بخصوص عبارة نأسف ... للاسف صحيحه :(

[مس ارنوبه..]

للاسف رحت الجامعه بنفسي وسمعت الكلمه من المشرفه وماصدقت ورحت للمسؤله الاخيره واخذت الهرجه منها قالتلي العباره صحيحه ومافيها تراجع قلتلها كيف وانا مطلقه من سنين ولالي دخل غير الضمان وانا ام لطفلين وظروفي صعبه ونعتبر من الطبقه التعبانه ماديا قالت للاسف انتي ماحققتلي الحد الادنى وفي ناس اسوء منك بكثير ماادري عاد وش اسوي عموما بكل الاحوال مارح اقدر اسدد يعني رح ااجل الترم دا خساره والله
وعسى ان تكرهوا شيئا وهو خيرا لكم
بس يااخوان لاتحبطو من كلامي انتو اسعوا وجاهدوا مثل ماعملت انا ويمكن حظكم يطلع افضل من حظي لاني ماسلمت الرايه الابعد ماسويت كل الي اقدر عليه وقطيت وجهي بكل مكان والحمدلله على كل حال

[nmon]

خليك من كلام المشرفين

اختي الامر وضح وصريح

انا اعرف اكثر من واحد في الضمان شملهم الاعفاء بدون نقاش
فمابالك انتي مطلقه وفي لضمان . نصيحتي لك جهزي ملفك واكتبي معه معروض
وخلي واحد من اقارب يروح شطر الطلاب ويدخل علي العميد صدقيني رح يجي بس لا تيئسي وتأجلي ترم
والله حرام

اتمنا لك التوفيق

تحياتي للجميع

[نيرمين]

حسبي الله ونعم الوكيل
لااله الاانت سبحانك اني كنت من الظالمين
استمري يااختي عليها وراح ربي يفرج همومك
اختك نيرمين

[مس ارنوبه..]

بالنسبه لشطر الرجال ماعندي احد يوصل اوراقي انا صارلي اسبوع مستاجره بجده عشان اخلص امور الاعفاء ماكنت ابيه يفوتني قلت لو شفت النت سوا حركات كالعاده اروحلهم بنفسي لكن للاسف مايشملني الاعفاء يعني كل محاولات المتعبه بائت بالفشل والله ماخليت طريقه لكن قدر الله وماشاءفعل
كل شي بالجامعه تمام الا مشرفات شطر الطالبات فيهم كبر وغرور ويدوب الوحده ترد بحرفين وماتبغى تساعد ولاتكسب اجر كل همها تصرفنا وبس

[مس ارنوبه..]

مكرر

[nanasmile]

حسبي الله عليهم .. يٍشملك آلاعفآء ... بٍس كٍـيف مآ وآفقو مع آن ظروفكٍ صعبه ..

لٍـكن وٍكلي آمركٍ للهٍ .. وآلله مٍعــآك ..

[شرقية]

اختي مس ارنوبه

لاتسمعي كلامها

روحي الجامعة اليوم أو بكره خذي ورقة موجهه للضمان

علشان يعطوك مشهد

بإنك أحد مستفيدي الضمان الإجتماعي

وبإذن الله راح يعفوكِ من الرسوم

[الساهرة]

لاحول ولا قوة الابالله ....والله انك تستاهلي الاعفاء من غير كلام يعني انتي مطلقة وفي الضمان ايش يبغوا اكثر من كذا بس غريبة صديقتي قبلوها بس عشان ابوها متقاعد وعند قسط سيارة يعني انتي حالتك اصعب من حالتها بكثير..انتي لاتياسي وحاولي فيهم ومعالاكي من هذولا المشرفات

[مس ارنوبه..]

ياقلبي والله ماخليت ورقه جبت ورقه من الضمان تثبت اني اخذه وكل الاوراق الي تثبت ظروفي اخذتها معايا بس الظاهر عشان انا عايشه ببيت اهلي قالوا مايشملك الاعفاء يمكن في بنات عايشين لحالهم زي بعض الارامل المهم انهم رفضوني

[nmon]

المشاركة الأصلية كتبت بواسطة مس ارنوبه.. بالنسبه لشطر الرجال ماعندي احد يوصل اوراقي انا صارلي اسبوع مستاجره بجده عشان اخلص امور الاعفاء ماكنت ابيه يفوتني قلت لو شفت النت سوا حركات كالعاده اروحلهم بنفسي لكن للاسف مايشملني الاعفاء يعني كل محاولات المتعبه بائت بالفشل والله ماخليت طريقه لكن قدر الله وماشاءفعل كل شي بالجامعه تمام الا مشرفات شطر الطالبات فيهم كبر وغرور ويدوب الوحده ترد بحرفين وماتبغى تساعد ولاتكسب اجر كل همها تصرفنا وبس

انتي متأكده ان اوراقك كامله
لو الاوراق كلها معاك ادخلي علي العميده او المسؤله في شطر الطالبات
وخليك من لمشرفات لازم تقابلي شحص مسئول وليس الي ما يخافو ربهم المشرفت

بصراحه انا رح انجن
اجل مين الي رح ياخذ الاعفاء اذا انت ما اخذتي

ربي يسهل امورك