الأسئلة والاستفسارات عن كلية طب الأسنان ..

[Dr~NanoOok]

وعليكم السلام والرحمة

بالنسبة لمشروع التخرج وعن طبيعته.. اذا كان على حالات او مواضيع معينة
فما عندي خلفية عنه

لكن اعرف انه بسنة سادس لازم نمسك حالة شاملة.. ونعالجها من بدايتها لنهايتها وتحوي على جميع انواع علاجات الاسنان
من علاج اللثة و التسوس و الخلع و التركيبات ثابتة او متحركة
غير حالات تقويم الاسنان

وكل طالب لازم يمسك حالات شاملة زي كده واللي نسميها ccc
عدد 3 حالات او اكثر

[Dr~NanoOok]

عزيزتي No_one

تسلمي على الذوق و التوضيح

انا شفت موضوعها بالصيدلة .. وكالجميع ازعجني اسلوبها وكان خاطيء وغلطت على القسم
لكن متأكدة انها كانت عن غضب واذا هديت حتتأسف من الكل إن شاء الله

لانها لما كلمتني.. وكتبت الموضوع هنا
اسلوبها صار افضل و بأدب

على العموم الله يهديها و يوفق الجميع للخير

[شفع]

مشكورة .. نورتي والله يسهل لك

[yaa raab]

السلأمعليكم

يارب تكونون بخير ياخواتي واخواني
انا حبيت اسال سوال او استفسر بس لاحد يفهمني غلط والله انا اسال وانا مقهوره
الان انا دخلت تحضيري واتمنى اتخصص طب اسنان ونسبتي بااختبارات الثنوي مره تشرف بس ابويا مو راضي يقول فيلو اختلاط (الفكر القديم )
انا اعرف انو طلا الطب البشري عندهم اختلاط في المستشفى الشباب والبنات بس هل برضو طب الاسنان كذا؟
واذا فيه اختلاط كيف حيكون يعني اشرحولي ممكن اقدر اقنعو وادرس وانا مرتاحه

[Dr~NanoOok]

وعليكم السلام والرحمة

أهلا بك أختي ..

الدراسة داخل الكلية تكون منفصلة تماما عن قسم الأولاد
كليتنا تحت إدارة نسائية وكلنا حريم وبنات ونكون بدون طرح أو عبايات

بعض المواد يدرسونا دكاترة رجال.. يكون تواجدهم داخل القاعات والمعامل فقط
وقبل ما يدخلوا يعطوا خبر عشان الكل يغطي ويلبس الطرح

ونفس الشي بالمعامل يتواجد دكاترة رجال يعلمونا

نجي للعيادات ..

الطالبات يكون لهم دور كامل لهم منفصل عن الأولاد
الأولاد الدور الأرضي.. والبنات الدور الأول

بالنسبة للعلاج.. احنا ملزمين بعلاج النساء فقط.. ما عدا في حالات الأطقم الكاملة (غالبا اعمار الرجال يكون فوق الـ 50 سنة )
وهم الوحيدين اللي نعالجهم كرجال ..

ونفس الشي الأولاد..

وخلال العيادات يكون الدكاترة المشرفين علينا متواجدين ..

إن شاء الله أكون وضحتلك .. وأي استفسار تاني اتفضلي شاركينا بيه

[yaa raab]

الله يبشرك بالخير ، يعني مايكون فيه اختلاطباي شكل اكيد!؟

[hadeel a]

Dr~NanoOok يعطيها العافيه جاوبتك عن سؤالك ..
ادا أنت حابه طب الاسنان و تبغي تدخلي بس ركزي في دراستيك و حطي في بالك انك تخلصي التحضيري بمعدل عالي يدخلك ده القسم لان انا شفتك كاتبه موضوع تاني في قسم الطب البشري ..
أنا كنت زيك وكنت أبغا اطب اسنان وماكنت اتخيل نفسي ابدا أن ادخلو مو لاني كسلانه ولا شي .. بس لان عارفه أن قسم طب الاسنان بياخد اكتر معدل و و كل اللي حولي يبغو طب اسنان .. و جلست أحاول أقنع نفسي بتخصصات تانيه و جلست أحاول أحبب نفسي في الطب البشري عشان لو ما اتقبلت اسنان .. و في النهايه الحمدلله أنقبلت أسنان و كان في فرق كبير بين نسبتي و أخر نسبه أنقبلت ..
طولت عليكي بالكلام بس أنا بأوصلك أن لو تبغي شي حطي قدامكو وفكري في و بس وداكري كويس بالتحضيري و حاولي أن مداكرتيك تكون باخلاص و فهم و دايما أدعي وتوكلي على الله في كل شي .
يارب يسهلك و ييسرلك و تجي السنه الجيه و تقولي أنك انقبلتي اسنان .

[Dr~NanoOok]

المشاركة الأصلية كتبت بواسطة yaa raab الله يبشرك بالخير ، يعني مايكون فيه اختلاطباي شكل اكيد!؟

الاختلاط لابد منه بكل مكان
لكن له حدود وضوابط ..

وبما اننا في مركز صحي سواء مستشفى أو عيادات أكيد حيكون هناك بعض الاختلاط

لكن كصورة مباشرة.. والفكرة اللي يتدوالها الناس عن طلبة الطب وحالهم ..
فهي ليست كذلك

ما أنكر اننا نحتاج نتواصل مع أولاد دفعتنا.. بما أن دكاترتنا اللي يدرسونا هم نفسهم والاسئلة موحدة ما بيننا وبينهم

نتواصل معاهم عن طريق منتدى.. او اننا نوصل لهم ملازم واغراض وهكذا

تعاملنا يكون على أساس "زملاء عمل ودراسة" وهذا موجود بكل مكان

[amiwa]

شكرا د.نانوك عالتوضيح^^
بس طيب في المستشفى خلاص لمن الواحد يتوظف؟ اللي اشوفو انو عادي اختلاط، بس ينفع الواحد يحدد، مثلا اذا وحدة ما تبغا تشتغل الا على حريم عادي؟ ولا ما ينفع؟

اختي كاتبة الموضوع^^ ممكن تقولي لبابتك الكلام اللي قالتو د.نانوك + انك مثلا تفكري تتخصصي بعدين ان شاءالله "أسنان أطفال" عشان لا يقول شي عن الاحتكاك بالرجال وكذة >< ان شاءالله يقتنع ياااااااااارب
والله يكتبلك اللي فيه الخير ؛)

[Dr~NanoOok]

أميرة
حلوة فكرتك لأقناع والدها ^_^ تقوله عن تخصص الأطفال وإن شاء الله يرضى مبدئيا

أعرف أكتر من بنت.. اهلها وعيلتها كلها ما اكنت موافقة على انها تدخل طب عشان الاختلاط والعمل بعدين
لكن سبحان الله اللي غير الأحوال.. وصارت أمها وأبوها أكثر الناس المؤيدين لها.. حتى انهم وقفوا قدام العيلة وبينوا لهم مسانتدهم ليها
خليكِ بالدعاء.. و بالاقناع بالطريقة الصح


بالنسبة لسؤالك

بس طيب في المستشفى خلاص لمن الواحد يتوظف؟ اللي اشوفو انو عادي اختلاط، بس ينفع الواحد يحدد، مثلا اذا وحدة ما تبغا تشتغل الا على حريم عادي؟ ولا ما ينفع؟

سألنا السؤال هذا بين بعض كثير.. بس ما عرفت الاجابة "^^
وفكرنا نعمل عيادة نسائية بالكامل.. وكأنك داخلة صالون تجميل نسائي مثلا

لكن الجواب الأكيد.. ما عندي فكرة عنه