سؤال لأهل المختبرات ..

[M!sS chocolate]

أبغى أسأل أهل المختبرات
هل ساعات الدراسه زي الطب يعني ماأرجع الا قريب المغرب لأني أشوف
اخويا هو طب ومايخلص محاضراته إلا الساعه 5 مو معقوله دراسه من 8-5

وكيف دراسته صعوبة الدراسه يعني زي صعوبة الطب أجلس طول السنه أنا والكتاب في حرب
أحس من بعد التحضيري أبغى شيء سهل طبعا مو مرره أكيد كل قسم وفيه صعوبه لكن سؤالي
هل صعوبته زي الطب .. لأنو عندنا ناس طب وجالسين يعانوا الناس تخرج وتتمشى وهم في البيت
بين الكتب ..

وابغى أسألهم شيء ثاني لمن يجوا يحللوا بعض الحاجات مايحتاج أكتب الكلمه
بس كيف يستحملوا الريحه أنا هذا هو اللي موقفني

قريب شوفت في برنامج اللي يجي في ام بي سي فور حق الدكاتره اكيد الكل يعرفهم
يجلسوا ويتناقشوا في الامراض وينصحوا الناس كانت وحده من الحلقات يبين كيف الشخص
يعرف انه عنده إمساك فلمن جاب صور الحاجات ديك أخويا قاللي هذا الشيء انتي حتمسكيه
وتحلليه وأنا من ساعتها علامات تعجب فوق راسي ماني مستوعبه ولاقادره أتخيل الموقف ..

[M!sS chocolate]

؟؟؟؟؟؟؟؟؟؟؟؟؟؟؟؟؟؟؟؟؟؟

لهدرجه الأسأله صعبه ..

[● ά7Ļά şùģάя ●]

معلييش يآعسسسل
بس الكل حآآآيس في إختبآرآت الفآينل
والقليل إللي يمديهم يدخلوآ
إصبري عليهم شوي

[قصة غروب]

اول شي لي الشرف اني اكون اول وااحد من قسم المختبراات يرد عليك.
طبعا انا ما ابغى اقولك ان قسم المختبرااات سهل او تااافه ومن الكلاام هذا لكن الوااحد لازم يعرف انه لو حتى يدرس تربية وطنية رااح يكون فيها صعوووبة
اما بالنسبه لطبيعة الدواام.
احنا كنا الترم الاول كاان عندنا عدد ساعات كثير فكاان تقريبا دواما من 8 الى 3 تقريبا هذا كان اقصى حد اتوقع,
والترم هذا خف دوامنا لكن كان دوامنا السبت والاحد والثلاثاء من 8الى 3 واحيان يوم الثلاثاء نرووح مركز الملك فهد للابحاث نتاخر الى العصر في بعض الاوقات.
وطبيعة الدراااسه في موااد فيها صعوووبة شوي وفي موااد فيها صعووبة لكن والله متعه الى ابعد درجه زي الhemtologyطبعا المواد الاساسية في الكليات الطبية تكون مشتركه في جميع التخصصات الطبية زي مثلا الاناتومي والفسيولوجي والمواد هذي كلنا نااخذها سوا لكن في مواد احنا ناخذها بشكل مخفف شوي عن الطب.
وطريقة المذاكره انك ماتطلع من البيت او ماتنام الا والكتاب في حظنك اتوقع لا بالعكس المواد كلها حلوها ومافي تعقيد يعني ماتحتااج الجهد هذا كله الكلام هذا اقوله وانا في سنه ثانيه ما ادري في سنه ثالثه كيف بيكون الوضع؟
اما بالنسبه للاشيااء اللي تقولي عليها انك تحلليها انت في المختبر اخصائي وتحتك فني ومساعد فني اتوقع ان هم اللي بيقووموا بالاشياااء هذي ولو وظيفتك احتاجت انك تقوووم بالشئ هذا اكيد رااح تقوووم فيه ممكن اللحين تشوفين الشئ هذا صعب او شئ مقرف لكن في حالاااات اسوأ من كذا ايش رااح تسوووين؟
واتوووقع كل التخصصات الطبية فيها اشياااء من النووع هذا فااحنا لازم نتحمل الشئ هذا ونعرف ان احنا مانلعب احنا نقوووم بشغلنا وواجبنا.
اتمنى اني افدتك ولو في اي استفسار بخصوص المختبرات سنه ثاانية ان شااء الله اقدر اجاااوب عليه
وبالتوفيق ان شاااء الله.

[M!sS chocolate]

^^^^^^

وأخيــــــــــــــــرا
صراحه لازم زغروطه دقيقه دقيقه
<<اللي يبغى إذنه سليمه يقفل السماعات ...










طيب حلو لمن 3 حلو على بالي لمن قريب المغرب زي الطب
واللهي احيانا احزن على اخويا مسكين <<تمون الأخت ..

ونااااااسه والله تخرجوا من الجامعه تروحوا مركز الملك فهد للأبحاث
يانااااااااااس يجنن هالقسم خلاص ماابغى الا هوو ..

نجي للشيء الأهم يعني الحاجات ديك موجوده طيب نمشيها
بس انا سؤالي على الريحه
أخويا يقولي في أمراض يعرفوها بالتذوق والشم
أنا بس عرفت الكلام دا على طول اتخيلت شكلي وأنا أشم
في وحده تقولي انو مو تشموها عالطبيعه تحطوا عليها مواد وبعدها تشموا

[قصة غروب]

هههه ههه ههه ههههههههههههه
حلووووه تشموها
احنا اللحين ما في احد من الدكاااتره جاااب طااااري الشم بس ممكن نشم في سنه ثااالثه علشان في ماده اسمها امراض
هه هههه ههههههههههه والله حلوووه طريقة الشم هذي
انا اللي اعرفه علشااان تكون امن في اللاب انه ما تشم اي مااده لان بعضها تكون سامه وبعضها يكوون يسبب امرااض ومشااكل فمشكلة الشم ما ااعتقد انه فيه.

[● ά7Ļά şùģάя ●]

المشاركة الأصلية كتبت بواسطة m!ss chocolate ^^^^^^ نجي للشيء الأهم يعني الحاجات ديك موجوده طيب نمشيها بس انا سؤالي على الريحه أخويا يقولي في أمراض يعرفوها بالتذوق والشم أنا بس عرفت الكلام دا على طول اتخيلت شكلي وأنا أشم في وحده تقولي انو مو تشموها عالطبيعه تحطوا عليها مواد وبعدها تشموا

أمآآآآآ بالتذوق
مرآ لأ
مستحيل أصلن
هيآ لحآلهآ تجيب مرض كيف لو أحد فكر يتذوقهآ وهيآ فيهآ حآجة لمرض معين

[عبوور]

لا طبعا ماراح تشمي شيء عشان تشخصي اي حاله أبدا أبدا
يعني بطريقة علمية مافي عينة تجيك فريش فالريحة تكون متغيرة التشخيص بالشم هذا للامهات بحكم انهم بيهتموا بأطفالهم ويكونوا قريبين منهم وقت ماتشتغلي ع العينة راح تشتغلي عليها في شيء اسمه سيفتي كبنت بالانجليزي ما اعرف له ترجمة هذا الشيء لحمايتك انت والعينة الهواء اللي داخل الجهاز يروح لفلتر ويخرج على برة والهواء اللي عندك قبل مايدخل الجهاز يتفلتر أحس أني ضيعتك عشان تعرفي شكل الجهاز حطي الكلمة هذي في العم جوجو وسوي بحث بالصور safety cabinet
بس عشان لما تدخلي الاب لاتقولي عبير كذبت علي في روايح مش روايح الفضلات روايح المحاليل والخرابيط احيانا تكون موجود بس مو بشكل قوي ابدا ولو المعمل اللي تشتغلي فيه من المعامل الجيدة اللي يهتموا بالنظافتها ماراح تشمي ريحة تقرف أبدا بعدين زي ماقلك قصة غروب راح تشوفي اشياء تقرف اكتر من الفضلات في رحلة البحث عن العلم لا تخافي
بالنسبة للدوام برضوا زي ماقال قصة غروب سنة تانية لذيذة ودوامها مو طويل بس بتدرسي أساسيات لازم تركزي فيها لكن سنة رابع راح تأخذوا الهنا كله دراسة لاقصي حد الدوام الين 3-4 ومحاضرات طول الوقت لكن كلمة حق راح تستمتعي لانه بجد بتاخذي معلومات واشياء مهمة وتفيدك
كترة كلام أقصي شيء بس الله يعينك لو تبغي اي استفسار عن التقنية انا في الخدمة