اش شعوركم وانت انقبلتو في كلية الطب << ابغى مشاااااعر

[soma al7elwa]

طيب أنا صيدلة ممكن أقول ايش مشاعري؟؟

____________

أول شي كنا على أساس انو النتايج فرمضان

وايام الفاينل وحدة صحبتي تقولي النتايج الطبية والهندسية بعد اسبوعين

قلتلها كزاااااابة

قالتلي والله فالمنتدى مكتوب

وتمر الايام ويجي اليوم الموعود

وربي الدقايق كأنها ساعات

يومتها كنت مواصلة

وكنا مجتمعين فمنتدى السنة التحضيرية

وانا مافي غير اسوي ريلود ريلود ريلود

كل دقيقة

كنت مفكرة انو حيكتبوا "تم اغلاق الموقع لنزول نتايج التسكين للسنة التحضيرية"

وبعدها بكم ساعة حيرجع يفتح وتكون نزلت النتايج

المهم وانا استنى عالمنتدى وعالودس ومعايا صحباتي عالماسنجر

جات اختي وهي ثانوية عامة

جلست تحكيني انو ماحلت كويس فالاختبار وانها خايفة ويش صار وايش الأسئلة اللي جات وكدا

والا شوية اسوي ريلود للاودس

ألاقي مكتوب صيدلة

اتبكمت

مو قادرة اتكلم

والدموع تطير من عيوني

ابغى اصرخ ابغى اضحك وابغى ابكي وابغى اسجد ومو عارفة ايش الشعور اللي جاني

واختي تطالع فيني مفجوعة ايشبك؟؟

قلتلها وانا مافيني صوت اتقبلت صيدلة

ورحت اجري ابشر مامتي وبابتي كانوا نايمين ياقلبي عليهم

واتزحلقت مو قادرة اوقف

وانا جالسة ابكي وقمت اجري عند مامتي نطيت فوقها

واصحيها وابكي واقولها ماما اتقبلت صيدلة اتقبلت صيدلة

فتحت عينها وضحكت قالتلي مبروك

لا تصحي ابوكي قوليلو لما يصحى

ورجعت نامت "^^

وادق على صحبتي كانت نايمة

وردت عليا ما تسمعني غير ابكي واشهق واضحك

قامت هي اتفجعت المسكينة

-ايشبك ؟؟ اتقبلتي صيدلة؟؟

وانا ابغى اتكلم مو قادرة

-اسما لاتفجعيني اتكلمي
قلتلها ايوا ايوا

وكملت بكا راحت قالت انا قايمة اشوف

وبعد شوية تتصل فيني اتقبلت طب D:

بس هي طبعا ماعندها حركات فيفي عبدو وعبلة كامل زي بعض الناس

خخخخخخخ

ولما صحي بابتي بعدها بيجي نص ساعة قلتلو وطار من الفرحة مسكين

وطبعا خلال اليوم اتصلوا فيني كل صحباتي بالتبريكات والتهاني p=

ويومتها ماقدرت انام من الفرحة

وماجات الساعه 12 وشوية الا قدني ميتة على سريري مو نايمة

وبس

منجد شعور مررررررررة حلو لما تحققي حلمك بعد كل الصعاب اللي واجهتك

والله لو كنت دخلت الصيدلة من غير السنة التحضيرية ما كنت راح احس بنفس الفرحة وبنفس الفخر اللي انا فيه دحين

ياااارب تدوقي طعم الفرحة دي يا د.مشاعل

تقبلي لقافتي p=

[مايلي]

يالله ذاك اليوم بالنسبة ليه تاريخي

كنت سهرانه استنى النتيجه انا وماما وبابا الين الساعه 3 وقلت اكيد مهي نازله خليني انام واصحى الصباح امكن تنزل

وصحيت الصبح وكنا في ملتقى التحضيري الدفعه كلها كانت سهرانه

الين الساعه9 جات اختي من الاختبار واديتها الارقام حقت الاوديس ونمت مادريت الا صريخ في البيت والباب حق غرفتي بغى ينكسر اختي جايه تجري وتبكي وتقولي مايلي انقبلتي طب وانا زي المفجوعه والبيت كله صحي وامي كانت نايمه وجات تجري على غرفة الكمبيوتر كان يوم لاينسى يتحقق حلم عمرك وحياتك بين يوم وليله وجلست ابكي اول مره في حياتي اعرف دموع الفرح الا في ذاك اليوم

ويارب ان شاء الله يفرح كل الطلاب في القسم الي يبغوه ويفرحك ان شاء الله وتسيري د/مشاعل

لو تبغينا نعبر مانقدر شعور لايمكن التعبير عنه

[د.مشاعل]

سوما الحلوه مبروووووووك الف مبروك وهنا انا اللي كنت المفروض كتبت في كل المجالات بس كان تعبريك حلو
وانت يا قلبي يا مايلي كمان مبرووووووووووك الف مبروك والحمدلله وانت دقتي دموع الفرح وكمان اختصارك حلو
مسويه فيها << احم احم

[mzat kau]

ياااااااااااااااااااااااااااااااااااااااارب ياكريم يحققلي حلمي انا كمان واجي احكيكم ايش سويت هههههههه ياكريم يالله يارررب

[soma al7elwa]

ياقلبي عليكي يامزتي

إن شا الله مقبولة لا تخافي

انتي بنت مرة نشيطة ما شا الله فكل مكان بتشاركي وتساعدي كل الناس ياقلبو عليكي

الله يسعدك يارب ويوفقك وتجي تحكيني ايش صارلك

^_^

[صــمـود الأقصى]

د.مشاعل الله يحقق لك أمانيك يارب ويذوقك طعم النجاح

عني أنا قبلها بيوم كانوا أخوالي سهرانين عندنا وأنا عارفة انه النتايج بكرة والعالم تسأل متى النتيجة

وأقولهم ماأدري .. أصلا حتى نتيجة المواد ماقلتها لهم يوم طلعت .. ووقت ماهم رايحين طالع فيني

خالي وقالي يابنت انتي شكلك راح تداومين في المستشفى المركزي احساسي كذا ..جاتني ثقة غريبة

وقتها .. ويوم النتيجة كنت عند دكتورة الأسنان وهي تقولي فيه ألم وأنا أقولها هاه تقولي اشفيك اليوم مو

طبيعية .. قلت لها ولاشي .. ورجعنا البيت وأنا على أعصااابي .. البيت كله نااااايم لأانهم كانوا

سهرانين ..قلت خليني أفتح المنتدى أول أتأكد .. وفتحت وشفت الناس اللي انقبلوا وانفجعت .. قمت

فتحت الأوديس وغمضت عيوني بيدي .. ويوم فتح فتحت وحدة من عيوني بس ولقيت مكتوب كلية

الطب .. طب وجراحة الخطة الجديدة ..انفجعت .. وانفجرت بكاء وعلى طول

سجوووووووووود ..وقعدت أبكي حدود ساعة كاملة دموع فرح وامتنان لله ورحمته بي لأني كنت في حالة

صعبة .. وجري على أمي وهي نايمة وحضنتها وهي نايمة واقولها انقبلت طب قالت مبروك ورجعت

نامت ورحت قلت لأختي وهي نايمة بعد بس استوعبت وسلمت علي وقالت مبرووك ونمت

نوووووووووومة فظيعة وأنا نايمة تقول أختي امي قامت تسأل صمود طلعت نتيجتها ولا كان حلم ..

ماألومها تعبت على فراقي كثير..بصرااااحة شعور جناااان اني حققت حلم الطفولة وخصوصاً اني كنت

مغتربة + التحطيم الفظيع في التأهيلي

اعذريني عزيزتي عالإطـــالة بس حبيت أوصل لك الشعور دعائي لك بأن يحقق الله حلمك .. آمين

[د.مشاعل]

الف الف الف مبرووووووووك على قبولك وادععيلي ان ربي يحقق لي امنيتي واعيش حلاوة طعم القبول

[Mis hadooll]

اما انا فحكايتي كانت فلم هندي
انا حلمي من الطفوله اني اسير دكتوره كنت دايما احب الفكره واتخيل نفسي اني حاسير جراحه ولمن دخلت الثنوي ركزت وحطيتو هدف قدامي وقررت اني اذاكر واشتهدا ومع اني ايام المتوسط كنت اتهاون وماحب اذاكر بس لمن قررت يكون هدفي كلية الطب سرت اشتهد واطلع من الاوائل ونسبتي دايما 99%
وسرت اعشق كل شئ لو علاقه في الطب واحب اتفرج على كل المسلسلات الطبيه واقرا المواضيع واهتم بكل شئ له علاقة في الطب وخليته يسير حلم اهلي بيا كمان ^_^

دحين انا طلع معدلي مو تمام
وكنت مقتنعه ومتأكده اني لو طلعت للمريخ ونزلت مستحيل انقبل ولا باي طريقه من الطرق كنت ابكي كل يوم وطبعا نكدت على ماما وبابا الين مافقدو هما كمان الامل انا صح املي بالله كبير بس معدلي كنت احسو مستحيل يدخلني
طبعا انا صرفت نظر عن الطب وقلت الي فيه الخير ربنا حيكتبلو هوا وانا لازم ارضى مهما كانت النتيجه وكل شئ مكتوب ونصيبك يصيبك
المهم انا كنت مواصله الين 9 ونص الصباح العب وكنت فاتحه المنتدى واشوف الناس متحمسين ويتناقشو وانا كنت اقول يارب لو صيدله لو علوم طبيه ياربي انا راضيه ومع الاكتاب الي انا فيه قررت انام واخليها على ربنا وبالفعل نمت وقبل الظهر انسانه عزيزه عليا وصديقه قديمه اتصلت عليا كان كل الي تبغاه انها تسأل عني
يعني هيا ولا تدري انو النتايج كانت في داك اليوم جلست اتكلم معاها حوالي ربع ساعه وكنت مررره نعسانه وبعدها قررت ارجع انام وبعدين قلت راح اشيك عالاوديوس بس كدا وجيت افتحو والصفحه تتأمل وانا نفسي ابكي وكنت متأكده اني ماراح الاقي شئ وماكنت ادري انو النتائج طلعت اصلا
المهم الصفحه انفتحت وانا كنت العب في جوالي واول ماجات عيني الاوديوس قرأت تخصص طب وجراحه موازي خطه جديده
واول ردة فعل كانت عندي اني سرت اصررررررررررررررررررخ بطريقه مو طبيعيعه بالفعل كانت صدمة حياتي
وقامو صحيو كل اهل البيت مفجوعين والشغاله جات تجري وتقلي ايش سار ايش في واختي الصغيره تقلي ايش فيه وانا بس اصررخ واقول الحمد لله وقعدت فتره لمن استوعبت طبعا اول شئ صحيت امي وقلتلها وسارت تقلي من جد ولاتمزحي وكانت مصدومه وصحيت من النوم ولمن راحت الصدمه حضنتني وسرنا نبكييييي
طبعا قلنا لبابا وفرح جدا وبعد كدا كل صحباتي عرفو وباركولي وكان يووم سعييد صليت ركعتين شكر لربي وبالفعل يومها عرفت انو الواحد لازم املو يكون بالله كبير وانو ربنا مايضيع لاحد تعبو ^_^
طبعا بعدها فتحت الاوديوس يمكن الفين مرره عشان اتأكد وكنت كل شويه اشك في نفسي هههههههههههههه واقول يمكن اتخيلت
والحمد لله ياااارب
اعذريني اذا كنت طولت عليكي بس حبيت اوصفلك شعوري بعد كل التعب دا
^_*

[د.مشاعل]

ياالله والله عشت معاكي الجو الف مبروك وعقبال التخرج وعقبالي يارب << مدخلة نفسها في كل شي ههه

[mzat kau]

سوما الحلوة ياقلبي من جد تسلمييييييييي ويارب ان شا الله يتحقق حلمي يارب

ويادكتور شعوله انا حبيت موضوعك جدنننننن يناسو ع المشاعر ديه