تجربتي | نبذه شامله عن التدريب في المستشفى |

[بشائر الفرح =)]

السلام عليكم ورحمة الله وبركاته
أهلاً بالجميع

اليوم حأتكلم لكم عن التدريب الصيفي ف المستشفيات وأجاوب على مجموعه من الأسئله
بواقع شيء من المعرفه وشيء من التجربه كذلك

ماهو التدريب الصيفي ؟
وليش نتدرب ؟
ماهي إيجابيات وسلبيات التدريب المبكر ؟
كيف تسفيد من فترة التدريب ؟
ماهي المستندات المطلوبه للتدريب ف المستشفى ؟
ماهو الـ Elective module ؟

التدريب الصيفي : هي فتره تدريبيه يقضيها الطالب ف المستشفى والقسم الذي يرغب أن يستزيد منه أو يتعلم فيه أكثر
ليس له وفت محدد على حسب رغبة المتدرب ف المده التي يريدها ف الصيف والمستشفى التي يريد

ليش نتدرب ؟

التدريب ف المستشفى له فوائد كثيره من ضمنها إذا كنت بتدرب تدريب مبكر فالتدريب ح يخليك تحب الطب أكثر وتتمسك فيه
التدريب ح يفيدك في تطوير بعض المهارات المهمه كمهاره أخذ الحاله المرضيه ومهارة عمل الإختبارات السريريه
ف التدريب تتعلم كيف تعطي الأبر وتركب الكانيولا وكيف تخيط بعض الجروح ف الطوارىء
ف التدريب تزبد روح المنافسه والإصرار عندك إنك تفهم المرض أكثر خاصه لما تشوف المريض أمامك ولما تسمع دعواته وتشوف بنفسك قد ايش هوا واثق فيك
في التدريب يزيد إحساسك بالمسؤوليه وإنه لازم تجتهد أكثر عشان تعالج المرضى وتخفف عنهم
التدريب يفهمك إن الطب مو مجرد مذاكره مستمره ودوام طويل أومعدل لازم نرفعه لا بالعكس هو تعامل مع المرضى وإستيعاب ومناقشه ثم نتيجه تصل بها لإحساس عظيم وهو راحة المريض

التدريب يعودك على جو المستشفى ويعودك ع النقاش والسؤال يزيد ثقتك بنفسك ويخلي شخصيتك مرنه شويه ف التعامل مع الفريق الطبي سواء كانوا رجال أو نساء
بمعنى اللي كان خجول أو كانت خجوله إنها تكلم الدكتور أو تتناقش معاه التدريب حيساعد مره كثير ف النقطه هذي
لإنك حتلاقي نفسك مضطر تسأل وتناقش وتعرض حاله وشويه شويه الخجل يروح ويسير الموضوع نوعا ما سهل

التدريب ومن تجربه شخصيه ح ينمي عندك البحث عن المعلومه وفهمها بالحذافير وحينمي مهارة القراءه كذلك بشكل ملحوظ لإن أي حاله تقابلها حيكون عندها مرض معين ف أنت في هذا الوقت يا إنك تكون عارف المرض وفاهمه فما يأخذ منك وقت كثير ف القراءه أو إنه يكون جديد عليك وبالتالي تلاقي نفسك لا إرادي نفتح الكتاب وتقرأ عشان تفهم وعشان في مريض حقيقي قدامك عنده هذا المرض مو مجرد محاضره أو معلومه تحفظها وتنساها

الكلام هذا كله لا ينطبق إلا على الدكتور اللي رايح يتدرب عشان يستفيد ومستعد يتعب على نفسه

اللي ماعنده إستعداد يسأل كثير و يتعب
أو مايبغا يتفشل
أو ماعنده إستعداد يقرأ
أو ماعنده استعداد يغير صفة الخجل أو يشتغل عليها شويه
أو ماهو مفكر يلتزم ويداوم يومياً ويتعلم

أقولها له من الآن ( لا تروح) ومن بدري عشان مايأخذ تدريب ويجي يقول أنا ما استفدت !
إذا ماعندك إستعداد لكل اللي قلته سابقاً ماحتسفيد ولا حاجه !!

مافي شيء سهل صدقوني اللي يبغا يتعلم
لازم يتعب مره
ويتفشل مره
ومايعرف يجاوب مره
ويخاف مره
لحد لما يتعلم بالعكس الدكاتره لما يشوفوا حرصك وإنك معاهم وبتسأل وتهتم وتشوف مرضى وتقرأ حتلاقيهم هما بنفسهم ينادوك كل ماتجي حاله إنترستينق .. لكن لو من أول يوم طفشت أو زعلت ما أحد حيسأل عنك !!

ماهو التدريب المبكر ( قبل السنوات الإكلينكيه )

اللي يكون بعد سنه ثالث فقط
أما سنه ثانيه مايحتاجوا يتدربوا ف الإجازه
ومن واقع تجربه كذلك اللي حاب أو حاب يتدرب ف إجازة سنه ثالث فالأفضل إن المده لا تزيد عن أسبوعين أو حتى أسبوع

ليش؟


لإن الهدف من التدريب المبكر هو الآتي :

تتمسك بالطب أكثر وتفهم مزبوط إن الطب مو بس درجات و تتعود على المستشفى وجوها من خلال تعامل المرضى وتعامل الفريق الطبي معاك ك طبيب متدرب
تبدأ تطور مهارة القراءه وتتعرف ع الأمراض اللي تشوفها بعينك وتشوف أعراضها ع المريض
ممكن ف هذه الفتره كمان تتعلم كيف تأخذ هستوري ( حاله مرضيه ) وتجرب تأخذ حاله وتعرضها ع أي دكتور معاك وهو حيصحح لك حتى لو ماكنت متقنه مره أو صحيحه طبيعي لإنك لسه ما درست كيف تأخذ هستوري بس إحنا هدفنا نتعلم ومره ع مره زي ماقلت حتزبط الأمور المهم إنك جربت مع العلم إنك لازم تقول لهم إنك باقي مادرست الهستوري مزبوط يعني لازلت بتتعلم

لا تستهون بأي شيء بسيط ممكن تتعلمه ف المستشفى لإنك ماتعرف يمكن الشيء البسيط هذا هو اللي يفرق بينك وبين طالب ثاني ماتدرب والفرق اللي بينك وبينه إنك تعلمت حاجه جديده
كل اللي ذكرته يكفيه تقريباً من أسبوع لأسبوعين لإن لو زادت المده ما أتوقع حتسفيد كثير لإنك تبقى مادرست كلينكال وحتلاقي أشياء كثير ما إنتا عارفها شي طبيعي ومتوقع فعشان كذا إحنا هدفنا
تتعود
تحب الطب
تقرأ
تسأل
تتعلم كيف تأخذ حاله وتفهم أساسيات أخذ الحاله مو أكثر من كذا عشان تسهل عليك ف سنه رابع
تتعلم كمان بعض الإختبارات السريريه وتحاول تطبق إذا قدرت وأتيحت لك الفرصه
تتعلم مهاره ف الطوارىء زي الكانيولا مثلاً أو حتى إنك تعطي إبره لأحد
تتعلم كيف تأخذ العلامات الحيويه للمريض

من الأقسام اللي ممكن تناسب فترتكم هذي هي الطوارىء و قسم الباطنه أحياناً

ممكن تبدلوا وتغيروا ف الخطه السابقه زي مايعجبكم هيا ف الأخير خلاصة تجربه
الهدف منها التوجيه وإنها تساعدكم شويه خاصه إنكم ف البدايه



يتبع

لحد يرد :)

[بشائر الفرح =)]

التدريب اللي ف وقته (أثناء أو بعد السنوات الإكلينكيه )

هنا عاد وقت الشغل لإنك خلاص تكون متعلم مزبوط كيف تأخذ حاله مرضيه وكيف تعمل إختبارات سريريه وكله تمام
طيب كطالب سنوات سريريه عشان تستفيد أكبر إستفاده ممكنه

ممكن تزود المده وتخليها شهر
والأفضل كمان إنك تأخذ تدريب ف قسم درسته
زي الباطنه أو الجراحه لو كنت رابع أو لو كنت خامس تأخذ أطفال أو نسا وولاده لإنك لما تتدريب ف ماده إنتا درستها من قبل حتستفيد أكثر وتركز ع اللي تبغا تشوفه
من فايندنق مهمه وتقدر تقدم كيس وتناقش وإنتا بنسبة 90% فاهم
لكن القسم اللي ما درسته حتضطر تقرأ فيه وتقرأ لحد ماتفهم الأساس وممكن جداً تفوتك بعض الفايندنق المهمه
ف كل الأحوال لكل الحالتين مبرراتها
على حسب خطتك وعلى حسب القسم االلي تحبه حتحدد إذا قسم درسته أو قسم مادرسته بس بشكل عام اللي درسته حتكون فائدته أكبر

طيب المتوقع منك :


- تحضر الإجتماع مع القسم إذا حسيت إنه بيفيدك
- وبعدين تدور معاهم على المرضى اللي هوا الراوند وتناقش وتسأل إذا إحتاج وهما حيسألوك غالباَ وقتها
- تأخذ حاله مرضيه ( هستوري ) بشكل شبه يومي
- وبعد ما تأخذها تشوف الdifferential diagnosis وتشوف التشخيص الأقرب للحاله
- تطبق عليها الإختبارات السريريه اللي درستها وتشوف الفايندنق المهمه لكل حاله
- بعدين تأخذ رقم الملف وتتابع الفحوصات والأشعه المعموله للحاله
- لحد ماتفهمها مزبوط من البدايه للآخير بعد كذا ممكن تجمع كل اللي وصلت له وتقدمه ك كيس برزنتيشن للقسم ف الميتنق اللي يعملوه
يعني الأفضل إنك تمسك حاله وحده وتخلصها كلها من جميع النواحي المذكوره سابقاً أفضل من إنك تأخذ أكثر من حاله ف اليوم الواحد
- تحضر العياده مع الدكتور وتحاول تستفيد قد ماتقدر منها
- تنزل الطوارىء تشوف كيف يعملوا السوتشرينق وحاول تشتغل معاهم يعني طفشهم كل شويه قول لهم بجرب وبأعمل
عشان يعطوك المجال تتعلم
- تعلم كيف تقرأ الأشعه ( اللي هو approach ) الصحيح لكل توع من الأشعه مو شرط التشخيص يعني
- وفي مهارات ثانيه بتعتمد على نوع التخصص نفسه زي اللي أخذ جراحه لازم يحضر عمليات واللي أخذ باطنه يشوف إندوسكوبي
- واللي مره مستمتع وحاب يغامر ممكن يكلم القسم ويأخذ مناوبه مع الدكتور المناوب حيشوف كل الحالات الجديده اللي تدخل وكيف يتعاملوا معاها

المستندات المطلوبه :

ف غالباً
- حيطلبوا خطاب من الكليه
( سنه ثالث يأخذوا الخطاب من الكليه , وسنه رابع وخامس يطبعوه من الموقع والدكتور الطيب حيوقع لكم عليه ف مبنى 10 )
- تقرير طبي
كمان حاول تكلم المستشفى قبل بفتره عشان يردوا عليك بدري

Elective module


في ماده حتنزل لكم في سنه رابع وسنه خامس إسمها ( Elective module ) عليها ساعتين ف الجدول ولمدة أسبوعين
هي نفسها التدريب بس على شكل ماده عليها درجات ولها فتره محدده ومستشفيات محدده ف كل منطقه ع رأسهم المستشفى الجامعي

أتمنى من أي دكتور أو دكتوره عنده
تجربه أو فائده أو إضافه على موضوع التدريب وتوجيهاته بشكل عام إنه يفيدنا ومايحرمنا من النصائح والخبرات اللي يمتلكها
وكذلك اللي عندي أي سؤال لا يتردد

شكراً لكم
وبالتوفيق يارب :)

[maryam.n]

السلام عليكم الله يجزاكي خير على نصايحك ووقفتك معانا دايما :) بس سؤال اش افضل مستشفيات تركز على تعليم المتدرب ياخد فيها تدريب صيفي

[Miss Dreamer]

موضوع وافي وجميل ..
أستفدت كثيير .. شكراً د.بشائر .. الله يسعدك ويجعله في ميزان حسناتك يارب

[بشائر الفرح =)]

المشاركة الأصلية كتبت بواسطة maryam.n السلام عليكم الله يجزاكي خير على نصايحك ووقفتك معانا دايما :) بس سؤال اش افضل مستشفيات تركز على تعليم المتدرب ياخد فيها تدريب صيفي

أهلاً مريم كيف حالك :)
اللهم آمين يارب وإياكي
تستاهلوا كلل خير إنتوا

كمستشفى تدريبي ويعلم مزبوط فالمستشفى الجامعي ممتاز
يمكن يكون في مستشفيات ثانيه ممتازه ف التدريب ما أعرف صراحه
بس حتى لو كان مستشفى عادي حتقدري تتأقلمي وتتعلمي بإذن الله

بالتوفيق

[بشائر الفرح =)]

المشاركة الأصلية كتبت بواسطة miss dreamer موضوع وافي وجميل .. أستفدت كثيير .. شكراً د.بشائر .. الله يسعدك ويجعله في ميزان حسناتك يارب

آمين يارب وإياك
تسلمي والله
أهم شيء إنكم تستفيدوا وتدعوا لي دعوه حلوه كمان :)

بالتوفيق دايماً

[بشائر الفرح =)]

خطاب التدريب

موقع الجامعه -> كلية الطب -> نماذج وملفات -> ملفات الطلاب -> ( نموذج طلب تدريب )
تطبعوه وتقدموه لإدراة الكليه إذا كنتوا ثالث طالبات هما حيختموه وكل شيء من عندهم

أما رابع وخامس زي ما ذكرت ف مبنى الأولاد رقم 10 - الدور الأرضي مكتب د الطيب يوقع لكم عليه
بالنسبه للي حابين يتدربوا ف الجامعي أتوقع إن الخطاب يختلف ف يسير إسألوا وتأكدوا أكثر

الكتب


بالنسبه لسنه ثالث :
بما إنكم لسه ما أخذتوا كلينكال .. فاشتروا بوكيت للميدسن صغير ياديفيدسون أو كومار تقرأو منه الأمراض
أنا جربت بوكيت ديفيدسون وكان معقول , كمان كومار أسمع إنه كويس
ممكن تروحوا المكتبه بكل هدوء الحياه .. وتطلبوا البوكتين وتحددوا مثلاً مرض الـ Goiter
تقرأوا المرض بشكل سريع كذا ف البوكتين وتشوفوا نفسكم ارتاحت لأي واحد منهم وبس وأشتروه عادي جداً
ف النهايه كل البوكتين مفيده وكلها بتغطي أهم المعلومات تقريباً

البوكيت
هو مصغر للتيكست بوك الكبير ويحطوا فيه الموست كومن ديزيز وكذا زي المراجعه السريعه أو المركزه بمعنى أصح

كيف تستفيد منه ؟

ببساطه تأخذه معاك لما تروح المستشفى .. لما تمر ع حاله وتعرف المرض اللي عندها يسير تقرأ عنه ف لحظتها وتثبت المعلومه معاك ع طول
وتذكروا حاجه مره مهمه كمان ( إن المعلومه اللي تناقشها مع أي أحد تثبت أكثر من اللي تقرأها فقط بدون مناقشه )
اللي أقصده حاول تناقش المعلومه حتى لو مع زميلك المتدرب عادي كلنا بنتعلم ولو تشرحها كمان لأحد ثاني يسير يا سلام عليك :)


بالنسبه للإختبارات السريريه اللي حاب يقرأ فيها ويجرب

- عندكم الكتاب الأساسي اللي لابد منه كتاب ( Tally)
- ممكن تضيعوا فيه بالبدايه , فيسير وقتها ممكن تأخذوا كتاب ممتاز جداً وعباره عن ملخص ل تالي وهو share بس لما تسيروا سنه رابع بشكل رسمي لابد تقرأو تالي مافيها كلام
- يفضل يكون معاكم نوت تكتبوا فيه المعلومات المهمه اللي تمر عليكم ولما ترجعوا تقرأوها

بالنسبه لسنه رابع وخامس :

خبرتي لا زالت ف أولها
- حاول هذه المره تقرأ من التيكست بوك الكبير لما ترجع البيت مرره حتستفيد صدقني خاصه إنك بإجازه وعندك وقت تقرأ ع أقل من مهلك وحاول تلخص ف بطايق صغيره يسير تقدر تراجعها بعد كذا
- ف المستشفى البوكيت ديفيدسون أو كومار لو ميدسن , جربت إكسفورد ميدسن بس ماناسبني حسيته أدفانس وينفع لسادس والإمتياز كمان , وللدفرنشيال في بوكيت حلو ومعروف إسمه differential diagnosis وسيرجكال ريكول والقحطاني لوسيرجري والباقي لسه مادرسته إن شاء الله الدكاتره يفيدونا فيه

بالنسبه لفكرة البطايق : جداُ مفيده لو ف نهاية اليوم تحاول تجمع النقاط اللي تعلمتها أو تحتاج قراءتها مثلاً ف بطاقه ع مدار الأسبوع حيكون عندك خمس بطايق
تخلص اللي يبقى لك منها ف الويكند وتقدر تراجعها بعد كذا بكل سهوله مره بترتب الأفكار وتختصر الوقت والجهد مستقبلاً

معليش ما نزلت صور للكتب لكن المره الجايه إن شاء الله

بالتوفيق ولا تترددوا بالسؤال :)

[life chances]

الله يعطيك العافيه د.بشائر

[بشائر الفرح =)]

^

الله يعافيك يارب
ويوفق الجميع

[رونــا]

مررة شكرا ي دكتورة ربي يسعدك