خ َـواطر ッ

[M7mmd.Y]

،

بعيدًا عن جو الدراما اللي انا عايشها الفترة هذي

حبيت اقول ان مدوناتكم الراقية اصبحت جزء من يومي =)

استمتع بقراءة يوميات " أو حتى اسبوعيات " البعض، وخواطر واحاسيس البعض الآخر

،

احيانًا يكون الواحد متضايق، وادخل هنا الاقي اللي يصبرني، واللي يمر بنفس الحالة

وايام الاختبارات كمثال... لما اطبخ مزبوط في اختبار، وازعل..

اجي هنا الاقي المدونات كلها ماشاء الله زيي

اوقات اكون ابغا اكتب شيء، وادخل، احصل مشاركة جديدة صاحبها اخذ الكلام من على لساني،

حتى اوقات الاحظ تشابه كبير في بعض المشاركات وتكون في نفس الوقت

،

وصلت لدرجة ان الكروم حفظ الصفحة من بين المواقع العديدة اللي ادخلها



،

استمروا في ابداعاتكم وكتابة خواطركم، وجزيل الشكر لمن خصص مدونته لفائدة الغير

شكرًا لكم ♥

[M7mmd.Y]

،

هذا موقع يقدم كورسات مجانية في مجالات كثيرة ومختلفة، مقدمة من جامعة هارفرد ومعهد ماساتشوستس، وكم جامعة ثانية

كورساتهم مفيدة جدًا للي يبغى يتعلم، ويتعمق في تخصصه، اخذت معاهم كورس كيمياء الحالة الصلبة واستفدت منه

https://www.edx.org/courses

الكورسات زي اي كورس في الجامعة، فيها واجبات واختبارات، وكله على الإنترنت

وفي الأخير بيعطوك شهادة معتمدة من الجامعة اللي اخذت منها الكورس، ورح تفيدك مستقبلًا

يعني اتخيل وقت تخرجك يكون عندك شهادات معتمدة من هارفرد وماساتشوستس.. مرة حلو

اسأل الله التوفيق لكم، ولي

[M7mmd.Y]

^

نسيت شي

اذا جيت تسجل في كورس، شوف متى بدأ هذا الكورس، حط الماوس على الكورس وبيجيك وصف مبسط

وتحته متى بدأ،، وبعد ما تسجل في كورس، ادخل بتلاقي تقويم فيه كل شي، مواعيد الواجبات والاختبارات

اتأكد من دا الشيء عشان ما تسجل في كورس ويكون فاتك اختبارات، واحيانا يكون فيه كورسات مكررة

هي مو مكررة لكن كل واحدة تبدأ او بدأت في وقت مختلف،،

درجة النجاح من 60، وما رح تُذكر الدرجة في شهادتك، يعني بس المطلوب انك تعدي الكورس

،،،

ربي يسعدكم

[M7mmd.Y]

،

كنت زمان اسمع ان الواحد لازم يفكر كويس في جميع اموره

سواء كانت قرارات بيتخذها، أو حتى لو كان بيحاسب نفسه

التفكير الكثير سيء، لكن ما صرت عارف الفرق بين التفكير الـ " كويس " والـ " كثير "

صارت تغييرات كثير حولي الفترة اللي راحت، وصراحة ما كنت متوقع أي منها، ودا اللي مسببلي الصداع كله

منها تغييرات كويسة، واغلبها سيئة لدرجة انو ما ينقال عليها مصطلح " تغيير " حتى، وإنما " إنقلاب " ممكن؟

،

الإنسان فعلًا ما يعرف مصلحته، وعقله بأبسط وصف غبي

مهما اللي حولك نبهوك وفهموك، والمشكلة انهم عندهم خبرة اكثر منك، لكن فيه اصرار مو طبيعي من عقلك

يخليك تسوي الشيء الغبي اللي الكل جالس ينبهك منه، وبعدها تستغرب من نفسك.. كيف ما سمعت كلامهم؟

يجيك هذا الـ " جزء " من عقلك ويختلق اسباب وحجج، وما بيسوي كدا إلا لأنو عارف ان الشيء دا غلط،

يُوصف هذا الجزء عادة بالقلب، تحاول تفهم كيف القلب وصل لقراراته الغريبة.. ما تعرف

ويقلك انه متأكد 100% .. أما الجزء الآخر، اللي دايما معاه في صراع دائم وهو العقل...

سبحان الله نفس العضو في صراع مع نفسه، وبسبب هذا الشيء تحس انهم جزئين مختلفين

العقل والقلب؛ القلب يتخذ قراراته بطريقة غير منطقية، وفي رأيي الشخصي، انو يخطىء في اغلب الوقت

ولكن لما يصيب... يكون من احسن القرارات اللي اتخذتها في حياتك

وأما العقل؛ يحتاج لمنطق، ويحتاج خطوات،

اهم شيء عند العقل انه يشوف ويفهم الطريق اللي رح يمشي فيه عشان يوصل للهدف

بينما القلب يشوف الهدف بس، بدون كيفية الوصول له... أو بكيفية ولكن " مجنونة "

ومن هنا ينشأ الصراع بين الأثنين

ما ينفع تتخذ قرار بعقلك لوحده، فيكون قرار قاسي، وما ينفع يكون بقلبك بس عشان لا تنجرح بسببه

ولكن،، مشكلة كبيرة لما يغلب قلبك عقلك..

دائمًا..

[M7mmd.Y]

،

اتذكرت حاجة من الحاجات الغريبة اللي كنا نسويها ايام الأبتدائي

كان كل فصل كأنو عصابة، نمزح ونضحك مع بعض، ولما يجي واحد من الفصل الثاني لازم كلنا نكرهو

خصوصًا لما كان يجي طالب من فصل ثاني يطلب من عندنا مساحة او قلم سبورة،

كان اكثر شي نكرهو اننا نساعد "اعدائنا" قلك .. وتسمع انواع المحشات في الطالب

كان فيه طالب مسكين، يجي بددددررري، وفيه طالب من فصل ثاني يجي في نفس الوقت

كانو يجلسو مع بعض في الصباح، ولما يبدأو الطلاب يجو... تبدأ العداوة

لما كفشوه كم مرة، صارو يقولو على الطالب دا خاين

هههههههههههههههههههه

والله ايام... والطالب هذا لازال صاحبي في الهندسة =)

[M7mmd.Y]

،

موضوع بعيد عن كل شيء،

هذي طرق مختلفة لطلب الـ استيك في المطاعم



اللي استغربه لما احد يطلب الاستيك rare او medium rare

هو يُقال انه اصل الاستيك انك تاكله وهو مو ناضج rare.. بحيث ان يكون بداخله عصارته

بداية قلت كيف الواحد ياكل لحم زي كدا؟ ماله اي ضرر يعني؟ لأن هذا الي اعرفه، وهذا من فوائد طبخه في الاصل

ولكن بعد بحث لقيت انو عادي جدًا ولا يشكل اي خطر على صحتك، بشرط انك تاكله في مطعم محترم

لأنهم يهتمو بنظافة المطبخ والأدوات اللي يستخدموها،

فيه دراسة لعلماء في جامعة نوتنغهام هدفها اثبات اذا كان اللحم الـ rare يشكل خطر على صحة الشخص

المشكلة كلها في بكتيريا تسبب التسمم اسمها Escherichia coli أو E. coli تعيش في أمعاء الثدييات

وهي بكتيريا تموت من درجة الحرارة العالية، يعني مجرد انك تحط اللحمة على النار رح تقتل البكتيريا

فـ هم جربو الشيء دا وبعدها ما انطبخ اللحم النيء وصار rare، فحصوها ولقيو انه لسه فيه بكتيريا

فـ اكتشفو انو خلال طبخ الاستيك كانو جالسين يقلّبو اللحمة بـ لاقط " ملقط " او ايًا كان اسمو

لقيو ان سبب تلوث الاستيك بعد الطبخ كان بسبب اللاقط نفسه، لأنه كان ملوث

فـ بعدها طبخو ستيك ثاني ولكن عقمو اللاقط بالـ إيثانول، وبعدها فحصو الاستيك، ولقيو انو مافيها اي شيء

فـ اثبتو انو لو كان المطبخ والادوات المستخدمة معقمة ونظيفة مافي ضرر عليك لو اكلتها في حالة الـ rare

بينما حتى لو انطبخت كثير لييين ما توصل well done

واستُعملت ادوات ملوثة، برضو رح يكون فيه خطر اصابتك بهذي البكتيريا

عشان كدا لو تبغى ستيك - خصوصًا الاستيك - اختار مكان محترم ونظيف زي ستيك هاوس... إلخ

هذي طريقة عشان تعرف ايش حالة الاستيك المقدم لك



-

http://news.bbc.co.uk/2/hi/health/3743657.stm

http://ar.wikipedia.org/wiki/%D8%A5%...86%D9%8A%D8%A9

.
.

جُعت :|

[M7mmd.Y]

وسبحان مُغير الأحوال، مين كان يتوقع؟

قدر الله وماشاء فعل ،،

*

ليا كم يوم احلم بنفس الشي.. :|

عارف لما تحلم بشيء مرة قلبك يتمناه.. وتصحى للواقع المرير وتكتشف انه مجرد حلم، ويكون نفسك ترجع تكمل

انزاح هم ووجع من قلبي في الحلم، ولما صحيت لقيت كل شيء على نفس حالته

يارب ...

[M7mmd.Y]

،

يؤلمني كثيرًا عدم تواجدك معي، مررت بـ أيام احسست فيها بوحدة قاتلة.. وازداد احتياجي لكِ

احتجتك لتنصتي لي، ما بداخلي يفوق ما استطيع تحمله.. اني حقًا لا ابحث عن حلول او نصائح

كل ما اريده هو انصاتك لي... وتفهمك لمشاعري، بدون احكام مسبقة..

اما عن اوضاعي، فهي متقلبة بعض الشيء، خصوصًا بعد اتخاذي لذلك القرار.. كان سببه انتِ

اتخذته بعدما وجدت سعادتك فيه.. تهمني سعادتك كثيرًا، فسعادتك هي سعادتي

دائمًا سأجعل حبي لكِ وخوفي وحرصي على مصلحتك اولًا، وسأسعى لتحقيق احلامك، قبل احلامي

كوني بخير لأجلي فقد اشتقت اليكِ

،

وبالنسبة إلى شخصيتي الخيالية، فقد حان لقاؤه بصاحبة المظلة الصفراء .. :)

[M7mmd.Y]

*

كل ما اقول الجملة هذي لأصحابي احسهم يبغو يلطشوني

بس حاسس الترم عدى مررة بسرعة :|

صح انكرفت برضو، لكن فيييين الترم الأول اللي جلس سنة احس، عادة الترم الأول يكون اطول

لكن يعني تحس بالترم الثاني، اما السنة هذي الموضوع كان غريب :>

\\\

رسائل مجهولة المصدر توصلني على الواتساب

" لا تنسى تجيب .... - طلبات - " / " لا تفوت اول نهائي للإتحاد بدون نور " وانا قدني ما اطيق الكورة

واصحابي نفس الشيء، مني متأكد مين الشخص دا، ولا يرد لما اكلمه... قلت ممكن برود كاست،

لكن اكيد ما حيرسل لست مقاضي البيت برود كاست..

احيانا لا يجد الإبداع الكافي، فـ يكتفي بـ " كمتشصق ؤبماقد " ،

ومرة يكتب جملة ولكن ما تزال غير مفهومه " ما ينفع تروح وانت كاشف وجهك "

ويفاجئني بـ اهتمامه بي " لا تكثر شرب مويه قبل النوم "

وبعض الأحيان شوية رومانسية.. " وحشتني يا قلبي 3> "

ولو اني حاسس انو واحد سامج اعرفه دوبو مطلع رقم وجالس يفل على حسي

ودا الشيء اللي موقفني اني اسويله بلوك :\

بسوي حركة ومنها رح اعرف اذا كان الشخص اللي في بالي، لو مو هوا، علطول بسوي بلوك

[M7mmd.Y]

،

الشيء اللي فيه بعض الناس ما تفهمه، انه فيه فرق بين الذوق وبين الأدب.. ممكن يكون بينهم اختلاف شاسع في المعنى

لكن بالنسبة لي، الذوق هو اعلى مرتبة في الأدب

لما تمشي ورا واحد وداخلين محل كـ مثال، ويفتح الباب ويمسكه لك عشان تدخل، هذا اسمه ذوق

الأدب انه يفتح الباب وينتظرك تمد يدك عشان تمسك الباب بعدين يتركه

وفيه انسان اخلاقه جدًا عالية وقمة في الذوق، هذا اللي اذا شافك شايل اكياس كثير

يقوم يتحرك من مكانه ويفتح لك الباب عشان تخرج..

وشخص مختلف ومميز، تقعد تصارع الباب قدامه ولا يتحرك حتى، او مثلا كنت وراه ودخل قدامك، يرجع يُدف الباب عليك > تصير

/

اشتريت مقاضي البيت، وتبغى احد يساعدك في شيلها من السيارة

- جار ذوق مُصِر انه يشيل المقاضي لين باب الشقة

- وجار مؤدب يشيل المقاضي لين المصعد

- وجار يسوي كأنه مو شايفك

/

كنت في مطعم، من المطاعم اللي يكون الخدمة فيها ذاتية وشايل معاك الأكل والطاولات كلها فُل

- شخص منتظر صاحبه يجيب الأكل، ف يشوفك، فـ يقوم عشان يعطيك طاولته

- شخص يعرض عليك الجلوس معاه لين ما تلاقي طاولة وتقوم

- شخص مخلص اكل وكل شيء لكن ماسك الطاولة، وانت قدامه واقف وشايل الاكل في يدك

/

اما المثال الأخير دا فـ مختلف.. بحيث انه ما صار ادب، وذوق، وإنما واجب

وشفت الحالات هذي بعيني.. مو كلها في نفس الوقت

- واحد خارج من محل مع زوجته ومتوجهين للسيارة، وسايب زوجته تشيل طفلهم والشنطة وكم شيء في يدها.. ولا هي قادرة..

وهو زي الملك رايح للسيارة وركب، ولا حتى ساعدها تركب او شال منها الحاجات.. كان ممكن تقله يساعدها

بس هذا شيء المفروض انه مافيه كلام اصلًا

- شخص خارج وشايلين حاجات في يدهم " مو كثيرة الأكياس " بس مقسمينها بينهم، ولما قربو من السيارة اخذ كل شيء منها

وهي ركبت السيارة

- شخص خارج معاه كل الأشياء، وهي مو شايلة غير شنطتها، وهو خرج يسرع في مشيه عشان يوصل السيارة قبلها

حط الحاجات على شنطة السيارة، ورجع فتح لها الباب عشان تركب، بعدين رجع يحط الحاجات داخل السيارة..

/

الأمثلة والمواقف كثير، ويوميًا تصير لنا ..

وفعلًا، فيه ناس معدومي الذوق والأدب.. زي اللي تمر به مواقف كثير زي اللي فوق ويكتفي بـ " ايش دخلني؟ " ، "ماله يد هو؟"

بينما فيه ناس يحرجوك بأخلاقهم وتربيتهم، وهم قلة، وعرضة للإنقراض

هذولا القلة هم اللي يحسسوك انه لسه فيه امل في الحياة