البارحه والبال ضايق والليل صوّت للغياب . . .

( أميرك ياخادمي) · #1 07-04-2010, 05:40 PM

البارحه والبال ضايق والليل صوّت للغياب . .
والخلق همت للمبيت . . بظلمة الليل الستير . . .

النوم ماله في عيوني لا ملذ ولا مطاب . .
والفكر حامت به طيور الهم . . بجناح كسير . . .

رحله جديده تستمر من العذاب اليا العذاب . .
ياليتها تفرج ويرحل هم . . بقدامي يسير . . .

وااا همي اللي برحلتي اثقل كتوفي كالزهاب . .
تعجز كتوفي تحمله . . وما ظنتي منه فرير . . .

وااا حلمي اللي راح ضاع قدام عيني كالسراب . .
والدمع من بين المحاجر . . حاير بعيني حسير . . .

يالين صار الحزن يلبس خاطري لبس الثياب . .
وما عاد للضحكه محل . . في واقعٍ اصبح مرير . . .

رحماك ياواحد احد رحماك يامنشي السحاب . .
رحماك يارب البريه . . ادعيك يافرد قدير . . .

رحمتك تاسع كل حي وللرزق فاتح كل باب . .
ياعالمٍ غيب القدر . . ويا لطيف ويا خبير . . .

تلطف بعبدٍ جوف جاشه قلب مما جاه ذاب . .
ومتمركزه في وسط جوفه . . شعلةٍ تسعر سعير . . .

والرأس من ضيم الليالي شاب ليته بس شاب . .
إلا شوي وينحني . . مما حصل واللي يصير . . .

ما اصبرك يانفسٍ عزيزه تحتمل كتم المصاب . .
ياطول عمرك صابره . . وماظنتي فالصبر خير . . .

الواقع اللي عايشه خالف مفاهيم الحساب . .
في كل حلمٍ أحلمه . . يتحقق لإنسان غير . . .

بلاش احلام واماني بلاش نبني بالشباب . .
بلاش ننظر فوق . . والحظ ما يبصر ضرير . . .

بلاش نرسم للأمل دربٍ يوديه الصعاب . .
صعب السعاده تبتدي . . وطاري البسمه اسير . . .

ما ارداك ياهذا الزمن وشلون نكست الرقاب . .
وصار الردي بالصف الأول . . بعد ماكان الأخير . . .

وشلون شيهانة بحر تصبح حليله للغراب . .
والحر من بعد العوالي . . ماعاد بجناحه يطير . . .

وكيف الحصيني ينتصر بالمعركه على الذياب . .
أنشهد انك يازمن . . ماعاد فيك ايات خير . . .

لو إنها في داخلي هالاسئله تلقى جواب . .
لكان شعري ما صرخ . . ولا اشتكى حر الزفير . . .

أميرك ياخادمي

دنيا الولهـ · 07-04-2010, 06:46 PM

وشلون شيهانة بحر تصبح حليله للغراب . .
والحر من بعد العوالي . . ماعاد بجناحه يطير . . .

ما شاء الله عليكـ
مااااااااااره روعهـ
صح لسانكـ
و يعطيك العافيهـ
دمت مبدع
تقبل مروري
دندون