الدوره التأهيليه ومديري

[تركي عبدالله]

السلام عليكم ورحمة الله وبركاته

يا خوان هذي قصتي بعد ما نزلت التسجيل بالدوره التأهيليه عرفت بالخبر بعد الظهر ويوم جيت اسجل خبرني ان النظام ما يفتح الا الساعة 2.30
قلت انام والعصر يكون خير حاولت ادخل العصر ما قدرت حاولت بعد المغرب والحمد لله سجلت
وبعدها جاء على بالي المدير وشلون بيوافق قلت مالي الا اكلمه الحين بالجوال يكون احسن واروق من الدوام وصجت بعض الموظفين الي ودك تشوتهم الزبده

اتصلت عليه ومن حسن حظي مشغوووووول اتصلت بعد نصف ساعه ولم يتم الرد

المهم بعد العشاء جاني حق الاثيوبي صح هو اسود زي الزيتون لاكن وجهه حلو شوي الستائر والمجلس الا وجوالي يدق الا المدير ابو فهد يا بعدي...

المدير: الو السلام عليكم حيا الله ابو عمر
انا: وعليكم السلام ورحمة الله وبركاته حيا الله ابو فهد بشر عن صحتك والدينك " لازم نتمصلح شوي تلقاه يقول عجل المكالمه على حسابي بس اشهد الله على كرمه بيض الله وجهه
المدير: اعذرنا ابو عمر ما قدرت ارد عليك
انا: وخر عني الحين مستانس المدير يعتذر مني المهم قلت ابو فهد وش رايك عندي دوره تأهيليه بجامعة الملك عبدالعزيز الي انتسبت فيها اول الصيف تذكر ومدة الدوره 12 يوم تقريبا وتراها اختياريه يعني لو ما تبي عادي بس تراها مهمه لي تفيدني " نص كلامي عليه محظره لووووووول
المدير: انت صادق ابو عمر
انا: بصراحه وجعني قلبي ومازال يتكلم المدير انا اسكت وعلى قولتهم اكلت تبن
المدير: انت صادق ابو عمر انا من ناحية تطوير الذات اعين واعاون ولا يمكن ارد احد يبي يطور من نفسه رح ولك الى ما بعد الحج "انا" لاكن "انا" بشرط انك تاخذ ام عمر معك من القراده ان ام عمر على يميني الله من حسن الحظ بس ما اقدر الف وادور
انا: يا ابو فهد انا ابي اروح مع بعض الشباب بالمنتدى علشان نستفيد من بعض بالدوره وبالمعرفه والخبره
المدير: هذا شرطي عليك ام عمر معك وعلى فكره ترى ابوي ما يمكن نسافر انا واخواني لأي مكان الا معنا زوجاتنا هذي وصية ابوي دايم لنا الا وش رايك يا ابوي " واثاري ابوه جنبه " قال ابو فهد لأبيه هذا ابو عمر زميلنا يبي يسافر جده وما راح ياخذ زوجته معه
انا: مستمع للحديث بين ابو فهد وابيه الا وفجأه السلام عليكم صوت خشن اثاري ابوه اخذ الجوال يكلمني طبعاً والد مديرنا ابو علي
ابو علي:السلام عليكم صوت خشن وله هيبه واحترام صراح
انا:بدت رجولي تتراجف من الخوف وعليكم السلام على ابو سليمان قلت اسم مديري من الخوف
ابو علي: انا ابو علي وسليمان رقم الخامس من عيالي
انا: حيا الله ابو علي يا هلا ومرحبا
ابو علي: وشلون سليمان معكم
انا: عز الله يا ابو علي انك جبت رجل والله لو ما سوينا ما نلق جزاه والله على ما اقول شهيد ما يمكن يرد احد, يسبق بالطيب حتى تنحرج منه وتصير مضبوط غصبن عنك
ابو علي: اجل اسمع انا من زوجت اول ولد من عيالي وانا والله ما اذكر سمحت لواحد منهم بالسفر الا مع عياله وانت واحد من عيالي ولا اسمح تسافر الا معك ام عمر
انا: تم يا ابو علي ابشر والله ان تروح معي ام عمر
ابو علي: ايه كذا ياوليدي احسن لك وتونسك وتكون عضدك وتريحك
انا: الله يسلمك يا ابو سليمان ويجزاك عنا خير الجزاء
ابو علي: يالله مع السلامه بعد كلام طويل عن التجاره والتعامل مع الناس والله نصائح منه من ذهب يعطيك خبرات تستفيد منها
المدير ياخذ الجوال: هلا ابو عمر
انا: هلابك ابو فهد
المدير: خلاص الي سمعته يصير
انا: تم ابوفهد

طبعاً المكالمه بالسياره
زوجتي بالسياره تحس بالانتصار لأني قايل لها بروح دراسه ودوره وبروح مع بعض الشباب بالمنتدى علشان نستفيد من بعض
وكنت ناوي انزل موضوع بهذا الخصوص للي بيخاويني وبناخذ العزبه وبنفلها هناك

وهي تضحك علي ضحكه قهر لي وخذ من التهزيء بروح غصبن عنك
انا في برود ما لي وجه ارد عليها واقولها شي مطأطأ راسي وانا عند الاشاره واقول بخجل تولمي يوم الجمعه ان شاء الله بنطلع على جده

وهذي قصتي افرحتني واخجلتني وحيرتني ووهقتني

افرحتني بموافقة مديري
اخجلتني بوالد مديري وطريقة كلامه معي حتى اعتبرني احد ابنائه
حيرتني شرط مديري على
وتوهقت مع الغاليه ام عمر سلمها الله
==============
والحين لما صرت ابي اروح عوائل وش رايكم يالي بيروحون عوئل مثلي اننا نتفق على شقق معينه ونتصل عليهم ونشرط عليهم اانا بكون مجموعه وكل عائله بتاخذ شقه منكم علشان نحدهم على السعر الي حنا نبي ويسون لنا تخفيض

مثال
لو اجتمعنا خمس عوايل واتفقنا على شقق معينه

يقوم احدنا بالاتصال عليهم ويحجز خمس شقق باسمائنا ويخبرهم المده اتوقع ممكن نستفيد اكثر بخفض السعر

هذا اقتراح واذا فيه مؤيدين عوائل نبحث عن شقق مقترحه

ويا ريت لو احد ينصح بشقق نستفيد منه