فطور على جوع والكااآارثه :( ..}

[مي السبيعي]

يالطيف هالشي ماينسكت عنه

[لقيت روحي]

يا جماعة انا اقولكم وانتوا شوفوا لي حل ...

انا ساعات يكون دوامي من 9 لـ 3
اظطر وغصبا عني ...

اكل الثامن اكله وانا مررتاحة مو زي رابيس ..

خصوصا البطاطس طعمها زي الصدى ههههه

اظطر اكل من رابيس الثامن ما شاء الله اكلهم بسرعة يخلص

و ساعات صعبة نطلب من برا لضيق الوقت

والله غصب عني اكل بيتزا حقتهم

[هدية]

مافي رقاااااااابة؟؟؟
لو يعملوا زي اللي في حلقة خواطر اللي فالجبيل

معليش محنا فشارع فجامعة المؤسس

["~* بيادر *~"]

المشكلة اننا مجبورين نأكل من هالأكل
انا عن نفسي ما آكل اي شيئ لأني معاي القولون ومتاعب شويه في المعده بس اوقات اجوع واضطر اني آكل بس والله اني اجلس ماسكه كروسان الجبنة في يدي دقيقة عشان اتأكد ان ما فيه شيئ غير صالح للاكل
ولما ارجع البيت امي تسألني افطرتي في الجامعة؟ اكلتي كويس؟ هي خايفة عليه لاني دايماً امرض من النحافة الزايده اللي جايبه لي المتاعب كلها ولما حكيتها عن الاكل تبع الجامعة اصرت عليه اخذ فطوري معايه وانا رايحه بس انا اصلاً ما افطر الا اذا حسيت بيغمى عليه من الجوع

ألف شكر رورو على الموضوع المهم

[بنوته دلووعه]

الـــــسلام عليكم ورحمة الله وبركااته

اولا : الحمد الله على سلامة صاحبة الموضوع وكل من تعرض لمثل موقفها ...

ثانــــيا : انا حصـــل معاي موقف مشابه لموقفكم ,,, اشتريت من رابيس عصير مانجــو طاازج اول شيء لاحظته ان لونه فاااتح كانه برتقال وكمان طعمه غريب مدري فيه حموضه ,, ولاني ما احب الخصاام والتهزيء وعارفه انوا ماراح يجيب نتيجه اخذت عصـــيري ورحت لمبنى الساااادس ورحت عند المسئوله مو موجوده انتظرتها لمدة ساعه ,, بصراحه استقبلتني تمااام بس الي معااها يطالعوني بطريقه ( لاعاد تجي مررره تانيه ابــــــدا وايلا ...) اول سؤال سالتني هو فين الاثبات وانتي من متى اشتريتيه ؟؟ قلتلها من ساعه قالت وليه ماجيتي من اول ,, انقهرت اش ارد عليها ذي ,قلتلها والله انتي ماكنتي موجوده اش اسوي
*طلبت من الموظفه تجيب ورقه شكوى
وطلعت 5 ريال وقالتلها اشتري مانجو وتقول معليش لازم نتاكد عشاان ما نظلم احد وفعلا اشترت وذاقت من كاستي ومن كاسة الموظفه وتطالعني وتقولي مافي فررق مرره عاادي ,, ردت صاحبتي قالتلها يعني انتي شايفه ان هذا طعم مانجو طبيعي مرره مو حاسه انه مخمج
,, سارت كل وحده من الموظفات تذوق وتقول مافيه شيء مررره عادي .. رجعت المسئوله قالتلي (ياحبيبتي هذا طعم عادي مو مخمج بس هو مثلج يعني زي الي تلاقيه في بنده وووووووالخ ردت صاحبتي وليه يبيعوه على اساس انه طاازج يعني سرقه عيني عينك ؟
عالعموم مشكووره..
اسفه عالاطاله بس هدفي ان كل وحده عندها اثبات من بيتزا او غيره تشيلها وتروح لهم حتى لو ما ريحوها وحده ورى الثانيه غصبا عنهم حياخذوا اجراء ويعدلوا في هالكفاتيريا .

[محبة لغموضي]

ههههههههههههههههههههههههههه

يااربييييه ع اكل راابييييييز

اول شي الحمدلله انو ما جاكي تسمم من اللي اكلتيه
فكرتيني بموقف صارلي السمستر اللي فات

كنت مررره جيعااانه وكان دوامي مرره كررف
فع نهاية الدوااام رحت اشتريت من رابيز اللي عند مباني الاقتصاد المنزلي
لانو قريب من البوابة الغربية 1 بحكم اني في باص <~ وربي حالتها حالة ههههههه

الموووهم اشتريت سندوتش مرتديلا
والله لا يوريكي اكلت اول لقمة طعمت كلوووور
حسيييت بطني خلاااااص قمت رميتووكويس كان عندي حلاوة وشكولاتة واكلت منو
ولا بجد كنت بستفرغ اسسستغفر الله ><

بس من وقتهاا حررمت اطب لهناك ههههههه
بس ايش اسوي اضطر اشتري من رابيز خاصة العلوم لانو دوامي لوقت متاخر

مو كفاااية الزحمممة واللي تقعدي نص سااعه او اكتر عشان تشتري فطور وفي الاخير يكون الاكل كدا

يلا الحمدلله ع كل حاااال
وبجد لازم يشوفو حل مع اكلهم دا

[BARGAIN]

المشاركة الأصلية كتبت بواسطة روان الغامدي في صباح إحدى الايام كوونت مرررا جيعااانه لاني كونت صايمه اليوم اللي قبلو وجلست على فطور الصيام وداومت الجامعه و الجوع يعصر بتني بعد ما خلصت أول محاضرتين دخلت الكفتيريا ولقيت صحبتي تاكل بيتزا تحمّست وطلبت بيتزا حجم كبير اكلت اول لقمه شميت ريحه مش كويسه بس كنت شاكه ومشيت الهرجه أتزكرت ماما تقولي دايما انتي موسوسه لاني الاكل أحبو دايما فرش وأهتم حتى بشكل الصحن يكون مرتب وكل حاجه أوك المهم وقعت في وقعه الله لايوريكم قولت لصحبتي شامّه شي قالت .. لا يتهئلك .. أكلت لقمتين بعدها الا شويا تقولي صحبتي .. روان الرّيحه طلعت أنا حسيت إنو الاكل وقف في حالقي وعيوني تفرصعت << مدري حسيت صحبتي خافت مني ساعتها المهم لفّيت البيتزا ودخلت غرفة تجهيز الاكل اللي في الكفتريا وهتلك يا تهزيء وقلت للفلبينيه المسؤله شومّي شوفي اكلكم الخاااايس دا قالت .. إس في دا نديييف قلتلها نضيف في عينك الاكل بايت شومي ,. والكدابه تشوم وتنكر !! وزهمت 3 موضفات من اللي يشتغلو كلهم قالو أبدا مافيلو حاجه قولتلهم طبعا يرجعو فلوسي عساهم البلا بغت تبدلي هيا باكل تاني قلتلها انتي مجنونه دحين جوت بتني أكل مخمج بسببكم كمان تبيني آكل من عندكم مرا تانيه وحده من الــ 3 اللي شممتهم البيتزا المنحوسه لما رجعت لي فلوسي قالت البيتزا بجد كان فيها ريحه طبعا ما سألتها ليش ما تكلمتي قدام رأيستك لانها أكيد راح تخسر وضيفتهااا ,. " وشهد شاهد من أهله" ومن بعد داك اليوم حلفت يمين ما آكل من الكفتريا حااجه ودحين ليا شهر ونص الحمدلله يا أاطلب من برا يا أجيب أكل من بيتي وقفلت عليهم بالشمع الاحمر << بالنسبه ليا طبعا ناهيكم إنو جاني سدت نفس يومين ما أشرب الامويا أنصحكم قااطعوها والله بسببهم كرهت بيتزا هت ,. و دومينوز بيتزا :( .... طبعا كرهتها لفتره ليست بقصيره سرت لما أشوف البيتزا ولا أشوم ريحتها يجيني غثيااااان

اهلين روان كيفك

والله شوفي الصراحه انا مثلك
اكل من عندهم وارجع البيت ويجيني مغص
اختي تقول لي لا اكيد ماكله شي ثاني
واتكرر معي الكلام ذا 3 مرات
الحين هي تحضيري ونفسها تاكل من عندهم
وقايلت لها نجوم السما اقرب لك
فا ياليت احد يستوعب الكلام اللي نقوله

[كريم كراميلة]

الحمدالله ع سلامتك يا قلبي
انتي فكرتيني موقف حصل لي في رابيس وبعدها توبت اكل منها اشتريت مرره ذرة والا وانا باول لقمةوالا الاقي شعر وسط الذرة والله علطول رميتها وجلست يومين بطني تعورني من الالم بس الحمدالله عدت ع خير بس وربي بعض الاحيان تضطرين تأكلين من أكلهم لانه السمستر الي فات كان دوامي من٨ال٥اغلب اليوم بالجامعة كنت اضطر اكل اي شئ بس توبة خلاص الحمدالله ع كل شئ
تحياتي^_^

[i saroon]

الكل يشتكي ! الين متى طيب ؟
ماراح يفكروو يغيروو ؟

[AIM]

الإحتكار هو سبب كل مشاكلنا سواء داخل او خارج الجامعه
شركة كهذه الشركة يجب أن تكون قد تعلمت من خلال عملها الطويل الكفاءة والخبره في مجال العمل في الأطعمه وهو مجال يتطلب الكثير
من الحذر والحرص , بيد أنها تسوء كل يوم أكثر من ذي قبل
وفي مبنى كلية التربيه الخاصه في الرحاب تنفد المأكولات من الكافتيريا عند الساعه العاشرة تقريبا , وهناك طالبات
لديهم محاضرات حتى الساعه الثانية ظهرا , إن لم تستطع رابيس أن تغطي الإحتياج فلا داعي للتمسك بعقدها مع الجامعه
كثيرة هي شركات المأكولات السريعه فلم رابيس بالذات ! أريد تفسيرا منطقيا لهذا التمسك العجيب بشركة رديئة مثل هذه الشركة !
حسنا ً إن كنتم لا تستطيعون التخلي عن تقديسكم لرابيس أو - مصالحكم المشتركة معها- فبإمكانكم الإبقاء على عدد من فروعها داخل الجامعه واستقطاب شركات أخرى ذات كفاءة وجودة في هذا المجال وأظنها كثيرة , احتكار غير معقول البته ! ..

المشكلة ياعزيزتي هي الاستهتار بالأمانه سواء من رابيس أو ممن ائتمنها , وكفى ..