| الحياةُ الجامعّية | مابين تجاربٌ ونصائِح -♥-

[شود البيشي]

السلام عليكم ورحمة الله وبركاته -يسعد مساء الجميع- أول حاجة مبروك للعزيزيات اللي انقبلوا وشرفتونا والله في مسارنا الجميل قبل لا أقول أي شيء وقبل لا ابدأ موضوعي حابة أقول لكم مايهم كلام اي ادمية لا قالت لك , واهه ! ليه داخله ادبي ماله مستقبل , اسحبي على كلامها وكملي مسيرتك وربي يوفقك ياجميلتي الزبدة إنه تقريبًا باقي اسبوع وشيء على الدوامات , كيف الوضع متحمسيين زيي وكذا هنا راح اكتب تجربتي في التحضيري ونصايح من صحباتي وكذا شغلات بسيطة وإن شاء الله اقدر افيدكم بأشياء حتى لو بسيطة موضوعي بيتكون من ! - المواد الدراسة والخطط - توزيع الدرجات - حياتي الجامعية < بحكم اني ثرثارة وكذا فلازم لثرثرتي نصيب - نصائح من جميلاتنا بنات 15 ننطلق ! الحياة الجامعية غير عن الحياة المدرسية180 درجة , من جميع النواحي في الجامعة فيه إعتماد كبير على نفسك من ناحية حضورك للمحاضرات و اختباراتك و في مذاكرتك كمان يعني أيام الثانوي كانت الأستاذة تجري وراكي عشان تحضري حصتها لكن هالحين عكس تمامًا وكمانا بعض المدارس كانوا يحددوا لهم قبل الإختبارات او يعطوهم اسئلة مراجعة وتسهيل للمواد لأبعد درجة بس هالحين شيء ثاني الكتاب معاكي كامل ويالله يالله تلقين كم شيء محذوف , وكمان غالبًا يعتمد على الفهم مو الحفظ لأنه ماراح يجي لك نصًا نفس اللي في الكتاب , لازم نفهم بالأول و بعدين نقدر نحفظ عندنا خطتين اللي هيا خطة ( أ ) و ( ب ) خطة -أ- تشمل ( رياضيات , حاسب , عربي , ثقافة ) خطة -ب- تشمل ( إحصاء , مهارات الإتصال , مهارات التفكير ) + الإنقلش نتكلم عنه في الأخير إن شاء الله الترم الأول انا اخذت خطة ( أ ) ( رياضيات , حاسب , عربي , ثقافة ) الرياضيات : أجمل مادة في الخطة كلها , يمكن البعض يشوف المادة صعبة بس ابد والله سهله وكمان يعتمد عليكي إنتي إذا ركزتي وفهمتي حتمشي تمام اخذته عند استاذة ( غادة مطر ) وشرحها ماشاء الله مرا جميل , يعني اللي عند هذي الاستاذة اضمن لكم الدرجات العالية بإذن الله . إنتي اهم شيء ركزي معاها وقت المحاضرة وراجعي اللي اخذتيه في البيت وماراح تنسيه إن شاء الله وبالنسبة للإختبار , كانت تعطينا اوراق مراجعة وبتفيد كثير لأنها مراجعة لجزئية الإختبار كلها بس طبعًا مانعتمد على الأوراق , الكتاب الأهم وبعدين الأوراق . الحاسب : احب الجانب العملي فيه , اما النظري ثقيل دم بشكل طاح حظي عند ( روان الشيخ ) ما انكر في البداية كرهت المادة بشكل بسببها بس بعدين الحمدلله مشيت اموري كويس , آمممم شديدة بشكل غير طبيعي فإنتي عشان تتجنبيها خليكي في حالك ولا تهرجي معاها سوي واجباتك وسلميها والله يستر عليكي طبعًا الجزء العملي يحتاج كمية تركيز وقت المحاضرة لأنه لو ما انتبهتي رحتي في خبر كان , الحمدلله كنت أفهم بالحاسب بشكل كبير فَ يعني غالبًا هي تشرح وانا مو ناحيتها ابد < وطبعا هالشيء مرا غلط بس الحمدلله عديت على خير , يحتاج له مذاكرة أول بأول لأنه راح يحوسكم وقت الإختبار . العربي : احب جزيئة النحو لأنه يعتمد على الفهم وجزئية الأدب لكم عليها , وجزئية البلاغة يعتبر كله مراجعة للي اخذناه في الثانوي اخدته مع ( رحمة هاشم ) , وكان شرحها بطل والله وتوصل المعلومة بشكل كويس المادة سهله بشكل كبير باستثناء كم باب كذا , يعني كلها اشياء قد اخذناها من ناحية جزئية النحو , فعل ماضي وامر ومضارع وكان واخواتها و ... و ... إلخ يعني اشياء بسيطة الحمدلله , والبلاغة كمان عندكم السجع والطباق والأشياء السهله هذي , رغم إنه المادة سهله وتساهلت فيها إلا إنه نقصت فيها اكثر شيء . الثقافة : وما ادراك ما الثقافة ؟ اخذتها مع استاذة ( عبير أبو طاهر ) , هالإنسانة كمية اخلاق ياجماعة وشرحها ماشاء الله ممتاز لأبعد درجة وطبعها هادية جدًا وتوصل معلوماتها بأدله وشواهد يعني محاضرة الثقافة بتكون جميلة وممتعة على حسب الأستاذة . غلطت عمرك في هالمادة إنك ماتذاكريها اول بأول لأنها مادة متعبة جدًا وقت المذاكرة وكثيرة كثيرة كثيرة بمعنى الكلمة يعني غالبًا البنات عقدتهم الرياضيات بس للأسف انا الثقافة كانت معقدتني شويتين الترم الثاني اخذت خطة ( ب ) والصراحة ابد مافيها تعب زي الترم الأول وكانت اسهل بكثير من خطة ( أ ) وممتعة كمان ( احصاء , مهارات الإتصال , مهارات التفكير ) الإحصاء : اخذته مع ( هبه باشيخ ) من ناحيتي شرحها مرا يعجبني , صح إنها بعض الأحيان تحسيها مو عارفة كيف توصل المعلومة بس الحمدلله في الأخير تفهمك كويس () المادة جدًا جدًا جميلة ومن ناحيتي حبيتها رغم إني كنت متخوفة منها كثير كل اللي عليكي في هالمادة شويتين تركيز وقت المحاضرة , وفي الإختبار تقريبًا حيكون كله تعويض للقوانين لا اكثر ! الباب الأول يعتمد على الحفظ والباقي كله قوانين وهيك حاجات جميلة , طبعًا في الإختبار ورقة القوانين بتكون عندك يعني القانون قدامك بس اللي عليكي تطبقي القانون بطريقة صحيحة , عكس الرياضيات في الرياضيات إنتي تفهمي وتحفظي القانون يعني ماراح يكون زي الإحصاء مهارات الإتصال : اخذته مع ( مرفت العرضاوي ) ياجماعة قد إيش هالإنسانة جميلة ؟ يعني انا كنت كارهة المادة بشكل كبير لأنه كنت أخذها في ساعة ونص يعني كمية ملل غير طبيعية , بس بجد اسلوبها يخليك تنتبهي معاها غصب . المادة محتواها كويس ولها تكاليف ومجموع التكاليف 30 درجة , وإذا جيتي عند استاذة مرفت بتاخذي 30 بالراحة بإذن الله بس اهم شيء اتقني شغلك وعملك . مهارات التفكير : اخذته عند ( عايشة الربعي ) شرحها جميل وما كأنك اصلا في محاضرة , تاخذ وتعطي معاكي وكل فقرة تجيب عليها مثال وكمان تعيشك بجو الحوار , يعني كانت كأخت لنا مو استاذة المادة دسمة بس مع التركيز وقت المحاضرة بتكون سهله بإذن الله . ونجي لآخر مادة ( الإنقلش ) نقدر نقول عقدة بنات التحضيري طبعا اخذت الأربع مستويات كلها ولك عليا يعني , فلحت بدرجة بسيطة الحمد لله المستوى الأول : اخذته مع ( رازيا سلطان ) إن ماخاب ظني تكون باكستانية الحمدلله إني نجحت بس , ما كنت افهم معاها اي حاجة بحكم إني ما افهم انقلش اصلا وهي ماتفهم عربي يعني كانت حالتي مرة صعبة طبعًا في هالمستوى عندنا اختبارات سبيكنق و الميد تيرم والفاينل و رايتينق والكويزات طبعا , الريدينق بس ماعندنا ! الرايتينق اشياء مرة سهله وبسيطة واهم شيء تكوني فاهمه كل كلمة قدامك ومركزة وقت المحاضرات المستوى الثاني : اخذته عند ( إبتهال خلوفة ) سعودية شرحها إيش جميل , صح إنه عندها النظام نظام ولاتأخرتي خمس دقايق تنقص بس شرحها كويس وتدخلي الإختبار وانتي فاهمة كل شيء الحمدلله بس اهم شيء تركزي معاها وتخففي غيابات وفي المستوى هذا حبيت الإنقلش وماكنت اسحب إلا لضرورة بس , وكمان هيا متعاونة معانا ربي يسعدها المستوى الثالث : وش أقول وش أخلي هنا ؟ طعم النجاح ماحسيته إلا بالمستوى الثالث والرابع بجد بجد كان شيء متعب والكل يقول إنه الثالث اصعب من الرابع مع إنه اشوف كلهم زي بعض بس الرابع يختلف بشيء بسيط اخذته مع ( ريا الحربي ) سعودية شديدة شويتين بس مو زي ابتهال ! الحمدلله كانت متساهلة معانا في الدرجات بشكل كبير -ربي يعطيها العافية ويسعدها- المستوى الرابع : هذا المستوى كنا شاكين إننا بناخذه صيفي بس الحمدلله عديناه وكم وحدة ماعدته -خيرة- هالمستوى أخذته مع ( مريم العوفي + مريم فلاته ) سعوديات كل وحدة اطلق من الثانية ماشاء الله ... مريم العوفي , شرحها جميل وتحسين بحماس وانتي في الكلاس , يعني تحسكم خلاص طفشتوا تقوم تسوي لكم اي شيء اهم حاجة عندها تستانسوا في الكلاس وتاخذوا راحتكم تحاول قد ماتقدر تمشيكم في السبيكنق الحمدلله , بس انتوا اهم شيء جيبوا جمل تمام وكذا وحتمشوا فيه () مريم فلاته , كانت بس يوم الأحد كانت تبع الريدينق , اممم برضو بطلة الحمدلله يعني ماتتعبي معاها :) معاهم تقدري تاخذي درجات عاليه إن شاء الله , بس التناحة تناحة الله وكيلكم ): الإنقلش بتاخذيه 4 ساعات بعض الأيام , من 11 لحد 4 , وبعض الأيام 3 ساعات من 8 لحد 11 اختبارات السنة التحضيرية كلها الكترونية بتكون على الكمبيوتر وكلها اختيارات وصح وخطأ , إذا كان الإختبار مع 30 درجة بتكون عدد الأسئلة 30 و إذا 40 درجة بتكون عدد الأسئلة 40 باستثناء الحاسب والإنقلش . الرياضيات + العربي + الثقافة + الإحصاء + مهارات التفكير : 30 درجة الدوري الأول + 30 درجة الدوري الثاني + 40 درجة الإختبار النهائي مهارات اللإتصال : 30 درجة على التكاليف + 30 درجة الدوري الثاني + 40 درجة للنهائي الحاسب : 35 الدوري الأول و 35 الدوري الثاني : 10 الجزء النظري , 25 الجزء العملي , النظري بيكون 20 سؤال و على فقرة نص درجة . العملي كل استاذة و على حسب توزيعها في الدرجات ^ في كل الإختبارين على هذا النمط 30 درجة الإختبار النهائي : 15 الجزء النظري , 15 الجزء العملي - النظري بيكون كمان 30 فقرة . الإنقلش : الميد تيرم -النصفي- عليه 20 الفاينل -النهائي- عليه 40 و راح يبقى 40 درجة ! 10 سبيكنق نهائي و 10 رايتينق نهائي صاروا بكذا 80 و الـ20 الباقية بتكون في يد الأستاذة ومنها اختبارات بشكل دوري سواء ريدينق او سبيكينق او رايتينق . وفيه استاذات يطلبوا ملفات ويعطوكم عليها درجات بحيث ترتفع درجاتك وهيك ~

[شود البيشي]

هنا نقدر نقول إنه فضفضة عن نفسي وعن اول تجربة لي في الجامعة ! قبل لا اسجل في الجامعة كنت متأكدة إني ماراح انقبل انتظام لأن اللي اعرفه الجامعة كلها واسطات وكذا يعني عندك واسطة ؟ الله يحيك وبتنقبلي , ماعندك ؟ اجلسي في بيتك ): بس الصدمة يوم إني انقبلت طبعا مرة الحمدلله إنه انقبلت إنتظام , كنت مستانسة وخلاص ابي الجامعة تجي اظن انه قبول دفعتنا طلع يا نهاية شعبان أو بداية رمضان , كملت إجراءاتي وإجراءات صحبتي وطلعت خطتي ( أ ) وكنت اتمنى ( ب ) لأنه كنت أقول إنها اسهل وكذا ومواد جديدة فأبغى اجرب الشيء الجديد سجلت في إختبار الإنقلش مع إنه ماكان ودي اختبر , بس عمي قال جربي يمكن تعدي كم مستوى < ياليتني ماسمعت كلامه كان اختباري في رمضان الله لايوريكم وصاحية من 8 الصباح واختباري 11 مدري 12 ! بس خلاص توتر وكذا , و اول مرة ادخل الجامعة من غير احد يعني القدرات والتحصيلي رحنا انا وصحبتي وكان الجو عادي الزبدة إني اختبرت وخلصت في وقت مرة قصير والحمدلله على كل حال بديت من المستوى الأول كنت أقول عادي كلها أيام ويعدي هالانقلش أهم شيء استانس واركز على المواد الباقي لأني اصلا مو فالحة في الإنقلش صحباتي اللي انقبل منهم انتساب واللي عن بعد واللي في السلامة واللي في الشرفية والله العالم بحالنا , احنا ثلاثة بس اللي انقبلنا في السليمانية , انا خطة ( أ ) والثانية خطة ( ب ) والثالثة ( علمي ) , يعني النفسيات مرة زفت ليه كذا وضعنا ): قلنا بما إنه كل وحدة خطة وجدولها غير فَ مالنا غير الباص اللي يجمعنا , كنا كمان متخوفين من الباص في البداية لأنه من المتوسط واحنا على باص واحد يعني كذا فجأة ننقل باص ثاني ؟ شيء غريب على العموم الحمدلله سجلنا في باص وداومنا أول يوم وطبيعة أول يوم تكونين مواصلة غالبًا فَ رحت مواصلة وعاد أشكالنا ذاك اليوم بطلة , كذا ضايعين وين نروح وش نسوي ؟ مع إنه كنا 4 بنات موب وحدة بس خلاص مكان جديد ومرة كبير فَ لزوم إنك تضيعين وتحوسين , رحنا وعرفنا المباني تبعنا والكلاسات ^ طبعا بالاستعانة ببنت خالة وحدة من صححباتي :) اليوم الثاني كان عندنا اليوم الإرشادي وحضرته وياليتني ماحضرته , ما استفدت شيء من ذاك اليوم غير معنى كلمة تسكين يعني نصيحتي ؟ كبري مخدتك ونامي بدال تضييع الوقت ثالث يوم بدينا ناخذ إنقلش ورياضيات وكانت بداية حماسية لي لكل المواد بإستثناء الإنقلش , الأسبوع الأول كنت أغلب الوقت مع صحباتي بحكم إنه مافيه محاضرات طول الوقت , بس الأسبوع الثاني بدأ الجد ما أشوفهم غير في البريكات ويادوبك ناكل ونصلي الظهر ونرجع للإنقلش كان دوامي كل يوم من 8 , و3 أيام أطلع 4 ويومين 12 اليومين اللي اطلع فيها 12 تعتبر معنى الراحة والله , أصلا شعور فخم إنتي تطلعين وصحباتك باقي عندهم كلاسات في بداية الترم كنت أرجع البيت واراجع اللي أخذناه وكذا ^ هذا اللي يسمونه بشد حيلي الترم الجاي نبدأ بجماس ونهاية الترم افتح الكتاب وكأني أول مرة أفتحه رغم الاختبارات الدورية بس النسيان يسطير على عقلك في التحضيري عموما كذا كان يومي : أقوم الساعة 6 , ويجي الباص 6 ونص تقريبًا وابدأ 8 وأرجع البيت الساعه 4 وأحاول أجلس لحد العشا وانام بعدين , لا كتب ولا مذاكرة ولاهم يحزنون لكن في اليومين اللي أرجع فيها 12 ! أرجع من الجامعة 12 وأنام لحد العصر تقريبا وأصحى أذاكر اللي أخذته خلال اليومين , وبعدين ماعد أنام إلا 1 أو 2 الليل كانت تجربة جميلة والله كأول ترم لي الترم الثاني الله يسلمكم كنت ما أحس إني تحضيري 3 أيام أطلع 12 ويومين4 !! وغير هذا الأستاذات يعتذروا كثير , وأنا أصلا سحباتي كثرت الترم الثاني بس ما أثرت عليا الحمدلله < لا أشوف احد مسوي زيي بالنسبة لتعاملي مع البنات وكذا , ما حاولت أتقرب من أي وحدة كثير , لأني مابعرف هي كيف بتكون ؟ أفضل شيء خليكي في حالك حال نفسك وخلي البنات في حالهم ما أقول لك عيشي لوحدك ؛ لا ياقلبي تعرفي لك على ثنتين ثلاثة حلو وأهم شيء يكونوا كويسيات ويحفزوكِ للدراسة وكذا موبب كل يومين وانتي ساحبة معاهم ! أنا ومجموعة بنات سوينا قروب قبل الجامعة وتعرفنا على بعض وصاروا صحباتي وكذا ونفيد ونستفيد من بعض والحمدلله بعضهم كانوا معايا في بعض المواد وكمان وحدة من بنات الثانوي معايا في كل المواد يعني من هذي الناحية ارتحت ^ ناهد ؟ جعلك بالجنة ياشيخة ايوا دقيقة باقي نقطة كمان ~ بالنسبة للاختبارات أبد أبد ماينفع تذاكري قبلها بيوم , أنا كنت أخذ لي أسبوع قبلها أو أسبوعين وأقسم المادة على كذا يوم وبالنسبة للإحصاء والرياضيات , اللي ماتفهم فيهم أفضل لها تدخل اليوتيوب عندك : ( غادة مطر , للرياضيات ) , ( علي المرشدي , للإحصاء ) الدروس اللي كنت أغيب فيها كنت أشوف شرحهم والحمدلله مشيت تمام بس حابة أقول لكم لازم تذاكروا كويس عشان تاخذوا درجات عالية وبإذن الله كل وحدة تدخل التخصص اللي تبغاه وبس الله يسلمكم هذي حياتي ~ - خذوا السنة التحضيرية ببساطة وإنها مجرد تجربة مختلفة مو شيء صعب ومستحيل حاولوا دايمًا تساعدوا غيركم واخلصوا النية وشوفوا كيف يعود عليكم بالنفع بإذن الله , وشجعوا نفسكم دايمًا وتأكدوا إنه عندكم قدرات كامنة تحتاج جهد بسيط عشان تكتشفوها وتستغلوها , ودايمًا دوروا على البنات اللي يعطوكم طاقة إيجابية وكل شيء ياخذوه ببساطة وابعدوا عن المتقاعسين اللي يعلقوا فشلهم على الدكتورات أو المناهج لأنكم تلقائيًا بتصيروا زيهم أخيرًا : لازم تحطوا تجارب الآخرين في عين الإعتبار مو مجرد كلام تقروه وخلاص ! وترى التحضيري والله سنة جميلة ومابتحسوا بحلاوتها إلا بعد ماتشوفوا ثمرة جهدكم , وحتمر بسرعة فوق ماتتصوروا والله يحقق لكم امانيكم واحلامكم ويكتب لكم كل خير . ( بدور ) - أول شيء توكلوا على الله سبحانه وتعالى واحرصوا على حضور المحاضرات مع المثابرة والإجتهاد والصبر , واهم حاجة تكونوا راسمين لنفسكم طريق تبغوا توصلوا له بعد التحضيري , وكمان عشان لاتتورطوا في نص الترم , إذا كانت الأستاذة ماتفهِّم كويس غيروها من بدري ( منال + سارة ) - ذاكروا اول بأول او اقلها بين فترة وفترة عشان تثبت المعلومات وماتتراكم عليكم وتنضغطوا , واعطوا السنة التحضيرية حقها عشانها سنة مصيرية , ووازنوا بين حياتكم الاجتماعية والمذاكرة يعني مو تذاكروا لدرجة إنكم تختفوا من الحياة ونفس الشيء الجامعة ماتكون بالنسبة لكم مذاكرة ومحاضرات واختبارات ! لا , حاولوا تطوروا من نفسكم واحضروا دورات , وكمان حاولوا تختبروا ايلتس عشان تخففوا من دوامكم الطويل () ( جمان مغربي ) - احرصوا على المعدل المرتفع عشان تقدوا تدخلوا التخصص اللي انتوا تبغوه وابعدوا عن أصناف الأوادم المحبطين وكل همهم " مالك امل - المنهج صعب - الدكتورة الفلانية مو كويسة " ومن هالكلام اللي يضيق الخلق , ولو جينا واقعيًا نلاقيهم بالعين الكتاب بلع السحبات الواجد عن المحاضرات تنكبكم آخر السنة يوم تحتاجوها الدراسة أولا ثم الزحف , بالأخير بينكسر حلمكم لو طمحتوا لشيء من 12 سنة , انتوا كذا بتهدموا حلمكم بنفسكم بسبب تسيبكم وكمان كونوا طبيعيين ماله داعي التصنع عشان تجذبوا الأوادم لكم ( رزان ) - التحضيري اسهل مرحلة في الجامعة لحد يشيل همها , بس اهم حاجة التزموا بحاجتين لو التزمتوا فيها بتاخذوا A+ بإذن الله اول شيء الحضور وتاني شيء الفهم ووقت المحاضرة , لو فهمتوا كويس خلاص تقدروا تدخلوا الاختبارات بدون مذاكرة واغلب اختباراتي ما اذاكر والحمدلله , لأني كنت احضر وافهم واكتب الشيء اللي مو واضح في الكتاب الإنقلش جميل صح بس ساعاته طويلة بس في الأخير بترتاحوا ويرتفع معدلكم ويسير عندكم لغة ولو بسيطة التحضيري اسهل مرحلة وفرصة لكم إنكم ترفعوا معدلاتكم وتدخلوا التخصصات اللي تبغوها . ( رغد ) - احب ابارك لكم اولا على وصولكم لهذه المرحلة والله يوفقكم , واهم شيء توكلوا على الله في دراستكم لأن الفضل كله من الله عزوجل وادرسوا زين والتحضيري مو صعبة على اللي يجتهد ويثق بالله ( روان ) - اولا توكلوا على الله واحتسبوا الأجر . ثانيًا , انتبهوا على نفسكم مو تقولوا جامعة وفلة ومدري ايه وتسحبوا ؟ لأنه بيأثر على معدلكم وشدوا حيلكم من البداية في المواد لأنه معد فيه احد ينبهك وينصحك لأنه راح تندموا بعدين إذا طلع معدلكم ناقص , من البداية حاولوا تكونوا قويين صحيح النفسية حتكون مو حلوة من الجامعة اول ترم بس حتتعودي بعد كذا واصبروا على كل شيء في الجامعة , وحاولوا تتحاشون اي بنت شكلها غريب او بوية ولا تبصبصون عليهم لأنه يترتب بعد كذا على مشاكل يعني خليك حالك حال نفسك , والله يوفقكم وييسر اموركم . ( جواهر ) حبيباتي , وبنصائح البنات أنهيت موضوعي ربي يوفقكم جميعًا ويحقق لكم امانيكم فإن اصبت فمن الله وإن أخطأت فمن نفسي والشيطان () استودعكم الله - شود البيشي

[بنت ناس وقلبي ألماس]

وعليكم السلام ورحمة الله وبركاته

ويسعد مسائك يا عضوتنا الفاضلة

ما شاء الله تبارك الله كفيتي ووفيتي


موضوع جميل وكلمات أروع وتنسيق أجمل

الله يسعدك يارب ويحرم يدينك على النار

ويحقق لك مبتغاك ويحفظك أينما كنتي

[شود البيشي]

المشاركة الأصلية كتبت بواسطة بنت ناس وقلبي ألماس وعليكم السلام ورحمة الله وبركاته ويسعد مسائك يا عضوتنا الفاضلة ما شاء الله تبارك الله كفيتي ووفيتي موضوع جميل وكلمات أروع وتنسيق أجمل الله يسعدك يارب ويحرم يدينك على النار ويحقق لك مبتغاك ويحفظك أينما كنتي

أهلا أهلا ياجميلة
امين ياقلبي , ويسعد لي قلبك

[شـروق الزهراني <3]

ماشاء الله موضوع متكامل وجميل

بس اهم شيء ركزوا على المذاكرة مرررررررررررررة مهم معدل السنة التحضيريةةةةةةةةةةةة

لانه بيمشي معاك للنهاااااااااااية وهو الاساااااااس

[بيان عبدالعزيز]

وعليكم السلام ورحمة الله وبركآته

آسعد آلله صبآحك بالخيرآت شود البيشي

مآشآءالله تبآرك الله

هالسنة طلعت الابداعات في المُلتقى الاداري والانساني^^

صرآحةة آحنا كمشرفين فخورين فيكم وفي إبداعك وإبداعات بقية العضوات والاعضاء في القسم

ربي يحفظكِ مآشآءالله ابدعتي بمعنى الكلمة

جداً رآئع موضوعك ومفيد

جزآك الله خيراً ويعطيك آلعآفيةة يآرب

دمتِ بخير

[شود البيشي]

المشاركة الأصلية كتبت بواسطة شـروق الزهراني <3 ماشاء الله موضوع متكامل وجميل بس اهم شيء ركزوا على المذاكرة مرررررررررررررة مهم معدل السنة التحضيريةةةةةةةةةةةة لانه بيمشي معاك للنهاااااااااااية وهو الاساااااااس

يا أهلين وسهلين ()
زي ماقالت شروق معدل التحضيري مهم بشكل كبير يعني لو تهاونتي وجبتي معدل مو كويس راح تندمي بعدين ):
+ ربي يسعدك يختي

[شود البيشي]

المشاركة الأصلية كتبت بواسطة Bno Abdulaziz وعليكم السلام ورحمة الله وبركآته آسعد آلله صبآحك بالخيرآت شود البيشي مآشآءالله تبآرك الله هالسنة طلعت الابداعات في المُلتقى الاداري والانساني^^ صرآحةة آحنا كمشرفين فخورين فيكم وفي إبداعك وإبداعات بقية العضوات والاعضاء في القسم ربي يحفظكِ مآشآءالله ابدعتي بمعنى الكلمة جداً رآئع موضوعك ومفيد جزآك الله خيراً ويعطيك آلعآفيةة يآرب دمتِ بخير

ويسعد مسائك ياعسل
حبايبي انتوا , والله السنة اللي راحت كنا نحوس في المنتديات عشان نلقى مواضيع
زي كذا ونقدر نستفيد , والحين جا دورنا وحبينا نفيد أخواتنا الجديدات ويارب إنهم يستفيدوا
يعافيك يارب ()()

[بشرى.]

السلام عليكم... موضوع جدا جميل واستفدت منه بصراحة رغم اني عن بعد تحضيري
المهم يعطييييك العاااااافية ...
بس متى اقدر اختبر ايلتس دا ؟

[نــورهـ]

و عليكم السلام و رحمة الله و بركاته

ماشاء الله ماشاء الله

تسلم هاليدين ع الموضوع الجميل المتكامل.

ما قصرتي الله يعطيكِ العافية و يجزاك خير ع جهدك و إفادتك للطلبة.

بارك الله فيك و في موازين حسناتك يا رب.

جزيل الشكر و التقدير يا شود.