طرق حقيقيه و مجربة للنجاح في السنة التحضيرية..معاً لسنة جميلة وناجحة..

[jo0odi s]

بسم الله الرحمن الرحيم

كيفكم يا حلوين يارب تكونوا في احسن حال وتكونوا متحمسن للدراسه ...

واخيرا وبعد جهد وعناء ليا فترة اشتغل على هذا الموضوع عشان اطلعه بأحسن شكل.. صح ما عرفت احط خلفية <<برا

بس اهم شيء عندي تستفيدوا من كلامي،سامحوني يمكن حهرج كثير بس صدقوني كل معلومة هنا

حتفيدكم كثير..

حنبدأ وحقول لكم تجربتي البسيطه في التحضيري انا مالقيت احد يفهمني ايش يعني تحضيري ولا يقولي هذا صح وهذا خطأ ومع ذلك كنت متحمسه للجامعه ومن اول اسبوع جاني احباط ،وانا كتبت الموضوع هذا بس عشان

افيدكم واقولكم انه التحضيري مو شيء مرعب زي ما كل الناس بيقلوا ولو عرفنا نتعامل معاها من جد حتكون سنة حلوة

اول شيء لازم نعمله انه ما نستسلم احنا داخلين تحدي مع نفسنا ومع اهلنا ومع العالم كله وحنقدر ننجح ونتفوق ،لازم يكون كلنا امل بالله انه ما حيسيبنا ونتوكل عليه ونعمل كل شيء نقدر عليه ،ولو لحظه وانتوا بتذاكروا

حسيتوا انكم تعبتوا او نفسيتكم تعبت على طول غيرو جوكم روحو خذو شور ولا اخرجوا ولا اقرؤوا قرآن اهم شيء تغيري جو شويه عشان ترجعي وتذاكري بتركيز واهم شيء حطوا شعارات تحمسكم وصوركلها تفاؤل وحياه

عشان تقدروا تساعدوا نفسكم..

ثاني شيء انتبهوا من الاشاعات : ناس يقولو فيه حاجه محذوفه ،وناس يقولو حينزلو اسئله نذاكر منها ...الخ سيبوكم من هدولا الناس ،والناس اللي يبغوكم فاشلين امشي نسحب عالمحاضره ،مافيا اذاكر،خلاص طز

خلاص تعبت هذي الفئه الغريبه حتلاقوها كثير ،ابعدووووو عنهم وقد ما تقدروا سلكولهم لانهم ناس يجيبوا الاحباط

فيه نقطة مهمه لازم نتكلم عنها انه الدراسه مو كل شيء في الحياة انا اعتزلت العالم كله بداية التحضيري لاني كنت فاهمتها غلط هيا تحتاج لشوية تخطيط للوقت وحيزبط كل شيء

احنا كبرنا ولازم ننظم وقتنا عشان نكون مو مقصرين لا في الدراسة ولا حتى في حق نفسنا وهذا هوا النجاح... حنلقى وقت للدراسة وللنوم وللفله والخرجات وكل شي نبغاه ،ماينفع ننكد على نفسنا لازم نخرج وننبسط

ونفلها بس نهتم شوية في المذاكره

نتكلم عن المواد

خطة أ (رياضيات،فيزياء،مهارات اتصال،مهارات حاسب)

خطة ب (احصاء،كيمياء،احياء)

بالاضافه للانجليزي

فيه مواضيع كثيرة عن كيف نذاكر كل مادة فيهم ومن فين فما ابغا اكرر نفس الكلام بس اللي يبغا يسأل عن هذي النقطه يتفضل ويسأل وحجاوبه على طول ان شاءالله

اهم شيء في موضوعي النقطه اللي دحين حتكلم عنها وهي ترتيب الوقت وحذكر لكم مثال عالسريع مثلا

السبت والاحد والاثنين حذاكر كيمياء واحصاء

الاحد والثلاثاء حذاكر انجليزي واحياء

طبعا هذا مثال وكل واحد على حسب اللي يناسبه ،بس اهم شيء تحطوا لنفسكم يوم (اف) اجازة زي يوم الخميس عشان تقدرو تنامو كويس وتصحوا وتنبسطوا وتحسو انه عندكم فراغ ولا تنضغطوا كل ايام الاسبوع وحترجعو

بحماس اكبر للدراسة،انا كنت اتمنى احد يقول لي كذا بس كلهم كانوا يقولوا لااا بس ذاكري ماينفع اضغط على نفسي ابدا وانتبهو لا تراكموا الدروس وتقولوا حيمدي قبل الاختبار والله مايمدي ..انتوا في جامعة يعني لازم

تخططو لمستقبلكم كويس من دون ما نضغط نفسنا مايصير كل وقتنا دراسه ولا كل وقتنا خرجات ولعب..

دحين حتكلم عن سبب النجاح في الحياه كلهااا وهوا ربنا ،يا جماعة لازم نقرب لربنا مو بس عشان الدراسة عشان نعمه كثيره علينا وعشان هوا دايما معانا ، والله ما كان فيه شيء يصعب عليا الا واروح اصلي وادعي من قلبي

وربي يساعدني،لا تسيبوا الجامعة تضيعكم من حياتكم ومن ربكم ..!

حقولكم اشياء بسيطة وابدا مو صعب تعملوها ،مثلا لو نزلتوا القرآن على جوالاتكم وانتوا رايحين او راجعيين من الجامعة تفتحوا وتقرؤو لو آيتين وماحيكلفكم

شيء ما حتشيلو شيء زايد معاكم لانه جوالاتكم دايما معاكم،او خدو مسبحه معاكم وسبحو في الطريق اصلا الدنيا زحمه وحتقعدو كثير في السيارة بدل ما تسمعو اغاني سبحوا ..قربوا لربكم لانكم في حاجته...

وبكذا حتكونو ناجحين وحطيتوا وقت لربكم ولدراستكم وللفلة حقتكم وهذا هو النجاح ...

واخيرا عارفه انكم طفشتو اخر جزء خلاص في موضوعي

انا عملت هذا الموضوع وماقدرت اكتب كل شيء حسيت اني كثرت هرج بس انا لما كنت تحضيري كان عندي اسئلة مررة كثير ومالقيت احد يجاوبني فأعمل مواضيع وزحمة،وكان عندي اسئلة بايخه بعض الاحيان

ما اقدر حتى اعملها موضوع مثلا (جوالات الكاميرا مسموح بيها، عادي نلبس بنطلون ،عادي اجيب لابتوبي،الشرح عربي ولا انقلش ...الخ) فما كنت اقدر اسأل هذي الاسئلة

عشان كذا أي سؤال مهما كان صغير لا تتكسفوا انا ححط الموضوع عندي في المفضله وكل ما اقدر حشيك عليه وحرد على كل واحد فيكم وانتو كمان حطوه عندكم في المفضلة ممكن في أي وقت تحتاجو ليه واللي يبغا يسأل عن

طريقة التدريس عن الانقلش عن اللبس عن الاختبارات ...الخ

فبدل ما نعمل مواضيع كثيره نحط اسألتنا هنا وكلنا حنساعد بعض وحنرد على بعض حتى لو تبغوا شرح أي شيء لو ما عرفت انا فيه ناس كثير حيساعدوكم معايا ..

اتمنى اكون افدتكم وكان هرجي طويل معليش ،والله يسهل اموركم ما حنساكم من دعائي وانتم كذلك ما اطلب منكم الا الدعاء لي

والسلام عليكم ورحمة الله وبركاته

[احسآس مآيفهمونه ♥]

حببيتي الله يسعدكك يأآشيخة وإن شاءالله هالموضوع يكون في ميزان حساناتك يارب

حبييبت أسأل كيف أقدر أنق من أستاذة لأستاذة ثانية يعني أروح أكلمها ولا أروح للشؤؤن الطالبات وإذا غيرتها هل راح يتغير وقت جدولي يعني حيصير لخبطة بالموضوع ولا لا

وشكرأآأ حبيبتي مرهـ ثانية على هالموضوع اللي اكييد كلنأآأ راح نستفيد منو

[jo0odi s]

المشاركة الأصلية كتبت بواسطة احسآس مآيفهمونه ♥ حببيتي الله يسعدكك يأآشيخة وإن شاءالله هالموضوع يكون في ميزان حساناتك يارب حبييبت أسأل كيف أقدر أنق من أستاذة لأستاذة ثانية يعني أروح أكلمها ولا أروح للشؤؤن الطالبات وغذا غيرتها هل راح يتغير وقت جدولي يعني حيصير لخبطة بالموضوع ولا لا وشكرأآأ حبيبتي مرهـ ثانية على هالموضوع اللي اكييد كلنأآأ راح نستفيد منو

ياهلا بك حبيبتي شوفي موضوع النقل شوي صعب الا اذا طحتي لك في استاذتين كويسات لانه لما كنا نروح الشؤون كانو يقولو مستحيل ويسوو مناحه فكنا نقول لاستاذاتنا انه ممكن احضر عند استاذه ثانيه بس لازم الاستاذتين يوافقو والاوقات لازم تكون نفسها بس وقت الاختبارات ترجعي لنفس شعبتك وتختبري فيها لانك ماحتغيري جدولك من الشؤون حيكون بس كلام بينك وبين استاذتك ..بالتوفيق ياقلبي

[Azo18]

لوفي أكتر من شكر واحد كان شكرتك

الله يوفقك ويعطيك ع قد نيتك ويرزقك الرزق اللي فيه خير لك ولأمتك الإسلامية جزاك الله الف خير كلامك يثلج القلب

أشكرك من كل اعماق قلبي

بارك الله فبك


في كم سؤال الحين لو بد استفسر عن اي شيء عن المادة هل أكلم الدكتور ولا لو كلمتو ممكن يزعق عليا ويخصم درجات والتخويفات هذي ؟

وبس

[jo0odi s]

المشاركة الأصلية كتبت بواسطة azo18 لوفي أكتر من شكر واحد كان شكرتك الله يوفقك ويعطيك ع قد نيتك ويرزقك الرزق اللي فيه خير لك ولأمتك الإسلامية جزاك الله الف خير كلامك يثلج القلب أشكرك من كل اعماق قلبي بارك الله فبك في كم سؤال الحين لو بد استفسر عن اي شيء عن المادة هل أكلم الدكتور ولا لو كلمتو ممكن يزعق عليا ويخصم درجات والتخويفات هذي ؟ وبس

يسعدك ربي ماتتخيلي حجم فرحتي بدعائك ربي يحقق لك ماتتمنيه ..
بالنسبه لسؤالك اول شيء في التحضيري ولا دكتور بيده درجه وحده ..الدرجات موزعة عالاختبارات ، والاختبارات مو اللي يدرسك يحطها وابدا لاتخافي اي سؤال تبغيه على طول اسالي استاذتك ولا تقعدي تسمعي كلام البنات اللي معاكي احسن تاخدي الشيء من مصدره ولا حتزعق ولا حتعمل شيء بالعكس هما يحبو الطالب المجتهد واللي يسال وكدا ...

الله يوفقك حبيبتي

[Azo18]

اوبس انا ولد اختي

ع العموم جوزيتي خيرا بخصوصو لو انو كنت عند منسقين المواد اكيد هما اللي حيحطوا الاختبارات طبعا ولا غير صحيح ؟

واذا كانو منسقين المواد حيبدطو الأختبارات مداني اعرف اسلوبهم واتقرب منهم وكذا صح اختي ؟

[توتي واماني]

حبيت اشكرك ياjo0odi على هذا الموضوع الي كنت محتاجه بالمرة وعندي اسئلة كثيرة بس مكسوفة

[جُوآن]

الله يوفقك و يسعدك يارب

انا حبيت اسأل دحين في القاعة لو جلست في المقعد الامامي يصير ليا على طول و الا يتغير ؟

يعني بالمدرسة اماكنا في الفصل معروفة في الجامعة نفس الشئ و الا لا ؟

عادي لو اقعد بعبايتي في الجامعة ؟ انا وحدة خجولة مرة

لو شلت معايا من البيت كوب النسكافية الي يحفظ الحرارة المقفل , عادي ادخله في القاعة و الا اخليه برا ؟


و راح ارجع لك تاني الله يعينك عليا


:)

[jo0odi s]

المشاركة الأصلية كتبت بواسطة azo18 اوبس انا ولد اختي ع العموم جوزيتي خيرا بخصوصو لو انو كنت عند منسقين المواد اكيد هما اللي حيحطوا الاختبارات طبعا ولا غير صحيح ؟ واذا كانو منسقين المواد حيبدطو الأختبارات مداني اعرف اسلوبهم واتقرب منهم وكذا صح اختي ؟

معلييييييييييش اخويا اعذرني ما انتبهت والله اسفه ..

ردا عن سؤالك اخوي الجامعه لها فروع عده ..فلذلك يجتمع من كل فرع اساتذه معينين مع منسق الماده وكلهم بيحطو الاسئله فمافي شخص معين يحطها لحاله وهذا الشيء يطبق عالتحضيري فقط...


بالتوفيق اخوي واسفه مره ثانيه

[jo0odi s]

المشاركة الأصلية كتبت بواسطة توتي واماني حبيت اشكرك ياjo0odi على هذا الموضوع الي كنت محتاجه بالمرة وعندي اسئلة كثيرة بس مكسوفة

يلاااا قولي كل اسئلتك مهما كانت صغيره من جد انا نفسي اساعدكم عشان ماتحسو بالضياع اللي كنا حاسين بيه

انتظر اسئلتك حبيبتي ..