أمطار الاربعآء 22/2/1432 //~

••Cute Girl · #1 29-01-2011, 09:53 PM

المشاركة الأصلية كتبت بواسطة Life as Game

ههههههاي حللللللللللوة ,,
عزيزي ساهر بخصوص انك غيرت اسمك لغاطس تضحك علينا مسلا ؟؟

ممكن تبعدي صورة البت العبيطة دي ,,

يديك العافية

::

آهنن جزيلاَ <ماتقلد لايف ترىَ

عاش من شافك يالدوبْ..

دحين البنت اللي عبيطه ولا انتَ ياعبيطْ

منورني بمرورّك.. =p

،’

bint aboha · 29-01-2011, 11:31 PM

السلام عليكم ورحمه الله وبركاته

جاتني هذه الرساله ع البريد يافلتها كاااااااااااااااي يرحم امه كاتب الموضوع هذا

يسعده وياليت يكثر منها كمان مشكوره غلاي والعروض مغريه

تقبلي مروري

••Cute Girl · 29-01-2011, 11:41 PM

::

هلا حبيبتي منورتنيْ..

عفوآ جزيلاً ..

،’

البتول 2010 · 30-01-2011, 03:50 AM

المشاركة الأصلية كتبت بواسطة ••cute girl

::

* تم استبدال تفتيش الامير فواز
الى مكان بيع التذاكر للدخول المدينة المائيه <جدة>

الللي يحتاج شيء يكلمنا ............
الهيليكوبتر جاهز فوق السطوح
وفي يخت بيتجول ف المحمدية
خدماتنا:
1-الجت سكي موقف جنب الرصيف في البساتين
2-الجت بوت واليخت في مرسى الفيصليه خلف عزيز مول
3-قوارب مطاطيه للأطفال
4-عوامات سباحه بجميع المقاسات
5-عروض الدلافين في شارع حراء
شعارنا..نغرقكم بمرح

مع تحيات هلب تيم لخدمات السياحة

* خبر عاجل :

ادارة مرور جدة تطلق نظام (غاطس ) لرصد المخالفات تحت الماء

هههههههههههههههههههههههههههههه شكلو هذا اللي بيصير قلت للاهلي مكافاة الجامعة اول شي بشتري بها قارب بس ان شاء الله ما يرفعون سعر القوراب

diamond purity · 29-01-2011, 09:18 PM

بسم الله الرحمن الرحيم

بداية القصة صراحه كانت جميله جدا بعد ما انتيهنا من اختبار الثقافه خرجنا انا وزميلاتي عشان نتفسح في ارجاء الجامعه في شطر الطالبات لان الجو كان يجنن مع قطرات المطر الخفيفه.. وبدأنا نلتقط الصور ونحنا مبسوطين وفراحنين ونقول يالله الجو خيالي وكأننا في ماليزيا او باريس او على قولة وحده من صحباتي في الشانزليزيه.. الله يذكرها بالخير هيا راحت من الشانزلزيه على بيتها وانا بقيت الين اتحول الشانزلزيه الى كارثه.. بعد كدا بدأ يشتد المطر ونحنا مستغربين انو الجامعه الىت حد الان ما اعلنت اي خبر اخلاء مع انو متعودين من يوم ما تنزل حبتين مطر يسوو اخلاء.. نحنا قلنا شكلو الموضوع مو مستاهل اخلاء .. الهم بقينا انا ووحده من زميلاتي في كافتيريا رابيس ننتظر الباص يتصل علينا عشان نروح وكانت الساعه 11 وربع وانا خرجت من الكافتيريا عشان اروح مبنى تاني لاحتياجات خاصه صراحه وكانت المطره وقتها اشتدت وتخبط في راسي خبط المهم انا جلست في المبنى اقل من 5 دقايق ورجعت ثاني على الكافتيريا وما صدقت انو الطريق هادا هوا اللي دوبي مريت منو من اقل من 5 دقايق.. كان شيء فظيم منسوب المويه ارتفع بشكل غير طبيعي واصبح يغطي السيقان..

المهم رجعت بسرعه على الكافتيريا وانا كأنهم غطسوني في بحر وطلعوني.. حملنا اغراضنا انا وصحبتي وخرجنا على البوابه الغربيه 1 وكانت المويه مرتفعه جدا قبل رصيف البوابه وتقريبا نسبحلها سباحه .. و وحده من الامن واقفه عند البوابه وتنبه البنات انو هنا في حفرتين مو باينين من المويه وتنبههم لا يطيحون فيها.. هادي الحفر كانت بلاعات زيها زي قلتلها انزالت عنها اغطيتها بسبب قوة المطر وشدتها (وبعدين يقولو انو الجامعه مأمنه وماخذه احتياطاتها)

المهم فضلنا نستنى الباص يجي عند البوابه والكهربا خلاص انقطعت عن غرفة الانتظار اللي كنا فيها وما نسمع الا البنات يقولو انو في حريقه في احد مباني الجامعه.. نحنا طبعا انفجعنا ودقينا على سواق الباص وقلناله انت فييييييييين.. قال انا برا يلا يلا اخرجو.. لبسنا العبايات وخرجنا لواقع ثااااااااااني.. الشوارع كلها مليانه بالمويه وسيارات امن الجامعه ورجال مرميين في كل مكان وكلهم جلسو يزعقو علينا يلا يا بنتي اركبي اي باص تشوفيه في طريقك اي باص حتى لو مو باص الحي حقك..

تستطيع أن ترى الصورة بحجمها الطبيعي بعد الضغط عليها

هنا انا انصدمت وحسيت انو الوضع صار جدي ومافيه مزح بالذات لمن تطالعو في وجيه الرجال وتعبيراتهم كانت بجد مرعبه وصرنا نجري جري نصارع المويه اللي نسبح فيها من جهه والمطره ووالريح اللي تدفع فينا من جهه ثانيه نحاول نوصل لمواقف الباصات ..والله حسيت انو الموقف وكأننا رايحيين ليوم الحشر.. الدنيا ظلمه وريح وما تشوفي الا انوار الباصات ورجال مستنفرين في كل مكان وبنات تجري تلحق على روحها.. والحمدلله وصلنا الباص ودخلنا وبدأو الاهالي يتصلو علينا ينبهونا من خطورة الوضع.. ونحنا قاعدين ننتظر في الباص وبعد مرور ربع ساعه تقريبا من الانتظار شفنا رجال الامن يدقو على ابواب الباصات ويقولولهم ادخلو جوا شطر الطالبات وخدو اي طالبه تلاقوها في وجهكم.. وفعلا فتحولنا ابواب الطوارئ ودخلنا بالباصات على جوا ما نلاقي الا بنات لسا بشعورهم دوبهم خارجين من الاختبارات على واقع الصدمه والواقع الاليم اللي برا..

وبدأنا نلم في البنات وخرجنا برا مرا ثانيه ننتظر بنات باص حنا الفيصليه وننتظر البنات اللي معانا تيجيهم باصات حيهم.. والسواق الباكستاني يتكلم ويقول( نحنا جامعه في باكستان واحد دقيقه كل مويه نااااااااشف شوف هنا كيف كينجدوم ساودي ارابيا)

المهم وبعد ما اتجمعنا تقريبا 10 بنات في الباص جينا نبغى نخرج من الجامعه عشان نلاقي واقع وصدمه ثانيه.. الا وانو منسوب المياه ارتفع لدرجه لا يمكن حتى للباصات انها تمشي فيها وباصات معطله في نص الطريق والسواقين هربو منها وتركو البنات وابواب الجامعه الكبيره ما تسمح للباصات بالخروج بسبب ارتفاع المياه بشكل اكبر في الخارج..

فرجعنا لفينا ورحنا عند البوابه الغربيه 2 وفضلنا هناك نستنى بنموت من البرد لان كل ملابسنا وعباياتنا مبلوله والباص صار مبلول ومع انو المكيفات كلها مقفوله.. وجلسنا ننتظر في حالة رعب.. بس نتفرج على منظر السماء والغيمه السودا اللي كانت تلف جوانب الجامعه وكأنها موحهه خصيصا لتمطر على ارجاء الجامعه فقط.. ونسمع اصوات الرعد واصوات قطرات المطر اللي كادت انها تكسر سقف الباص علينا وكانت مياه الامطار و السيول غمرتنا من كل النواحي..

ونحنا واقفين بدون حراك الى ان توقف نزول المطر وصارت الساعه 3 العصر تقريبا وبدأنا عندها نحرك ونتجول في ارجاء الجامعه المصون لنرى ما اغرقته مياه هادي الامطار من شوارع الجامعه.. بجد كاااااانت صدمه مافي مكان نااااااشف..المهم خرجنا بعدها من اسوار الجامعه عشان نلاقي صدمه اخرى النفق اللي قدام الجامعه اصبح حمام للسباحه او على قولة سواق الباص

Wwwooooow swimming pool

الاخ مبسوط من اللي شايفه.. المهم خلصنا من صدمة النفق دخلنا الصدمه الثانيه وهيا انو الدوار حق الحصن اللي نروح منو بيوتنا مقفووووووووووووول بسبب ارتفاع منسوب المياه بشكل ما تقدر تمر منو اي نوع من انواع السيارات وما كان قدامنا الا الاندلس مول دخلنا المواقف عشان نلاقي باصات ثانيه تنتظر في مواقف الاندلس الى ان يجي فرج رب العالمين علينا وتنفتح الطرق ..

الهم جلسو البنات في الباص وميتين جوع والبنات خايفين ينزلو جوا المول.. المهم جمعنا فلوس ونزلنا 3 بنات نشتري اكل للباص كلو.. والله ماقد نزلت سوق وحسبت قيمة مشترياتي بالهلله عشان نشتري شي يكفي الجميع.. والله نحسب الاكل والمويه بالهلله..

المهم نزلنا بالاكل للبنات وشويه نلاقي اهالينا كلهم يتصلو علينا ويقولولنا اطلعو فوق في الاندلس الدور الثاني.. ونحنا نسأل لييييييييش بكل برائه.. يقولولنا في سيل جاي طريق الجامعه.. ونحنا سمعنا سيل ويافكيك طلعنا فوق الدور الثاني ودخلنا مسجد النساء ولاقينا كل بنات الجامعه اللي قدرو يخرجو منها موجودين في المسجد والحال كما هوا الحال في الملااااااااجئ اللي نشوفها في التلفزيون.. البنات يدورو على اكل ويدورو على ملابس وعلى شواحن جوالات كان وضعنا مزري الجوالات انطفت وخلص شحنها لان الاهالي كل شوي يدقو ويتطمنو ولمن البنت تقولهم الجوال بيفصل شحن يروحو يطلبو رقم جوال اي بنت من اللي جالسين حواليها عشان يقدرو يتطمنو على بنتهم عن طريقو.. الاحلى من كدا انو نحنا خايفين وكل شويه والتاني نطلع برا عن زجاج المول ونشوف كيف وضع الشارع صار وايش اخبار السيل.. والشباب فايقين ورايقين يلطشو في الكلام..
واحد الله يستر علينا وعليه بس يقول يا لييييييييت جده تمطر 14 ساعه في اليوم عشان نشوف الوجيه الحلوه هادي
المشكله حتى حسابو لعدد الساعات اللي في اليوم غلط

يلا الستر بس

وفجأه تفصل علينا الكهربا وترجع تفتح ثاني.. مرتين انقطع التيار وبعد المرا الثانيه فتحو الموتورات وشغول الكهربا الاحتياط طبعا صارت الانوار اضعف وافياش الكهربا اللي كنا نشحن فيها الجوالات انقطع عنها التيار.. وبدانا ننظر ونحاول نتصل على اي احد ينقدنا من اللي نحنا فيه.. الخطوط مو راضيه تشبك لا مع اهالينا ولا مع الدفاع المدني ولمن تشبك الخطوط ونكلم الناس اللي برا يقولولنا لا تخرجو من المكان اللي انتو فيه هوا دحين اأمن من برا.. فضلنا ننتظر الين بدأو الناس يمشو وماحنا عارفين فين قاعدين يروحو.. الين صار العشا وبدأو اهلي يتصلو وقالولي انهم دبرولنا سواق بيتو قريب من الجامعه ويقدر يوصلنا ورسلوه عشان يحاول يروحنا.. كانت الساعه 9 ونص شلنا عزالنا واغراضنا المبلوله.. وكنا تثريبا اخر ناس بتخرج من المسجد انا و5 بنات من صحباتي في الباص وبدأو البنات يبكو لانو بجد كنا نازلين ورايحين على المجهول ماحنا عارفين فين وجهتنا وكل الطرق مقفله.. المهم نزلنا وركبنا السياره جلسنا فوق بعض ونجوم ونحاول نوصل لاي طريق مفتوح لكن بدوووون جدوى .. جربنا طريق ال60 والخط الرسيع ورحنا كبري المينا عشان نحاول ننزل منو على طريق الملك لكن بجوووون جدوى وفضلنا نلفلف في الشوارع ونشوف من المناظر ما يبكي ويحزن من احوال الشوارع وكأننا في مخلفات زلزال او حرب لا سمح الله ورجعنا الى المقر الاول حي الجامعه ومن هناك حاولنا نوصل لبيت احد من اهلي كان قريب مننا بيت عمتي وبنت عمتي في حي النسيم.. ما فكرنا نروحلهم من اول لان كان عندنا امل نروح بيوتنا.. المهم حاولنا نوصل لبيت عمتي وللاسف ما قدرنا .. والبيت اللي قدرنا نوصله هوا بيت بنت عمتي عندها فقط انتهت مأساة الشوارع والملاجئ..وبدأنا ننتظر الين تنفتح الطرق.. وللاسف انا ما وصلت بيتي الا ثاني يوم المغرب..

انا الان لمن اقلب في صور الكاميرا اتعجب لحال الصور اللي تصورناها في بداية المطر كيف انها جميله ومناظر طبيعيه رائعه وكيف بعدها تنقلب الصور لصور كوارث طيبيعيه.. انا وجميع البنات اللي عاشو الموقف مستحيل ننسى اللي صار معانا وننسى كل اللي عانيناه من برد وجوع وتشرد وحوسه في الشوارع بلا ملجأ وبلا منقذ نبحث عن بصيص امل او عن اي وسيله ترجعنا لبيوتنا سالمين.. والحمدلله الي كتبلنا قدرلنا انو نرجع سالمين بيوت اهلنا.. لكن الله اعلم بأحوال الناس الثانيه اكيد كان في ناس وضعهم اسوأ من وضعنا عسى ربي يكون ردهم لاهاليهم سالمين.. هادي كانت قصتي معاناتي انا وصحباتي في احداث سيول جده 26\2\2011 عسى ربي يكتبلنا فيها الاجر وياكم على ما صبرنا عليه.. لكن المؤسف فعلا اللي سمعناه ثاني يوم في الجرايد والاخبار من انو الجامعه انقذتنا ووفرتلنا سبل الراحه وغيرها وغيرها من عمليات الانقاذ اللي ما شفناها طوال فترة دوراننا في الشارع.. عسى ربي يعوضنا خير والحمدلله انو البلد لسا فيها خير وفيها شباب طيبه وقلوبنا على بعض الحمدليك يالله على كل حال

وفي النهايه اختم قولي بذكر الله والحمدلله اللي سلمنا في جميع الاحوال .. والله يسلم الجميع ويطمن قولبهم على احبائهم ولا يحعل احد في موقف زي مواقفنا الي كنا فيها..

والحمدلله حمدا كثيرا اني اليوم جالسه ورا لاب توبي على سريري اكتب قصتي وانا في مأمن.

مع تحياتي:

م.ق

طالبة في جامعة الملك عبدالعزيز