قولي وداعاً لحب الشباب

sara a7md · #1 26-02-2012, 03:38 PM

بسم الله الرحمن الرحيم

السسسلآم علييكم

هذا روتيني اليومي المعتاد لمعالجة وتفادي التعرض لحب الشباب

اول شيء نوع بشرتي مختلطة التي زون دهني والباقي عادي ومعرضة للحبوب

وحساسة شوي عارفة نوع غريب لول

اول ما أصحى من النوم اغسل وجهي تمام بمويا دافية وصابونة الأكني ايد

بعدها ابخ على وجهي مويا ورد استنى شوي لمن ينشف واستخدم محلول الدلاسين

بكامل الوجة اخلية ينشف تمام يعني عشر دقايق او ربع ساعة واستخدم كريم الأورنج دايلي

بالليل قبل النوم نفس روتين الصباح بس بعد ما أغسل وجهي بالصابون والفرشة امسح بقطنة مع اسكينول

وبعدها بخاخ مويا الورد والدلاسين والكريم

الروتين الأسبوعي احيانا لو حسيت ان بشرتي ناشفة محتاجة ترطيب شوي

بدال الصابون استخدم الشوفان

مرات استخدم مقشر ستيفز للبشرة الدهنية مع الفرشة

ومرة بالأسبوع او بالأسبوعين استخدم ماسك الهملايا</B>

الحين مع الرفيو للمنتجات الموجودة بالموضوع

صابونة الأكني ايد : استخدمت كثير من صابونات او صوابين (مدري وحدة منهم ) و غسول
وماناسبني غير الأكني ايد مرة ناسب بشرتي مايخليها ناشفة مرة وعالج الحبوب اللي عندي
وبدأت تخف كثييييير لين ماراحت نهائياً بعد هالصابون يعني بجد انقذني
حتى ينفع استخدامة للشعر الدهني بس ماعمري جربتة للشعر

الفرشة : اخذتها من زوجة اخوي فرشة شعر للبيبي كذا فجأة ماعمري قريت احد استخدم مشط للوجة
عجبتني مررة نااعمة قمت غسلتها وعقمتها لأسبوع وصرت استخدمها صارلي سنة تقريباً
وفرقت فيها لاحظتها تنظف تمام المسامات وبعمق طبعاً استخدمها مع الصابونة والمقشر
كنت استخدمها بالصباح وبالليل بس بطلت وخليتها بالليل بس علشان تفادي لخطوط التجاعيد
لأنها ممكن تسبب دا الشيء انظف بشويش وبحركات دائرية لكامل الوجة ماعدا محيط العينين
لاحظت كمان انها تخلي ملمس الوجة صحي وناعم انصح فيها لكل البنات

مويا الورد : طبعاً استخدامة عندي مثل شرب المويا عادة وشيء مهم مرة يخفف من الأحمرار
بعد استخدام الصابون والفرشة والماسك والمقشر ويصغر من المسامات ويخلي البشرة صحية مع الأستخدام المستمر

محلول الدلاسين : لو يقولو لي اختاري منتج واحد بس اختارهـ هو
وينة من زمان عني هذا المنتج الوحيد اللي حسيتة فرق وجهي فية
هو زي معقم للحبوب صارلي اكثر من سنيتن واستخدمت يمكن اكثر من 15 علبة للحين
بالنسبة لي احطة لكامل الوجة بعض البنات تحطة بالحبة ينفع بالحالتين
بما انو بشرتي معرضة للحبوب فا علشان كذا استخدمة لكامل الوجة وفعلاً ماشوف الحبوب
إلا نادراً ولله الحمد طبعاً لازم تجي حبة تسلم عليا بين فترة وفترة وعلى طول احط المحلول عليها
كل مافتكر يمكن مرتين طولت اليوم واكثر خاصة اذا الحبة اللي داخل البشرة وتوجع يومين بالكثير وتروح

الأكسينول : روعة ينظف تمام من الأوساخ ويصغر المسامات وجربت الليمون الأصفر والأخضر والخيار والبرتقال
احسن شي نفعني الليمون صح انو حار بس يخف على طول بعدها
ما انصح الليمون للي بشرتها حساسة جربي الخيار

كريم الأورنج دايلي : النوع اللي استخدمة للتفتيح صح سعرة غالي مرة واحسة يخلص بسرعة
بس دي رابع علبة اشتريها مابيض بشرتي لأني ماشتريتة للتبيض ابغاة يفتح الآثار الحبوب القديمة
وتصير بنفس درجة بشرتي وفعلاً الآثار بدت تختفي كنت زمان استخدم كونسيلر ثقيل
علشان تتغطي الحين صح ما أختفت بس صار الأساس يخفيها
الآثار الخفيفة راحت نهائياً لكن القوية خفت بشكل كبير وكلمالها تخف
الكريم مرة حلو واحلى مافية ان البشرة تتشربة بسرعة استخدمة صباح ومساء
مو كل صباح علشان مابغاة يخلص بسرعة ولمن احطة لبشرتي اسويلها مساج خفيف لين ماينشف تمام الكريم

الشوفان (كويكر) : ليا شهرين استخدمة لاحظت انو يخلي البشرة رطبة صحية يخفف من الأحمرار وينظفها تمام
زي ماقريت انو فعال للحبوب وماراح يأثر عليها ينفع لكل البشرات وما اقدر اكتب اكثر لأنو لازم اجربة اكثر من كذا

مقشر ستفيز للبشرة الدهنية المعرضة لحب الشباب : ليا سنة ونص علية مرة حلو يشيل طبقة الجلد الميت
اللي هي القشور اللي تطلع مع الأساس غيروا الباكيج وحسيت انو المنتج نفسة تغير
الحين صار بزيادة معطر ريحتة كلها عطر قبل ماكان كذا كانت ريحتة مشمش
بس ليا اسبوعين استخدمة ماصار لبشرتي شيء فا مشي حالو ما اعرف اذا برجع اشترية مرة ثانية ولا
لأن ريحة العطر الجديدة ماحبيتها

ماسك الهملايا النيم للبشرة الدهنية المعرضة لحب الشباب :
ماسك مرة قوي ينظف تماااام ويشيل الأوساخ والدهون ويفتح المسام وينظفها استخدمة لمن احس وجهي مدهن بزيادة
او لمن طول الأسبوع اكون عاملة مكياج لأنو كمان يقتل الجراثيم اخلية لربع ساعة احياناً انسى
واخلية لنص ساعة وانظفة بقطنة ومويا دافية ينشف الدهون فعلاً يمكن تمر نص اليوم ولا دهن
يطلع حتى بالأنف مو اي وحدة راح يعجبها هالماسك بص انصحة للبشرة الدهنية والمختلطة بس
بعد ما انظفة وجهي يصير مرة احمر ابخ مويا ورد نص ساعة وراح الأحمرار تماماً
العلبة معايا اكثر من سنة ونص يعني بيجلس معاكي كثير

</B>

نصايح عن تجربتي لتفادي التعرض لحب الشباب :

حاولي يدك تكون نظيفة طوال اليوم وحاولي كمان يدك تبعديها نهائياً عن وجهك
عندي الحين فوبيا مابغى شي يقرب من وجهي حتى لو اطفال عيلتنا يقربو يبوسوا
على طول بعدها استخدم المحلول ههههه

جوالك الاب توب الآيباد لازم يتمسح بمعقم ديتول او حتى اسكينول بالأسبوع مرتين وكلما تفتكري

شرب المويا مرة مهم لتصفية البشرة وللحبوب

اكلك مافي احسن من الأكل الصحي والخضار

حاولي تبعدي عن العصبية واذا كان يومك طويل ومرهق استرخي لساعة او ساعتين

شعرك ابعدية عن وجهك خاصة اذا مستخدمة منتجات من كريمات وسبراي

المكياج لازم ولازم يتمسح قبل النوم وكمان فرش المكياج مرة مهمة تنظيفها على حسب
استخدامة لها يعني اقل شيء بالأسبوع مرة علشان البكتيريا ماتتجمع فيها وتصير بوجهك

..... ..... ..... ..... .....

وبالنهاية لا تفكري كثير بالحبوب وانسيها زيي سوي روتين مناسب لك

اذا تحبي جربي اللي ذكرتة فوق لكن لو انت معاكي روتين مناسبك لا تغيرية

او حتى جربي منتجات لين تلاقي اللي يناسبك وخليكي علية وهذا انا اللي اتبعتة

لأني رحت دكاترة جلدية واعطوني اشياء وجربتها ومانفعتني

سويت بحث بالأنترنت ومثل البنات جربت كثيييير من كلين آند كلير ونيتروجينا صابونة البابايا

وما نفعني غير اللي ذكرتة فوق مو شرط في اللي ماناسبني ناسب غيري واللي نفعني ماراح ينفع غيري

فا علشان كذا جربي لين تلاقي الأشياء اللي تناسب بشرتك بالضبط

والحمدوالشكر لله على النعمة وهذا نهاية موضوعي

م / ن .

شعاع الألماس · 26-02-2012, 05:02 PM

موضوع راااائع ومتكامل

يعطيك العافيه ي رب ....

just besh · 26-02-2012, 05:41 PM

الله يعطيك العافيه
ايوا انا عندي روتين خاص
وانتبهت انك ماشاء الله تكثري من الاشياء الكيميائيه
انا افضل تخففي قد ماتقدري افضل الاشياء الطبيعيه
تقبلي مروري