السلام عليكم

[Silent Snow]

السلام عليكم ورحمة الله وبركاته

حابه اسالكم حاجه او بالاصح اطلب مساعده منكم

انا متخرجه من دفعة السنه الي فاتت يعني اظن 1429

اولا حطوني في كلية التربيه عشان مافي مكان بالجامعه

ثانيا اتحملت ورضيت وبدأنا السنه التحضيريه وكانت بالعربي المواد كلها

وكنت اشوف عمي بالجامعه دراستو انجلش وبستغرب قمت قلت يا شيخه يمكن عادي

خلصت التحضيري واخدت صيفي وقفلو التخصصات علينا وحطوني فيزيا مع انو كان اختياري الاول انجليزي لانو الوحيد الي ممكن اتقبلو جمب المواد العلميه التانيه

مع العلم اني كنت بخلص تحضيري واحول للجامعه بس مانفع عشان المعدل

سكتت وقلت الحمدلله

عرفت انو تخصصي فيزيا انصدمت ومشيت ولما عرفت انو كلو يعتمد على الرياضيات قلقت مره لاني اكره الرياضيات

قلت يلا نتفائل واشد حيلي السنه دي واجيب معدل واحول للجامعه

لانو القسم الي ابغا في الجامعه الي هوا " تقنيه طبيه .. علاج طبيعي "

سولنا اجتماع مره بالكليه لشرح القوانين والالتزامات وامور التحويل

طبعا ماحضرت الا عشان موضوع التحويل عشان اعرف ارتب نفسي

لما جات تتكلم على التحويل الدكتوره " نجوى ابو زناده "

قالت طالبات السنه الي فاتت " الي انا من ضمنهم "

ممنوع منعا باتا تحويلهم لاي قسم صحي او كلية طب في الجامعه !

صعقت وكانو احد اعطاني كف كل املي وامنيتي حطمتها بكلامها دا

سألنا ليش
وسببهم التافه انو عشان دراستنا التحضيري عربي

والسنه الي فاتت كذبو علينا وقالو انو الكليه منضمه للجامعه واكتشفنا كذبهم في المحاضره دي

لانها قالت المتخرجين السنه دي على دفعة 2010 يتاح لهم التحويل لاي قسم يبغوه من طب وغيرو

عشان دراستهم التحصيري انجليزي وعشان دحيييييين الكليه انضمت للجامعه

يعني السنه دي التخصصات تتفتحلهم كل تخصصات الجامعه

طيب واحنا ؟ ليش الظلم دا يا جماعه ؟

طيب الي قدي وفي الجامعه يفرقو عني بايش ؟ ازود مننا بايش ؟

ليش ما يقولو من الاول !! ليش يصدمونا دحين ويحطمو كل شي

والله انا مره مره متأزمه نفسيا انا في قسم لا احبو ولا اكرهو بس ماني قادره اتقبلو

وامنيتي من كل قلبي اتعلم العلاج واعرف الكثير عنو

كتير قالو يمكن مالك خير بالقسم بس انا متأمله انو ان شاء الله اقدر ادرسو

حاولت اقنع نفسي باني خلاص فيزيا واشيل العلاج الطبيعي من بالي بس والله مو بيدي كل ماشفت موضوع عنو دخلتو وقرات وحاولت اتعمق فيه

انا ايش اسوي دحين ! والله ظلم الي عملوه

فكرت اعيد التحضيري واقدم من جديد في الجامعه عشان ادرسها انجليزي بس عشان ادخل القسم الي ابغاه

كنت اخاف من ضياع السنين بلا اهداف او في شي ما ابغاه وحصل

بس لو في امل انقبل من جديد في الجامعه مستعده اضيع سنه تانيه عشان اوصل للتخصص الي ابغاه

ابغا مساعده منكم , نصيحه , اي شي

ابغا اعرف رأيكم

بليز لا تردوني وتقرو الموضوع وتخرجو من غير رد

[● ά7Ļά şùģάя ●]

إليكِ القصة:
أحد الأمراء كان يجالس أحد الوزراء له فبينما هما على وجبة غداء
إذ أخذ الأمير تفاحة فأخذ يقطعها بالسكين فشاء الله أن يقع السكين فيقطع الإصبع بكامله
فتألم وتوجع فقال الوزير: "الخيرة في ما اختاره الله لك" لعل في قطع إصبعك خير
فغضب الأمير فسجنه
فلما أدخله السجن قال الوزير: "الخيرة فيما اختاره الله لي" لعل في السجن خيراً لي

مرت الأيام فأراد الأمير أن يخرج للصيد
فإذا بعصابة وثنية كانت تعبد الأوثان
فأخذت ذلك الأمير قرباناً للآلهة التي كانوا يعبدونها فلما أخذوا الأمير وأرادوا أن يذبحوه
إذا بأحد الوثنيين يصيح على أصحابه لا تفعلوا قالوا لم ؟ قال انظرو إلى إصبعه
وكان من عادتهم أنهم ينزهون آلهتهم فلا يقربون لها قرباناً معيباً فتركوه وشأنه

فلما رجع إلى مملكته تبين له قول الوزير فاستدعى الأمير الوزير
فقال له الأمير: أحسنت جزاك الله خيراً لقد عرفت قولك يوم حصل لي كذا وكذا
ولكني سائلك يوم أدخلتك السجن قلت الخيرة فيما اختاره الله لي لعل السجن خيراً لي فماذا تقصد بكلامك ؟
قال الوزير: لو حصل أنك لم تسجنني لخرجت معك إلى الغابة ولا أصبحت أنا القربان لتلك الآلهة
ولفقدت حياتي من حينها فاختار الله لي السجن ليمنعني من الوفاة

\

النفس البشرية بطبيعتها تريد ماتظن أن في تحقيقة سعادة لها في هذه الدنيا
تطمح وتأخذ بالأسباب لتحقيق ذلك وتسلك طُرقاً وأساليب مختلفة
وهذا شيء غريزي وجميل أن نسعى لتحقيقه
موقف لاتدري مالحكمة منه؟! ولماذا حصل لك عكس ماتريد؟! حكمة لايعلمها إلا علام الغيوب
فقد يحصل لك ماتريد وتتمنى فيكون شر لك, ووبال عليك
لذلك نقف طويلاً ونتأمل نجد أن الخيرة فيما اختارة الله لنا

/

من وجهة نظري تآبعي درآستك في قسم "الفيزيآء" مع يقين إنه الخير
وبإذن الله بتبدعي فيه
ومآيمنع تثقفِ نفسك وتنوري موآضيع أخوآننآ وأخوآتنآ العلآج الطبيعي
موفقه حبيبتي

=)

[Reham.H.B]

أنا حتى زيك بالزبط! و توني حاطه موضوع عن ذا الشي أستفسر عن التحويل للجامعه!
بس أنا ما فقدت الأمل لسه..في بنات قالولي إنو العلاج الطبيعي يعتبر قسم غير طبي! مازلت شاكه بالموضوع بس برضو بحاول و بسأل! و أنا إتخصصت أحياء الحمد لله برغبتي بس برضو نفسي علاج طبيعي
حاولي تقنعي نفسك بإنو قسم الفيزيا هو خير لك و في نفس الوقت أستخيري و إجتهدي في الدراسه و حاولي تحولي للجامعه إذا كان خير لك بتنقبلي إن شاء الله و إنتي مبسوطه و إذا مو خير لك برضو ح تكوني مبسوطه لأنو هذا إلي ربنا إختارو لك و إنتي ح ترضي فيه!
الله يعين و يوفق و يساعد كل بنات عــــــ1991ــــــام..عام التجارب و الإختبارات..بنات العام الصامدين في وجه أولى التغيرات الظالمه في حقهم..أول ما إتغيرت المناهج على راسنا! وأول ما طلع التراكمي على راسنا!..و أول ما إنظمت الكليه للجامعه على راسنا!.. بس ربنا ما يضيع عمل المجتهدين!

و عندي لك خبر!..إذا تعرفي جامعة البترجي أو سمعتي فيها..
فهي تقدم منح للطالبات بشرط إنو ما يكون فات على تخرجهم من الثانوي أكثر من 3 سنوات و فيها جميع التخصصات من طب و من طب أسنان و صيدله و علاج طبيعي..بس الشرط الوحيد عندهم إنك تعيدي سنه التحضيريه و طبعا كلللووووو بالإنجلش!
ممكن تحطي هذا الخيار في الحسبان إذا تبغي..بس أهم شي الإستخاره!

أتمنى ما أكون ثقلت عليكي بردي وأفدتك بشي و لو بسيط..بما إننا نتشارك في نفس الحلم ^^

[الكبير كبير]

أنا برضوا أييـــد رأي الأخت رهآم ..

ابــدن لا تستسلميــن ..

وشوفي اش قالت لك بخصوص كليه البترجي ..

آسعي في هذا الموضوع ..


اسعي .. واللي لك فيه خيـــر .. أكيد بتلاقين ان ربك بيسهله لك ..

تحيآتي لك ..

[weddah]

وانا كمان اقول مدام عندك رغبة حقيقية تدرسي علاج طبيعي
ابدا لا تستسلمي وحاولي كل الطرق

ما اعرف كثير في انظمة الجامعة
مادري اذا ممكن تعيدي التحضيري وتدخليه
او تدخليه سنة بفلوسك وتاني سنة تحولي انتظام

من جد مااعرف الانظمة

بس حااولي واسعي في الموضوع

وربنا معاكِ ان شاء الله

[همسة حـب]

انا رأيي من رأي احلا سكر n_n

ماتدري فين الخير .... وعسا ان تكرهو شيئا وهو خير لكم ... وعسا ان تحبو شيئا وهو شر لكم

استعيني بربك واستخيري الله في اللي انتي فيه الان

وربي بيعينك ... وعلى قولة احلا سكر ... مايمنع انك توسعي ثقافتك وتقرأي عن العلاج الطبيعي :)

والله يوفقك يارب ويكتبلك الخير ويسخرلك هوا يارب