حقوق طالبات جامعة الملك عبدالعزيز ..سنترا ..تجمع من جديد

[دلوعة الخليج]

السلام عليكم ورحمة الله وبركاته
حدخل بالموضوع على طول بدون اي مقدمات طبعن قبل فتره طلع تجمع للطالبات على اساس انهم يسمعون اصواتهم لاكبر عدد ممكن وبكذا ندافع عن حقوقنا ومنها حكاية السنترا الي كانت ربوع خميس جمعه ورفض جميع الطلبه ووقوفهم يد واحد امام هذا القرار جعل الجامعه تغير من قرارها لمصلحة الطالب وهذا مانحن نسعى اليه مصلحتنا فوق كل شئ اولا واخيرا خاصه انوا مصالحنا ماتاثر في احد ابدا وبكذا لاضرر ولاضرار
نجي لمشكلتنا الثانيه وهذي المشكله ماظهرت الان من اول ظاهره ولا في احد بيتكلم ولابيدافع عن حقوقنا لازم نكون يد واحده طلاب وطالبات الى متى السنترا بيقطع والى متى اتساذاتنا يمشوا المنهج باسرع وقت عندهم ويقولوا مافي وقت ولايجابوا على اسفساراتنا ولما تكلمي الوحده تقلك لايوجد وقت للرد والنقاش في المحاضره وخاصه لما يكون السؤال مهم ولجميع الطالبات نحنا ايش ذنبا اذا نظام السنترا متدني ولايخدم الطلاب بشكل ممتاز
لازم يكون هناك ردت فعل منا لوقوف مثل تلك المهزله اغلبنا دافع فلوس وكلها 3 اسابيع بالله اقنعوني اي ماده تختم ب3 اسابيع هذي تدخل بعقل مين بالله لازم يكون هناك تجميع تاني للطالبات والمطالبه بحقوقنا في السنترا اولها تغيير نظام سنترا للافضل ويكون يخدم الطلاب بشكل ممتاز وعدم قطع المحاضرات او عدم دخول الاستاذه بوقت المحاضره لان صعب عليها الدخول وكان النظام معلق معاها وبكذا نحنا اصابنا الضرر المحاضره دي الي راحت علينا بسبب سوء السنترا مين يعوضها لنا بالله اذا كان 3 اسابيع نختم فيها منهج باكمله والطلب التاني هو زيادة هذه المده لتكون مابين شهرين او 3 اشهر على مستوى الترم ويكون في مجال اكبر للطلاب للنقاش والاستفسار من صاحب الماده

انا مابقول مظاهره لان هل الكلمه شوي كبيره
بس بقول تجمع ويكون في وحده تتكلم بصوت الجميع والي عندها اي استفسار تكتبه وتديه المتكلمه بصوت الجميع بحيث مايكون في شوشره في وصول اصواتنا
ولازم صوتنا يوصل للكل وللصحافه بشكل عام اللين يوصل لولي الامر وهو الملك عبدالله حفظه الله
ليكون هناك ردت فعل لحقوقنا ومتطلباتنا ولازم يعرفوا انوا طلباتنا مهمه جدا واننا ماراح نسكت على هل الظلم ابد
وهل التجمع له ادابه ولجامعتنا الاحترام منا ولنا ايضا ..انا ما ابغى امس جامعتنا بشئ سئ ولكن يوجد حق من حقوقي محد يبالي به وبكذا لابد ان يكون لنا ردت فعل قوية بدون اي تراجع
وانا عن نفسي راح اتوكل امر الصحافه بحيث يكون حقنا على اعين الكل بالمملكه والكل يسمع ويشوف متطلباتنا نحنا ماطلبنا غير حقنا لاغير
لمتى تسكتوا ولمتى تخافوا محد يقدر يسوي فينا شئ تهديداتهم لنا ماراح تخوفنا محد يقدر يسويلنا شئ دامنا واقفين بالطريق الصح ودام الصحافه راح تدعمنا هذا كافي ليكون صوتنا قوى بعد وقوف الله معنا
بالله عاجبكم الحال الي انتوا فيه كل يوم تنتظروا استاذة الماده وتدخل متاخر وتقول النظام علق كل يوم من سئ لاسواء
نحنا مو ضد جامعتنا نحنا ضد القرارات الغلط الي ماتخدم مصلحة الطالب اولا واخيره
اذا ما اخذنا حقنا بيدنا مين ياخذ حقنا
تقولون الله لهم بس الله قال اسعى ياعبدي و انا اسعى معاك
ماقال اجلس وحط يدك على خدك واستنى الفرج عمر الفرج ماجاه من الكسل والخمول والسكوت
الفرج يجي من الله بعد الدفاع وراء حقوقنا والمطالبه بتعويضنا عن الايام الي السنترا كان فيها معلق او النظام متوقف
كلنا لازم نكون يد واحد نختار اليوم الي يناسب الجميع
ونختار مجموعه كبيره من الصحافه لتدعم تجمعنا
ونقف يد واحده ويد الله مع الجماعه مو مع الفرد
لازم نتجمع ونكون اكبر عدد ممكن عشان محد يستهين بطلبنا
ولازم صوتنا يكون مسموع
ارجع واعيد تجمع سلمي وبمتحدث واحد واي استفسار يكون عن طريق الورق يكتب ويرسل للمتحدث الرسمي باسم جميع الطالبات
عشان يقولوا عننا اننا تجمعنا وطالبنا بحقوقنا بحدود الادب والاحتشام لانفسنا قبل غيرنا

اتمنى تتفاعلوا والاشاعات بطلوها حق لو تجمعتوا بيفصلوكم ولى بيجيبوا لكم الشرطه محد يقدر يسوي لنا شئ نحنا مو بنقاله بدون اقامه جايين نتجمع على فساد
نحنا طلاب وطالبات الوطن الغالي لنا حق ضايع ولنا كلمة غير مسموعه ولنا راي غير مهتم به
لابد ان يصل ولابد ان نقف يد واحده بدون اي تراجع او تردد
اترك لكم المساحه للنقاش والاتفاق
اختكم ....عزه الغامدي