أسئلــــــــه لطلبـــــــــة الطـــــــــب

[الطموحه]

بسم الله الرحمن الرحيم


عندي عدة إستفسارات عن مجال الدراسه بالطب لأني إن شاء الله ناويه أدخله
بعد ما أخلص السنه التحضيريه

بشكل عام يعني كيف الدكاتره وكيف تعاملهم ؟؟ يعني\حسب ما سمعت أنه البعض يعقد
مره وبشكل مخيف وهذا شي يخلينا نخاف ندخل الطب بشكل وخاصة أنه يحتاج شدة حيل
وحضور دائم ..
يعني تحسو أنكم مرتاحين فيها ولا تتمنوا أنكم ما دخلتوا ؟
عشان ناخذها من قاصرها ونرتاح

الشي الثاني

الدراسه كلها كم سنه تاخذ ولا على حسب التخصص ؟


أنا لما دخلت على موقع كلية الطب بالجامعه مالقيت قسم الطب النفسي وينه ؟
وهل تنصحونا فيه ؟

لأنه سمعت برضه أنه فيه قسم علم نفس وفيه علم نفس بالطب وهما غير عن بعض

بالنسبه لطب الأسنان هل هو أقصر مدة بالدراسه ولا لأ ؟


اللي يقدر بليز لا يحرمنا من ردوده وتفاعله
وآسفه إذا طولت عليكم

وشكراً

[miss meme]

هلا اختي الطموحة

انا مثلك نفسي في طب وودي اعرف او اقابل وحدة داخلة طب وتحكيني بالتفصيل الممل؟؟
وكيف يومهم؟؟ منأولو لاخرو
وأنا اسفة مااقدر افيدك اللي اعرفو انو الطب سبعة سنين ومع السنة التحضيرية سار ثمانية سنوات
وكلو كرف في كرف وودي وحدة تفهمنا كيف؟؟
الله يعطيكم العافية؟؟

وتقبلي مروري ..

[neurosurgeon]

يا هلا ومرحبا


انا مني من جدة بس حابب أقولكم انو الطب ستة سنوات مع السنة التحضيرية

والسنة السابعة امتياز تستلمي فيها راتب


وطب الأسنا ن نفس الشي بس كتير ناس تحب طب الأسنان لانو الدوام اريح والدخل أعلى اذا كنتي متميزة ومشهورة
الطب البشري انساني اكثر
فيه بعض التخصصات ممكن تجيب فلوس بس نصيحتي اذا تبغي فلوس لا تخشي طب بشري

والتخصص بعد البكالوريوس سواء في البشري او الاسنان
ومدته تختلف ممكن 4سنوات 5 او ستة على حسب التصص والمكان اللي تتخصصي فيه

وبالنسبة للكرف أكيد معرووف انو الطب من أصعب التخصصات و متعب من ناحية الدراسة والعمل
فاذا كنتي من النوع اللي مايستحمل الكرف فالطب غير مناسب لك ابدا


وبالنسبة للدوام فاغلب الكليات دوامها من 8 الى 3 او4 على حسب


والدراسة تكون في اول ثلاثة سنوات نظرية تماما
والثلاثة السنوات التالية تكون سريرية بعنى انك تروحي المستشفى وتشوفي مرضى والجزء النظري فيها أقل


وليكن لديك طموح وهدف بحيث ما تحبطك الدرجات الواطية ولا الدكاترة المعقدين
ونية طيبة في اختيار هذا التخصص
لا لاجل المال ولا الشهرة


وحطي في بالك انك لازم تجيبي معدل عالي علشان تخشي الطب
والمنافسة اتوقع تكون شديدة مع اضافة السنة التحضيرية

والله أعلم

وفقكم الله





تحياتي

[miSs]

مساء الخير كيفكم ؟
انا باذن الله طالعة ثالثة طب في جامعة عزوز
الطب ستة سنوات وسنة امتياز براتب 6000 ترا نقصوها كانت اكتر من كدا
والاسنان زي الطب ستة سنوات وسنة امتياز بس هو اريح من ناحية بعدين ازا اتخرجتي منو في شغلك يعني الدوام اريح هو يحتاج شغل يد اكتر انا صحبتي في الاسنان ينحتو اسنان بالشمع ويسو قوالب اسنان

بس انا احس الطب اكتر انسانية واحلى وممتع اكتر وفيه مجالات كتيرة
بس مع السنة التحضيرية هل راح تصير ثمنية سنوات والله ما اعرف دا الشي مو معقول احس حرام كدا

بالنسبة للدكاترة في ناس تعقد وفي ناس لا عادي انتي اهم شي تكوني مزاكرة وتسوي الي عليكي

وتخصص الطب النفسي مرة قليل ناس يتخصصو فيه مدري ليه
طبعا راح تتخصصي بعد السبع سنوات

من ناحية الكرف احس كل قسم في الجامعة لازم تزاكري فيه وتكرفي لانو عشين تثبتي نفسك وصراحة الطب انا الحمدلله مبسوطة فيه هو صح كرف بس ممتع وحلو

واسفة طولت عليكم
وبالتوفيق

[neurosurgeon]

بس مع السنة التحضيرية هل راح تصير ثمنية سنوات والله ما اعرف دا الشي مو معقول احس حرام كدا

لا ماأظن عندنا في المدينة برضو أضافو سنة تحضيرية لكن عدد السنوات هو نفسه ستة

[miSs]

المشاركة الأصلية كتبت بواسطة neurosurgeon لا ماأظن عندنا في المدينة برضو أضافو سنة تحضيرية لكن عدد السنوات هو نفسه ستة

الحمدلله كويس

[miss meme]

الله يطمنكم انشاالله ربي يسعدكم
بس وين احسن عندكم ولا في مكة يقولو في عزوز احلى وامتع طبعا الاثنين كرف ما اقول لا بس ابغى شي ينفعني مكة ناس كثار ما نصحوني لانو مهي مرة في الطب
وانتو ما سمعتو عن كذا انا انقبلت في مكة طب وجراحة بس انا ودي في جدة وامي نصحتني اروح للحسن وانا استخرت و ما ادري بس انا نفسي بجدة احس نفسي مرتاحة بس السنة التحضيرية هيا اللي مخوفتني
وانا طالعة من توجيهي والنفسية ربك عالم بيها
ايش رايكم في السنة التحضيرية احسن لنا ولا لا؟؟
واذا مشينا فيها زي التوجيهي مع العلم انو نتجتي الموزونة92,41 كثار ناس نصحوني بجدة لانو النسبة عالية والفرصة ماتجي الا مرة وحدة..

معليش طولت عليكم بس والله تعبت من التفكير
صاحباتي يقولو انو لا تفكري ولا تحتاري عزوز وبس..

انتو ايش رايكم المشكلة انو موعدي في مكة وجدة نفس اليوم يوم السبت ونفس الوقت ايش رايكم في الحظ النحس

[المتفائلة]

بالنسبه لاضافة السنة التحضيريه ماراح تزيد من عدد السنوات

وبالنسبه للطب فالاخوان والاخوات ماقصرو ماشاء الله

المجال الطبي بمجمله متعب لكن لاننكر أن بدعوه واحده من مريض تنسيكِ كل التعب والهم
لا تفكري بالماده وفكري في انقاذ حياة الناس
طوري من نفسك تميزي

وان شاء الله ربِ يوفقك

[المتفائلة]

المشاركة الأصلية كتبت بواسطة miss meme الله يطمنكم انشاالله ربي يسعدكم بس وين احسن عندكم ولا في مكة يقولو في عزوز احلى وامتع طبعا الاثنين كرف ما اقول لا بس ابغى شي ينفعني مكة ناس كثار ما نصحوني لانو مهي مرة في الطب وانتو ما سمعتو عن كذا انا انقبلت في مكة طب وجراحة بس انا ودي في جدة وامي نصحتني اروح للحسن وانا استخرت و ما ادري بس انا نفسي بجدة احس نفسي مرتاحة بس السنة التحضيرية هيا اللي مخوفتني وانا طالعة من توجيهي والنفسية ربك عالم بيها ايش رايكم في السنة التحضيرية احسن لنا ولا لا؟؟ واذا مشينا فيها زي التوجيهي مع العلم انو نتجتي الموزونة92,41 كثار ناس نصحوني بجدة لانو النسبة عالية والفرصة ماتجي الا مرة وحدة.. معليش طولت عليكم بس والله تعبت من التفكير صاحباتي يقولو انو لا تفكري ولا تحتاري عزوز وبس.. انتو ايش رايكم المشكلة انو موعدي في مكة وجدة نفس اليوم يوم السبت ونفس الوقت ايش رايكم في الحظ النحس

برأيي ان السنه التحضيريه افضل
لانو في كثير يدخلو طب ومايقدرو يكملو
وتروح فرص كثير على ناس طموحها الكليات الصحيه

ارى ان السنة التحضيريه راح تبين مين اللي بجد يستحق دخول الطب
وان شاء الله هذه السنه راح تتعودو فيها

والله يوفقك يارب
لا تضيعي فرصة الاتلحاق بجامعة الملك عبد العزيز
لكن كمان اقول لك استخيري والله يكتب اللي فيه خير

[neurosurgeon]

ما في أحد يختلف انو جامعة عزوز احسن بكتير من أم القرى

من حيث اكتمال اعضاء هيئة التدريس وتميزهم وتوفر المستشفى الجامعي والطلبة بشكل عام افضل والتنافس بينهم شديد


لكن الدراسة في مكة لها ميزة ربما من حيث العامل النفسي وكونك جنب أهلك
وهذا بدوره له دور في التحصيل

عموما الله يوفقك ويختار لك اللي فيه الخير