مواد سنة ثانيه طب بشري

[Dr.AlJuhani]

بسم الله الرحمن الرحيم
أول حاجه أهني كل من أنقبل بكلية الطب
بنين وبنات
وأقولهم شدو حيلكم
وحاولو تستفيدو قد ماتقدرو
السنه هذي غنية بالمعلومات الممتعة
.....
نظرا لكثر الأسئله...وكثرة المواضيع في المنتدى اللي فيها أستفسارات عن المواد
حبيت أنزل هذا الموضوع أجتهادا مني
لاأكثر ولا أقل
وأحب ان أنبة أنو لكل شخص أسلوبه وطريقته في المذاكره
لكن ححاول أكون حيدايه في كل شي
في هذا الموضوع راح أتكلم عن مواد الترم الأول للسنة الثانية طب بشري
.........
أولا

الأناتومي

الأناتومي أول حاجه راح تبدأو بكتاب الفندمنتل هذا راح تدرسوه بس مو كلوه
ممكن يخططوا لكم فيه
وإذا لا أطلبو منهم أنو يتخطط
بعدها راح تبدأو أبر ولور
لازم يكون عندكم نوعين من الكتب
الأول كتاب للمذاكره
وهوا إما \ أو
إما تشتروا كتاب سنل باي ريجن وهوا اللي أنصح فيه بشد شديده لنو لاااازم يكون عندكم وتذاكرو منو الأبر واللور
أو تاخذو كتب القسم اللي مألفها الدكتور بادوود
وسواء الناس اللي ذاكرو من هنا او من هناك جابو
A+
بس يعتمد على أرتياح الشخص
النوع الثاني من الكتب
الأطالس= الكتب التي تحتوي على صور
عندكم مجموعه كبيره
ولكن أغلب دفعتي كان عندها أطلسي ماكمن وغرانتس
ماكمن يجيب الجثث حقيقيه زي ماهيا وهذا يفيد في المشرحه ووقت مذاكره العظام
وغرانتس عباره عن رسمات
هذا جدا مفيد ومهم في حكاية العضلات
بعدها حتبدأو في الهد والنك
هذي عندكم مصدرين
شيتات الدكتوره فتحيه بخط اليد
أو شيتات الدكتور سعد زغلول
بالنسبه ليا ذاكرت من شيتات الدكتوره فتحيه لنو هيا اللي درستنا وكنت لما أذاكر أفتكر شرحها كويس
فيعني يعتمد على الطالب وأرتياحه
ونصيحتي آخر الترم خذو الدكتوره فتحيه ونزلوها المعمل وخلوها تراجع معاكم الأشياء المهمه أحنا كنا بنعمل كذا
مررره عسوله الله يسعدها
وبعد كذا راح تاخذو مقتطفات من القفص الصدري والأبدومن
والعين
هذي ذاكروها من شيتات الدكتور سعد زغلول كويسه وتكفي
نهاية بالنسبه لمصادر المراجعه
لنو يوم الأختبار يادوب يمديك تذاكر
فهيا وبلامنازع الكومون
MCQ
تبعت الدكتور سعد زغلول
تلاقوها في مكتبة محمد في حي السليمانيه
أو في مكتبه دار العلوم
اللي قريبه من بوابه 3 حقت الجامعه بعد مدارس دار التعاون
.......
الهستو
هذي االماده سهله جدا جدا
ونصيحتي لاتتفلسفو فيها كثير
تكفي الكتابين اللي قالوا لكم عليها
اللي مألفهم الدكتور باداوود
وأصلا الكتاب راح يخلص وبعدين حيدوكم شيتات ذاكرو منها
ومهما شرحوا ومهما قالوا زياده لاتلقو بااااااال
.....
الأمبريو
كتابين
الأول فندمنتل
ومرررره يكفي
والثاني راح يقولو لكم عليه بعدين اللي هوا السبشل أمبريولوجي
سهل جدا جدا
وبرضو لاتتفلسفوا في الماده كثير
بعدين أن شاء الله لما يسير عندكم أختبار أحد يفكرني أنزل التخطيط على الأشياء المهمه وكمان الأشياء اللي بتتكرر
.....
الباثو
ماده ممتعه جدا حتى لو كانت صعبة في البدايه
نصيحتي كتاب
Basic pathology
تبع روبنز
هذا الكتاب تحفه من تحف كتب الطب
رائع جدا جدا
أنتوا راح تاخذو أول حاجه السل أنجري
في شيتات من قسم البنات ناسيه أسم الدكتوره يمكن أسمها هدى ماأفتكر بس كانت كويسه
لكن الله يخليكم أقرأو الكتاب
لو قبل ماتنامو مرره مهم تقرأوه
فقط قرآءة
الفصل القاني الأنفلاميشن
تكفي شيتات الدكتوره سوسن رائعه بمعنى الكلمه
ورجاء خاص للبنات لاتفوتو لها ولا محاضره
وكمان الكتاب رائع انا ذاكرت جزئيه الأنفلاميشن من الكتاب لنو حسيتها ممتعه لكن الشيتات تكفي وتوفي
الفصل الثالث الهيمودينمك في شيتات الدكتوره سوسن برضو مع أنها مو اللي تديكم الفصل لكن أحنا أخذناها زمان من اللي اكبر مننا صراحه كانت كويسه
الفصل الرابع النيوبليزيا
نصيحتي ذاكروه أول بأول لنو الكميه كبيره في وقت قصير
لكن برضو ممتع
عندكم مصدرين أما شيتات الدكتور علي صوان شخصيا انا ماأطلعت عليها لكن اللي أكبر مننا ذاكروا منها
وفي بنات من دفعتي ذاكروا منها
أنا ذاكرت من شيتات الدكتوره فدوى اللي أدتنا الجزئيه هذي
طبعا فقي الباثو الكومون ثم الكومون ثم الكومون ورح تلاقو مكتبة محمد مليئه بكومون للباثو
عاد أنتو نقوا منها اللي يعجبكم

......
البايوكمستري
أول شابترين
الهيموجلوبين والمايوقلوبين
من كتاب لبنكوت
الطبعه الأخيره
نصيحتي للجميع
وأنتا بتذاكروا الحين
خلو جنبكم ورق حق ملاحظات لاصق جنب كل براقراف أكتبو النقاط المهمه هذا الشي راح يفيد في الفاينل
لنو وقتها راح يكون المنهج كبير جدااااااااااااا
فما يمديكما تطلوا على الجزئيه القديمه إلا متأخر فعلى الأقل تكونو كاتبين النقاط المهمه في هذا الورق
بعدها في فصل
الأنزيمات على حسب
في شيتات الأولاد
وفي شيتات الدكتوره عنايات
على دفعتي الدكتوره عنايات هيا اللي حطت الأسئله فأنا وأغلب البنات ذاكرنا من هناك
لكن أطلعوا على تيتوريلات الدكتور العرضاوي
لنو مهمه
بعدها في فصل الكربوهيدرات أحنا أدتنا هوا د.سهاد شرحها كويس
لكن المذاكره من شيتات الدكتوره أمينه بلا منازع
لنو رائعه جدا
ونصيحتي أفهمو وأحفظو هذا الفصل كويس
لنو الباقي يعتمد عليه
وبعدها في فصل البروتينات
من شيتات الدكتوره أمينه برضو لنو حلو
حاولو تذاكرواهذا الفصل أكثر من مره
وأكرر أكثر من مره لنو ماينفع مذاكره مره وحده
مرره ماينفع خاصه هذا الفصل
وبعدها في فصل الـ
DNA
RNA
هذا الفصل شيتات الدكتوره فايزه مرررررره كويسه
بس نصيحتي
خلوا معاكم ورقه وقلم
لنو في وسط الشرح تقول هذا مهم
يعني اللي تقول عليه مهم أحفظوه زي أسمكم
وبرضوا أخر الترم مراجعتها لو فيكم أيش أحضروها مرررررررررررره مهمه
وطبعا في البايوكيم لاغنى عن الكومون
اللي حجمها اكبرمن المنهج نفسوا
بالنسبه للفصول الثانيه
من سل ممبرين وغيروا ذاكروها من الشيتات ماتفرق كثير أي شيت مو مشكله
كمان نصيحتي بالنسبه لهذي الماده أولا بالنسبه للمعمل
لاتعملوا زي ماعملنا انا وأغلب البنات اجلنا اللاب لآخر لحظه
لازم على الأقل تتطلعوا على الملزمه حقتو قبل الأختبارات وتخططوا الشي المهم
يسير يوم الأختبار أو بين الفترتين ترجعو عليها
لنو يادوبك الوقت
وإلا راح يكون اختبار البايو معمل مأساة
فلازم من البداية وما تهملو
كمان
ثانيا
الماده هذي حاولوا تتابعوا فيها أول بأول
السايكلز مهمه جدا جدا
أحفظوها كويس
وأعرفوا كل أنزيم لو ماوجد أيش المرض اللي راح يسير
......
موفقين يارب
وأنا كل ماأفتكرت شي راح أرجع وأكتب
.....
وأكرر هذا أجتهاد مني فقط لاغير
وكل انسان له طريقته
وياريت احد من الميل يكتب ملاحظاته على المواد والدكاتره
والمصادر
وكمان الفيميل تكتب خبرتها ورأيها
لنو كلامي عن تجربتي الشخصيه
لا اكثر ولا أقل
....
إن أصبت فمن فضل الله
وإن أخطأت فمن نفسي والشيطان
...
بالتوفيق
:)

[Dr.AlJuhani]

أيوا بالنسبه لللاب الباثو حاولو تصورو الجارات
وتكتبوا الدسكربشن
أول بأول وآخر الترم
تسوو ملزمه
يسير فيه مرجع للمعمل
الله يسعدكم هذي نقطه مهمه جدا
لاتنسوها
وترا ممكن الجارات حقتكم غير حقت الميل
فعادي يعني
لنو أختبار اللاب حق الباثو موموحد



برضو
إذا أختلفت العرب
(فيميل وميل)
خذو تبع الميل
لنو الأسئلة من عندهم
وبرضو
لو دكتوره أتفلسفت زياده
أو دكتور أتفلسف زياده خذوا التقاطع فيما بينهم
لنو الأسئله
تبعت النظري لكل المواد
موووووووووووووووووووحده

[Dr.AlJuhani]

معليش بس أي أستفسار ياريت يكون بالموضوع الأصلي
لنو وضعت هذا الموضوع هنا بناء على طلب بعض طلاب وطابات دفعتكم
فياريت لو في أي أستفسار يكون هنا
منتدى medkaau
الموضوع راح تلاقوه في قسم الطب السنه الثانيه بنفس العنوان تقريبا
كمان يسير طلاب وطالبات دفعتي
يقدرو يفيدوكم لو ماعرفت حاجه
أو نسيت حاجه لنو أالأغلب مننا بيدخل هناك
وبالتوفيق يارب
:)

[A N G E L]

مشكوووووووووووووورة على الموضوع
مجهوود رائع صراحة دكتورة
ومررة مفييييد
تقبلي مروري وتحياتي :)

[dr.hope]

مشكورييييييييييييييييييييييين

ما ادري احس لمن اقرا اشياء زي كدا يجيني قلق

بس منجد شكرا

:)

[Dr.AlJuhani]

لاتخاف .. هذي مجرد تجربه
تقدر تستفيد منها..وتقدر تطنشها .. أهم شي سوي اللي يريحك

[نابغة]

شكرا جزيلا جزاك الله عنا خير الجزاء....
تحياتي ..

[صـودي]

يسلمووو يعطيك اللف عافيه يادكتوره بس ابغى اسال انو الاساله اختياري لكل الاختبار والا رايتنق اذا كانت رايتنق يحاسبوننا على الاخطا الاملائيه او تركيبات الجمله وثانكيووو
تحياتي

[Dr.AlJuhani]

الأناتومي والهستو رايتنق
ومايحاسبو على الأخطاء اهم شي المعلومه
الباقي
mcq

[Dr.AlJuhani]

وبرضو الامبريو
...
على فكره رايتنق في الفاينل بس
ومو كل الأختبار
لا
بس كم سؤال