عندما تصرخ البنت ( ياليتني ولد ! )

[الطموحة]

(ياليتني ولد )


لما يكونون معزومين بعزيمة ...والكل مستعد وتجهز....ويطلعون برا وينادوا السواق
وأخيرا يلقوا السواق مو موجود
وبعد جوله على جوالات الاخوان....
ويأس من ظهور السواق
وبعد جملة مافيه روحة ...
تلاقي صرخة تسبق هالجملة وتعبر عن الموقف بقوة

(يا ليتني ولد )

والا بجمعة عائليه ...وتخييم حلو بالربيع
العيال مجتمعين يلعبوا..
وبعضهم معه جمس والا جيب
والباقين يلعبوا بلوت
وضحك وبسطة
والبنات اللي معهم جوالات ويروح رجاها بالهوا
والثانيه واقفة تترجى اخوها ...بدون فايدة
والثالثة بعد مايأست رجعت لسواليف الحريم المملة والكيئبه
مع ان طلباتهم ماتعدت دورة بالجيب بين هالرمال
والا حتى يمكن يسمعون شريط بسيارتهم بس ماأحد راضي يعطيها المفتاح
والنهاية






(يا ليتني ولد )

وأحيانا تعزم صديقاتها
وتقولهم بكل الفخر
العشا على ...لا ومن وين من الريف الايطالي ......طلبيه عشان خاطر عيونكم
هم ماعندهم سواق
لأن الاب يقول عندكم 5 اخوان
(حنا مانحتاج سواق البيت كله شباب)
وإذا كانوا هالشباب
واحد مقفل جواله
والثاني بالبر مايوصل له الارسال
والثالث نايم بالملحق ولا في امل يصحى
والرابع بالغرفة ...وقافل على نفسه الباب ...ويقول لااحد يزعجني
والخامس مع عيال أخواله عندهم دورية
والعشا يتفركش
والاعذار تتسكت بوجبات( بتوصيل منزلي) من بيتزا هت
واول مايطلعون
تسمع صرخة بالحوش






(يا ليتني ولد )

كل شيء يهون بس اللي مايهون ايام الإجازات
قبل العطلة يمكن بشهر
البنات ..
يبه تكفى ..الله يسلمك ...الله يعافيك ...الله يخليك ....الله لا يحرمنا منك ..الله ....الله... الله... الله
نبي نسافر هاالسنة
لا وانا ابوكم هاالسنة مشغول
عندي انتداب عمل
ويمكن عمل اجباري
هالسنة امكم والده
وين ناخذ بزر بالشهور معنا
وأخوكم مهند
توه يمشي
تبونه يشغلنا اذا سافرنا والا يضيع من بين ايدينا
تدرون
تبون جدة والا الشرقيه ...يالله اختاروا ...
والا وش رايكم نروح عند اهلكم في الديره
بنفس هالوقت يدخل فيصل <<إحم إحم
يبه عن إذنك ترا اليوم رحلتي مع محمد وتركي وخالد ولد عمتي
بنسير على مصر ام الدنيا كم يوم ونجي
عاد زي ماقلتلك يمكن نمر شرم الشيخ
هاه يأخواتي ياحلوين تامرون على شيء قبل ماأروح
إيه
سموووو
تبون
ايش




(يا ليتني ولد )


ولما تكونين جالسة على اللاب توب
وتو النت شابك
(تم تسجيل دخولك الى شبكة الاتصال )
وتوك فاتحة على المفضلة تبين تشيكين على الموقع اللي تبي تدخلينه
الا اللي فوق راسك
ومن صار ....نواف ....حبيب البيت ......وبرا البيت
قفلي النت
ليه؟؟؟؟؟
بس بكيفي ....وثاني مرة لعد تشبكينه فاهمة !!!!اوكي
وليه معد أشبكه
اولا أصرف ....ثانيا بنت ....ثالثا وشو له تشبكينه ...وش الفايدة...؟؟؟؟ماله داعي
!!!!
عطيني لاب توبك بفتشه احس فيه شئ...... <<اكره الشكاك





(يا ليتني ولد )

طبعا صايرة كلمة للعائلات فقط تستفز شريحة كبيرة من الشباب هنا
اضف الموضوعات الصحفيه المنتشرة بخصوص هالموضوع
طبعا هالافته بقدر ماهي مزعجة
بقدر ماتخليك تفكر وتمعن فيها
الكل مع الشباب المعارضين لها
لان المحطات الترفيهية لهم قليلة
لكن ،،،لما يجوا يقارنوها بالبنات .......هنا نوقف شوي
أغلب المجتمعات النسائيه كئيبة ومملة بشكل كبيييييييير
والسواليف أغلبها تقتصر على
لبست...اشترت ...انخطبت ...تزوجت....حملت....سافرت
وتلاقي درجة الغليان عند البنات من هالسواليف توصل 100درجة مئويه
الطلعات برا و مع الصديقات....أغلب العوائل محدودة
والبقيه مابين حريه مطلقة....الى منع مطلق ...فالبيت هو المنتزه الموجود المشترك
وش في هالمنتزه ؟؟؟؟؟؟؟؟؟؟؟؟؟؟؟؟

مثلا تلقون
أغلب العبارات التي تنقال على اللي تكلم
ايه تلفون 24 ساعة انتي ماتملين
بالله عليكم وش تقولون كل هالوقت
منهي ذي ؟؟؟؟ هذي تغريد....هماك توك شايفتها بالجامعة
قفلي التلفون .....ليه؟؟؟؟؟؟؟بس موب لازم كل ذي الهذرة-
من بتكلمين نهى ...مو لازم بكرة بتشوفينها بالعزيمة
(( هذا اذا لقت احد يوديها ))
ألحين انتظر تليفون من أختك ببريطانيا _
من اللي شاغل التلفون ...والله اني قايلته شوفي سوير ان رفعتيه ثاني مرة لا تلومين الا نفسك..

طيب موب لازم انترنت ولا تلفون لانه امر مفروغ منه ...
بس أخوي مسموح له .....ابوي دايم يقول ان اخوي ولد وعادي لو يشبك النت ...ولو قلتله على الفاتورة ...قال هو يشبك على خطه ...انا مالي دخل
طيب اروح عند التلفزيون ....لا لا لا
مستحيل التلفزيون انقلب الى أداة لترويج المنكر ...كله استعراض للبنات ....
وهو خراب لعقولنا يالبنات
أداة استحقر نفسي إذا شفتها ...حتى الافلام اللي شفتها معادة بالقناة نفسها 4 مرات
غير البرامج والسخافات ووووووو...............
وين أجل وين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مافي قدامي غير غرفتي .....تدرون وش ابسوي فيها





-
-
-
-
-
-
(ااذاكر) !!!!!!عرفتوا ليه البنات اشطر من الاولاد ...........استوعبتوا السر ؟؟؟؟
طبعا في اشياء ثانيه موجودة
بس هذي اهم الاشياء
وأول ماتفتح الكتاب وتمسك القلم
افففففففففففففففففففف





( يا ليتني ولد )

نصل هنا للهدف من الموضوع !!
عندما تقول البنت..

(يا ليتني ولد )
أول شيء اسويه اروح أخذ امي واخوتي وامشيهم بشوراع
ونروح نشرب لنا قهوة من توتي كافيه
ولا نمر على ملك المانجو وناخذ لنا كوكتيل
والا اعشيهم على حسابي
والا أفاجئهم بتذاكر لمكة عشان ناخذ لنا عمرة
والا استنى اي فرصة اشوفهم محتاجين لي فيها عشان اخدمهم
زيادة على افعالنا لهم كنساء نطبخ وننظف ونقوم بالبيت كله عشانهم !!








هذي أفعالهم عندما تتحقق أمانيهم بأن يصبحون أولادا !!
فهل فعلوا كــ (أولاد) من أجلنا .. مانستحق ؟؟!!
ماتعليقكم ؟
وماهي حقوق البنت في بيت أهلها ؟







رفقا بنا ...فاننا نستحق الكثير !!
منقووول بتصرّف

[فتفوتة سكر]

اما انو عشان السواق ماهو موجود اصرخ واقول ليتني ولد !!!
طيب اذا الاب منع السياره من الولد حيصرخ ايش يقول ؟ ( ياليتني بنت ) >> تفسير منطقي
ولا ان سواليف الحريم ممله عقولتك ( تقول ليتني ولد ؟ ) ؟

ومين هالايام يقدر اخوها يقومها من النت قومي وبكيفي ( اعذريني هذي ماهي تربيه ) البنت لها خصوصيتها بالبيت
والولد له خصوصيته
البنت تطلع وتخيم وتشوي وتنبسط مع اهلها
والولد كمان

انما هالاسباب تصرخ ياليتني ولد ؟؟؟ ما اعتقد الكلام هادا واقعي


شكرا لنقلك طموحه

[سمية السلمي]

مرحبا

اولا : هذي الكلمة (( ياليتني ولد)) عشرين مليون سبعطش مرة اقولها والاغلبيه

فيه بعض من كلامك اعتقد انو ما اقول خاطي ولاكن نادرا .. زي النت صح فيه ناس كذا متشددين لا نادرا

اما انو الولد يستمتع اكثر من البنت هذي ابصم عليها بالعشرة يعني احنا متوفر لنا اننا نخرج عند زميلاتنا

واقربنا وتمشيات بس موذيك التمشيات << راسمه لبعييييد هع

موزي العيال اي شئ يخطر على بالهم يسونه باي طريقة وبون اشكال

ولا كن .. الحمد لله اننا بنات وربنا لم يخلقنا عبث كل له ميزاته بس وش نقول غير اللهم لك الحمد والشكر

كمان بضيف نقطة هي اللي مريحتني هع انو العيال ما ياقدرون يعيشون من غير البنيات

وشكرا لك اختي على الطرح

[الطموحة]

فتفوته ومسهر اجفاني مشكورين على المرور وانا معاكم على حكاية النت بس فيه بعض الناس تفكيرهم كذا

[مها يوسف]

والله اني ارحم الاولاد ترو عندهم مسؤليه وهم واحنا يالبنات ماهمنا الى االاكل والبس والتلفزيون
وكل شوي ايش ذنبنا
ترو انا اجاوب بصراحه لانكم بنات لكن لو فيه اولاد كان عدلت شوي

[Lawmaker]

هناك أسباب أدعى وأجدر بأن تصرخ الفتاة..(ياليتني ولد).!
لكن مشكلتنا الأزلية تتمثل في النظرة السطحية..
مما يؤدي إلى تسفيه آرائنا غالباً..
ونعتنا بـ "ناقصات العقل والدين"..
..
تحية..

[.,.نيــــــــــــــــــــران.,.]

هذي الاسباب كفيلة انها تجعل البنت تكره انوثتها

واللي ماعاشتها تقول الحمد لله لكن لاتقول انها مو أسباب منطقية !!

وفي أكثرر من كذه

طبعا يرجع ذا كله لتربية الاهل والنظرة الذكورية البحتة

أحيانا يربون البنت على انها ولد في السلوك لكن لمن تجي عند الطلبات وحقوقها البسيطة تصير بنت


مع ذلك لاينكر ابدا انه الكثير من الاباء يوفر لبنته وسائل الراحة الله يجزاهم خير الجزاء وطبعا هي اشياء اصلا اساسية ومفروضة
بس المشكلة في الاشياء هذي اللي بسبب منعهم لها تكره نفسها وتتمنى لو تفتك في أقرب فرصة


أشكرك على طرح الموضوع

تحياتي

[memoooo.]

دائما أردد هذي العبارة..
وطبعا في المقابل لازم أمي كمان تردد عبارتها..
(لو كنتي ولد خربتي البلد)

[northstar]

لاحول ولا قوة الا بالله
عمري ماتمنيت ان اكون ولد
بالعكس اعتز بذاتي

وعوذ بالله اكون ولد
هو الي في الزمان ده اولاد ولا رجال
دولا اشباه رجال او انصاف رجال

[شموع32]

هههههههههههههههههه

ميمو انا نفس الشي امي تقول ربنا عااااااااااارف

: (

وربي النيه سليمه بس مااعرف ليه متوقعين مننا اننا بنخربها