خ َـواطر ッ

[M7mmd.Y]

*

كل اجازة بنفس الطريقة:

اول الأجازة اكون متحمس وابغا ارجع للدراسة، واجلس افكر في المواد اللي حنزلها واسأل عنها

في نص الاجازة يبدأ يقل الحماس شوية، بس وقت الحذف والاضافة يرجعلك شوية حماس + خوف من المواد

وفي آخر يوم من الاجازة تحس انك تبغى تبكي :'\

مالي نفس :'((

~ true story :p

[M7mmd.Y]

# 10 حاجات تفقع مرارتي في الفيسبوك:

1. واحد يسوي بوست "status" وبعدين يسوي لايك لنفسه! زي هنا يسوي موضوع ويقول لنفسه شكرًا

2. لما ادخل ملف واحد والاقي مكتوب في المكان المخصص لذكر العمل او الدراسة:





3. اللي ما يركز في خلفية الصورة حقتو... بقالة - مطبخ - افياش - دولاب مكسور أو حمام - اكرمكم الله -

4. الصور حقت الشباب اللي عليها كتابات مالها أي معنى وابتسامات وبخط كبير والوان فاقعة

5. الـ بي بي...! لازم ينحط في كل الصور + البروفايل، وممكن يتصور جنب سيارته اللي حاط عليها برضو الرمز

just in case ...

6. شخص اضافك ومو مرة تعرفه وبس يسويلك تاق على الصور اللي مالك علاقه فيها

7. " الصيادون " .. ناس يحطو صور ويقولو تعليق سلبي عن نفسهم ومنتظرين الصيد، لايكات وكومينتات

8. اللي يحط معلومات بدون أي توثيق، وبدون حتى توثيق لكلامه تعرف انو الكلام غلط × غلط

9. اللي يسوي بوست ويُقسم عليك تسوي لايك، وحاليًا صار يدعي عليك لو ما سويت لايك او شير

10. اللي يتصور بنظارة شمسية في الليل.......

ولسه كثيييير بس كفاية عشرة

[M7mmd.Y]

*

الحمدلله الترم دا المواد تخصصية كلها، عشان كدا شايف الموضوع ممتع... لكن ما في شي يكتمل

كل الدكاترة باكستانيين :|

واللغة مرة معدومة، الـ V ينطقوها W، والـ R حالتها صعبة كمان معاهم... عاد نطق الأرقام فلم تاني

عندي مادة تعتبر اهم مواد القسم ولازم تفهمها، عشانها مرتبطة بكل المواد وبالشغل كمان

بس المشكلة مو هنا

المشكلة ان دكتورها يتكلم انجليزي بسرررررعة لدرجة انو تحس كأنو جالس يتكلم اردو :\

ومادة ثانية الدكتور ذلنا فيها، كل ما يقول شيء ومحد يجاوب يقول هذي ياخذوها اصلا في الابتدائي

ولما يجي يحل مسائل، معتمد على اننا فاكرين قوانين phys110 + chem110 + phys202 وبعض الثوابت

ويشرح علطول بدون ما يوقف ولا يقولنا من فين جاب القانون

مو داري اننا مو فاكرين حتى ايش كان موضوع المحاضرة اللي قبلها :\

[M7mmd.Y]

^

ابغى اكمل عااااد .. :\

معمل الكيمو، كنت اسأل الطلاب يقولو المادة حلوة وسهله، لكن اللي في المعمل رح يكرهك عمرك

في البداية قلت: قد ايش حيكون سيء يعني...

واليوم اكتشفت

جا متأخر وقال معاكم مذكرة المعمل؟ واللي ما معاه يروح يجيبها، بعدين جلس على مكتبه

- قدام السبورة فيه كرسي ومكتب وكمبيوتر -

وقال قربو مني، المهم احنا واقفين وهو يشرح وهو جالس، قلت وقت التجربة بنلاقيه جنبنا

للأسف لقيت انو احنا لوحدنااا، جالسين نسوي كل شي مع نفسنا، وهو يقول شوفو اللي في المذكرة وسوو مثله

واصلا ما اقدر اقول انه " شَرَح "، كل اللي سواه انه اتكلم عن ثابت رح نستخدمه في القانون وعن خطوة واحدة بس

واللي يقهر انو لما تروح تسأله عن شيء، ما يعجبه الموضوع، ولو كثرت اسئلة يعصب ويعلي صوته

مني فاهم ايش دوره في المعمل بالضبط، عاد ما اقولكم على اسلوب الكلام نفسه

اللي يقهر كمان اني رحت اسأله عن شيء لقيتو جالس يلعب سوليتير!!!



واليوم اول معمل في المادة

الله يعين بس

[M7mmd.Y]

المشاركة الأصلية كتبت بواسطة الشيخ العريفي گلمتنيَ أمرأة تقول : انها مسحورة، وقد أقسم من سحرها أنها لن تتزوج قلت لها: عندي علاج لكن ھل ستصبري عليـہ ؟ قالت: نعم أصبر قلت لها :أنا أقسم بَالله إن أخذتي العلاج تتزوجين وبالرغم عن السحر ومن وضعھہ ! قالت: مالعلاج ؟ قلت: (حسبي الله ونعم الوكيل ) گرريها وأنتي موقنة بھا ! يقول: واللـہ گلمتني بعد شهر تقول : أبشرگ بأني ملكت وزواجي قريب! قلت : گيف ؟ قالت: ۆاللـہ ما زلت أگرر [ حسبي الله ونعم الوكيل ] فھي رسالـہَ لگل مھموم، ۆمغموم ومظلوم ۆمريض ۆمديون ۆعقيم ۆمحزون ۆأسير

حسبي الله ونعم الوكيل

[M7mmd.Y]

Just my precious family ...




ههههههههههههههه اخويا بدأها وامي صدقت، صارت مضاربة عالفاضي :\

[M7mmd.Y]

*

صارت جَمعة في البيت ورحت اجيب البيك، والناس كانو منتظرين يفتح بعد العشاء، والفرع فيه قسم نسائي

كانو الحريم اقل من الرجال بشوية، ولما دخلو الرجال المطعم كله امتلى بحجمه الكبير، ولقيت ناس ينتظرو برا

والشيء الغريب ان العدد المهول من الحريم كلهم دخلو القسم تبعهم اللي مساحته تقريبًا مترين في مترين،

ولا شفت ولا واحدة واقفة برا زي الرجال ... كيف بتسوو كدا ؟؟!!

[M7mmd.Y]

*

التغيير يبغاله قوة وارادة، وتختلف بإختلاف الشيء اللي تبغى تغيره، فـ التغيير اللي ابغى اسويه تغيير جذري

يبغاله ارادة شبه خارقة! .. لكن خلاص، حان الوقت يعني...

كمان الفترة هذي عندي ضغوط من كل جهة، ضغوط من الأهل، من الدراسة، ومن شيء كمان مسببلي قلق...

وزيادة، الاسبوع الجي فيه شيء بالغ في الأهمية،

ما صرت اتهنى في النوم من كثرة التفكير فيه،،،

احس اني ماشي، ولا داري انا فين رايح... احس اني مقتنع بأشياء مستحيلة او غير قابلة للتطبيق

احس اني ما صرت قادر افرق من التوكل والتواكل في هذا الأمر بالذات...

دعواتكم يا غاليين،،

ربي يسهل امركم، وامري

،
اللهم رحمتك أرجو، فلا تكلني إلى نفسي طرفة عين، وأصلح لي شأني كله، لا إله إلا أنت

[M7mmd.Y]

فيه فئة من الناس ما تعرف ايش يعني ضمير، ما عندها امانة في شيء

اتعجب منهم، كيف يقدرو ينامو في الليل؟

فرق بين الشخص اللي تقابله ولو مرة واحدة في حياتك، وتجلس تدعيله كل ما تفتكره طوال عمرك

وبين اللي يخليك تدعي عليه في كل وقت،

اللي يضحك فعلًا لما يجيك الشخص هذا يتكلم عن الأمانة والضمير...؟ ،، عجبًا!

،

احذروا أن تظلموا أو تسيئوا لـ أحد فيكون سلاحه؛ حسبي الله ونعم الوكيل

[M7mmd.Y]

احساس سيء لما تلاقي كل اللي حولك سبقوك وانتا لسه في مكانك،

ربي ما كتب لي هذاك الشيء، والحمدلله على كل حال، قدر الله وماشاء فعل

لكن كل دا انعكس على مستوايَ الدراسي وعلى نفسيتي،

والاسبوعين هذي كويزات وميجورات، وانا مالي نفس افك كتاب..

وفيه واجب طوييييل بكره تسليمه.. وها انا جالس اكتب في المدونة

والله الترم دا زحمة وما اعرف كيف..... يارب يعدي على خير

لكن كل اللي اعرفه اني اشتقتُ لكِ ،، ♥

اشتاقت نفسي لحنان يهدئ اضطرابها، ويسكن قلبي من الصراع،

اللهم احفظها لي، واحفظني لها، واجمعني بها على خير ♥