إلى المختص والخبير والمجرب

[A.SahfaN]

بسم الله الرحمن الرحيم

السلام عليكم ورحمة الله وبركاته ومغفرته

بدون اي مقدمات


لدي سؤال اوجهه إلى صاحب الخبره

ما هي الامور او الاشياء الواجب توفرها في من يريد الالتحاق بكلية الطب بعيدا عن الشهادة؟

ارجو ممن لديه اي معلومه تفيدني ان يبديها وذلك بحكم تجربته

[JuStice]

.

وعليكم السلام ورحمة الله وبركاته ,

مني طالب في كلية الطب لكن قرأت عنها مررة كتيير لأني ناوي أحول لها إن شاء الله ,

أول حاجة الحفظ والفهم .. حسب علمي إنه لازم يكون معدل الحفظ عندك أعلى من الفهم وخاصةً في السنوات الأولى بكلية الطب ,

بالرغم من إن البعض يقول إن معدل الحفظ والفهم لازم يكون متساوي لكن مع احترامي هذا غير صحيح بالذات في الثلاث سنوات الأولى بكلية الطب فيه كمية معلومات هائلة لازم تنحفظ !

تاني حاجة حياتك راح تتغير ! هل إنت مُدرِك ومستعد للتغيير الكبير اللي راح تواجهه ؟!

لازم تقرأ عن دراسة الطب وطلاب الطب ونظام الدراسة وعن المواد وسنوات الطب وسنة الامتياز وما بعد التخرج .. كل دي الحاجات اقرأ عنها واعرفها ,

بعد كدا إذا كنت مستعد لها وللتغيير فهذا شي ممتاز عشان ما تنصدم لما تدخل كلية الطب من الأشياء والضغوط اللي راح تواجهها ,

تالت شي وهو الأهم "التضحيات" صدقني راح تضحي بأشياء مرة كتير بحياتك ,

في سنوات الدراسة راح تضحي بكتير من وقتك في الدراسة .. راح تقل خرجاتك مع الشباب .. طلعاتك .. اللعب .. كل دا راح يكون مرة قليل ومدروس .

أما بعد التخرج فـ راح يكون الطريق ما زال طويل أمامك .. إذا كنت شخص طموح فأكيد راح تحاول تحصل على البورد والزمالة ودي مو سهلة راح تاخد سنين من عمرك ,

رابع شي وبرضه مهم جدًا .. الصبر ثم الصبر ثم الصبر في الدراسة لأنه في النهاية راح تنال ثمرة جهدك وتعبك .

إذا كنت شايف في كل دا متعة (: فإنت إن شاء الله مناسب للطب .

طبعًا في حاجات كتيرة .. عشان كدا حاول تقرأ كتييييييير عن الطب وإذا تعرف أحد طلبة الطب فاستغله واسأله عن كل شي وطفشه بالأسئلة

لأن هذا قرار خطير في حياة الإنسان ومستقبله وخلي في بالك إنك مُقبِل على تخصص جاد جدًا -بتعاملك مع المرضى- وصعب -بطول مدة الدراسة وكثافة المعلومات- ومتعب .

هذا هو واقع الطب , وغير صادق كل من قالك إنها مو صعبة !

موفق إن شاء الله

.

[A.SahfaN]

مشكور اخوي JuStice والله يعطيك الف عافيه على اللي سطرته لي

نسأل الله ان يكتب لنا اللي فيه الخير

[surgeon]

ههههههههههههههه جستس اشبك مغمقها كذااااااااااااااااااااا

ترى والله الطب اسهل من كذا بكثير...(( كبرها تكبر صغرها تصغر))

قسم انو طلعاتي كثرت لما دخلت طب هههههههههههههههههههههههههههه


سرجون

[katkoooooota]

الله يبشرك بالخير يا surgeon والله انا خايفة ادخل الطب عشان خايفه اني اتعب مرره واقوم ما اقدر اكمل واسحب واعيد وتضيع سنوات من حياتي ..
انا في الفهم مررره امشي واحل اي مسالة ما عندي مشاكل وان شاء الله اجلس يومين اذاكر شي ينفهم اوكي عااادي .. بس لو جينا للحفظ اسوي منااااااحة ورااسي يسير ياس واسير تنكة ..

ف مرررررررررررررره خاايفة ومحتااره

[surgeon]

في اعتقاد غلط عندنا انو الطب حفظ وربي الطب فهم وفهم وبس


سرجون