ساعدونا نحن طلاب دفعة13

[أمجاد القرني]

بسم الله الرحمن الرحيم
السلام عليكم ورحمة الله وبركاته
طلاب وطالبات كليتنا الجميلة نريد منكم طلب وهو توضيح بعض الأمور لنا
نريد شخص من كل تخصص من كليتنا الرائعة
يجيب على أسئلتنا عن السنة الأولى في هذي الكلية
1/ماهي المواد في هذا التخصص
2/عدد الوحدات لكل ماده
3/أسماء الدكاتره لكل ماده وكيف تعاملهم هل شرحهم تمام
4/طبيعة المادة فهم زي الرياضيات أو حفظ مثل الاحياء
5/طريقة الشرح هل يكون فيه قروب وليدر أو شرح عادي زي التحضيري وكيف أفضل طريقة للمذاكرة يعني في مصدر معين أو فقط من الكتاب
6/تقسيم الدرجات كيف يكون وأسئلة الاختبار اختياري كله أو لا
7/الدوام يكون في الكلية فقط أو في المستشفى بعض الايام لان سمعت في ناس بيداومو في المستشفى هل هذا صحيح لأولى أو الي اكبر مننا فقط ومتى نداوم من اي ترم أو سنة
8/لون السكراب لكل تخصص وهل إجباري نلبسه كل الأيام وعادي نلبس معطف أبيض أو فقط السكراب
9/أقل معدل انقبل لكل تخصص
10/وعدد الطلاب لكل تخصص
مازال الكثير من الأسئلة لكن ما نبغى نكثر عليكم😥
أتمنى منكم التفاعل والمساعدة لدفعة13
لانه هذي المعلومات ما أحد يعرفها بعد الله إلا أنتم فياليت تساعدونا لانه
بجد بحثت عن الكثير من المواضيع المثبته لكن لم أجد إجابة لأسئلتي

وأسأل الله العظيم يدفع عنكم كل شر في الدنيا والاخره
نحن طلاب وطالبات دفعة13 في انتظاركم

ولكم جزيل الشكر

[dracula20100]

up up up

[sab94]

Up..up..

[أمجاد القرني]

المشاهده فوق 90 ولا أحد رد علينا من طلاب الكلية الرائعة
مازال طلاب وطالبات دفعة 13
ينتظرون خبراتكم وتجاربكم فلا تبخلو علينا
يا دكااااااااترة المستقبل ردو

[Bashaier.y]

Up up up ^^

[Deev]

السلام عليكم ورحمة الله وبركاته
انا حجيب ان شاء الله عن قسمي وهو ( العلاج الطبيعي )
بسم الله نبدأ..

1/ماهي المواد في هذا التخصص
الترم الاول : تمرينات علاجيه , علاج كهربائي , علاج مائي , علم التشريح , الاختبارات والمقاييس , الكمياء الحيويه , علم وظائف الاعضاء , والمواد العامه ( الثفافه والعربي )
الترم الثاني : استكمال لبعض المواد ف الترم الاول : تمرينات علاجيه , علاج كهربائي , علم التشريح , الاختبارات والمقاييس ,علم وظائف الاعضاء , ميكانيكا الحركه , والمواد العامه ( الثفافه والعربي )

2/عدد الوحدات لكل ماده

http://pt.kau.edu.sa/Pages-%d8%ae%d8...%b9%d9%8a.aspx

3/أسماء الدكاتره لكل ماده وكيف تعاملهم هل شرحهم تمام
ماحيفيدك بشي اني افصل لكل ماده دكتورها وانما اجمالا اقولك انه الدكتورات والدكاتره ماشاء الله شاطريين وكويسين ويفهموا وطبعا وكل دكتور او دكتوره واسلوبها حتلاقي اللي جدي مرا وتلاقي اللي دمه خفيف ويحببك بزياده ف الماده وكذا يعني

4/طبيعة المادة فهم زي الرياضيات أو حفظ مثل الاحياء

تخصصنا اوله فهم عميق للنظري ثم التطبيق للعملي حتى ف الجدول بتلاقي كلاسات للماده نظري ثم بعدها عملي بحكم شغلنا بعدين كلو عمملي

5/طريقة الشرح هل يكون فيه قروب وليدر أو شرح عادي زي التحضيري وكيف أفضل طريقة للمذاكرة يعني في مصدر معين أو فقط من الكتاب

طريقه الشرح زي كانك ايام المدرسه في كلاس لكم خاص والدكاتره او الدكتورات ييجوا عندكم ويشرحوا لكم من عروض ويعطوك مصادر اذا انت حاب تقرأ منها
وطريقه المذاكره هي من السلايدات اللي يعطوها لكم الدكاتره وافضل طريقه للمذاكره هيا لمن ترجع البيت اقرأ اللي اخذتوا لانه اول ترم مواد كثييره وضغط وتيجي تنزنق يوم الاختبار ولا انت متذكر شي من شرح الدكتور وخصوصا مادة الاناتومي ( علم التشريح ) وانا اشدد للطلاب والطالبات الجدد انهم يذاكروا دي الماده اول باول ويهتموا فيها لانها المواد الاساسيه جدا واللي يبنى عليها المعرفه القادمه من السنين القادمه ان شاء الله ودي الماده اصلا مرا حلوه وممتعه جدا ومنطقيه جدا وكل كلاس تحس نفسك انت ف رحله داخل جسم الانسان >> تحمست شويا اعذروني خخخ

6/تقسيم الدرجات كيف يكون وأسئلة الاختبار اختياري كله أو لا

النظام الجديد كل الاسئله النظريه اختياري
النظري : عندك دوري اول ودوري ثاني وفاينل الدوريات ب 15
والعملي : على حسب الماده بس اكيد فيها ع الاقل دوري واحد وفاينل ودرجاتها ع حسب الدكتور زي م قلت

7/الدوام يكون في الكلية فقط أو في المستشفى بعض الايام لان سمعت في ناس بيداومو في المستشفى هل هذا صحيح لأولى أو الي اكبر مننا فقط ومتى نداوم من اي ترم أو سنة

الدوام للسنه الاولى ف العلاج الطبيعي ف الكليه والسنين اللي بعدين بتروحوا مستشفيات

8/لون السكراب لكل تخصص وهل إجباري نلبسه كل الأيام وعادي نلبس معطف أبيض أو فقط السكراب

شوفوا ي حلوين السكرب الزامي ف الاختبارات العمليه وعليه درجه لكن ف الايام العاديه تلبسه ع كيفك بس انا انصح فيه لانه جدا مريح وزي م قلت احنا ف تخصصنا العملي عندنا يحتاج حركه وكذا فالسكرب يريح بكل النواحي
ولونه تركوازي وبالنسبه للاب كوت فالبنات حتضطري تلبسيه للايام اللي يكون فيها دكتور يدرسكم + ايام الفاينل العملي
الاولاد انا اشوفهم م يلبسوه فما اعرف كيف الوضع عندهم

9/أقل معدل انقبل لكل تخصص
بصراحه ماعندي فكره ^^

10/وعدد الطلاب لكل تخصص

عدد الطالبات للسنه اللي فاتت 24 والطلاب كانوا 7 او 8 مني متأكده

كلمة اخيره حابه اقولها للمستجدين ف تخصصنا الرائع

شوفوا ي حلوين معروف اول سنه باي شي ف الدنيا صعبه وكل شي جديد عليك وتبدأ تحس نفسك ضايع ومنت ملحق فهذا اقولك ومن خبره طبيعي جدا وخصوصا اول سنه موادها كثيره زي منتو شايفين لكنها كلها اساسيه ومهمه لكم وفي بعض المواد عدد وحداتها قليل فمراعيين حكايه كثره المواد وكدا وابشركم السنين الجايه حتكون اسهل لكم واقل موادا وتبدأوا تاخدوا وتتعمقوا ف تخصصكم ، لا تنسوا تشدوا الهمه ف مادة الاناتومي وتزاكروها مزبوط ولاتيأسوا من البدايه واهههههم ششي لاتخلوا هدفففكم الدرجات خلاص خلص دا الزمن انت دخلت التخصص اللي تبغاه ليه تبغى الدرجات فقط ؟!!
وبعدين بقولها لكم اللي هموا الدرجات حيرتاح ايام الكليه لكن ف العمل بعدين حيتعب كثير كثير وحيكون " بلا فائده "

اتمنى اني افدتكم عن السنه الاولى ف تخصصنا الجميل
واي استفسار انا موجوده

PS: انا متشوقه اني اشوف طالباات متحمسات للعلاج الطبيعي واقابلكم بعد اول يوم ^_^

[Sweet Dreamz]

وعليكم السلام ورحمة الله وبركاته
بسم الله الرحمن الرحيم
المعذرة على التأخير
حبدأ اجاوب على الاسئله فيما يخص قسمي قسم المختبرات الطبية ^^

1/ ماهي المواد في هذا التخصص

الترم الأول: علم التشريح, علم وظائف الأعضاء, مهارات مختبرية, مادة علم الأجهزة, كيمياء حيوية بالإضافة الى مادة الثقافه الاسلاميه والعربي
الترم الثاني: علم امراض الدم, علم الوراثة, علم الأنسجة والخلايا, علم المناعة بالإضافة الى الثقافه الاسلاميه والعربي طبعاً
سنة ثالث عموماً بدون ترتيب: حتاخذوا علم الاحياء الدقيقه, بنك الدم, امراض الدم, علم المناعه, كيمياء سريرية, علم الطفيليات ,,, وزي مانتو ملاحظين فيه مواد يكون لها جزئين جزء تاخذوه سنه ثانيه وجزء في ثالث وزي كذا

2/عدد الوحدات لكل ماده


http://mlt.kau.edu.sa/Pages-%D8%A7%D...%A7%D8%AA.aspx

الجدول هذا قديم ماحتمشوا عليه, بس حطيتو لك عشان تشوفي عدد الوحدات(الساعات) لكل ماده..

3/أسماء الدكاتره لكل ماده وكيف تعاملهم هل شرحهم تمام

اغلب موادنا اللي حتدرسوها ماحيدرسكم هيا دكتور واحد, حيمر عليكم دكاتره مختلفين في الماده الوحده وممكن حتختلفوا عننا
وغالباً الحمد لله الدكاتره كويسين وشرحهم كويس

4/طبيعة المادة فهم زي الرياضيات أو حفظ مثل الاحياء

اي ماده بالضبط؟ حتمر عليكم مواد مختلفه وتحتاج المهارتين, الحفظ والفهم
ماحينفصلوا عن بعض,,, والمختبرات حيكون فيها شويا رياضيات وحسابات عشان في المختبر لازم تخففوا العينه وهذا التخفيف يحتاج حسابات وزي كذا لكن بسيطه مافيها تعقيدات الرياضيات
يعني بالمختصر, مافي ماده حفظ بحت ولا فيه ماده فهم بحت.. لازم الاثنين

5/طريقة الشرح هل يكون فيه قروب وليدر أو شرح عادي زي التحضيري وكيف أفضل طريقة للمذاكرة يعني في مصدر معين أو فقط من الكتاب

طريقة الشرح زي التحضيري بالتمام مافي شي زياده, الدفعه تكون في كلاس واحد طول السنه والدكاتره هما اللي يجو عندكم ويشرحوا
احنا ماعندنا كتب واغلب موادنا تكون سلايدات(يعني عروض بوربوينت) يكونوا الدكاتره مسوينها أو تكون اوراق هما يكتبوها ويعطوكم تذاكروا منها وهيا مصدر المذاكره الرئيسي لكم

6/تقسيم الدرجات كيف يكون وأسئلة الاختبار اختياري كله أو لا

تقسيم الدرجات يختلف من دكتور لدكتور كل واحد واسلوبو, لكن الاختبار النهائي في الاغلب لا يقل عن 40 درجه اما التقسيمات الباقيه تختلف على حسب اذا الماده فيها معامل واختبار عملي او لا وزي كذا
اسئله الاختبار في الترم الأول كانت كلها اختياري, لكن الترم الثاني كانت اختياري وكتابه يعني مقاليه

7/الدوام يكون في الكلية فقط أو في المستشفى بعض الايام لان سمعت في ناس بيداومو في المستشفى هل هذا صحيح لأولى أو الي اكبر مننا فقط ومتى نداوم من اي ترم أو سنة

اول شي انتي سنه ثانيه الان يعني مو اولى
اولى كانت التحضيري, ولو دخلتي مختبرات مثلاً, حتصيري سنه ثانيه مختبرات وزي كذا, معليش بس حبيت اوضح هذي النقطه ><"
الدوام في الكليه مافي دوام في المستشفى ابداً لانك لسا سنه ثانيه, لكن ممكن تروحوا مركز الابحاث تاخذوا محاضره فقط وترجعوا وهذا في الترم الثاني بس ويكون عملي مره وحده في الاسبوع, هذا بالنسبالنا يمكن انتو حتختلفوا عننا الله اعلم, وسنه ثالث برضو كليه لكن ممكن تروحوا من فتره لفتره مركز الابحاث زي ماقلتلك
(مركز الابحاث هذا مركز فيه بحوثات ومعامل وممكن تاخذوا فيها محاضرات)

بس في سنه رابعه وخامسه خلاص كلو مستشفى حتودعوا الكليه

8/لون السكراب لكل تخصص وهل إجباري نلبسه كل الأيام وعادي نلبس معطف أبيض أو فقط السكراب

لون السكرب حقنا ازرق ملكي زي هذا اللون


واجباري تلبسيه كل يوم, وعليه المعطف الابيض اللي هوا اللاب كوت وكمان اجباري "للبنات" عشان فيه دكاتره حيدرسوكم

9/أقل معدل انقبل لكل تخصص

والله ماعندي خلفيه لكن مو اقل من 4.5

10/وعدد الطلاب لكل تخصص

عددنا احنا في البنات في الاغلب دايما يكون في الاربعين او في الثلاثين والاولاد في العشرينات

-

خذوا راحتكم واسئلوا احنا في الخدمه مايردكم الا كيبوردكم, اتمنى تكونوا استفدتوا ان شاء الله
واحنا باذن الله بنجيكم اول اسبوع ونشرحلكم كل حاجه باذن الله بالتفصيل
موفقين يا رب

[Asrar M]

يعطيكم العافية ي سويت دريمز وَ ديف

و هنا التغذية العلاجية
[ http://www.skaau.com/vb/showthread.php?t=704292 ]

[dr-sh0sha]

المشاركة الأصلية كتبت بواسطة أمجاد القرني بسم الله الرحمن الرحيم السلام عليكم ورحمة الله وبركاته وعليكم السلام والرحمه طلاب وطالبات كليتنا الجميلة نريد منكم طلب وهو توضيح بعض الأمور لنا نريد شخص من كل تخصص من كليتنا الرائعة يجيب على أسئلتنا عن السنة الأولى في هذي الكلية انا حجاوب عن الاشعه التشخيصيه 1/ماهي المواد في هذا التخصص 2/عدد الوحدات لكل ماده http://rad.kau.edu.sa/pages-%d8%ae%d...%8a%d8%a9.aspx اجابة السؤالين السابقه في الرابط اعلاه 3/أسماء الدكاتره لكل ماده وكيف تعاملهم هل شرحهم تمام الدكاتره يختلفوا من سنه لسنه من ناحيه المواد اللي حيدرسوكم هيا بداية السنه يجوكم وحتعرفوا جواب دا السؤال ^_^ 4/طبيعة المادة فهم زي الرياضيات أو حفظ مثل الاحياء تعتمد ع الفهم والحفظ وطبعا المذاكره اول باول 5/طريقة الشرح هل يكون فيه قروب وليدر أو شرح عادي زي التحضيري وكيف أفضل طريقة للمذاكرة يعني في مصدر معين أو فقط من الكتاب الشرح حيكون على البروجكتر سلايدات ويعطيكم الدكتور بعد المحاضرة وتذاكروا منها مانرجع للكتب فقط الاناتومي هيا الماده الوحيده اللي ليها كتاب 6/تقسيم الدرجات كيف يكون وأسئلة الاختبار اختياري كله أو لا الاختبارات كلها اختياري وصح وخطا واحيانا كتابه بس سهله لاتخافوا 7/الدوام يكون في الكلية فقط أو في المستشفى بعض الايام لان سمعت في ناس بيداومو في المستشفى هل هذا صحيح لأولى أو الي اكبر مننا فقط ومتى نداوم من اي ترم أو سنة سنه تالت تبداوا تنزلوا المستشفى يوم كامل دوام رسمي يعني في تاني تنزلوا بس زيارات خفيفه تشوفوا بس ماتمسكوا بيشنت 8/لون السكراب لكل تخصص وهل إجباري نلبسه كل الأيام وعادي نلبس معطف أبيض أو فقط السكراب لون السكرب عودي وتلبسوا عليه اللاب كوت الابيض بس طبعا مو اجباري اللاب كوت بس لانو في دكاتره احيانا فلازم البنات يلبسوه 9/أقل معدل انقبل لكل تخصص ماعندي فكره ويختلف من سنه لاخرى و بالنسبه لاختياركم التخصص تقريبا الكل يدخل التخصص اللي يبغاه 10/وعدد الطلاب لكل تخصص دفعه 12 كانت 12 طالبه اظن بالنسبه للاولاد ماعرف دفعه 11 27 طالبة ..الاولاد 12 اظن مازال الكثير من الأسئلة لكن ما نبغى نكثر عليكم😥 أتمنى منكم التفاعل والمساعدة لدفعة13 لانه هذي المعلومات ما أحد يعرفها بعد الله إلا أنتم فياليت تساعدونا لانه بجد بحثت عن الكثير من المواضيع المثبته لكن لم أجد إجابة لأسئلتي وأسأل الله العظيم يدفع عنكم كل شر في الدنيا والاخره نحن طلاب وطالبات دفعة13 في انتظاركم ولكم جزيل الشكر

العفو ونحنا بالخدمه لاي استفسار

[Dr.Shaikhah]

بسم الله الرحمن الرحيم السلام عليكم ورحمة الله وبركاته طلاب وطالبات كليتنا الجميلة نريد منكم طلب وهو توضيح بعض الأمور لنا نريد شخص من كل تخصص من كليتنا الرائعة يجيب على أسئلتنا عن السنة الأولى في هذي الكلية

وعليكم السلام
ان شاء الله اقدر اجاوب الإستفسارات الأشعاوية

1/ماهي المواد في هذا التخصص

سنة ثانية الترم الأول /فيزياء وأجهزة الأشعة السينية - الحاسب الآلي وطرق التصوير - الوظائف الحيوية والوقاية من الإشعاع - أخلاقيات المهنة والعناية بالمريض - التشريح العام - علم وظائف الأعضاء - العربي 1 - الثقافة الإسلامية 1
سنة ثانية الترم الثاني / فيزياء وأجهزة الطب النووي - تسجيل الصور والجودة ونظام الأرشفة - تقنية التصوير الإشعاعي 1 - تقنية التصوير الإشعاعي 2 - التشريح الإشعاعي - الثقافة 2 - والعربي 2

سنة ثالثة الترم الأول / فيزياء وأجهزة الموجات الفوق صوتية - تقنية التصوير الإشعاعي 3 - تقنية الطب النووي 1 - ممارسة سريرة للتصوير الإشعاعي 1 [ هذي المادة نداوم بالمستشفى ] -التشريح المقطعي - ثقافة اسلاميه 3
سنة ثالثة الترم الثاني / تقنية التصوير الإشعاعي 4 - ممارسة سريرية للتصوير الإشعاعي 2 - تقنية الطب النووي 2 - التصوير المقطعي المحسوب 1 - التصوير بالموجات الفوق صوتية 1 - ثقافة اسلامية 4
سنة رابعه الحين ما بعد أغوص فيها

3/أسماء الدكاتره لكل ماده وكيف تعاملهم هل شرحهم تمام

ما ح يفيدك اسماء الدكاترة بشيء يذكر لأن مو شرط اللي درسنا المادة الفلانية يدرسكم ممكن يتغير

4/طبيعة المادة فهم زي الرياضيات أو حفظ مثل الاحياء

حفففففظ مع فهم لازم الإثنين مع بعض

5/طريقة الشرح هل يكون فيه قروب وليدر أو شرح عادي زي التحضيري وكيف أفضل طريقة للمذاكرة يعني في مصدر معين أو فقط من الكتاب

طريقة الشرح يجي الدكتور لعندكم أو الدكتورة ويشرح لكم من العرض البروجيكتور ممكن يرسل لكم المحاضرة قبل بيوم يصير تصوروها وتجيبوها عشان تتابعو وتكتبو معه وممكن يعطيكم هيا بعد المحاضرة على حسب ويكون عندكم ليدر انتو تختاروها ترتب الجدول مثلا تتواصل مع الدكاترة والدكتورات تضبط اموركم وكذا ولو كانت الدفعه متعاونه تقدرو تعملو قروبات وتذاكرو وتشرحو لبعض زينا افضل طريقة للمذاكره انك تذاكري اول بأول عشان لا يتراكم عليك .. وكنا نذاكر من السلايدات اللي بيعطينا وبيشرح منها الدكتور وبعضهم يعطونك مصار كتب ترجعين لها وبعضهم يعتمد على الكلام اللي يقوله بالمحاضرة فلازم تسجلي كل كلمة تنقال

6/تقسيم الدرجات كيف يكون وأسئلة الاختبار اختياري كله أو لا

الفاينل عادة 40 والدوريات 15 و يعتمد الباقي لو كان في معمل او كويزات أو واجبات والحضور وكذا

7/الدوام يكون في الكلية فقط أو في المستشفى بعض الايام لان سمعت في ناس بيداومو في المستشفى هل هذا صحيح لأولى أو الي اكبر مننا فقط ومتى نداوم من اي ترم أو سنة

في سنة ثانية نزلنا المستشفى لكن مرات قليلة نتعرف على القسم والأجهزة
لكن من سنة ثالثة يكون لك يوم بالإسبوع بس تروحين فيه المستشفى وتستقبلي حالات وأكشن

وعلى فكرة معامل الأشعه في كلية الأولاد ماعندنا معامل في كليتنا لذلك لو كان عندنا يوم معمل نروح نحضره في كلية الأولاد

8/لون السكراب لكل تخصص وهل إجباري نلبسه كل الأيام وعادي نلبس معطف أبيض أو فقط السكراب

لون السكرب لقسم الأشعه عودي
مو إجباري تلبسينه لكن أريح وأفضل وعملي أكثر انك تلبسينه والمعطف ضروري تلبسينه كل يوم عشان اغلب اللي يدرسونا دكاترة رجال وفي بنات يخلو عبايتهم عليهم

9/أقل معدل انقبل لكل تخصص

والله ماقدر احدد لك كم بالضبط للأسف

10/وعدد الطلاب لكل تخصص

احنا دفعتنا 2011 عددنا 27 بنت و 10 أولاد

مازال الكثير من الأسئلة لكن ما نبغى نكثر عليكم😥 أتمنى منكم التفاعل والمساعدة لدفعة13 لانه هذي المعلومات ما أحد يعرفها بعد الله إلا أنتم فياليت تساعدونا لانه بجد بحثت عن الكثير من المواضيع المثبته لكن لم أجد إجابة لأسئلتي وأسأل الله العظيم يدفع عنكم كل شر في الدنيا والاخره نحن طلاب وطالبات دفعة13 في انتظاركم ولكم جزيل الشكر

إن شاء الله اكون جاوبت جواب شافي كافي وأي استفسار نحن بالخدمة