطق .. في كلية دار الحكمة ...

لكن هل عملي في هذا التخصص راح يحتم علي اني اشتغل بمراكز الفئات الخاصه الصغيره اللي راتبها 1500 او 2000؟؟

او اكون مضطره للعمل في مراكز الفئات الخاصه الكبيره لكن مختلطه ؟؟


ثاني اتجاه .. فكرت في دراسة ماستر توجيه وارشاد لسببين :

ان تقنيات تعليم وهو المسار المفضل لقلبي ...
نسبة قبولي فيه ميئوسه نظرا لعدد المتقدمين لهذا القسم ونظرا لعدد سنوات خبراتهم مقارنة بسنة واحدة خبره لي

+ ان معدل القدرات عندي يعتبر اقل من المتوسط

ولقيت ان الارشاد تخصص حلو ومستقبله الوظيفي يناسبني نوعا ما اكثر من الادارة التربويه

يعني اتعين كمرشدة طلابيه او كمرشدة اجتماعيه في مراكز فئات خاصه او مدارس حكوميه




ثالث اتجاه ... ماستر مهارات اتصال ..في الماستر العام

لكن ماعرف ولا شي عن مجاله الوظيفي .؟!!

وغير انه هالتخصص سمعت انه سنوي ومااظن راح يفتحونه في التقديم الشهر القادم لانه كان مفتوح في اخر تقديم


اسئلتي :

1-باي اتجاه تنصحوني اقدم ؟

2-وحاليا هل اقبل بالعمل مؤقتا معلمة رياض اطفال ؟؟
مع العلم ان نفسيتي صارت تكره شي اسمه تدريس في مدرسة اهليه ؟؟ بدون مبالغه صارت عندي حالة نفسيه
والحين عندي بكرا تحضير لدرس في مدرسة يبغون يشوفوني ..
وماااااااالي نفس وحاسة بضيقة واخاف اروح ويقبلوني وبعد يومين اكنسلهم وكأنك يازيد ماغزيت

3- ايش النقاط اللي ناقصتني ؟ هل تنصحوني بدورات معينه ؟؟ هل تنصحوني بمجال ماخطر على بالي ؟ هل تنصحوني بتطوير نفسي في مجال محدد ؟؟



تراني قربت اصير مثل هذا