استفسار عن مكان وجود ملخصات اشرف بركات

[N3M]

سلام ..

ياشباب ابي ملخصات اشرف الجديده .. رحت كل المكاتب القريبه ومالقيتها ..
سئلت وقالوا في الصفا ..
المشكله انا ما ادل في جده .. عشان كذا ابي وصف دقيق جدا للمكتبه ..
وياليت يكون الوصف بشوارع معروفه يعني التحليه فلسطين كذا ..

بالانتظار

[الســــاامر]

+1

نفس الاستفسارات

ياليت اللي يدلّ المكتبة يعطينا علمها

وموفقين خير ان شاء الله

[Mr-Ammar]

طيب انا اقلك بكل بساطه يمكن الطريق حيكون طويل لكن عشان ما تلخبط


انتا جاي من الجامعه تطلع كبري بريمان وتنزل يسار رايح على دوار النجمه ،،

تاخد الدوار وتروح يسار على شارع الاربعين ،، متجه لدوار الزهراء ( غالبا دوار النجمه حيكون مقفل فراح تدخل من اجباري يمين تروح لشارع الاربعين عكس اتجاه دوار الزهراء وتاخد يوتيرن وترجع )

وانتا متجه لدوار الزهراء تدخل فرعي من عند المحطه ،، وتمشي لين يجيك عنايه ،، تدخل من قبلو يمين

تمشي لين نهايه الشارع يقفل معاك تحصل على يدك اليمين مدرسه

ادخل من عند المدرسه يمين في شارع كدا صغير ،،

بعد ما تدخل يمين راح تحصل مسجد على طول واضح

خد لفه حولين المسجد راح تحصل المكتبه ،، اسمها مكتبه الانوار

ازا ما فهمت الشرح قلي عشان اوضحلك زياده

[N3M]

<< دآآخ

كيف اخذ يسار من دوار النجمه وبعدين يكون مقفل واخذ يمين اجباري ..
فيه لخبطه ..
واللفه اللي قبل العنايه << العنايه حق الحلاقه والا ايش عشان انتبه بس ..
معليش لو توضح من جديد ..

الف شكر لك ..

[N3M]

Uuuupppp

[وسيم الإتحاد]

أوصف لك أسهل ....

إنت ماشي في الخط السريع متجه للمدينة اطلع كبري شارع التحلية

تجيك أول إشارة (( جرير وبرجر كينج )) تطول من عندها ويجي كبري تطلعه تطول زي ما إنت بعدين تجيك حفريات (( تقاطع السبعين , العزيزية بنده )) تاخذ من عنده يمين

تمشي في الشارع السبعين على طول لا تلف يمين ولا يسار إلين تشوف مطعم ومطبخ بلدي علي اليمين وعزيز مول على اليسار

طول زي ما إنت حتشوف بعده بشوية محل بروست صغير على اليمين اسمه كوكي على لفة صغيرة لا تلف من عندها .. لف من أول لفة بعد هذي اللفة يمين

حتطول شوية حتشوف مدارس المنارات العالمية على اليسار ومكتبة الأنوار على اليمين


هذي المكتبة إللي ينزل فيها أشرف بركات جميع ملخصاته إللي يسويها

[N3M]

^^
حلووو

واضح ..
شكرا لك

[TCHECO]

المشاركة الأصلية كتبت بواسطة وسيم الإتحاد أوصف لك أسهل .... إنت ماشي في الخط السريع متجه للمدينة اطلع كبري شارع التحلية تجيك أول إشارة (( جرير وبرجر كينج )) تطول من عندها ويجي كبري تطلعه تطول زي ما إنت بعدين تجيك حفريات (( تقاطع السبعين , العزيزية بنده )) تاخذ من عنده يمين تمشي في الشارع السبعين على طول لا تلف يمين ولا يسار إلين تشوف مطعم ومطبخ بلدي علي اليمين وعزيز مول على اليسار طول زي ما إنت حتشوف بعده بشوية محل بروست صغير على اليمين اسمه كوكي على لفة صغيرة لا تلف من عندها .. لف من أول لفة بعد هذي اللفة يمين حتطول شوية حتشوف مدارس المنارات العالمية على اليسار ومكتبة الأنوار على اليمين هذي المكتبة إللي ينزل فيها أشرف بركات جميع ملخصاته إللي يسويها

+1

لكن المكتابة غيرها بركات صارت مكتبة النجوم
وهي بدل ماتلف يمين من عند كوكي تطول على الشارع قبل اليوتيرن يمينك مكتبة النجوم ..
الانوار تتاخر يوم او يومين بس ..
تقديري..

[zelme]

المشاركة الأصلية كتبت بواسطة tcheco +1 لكن المكتابة غيرها بركات صارت مكتبة النجوم وهي بدل ماتلف يمين من عند كوكي تطول على الشارع قبل اليوتيرن يمينك مكتبة النجوم .. الانوار تتاخر يوم او يومين بس .. تقديري..

غريب اللي أعرفو انو مكتبة الانوار هي اللي ينزل فيها أشرف ملخصاتو

[saud888]

طيب ليش مايكون فيه واحد كفو ابن حلال رجال من ظهر رجال يروح يجيب الملخصات وينزلها في وحده من المكاتب الي قريبه من الجامعه

ويريحنى من الف والدوران

ويبشر بالدعاء في ظهر الغيب