جدولك مو مزبوط ؟؟موادك قليلة ؟؟محتاج مادة ؟؟ هنا الحل إن شاء الله

[خافي الأحزان]

السلام عليكم ورحمة الله وبركاته



كما هو معلوم الشعب مقفلة وكله أحمر

وأغلب الشباب مو عاجبه جدوله وفيه ناس كثير جداولهم مافيها غير مادة مادتين

والسبب يرجع لنا نحن الطلاب!! نعم نحن

للأسف شباب كثير ضايفين مواد مايبغوها لدرجة إنه البعض معبي جدوله فل 18 ساعة كاملة وهو مستحيل يتركه كذا لكن بس كذا بيحجز مواد على الفاضي

والمشكلة 90% منهم محتاج مادة مو موجودة عنده

طيب بالله عليكم لو كل واحد عبى جدوله على الفاضي كيف بنترك لبعضنا ما نحتاج من مواد

واحد أضاف 18 ساعة على جدوله ومن ضمن المواد رياضيات مو محتاجها وهو نفسه ينزل استاتيك مثلا

والثاني كمان أضاف 18 ساعة على جدوله عنده استاتيك مو محتاجها وهو نفسه ينزل رياضيات

طيب لو كل واحد حذف اللي مايبغاه كان كل واحد زبط جدوله زي مايبغى

واللي يقهر تجي بعد إنتهاء الحذف والاضافة من الجامعة بأسبوع تلقى الشعب كلها انفتحت ومقاعد بالهبل !!



شباب في هذا الموضوع نبغى كل واحد يذكر المواد اللي يحتاجها واللي يبغى يحذفها لعل وعسى ما نكون زي الاثنين اللي فوق


واللي عنده مواد إضافية مو محتاجها ياليت يتقي الله في الطلاب اللي جداولهم فاضية ويتذكر قول الرسول (من فرج عن مسلم كربة من كرب الدنيا فرج الله عنه كربة من كرب يوم القيامة)



بالتوفيق للجميع