✿!{.. آراءكم في الدكتورات |{للطالبات}ﾟ¨ﾟ*

[مزاحمتهم]

المستوى الرابع

المحاسبة 2 : د.لاريسا ، جنسيتها يمكن امريكية مو متأكدة .. الأكسنت حقها واضح وتحاول تبسط الكلام وتحل بيدها كل مثال بالسلايد .. بالبداية كنت اشوفها بطلة لكن بالشباتر الأخيرة كنت اضطر أحضر كلاساتها بس صورة و أعتمد على نفسي كثيررر .. المادة نفسها مو صعبة لكن مو سهلة بنفس الوقت ..

التحرير الكتابي : اسهل و ابسط من المهارات اللغوية ، و تحسي أنه حتى لو دخلتي الاختبار وفيه أشياء ما مداكي تمسكيها حتمشي وتحلي .. دكتورتي كانت سهير .. طيبة و وشرحها تمام.. و تدي النشاط اهتمام ..

مبادئ الادارة : اخذتها مع أ. صبا .. تشرحلنا سلايد سلايد و تدي مثال مو بس تقرأ .. المادة عيبها أنها نظرية والكلام صح سهل ومفهوم بس دش .. مع أ.صبا ما حسينا بذا الشي بالكلاس لأنها كانت تدي أمثلة و تفهم .. لكن بالمذاكرة كنت أطفش صراحة ههههههه بس كلام كلام .. ماهي ممتعة .. ويختلف من وحدة لوحدة.

الاقتصاد الكلي : هذا شي ثاااااااني .. مع د.حاجة إبراهيم .. شرحها يبرد القلببببب و تفهمك قد ما تقدر.. المادة نفسها خفيفة وممتعة وتدخل المزاج.. ما كان فيها مشروع بس أدتنا ملزمة أسئلة وقالت حلوها وحددت لنا يوم لتسليمها ..

الانجليزي2: د.عائشة .. جنسيتها أسيوية .. منظمة و تغير الجو وتجلس تتحاور مع الكل وتمزح وتكنسل كلاسات .. تساعد وتراجع معاكي الواجبات الللي سلمتيها و حقانية بالدرجات ..

ثقافة 1 :
اخذتها مع ا.معتوقة .. كان نفسي أستفيد من المادة .. بالبداية كانت الكلاسات الأولى مو قد المطلوب بس تلقين كلام .. وما كنت اسمع كويس لأني أجلس ورا وهيا مرتبتنا بالأرقام ورقمي كان بالتسيعينات .. سبحان الله بعد الميد الأول اتغير كل شي .. الصوت صار أوضح و بدت تجيب قصص صحابة تتناسب مع الموضوع وتسويلنا تفاعل بنقاش .. صرت أتحمس لكلاساتها ..

[مزاحمتهم]

المستوى الخامس


إعداد التقارير: مع د.صايمة .. دكتورة طيبة و تشرح كويس .. جنسيتها باكستانية ,, بالها مرررة طويل وتسمع للبنات وتديهم زمام الأمور ههههه ( متى تبوا الليسينينق ؟ متى تبوا تسوو ا العرض ؟ .. كله كان بمشورتنا ..) تراعي بالدرجات و تعاملها أخلااااااااق ..

التمويل : ا د.خديجة حريري .. خطيييييييييرة وتشرح كل شي وتربطلك إياه بالحياة و أشياء كثيرة حتخرجي بها من الدكتورة .. حاولي قد ما تقدري تأخذي معاها .. طيييبة وتسمع للبنات ولأسئلتهم ..

ثقافة 2 : موضوعات ثقافة 2 جممميلة و مفهومة ومفيييدة .. أخذتها مع ا.منال باجابر .. مررة كلاسها رائع باستشهاداتها و بقصصها.. أسلوبها بالشرح بسيط لكن يلصق بالدماغ .. حتتذكريها كثير وانتي تذاكري .. النشاط تعبتنا شوية فيه .. ولما كنت أقولها انو تدينا فرصة ووقت لأنهم زنقونا ..كانت تقول مو بيدي الكلية حددت خلاص ..

نظم معلومات: أخذتها مع د.شيماء .. ما أحب الحاسب و شغل البرامج والأجهزة والأسلاك بس معاها كان غيررررر.. بالكلاس شرحها خطير الله يسعدها ولو سألتيها تجي إلين عندك وتجاوبك .. مررة طيبة و أخلاق و حقانية مرة بالدرجات و تقول أنا ضد البونس ..شيماء وخديجة حريري حق التمويل ما يتعوضوا .. حاولي معاهم تنزلي ..

مانزل معايا التسويق :(
فنزلت مادة حرة ..

فلك عام 201: أخذتها مع د.علاء الدين .. المادة سهلة وعبارة عن أربع ابواب .. الدكتور كان يقول : أول باب أصعب شي لأنه فيه معادلات وشغل ..أما الأبواب الأخيرة سهلة عن كواكب المجموعة الشمسية و الأرض والقمر .. الباب الأول ماكان صعب زي ماقال .. معادلات بسيطة و قوانين مباشرة وهوا كان يشرح بأمانة و يراجع أحيانا اللي اخذناه قبل .. مرررة الدكتور يساعد ويدي بونس ويعيد إختبارات .. وشرحه ممتاز ويقولك خلال الشرح ايش الأشياء اللي تركزي عليها و انتي تذاكري ، وهذا الشي يسهل علينا مرة ..

[اكريلك]

السلام عليكم

بنات الله يسعدكم مين عندها فكره عن الاستاذات انا لسا جديده ومني عارفه احد

لبنى عيد محمد الطيب احصاء
و
منال محمد كامل حموده ، غاده عثمان عيد الجحدلي مبادئ محاسبه
و
مها عبدالعزيز يولداش الانديجانى مبادىءالا قتصاد الجزئي

[الهيملي]

المشاركة الأصلية كتبت بواسطة اكريلك السلام عليكم بنات الله يسعدكم مين عندها فكره عن الاستاذات انا لسا جديده ومني عارفه احد لبنى عيد محمد الطيب احصاء و منال محمد كامل حموده ، غاده عثمان عيد الجحدلي مبادئ محاسبه و مها عبدالعزيز يولداش الانديجانى مبادىءالا قتصاد الجزئي

استخدمي محرك البحث قد تجدين الإجابات

http://www.google.com.sa/cse?cx=part...&ss=#gsc.tab=0


بالتوفيق.

[dode699]

السلام عليكم

كيفكم بنات

حابه اسالكم ايش رأيكم في دكتوره عائشه معيض الريعي تدرس المدخل الى علم النفس

وشكرا

[najmah]

بنات ربي يسعدكم

اراءكم :)
د. أمل دمنهوري تحليل كمي
د. خديجة حريري أساسيات تمويل

وبالتوفيق للجميع

[shosho-9]

المشاركة الأصلية كتبت بواسطة najmah بنات ربي يسعدكم اراءكم :) د. أمل دمنهوري تحليل كمي د. خديجة حريري أساسيات تمويل وبالتوفيق للجميع

د.خديجة حريري ♥️ شرحها مررررة كويس واخلاقها كمان وتربط الشرح بالواقع وتعطيكي معلومات مرة مفيدة
يعني من جد تخرجي من محاضرتها فاهمة
وفي الدوريات والنهائي تعطيكي ورقة اسئلة خارجية ( اختيارية ) تكون بونس

[najmah]

المشاركة الأصلية كتبت بواسطة shosho-9 د.خديجة حريري ♥ شرحها مررررة كويس واخلاقها كمان وتربط الشرح بالواقع وتعطيكي معلومات مرة مفيدة يعني من جد تخرجي من محاضرتها فاهمة وفي الدوريات والنهائي تعطيكي ورقة اسئلة خارجية ( اختيارية ) تكون بونس

الله يسعدك طمنتيني طيب كيف المادة وشرحها إنجليزي كلوو ولا بالعربي

الأسئلة الخارجية قصدك للي يبغى يحسن درجاته يختبرها ...

وشكرا ع المعلومات

[shosho-9]

المشاركة الأصلية كتبت بواسطة najmah الله يسعدك طمنتيني طيب كيف المادة وشرحها إنجليزي كلوو ولا بالعربي الأسئلة الخارجية قصدك للي يبغى يحسن درجاته يختبرها ... وشكرا ع المعلومات

المادة حلوة ومهم انك تحضري المحاضرات لانها فهم
عادي تشرح بالعربي و كمان بالانجليزي
واذا ما فهمتي شي اساليها عادي تعيدلك الشرح لين ما تفهمي
ايوا هيا توزع اسئلة بونس مع الاختبار عشان تحسن الدرجات
وهيا اول محاضرة حتقول على كل شي
اول محاضرة يمكن تكون شديدة شوية عشان البنات لا يستهترو بس بعدين مافي احسن منها

[شوآقي]

السلام عليكم

بنات ايش رايكم فـ

نسرين ملا لـ خدمه مدنيه

مرام ماهين الاتصال في المنظمات العامه

سوزان القرشي بحث وتدريب عام

رجاء الخواجي اداره الجوده في الاجهزه الحكوميه

سلوى اعظم اداره محليه

متخوفه من سوزان ورجاء مدري ليش

كيف المواد مع بعض تمام ؟

انا ماشيه ع الخطه بس ماده خدمه مدنيه و اداره محليه اجلتها من اول

وجزاكم الله خير