مقارنه مهمه لمعاهد اللغه الأنجليزية بجدة ...نرجو المشاركة

[الذهبية]

أنا جربت نيوهورايزن

وبصراحة شفتو كويس واستفدت منو

يعني اللي درستني كندية

وهوا يعتمدو على كتاب وفيها محادثات ورايتنج وجرامر وكل شي

بس سمعت انو بيرلتز أفضل من نيوهوراين

أسعارهم كويسة تقريبا 1600 وأوقات يعملو تخفيض يوصل لـ 1200 المستوى

[دلع أنثـى]

بصراحة انا بحثت كثير عن افضل المعاهد اللغة عندنا واخذت من تجارب كثير ناس فوصلت الى (المجلس البريطاني الثقافي) 6 مستويات والمدرسين كلهم بريطانين ...والله اعلم

[بنت جدة المنكوبة]

البريطاني19 مستوا
مو 6

[leenah2010]

جبت لكم مشاركة جيدة للعضوة جريئه من منتديات حلول البطالة تقارن فيها بين المعاهد:

طبعا المعاهد التوب في تعليم الانجلش هما 1- معهد بيرلتز berlitz 2- المجلس الثقافي البريطاني british council 3- معهد وول ستريت wall street 4- دايركت انجلش direct english (تابع لمعهد نيوهورايزن) وراح اتكلم عن كل واحد بشئ من التفصيل حسب معرفتي وتجارب الناس معهد بيرلتز berlitz ممتاز للشخص اللي مستواه متوسط في الانجلش واغلب اللي مستواهم مبتدئ يخافو منه لانهم يجبروك على التحدث بالانجليزيه من اول كلاس ويعطو اهمية اكبر للمحادثة (90% محادثة و 10% للقراءة والكتابة والاستماع والقواعد) واغلب اللي درسو المستوى التأسيسي (اتفك لسانهم) في الانجلش وسارو يقولو جمل ويتكلمو في بعض المواقف بطلاقه.. وطريقه تدريسهم قروب من الطلبه (من 4 الى 7 طلاب) يدرسو مع التيتشر على طاولة وحده (زي طاولة الاجتماع) والاساتذه اجانب المجلس الثقافي البريطاني british council معهد ممتاااز للي جاي يدرس انجليزي صح..بس عيبهم (من وجهة نظري) يتكلمو باللهجة البريطانية وانا افضل اللهجة الامريكية المتداوله..اعرف وحده درست عندهم ومهارة الكتابة عندها اكثر من رائعه ووحده غيرها قراءتها ممتازه وماتغلط كثير بس لهجتها بريطانيه (مافي ايقونة واحد يستفرغ؟) ونظامهم كلاس تقليدي واساتذتهم برضو اجانب معهد وول ستريت wall street ممتاز للشخص اللي عنده ارتباطات زي العمل او السفريات لانه نظامهم مرن تقدر توقف متى ماتبغى وتكمل مكان ماوقفت والدراسة لوحدك.. يدوك الحقيبة التعليمية وتدخل اللاب وتجلس تدرب نفسك على الكومبيوتر ولمن تخلص الوحده تروح تحجز لحصة المواجهة تتكلم فيها مع المدرس عن الدرس ويسالك عنه وانصح فيه للشخص اللي مايحب يدرس مع الطلاب دايركت انجلش direct english ببساطة خيار المبتدئ المفضل تتعلم من البداية (قراءة-كتابة-محادثة-قواعد-استماع) والدوام يومي من السبت للربوع وجدول حصص زي المدرسة والدراسة في كلاس مع مجموعة طلاب..وزي ماقالت خريجة فريش في البداية مدرسين عرب وفي المستويات المتقدمة مدرسين اجانب. وكل المعاهد اللي ذكرتها فوق تتراوح اسعارها (للمستوى الواحد) مابين 2000 ريال الى 3700 ريال , والاسعار تختلف حسب العروض المقدمة من المعهد نفسه.. ونصيحة للشخص اللي مشكلتو في المحادثة فقط يعلم نفسه بنفسه يعني يروح يشتري فلم امريكي dvd ويزبط الترجمة على الانجليزي (مو العربي) ويتفرج على الفلم .. طبعا هوا رح يسمع الكلام بالانجلش ويقراه برضو بالانجلش ويكون معاه دفتر يسجل فيه الكلمات الجديدة ويحفظها (اكيد السعودي رح يبدع في حفظ السب بالانجلش ) وبعد ماينتهي الفلم يروح قدام المرايا ويحكي لنفسه عن الفلم وايش عجبه وايش ماعجبه (كأنك تحكي لواحد ثاني عن الفلم) .. وصدقوني لو الواحد استمر على هذي الطريقة مع الوقت رح يتحدث الانجليزيه بطلااااااااااااااااااااااااااااااقه وبدون اي مشاكل هذا اللي عندي واتمنى اكون افدت الجميع واي خدمة انا حاضره تشاو

[عماد الحسن]

مقارنة رائعة ومشاركات مميزة

جزاكم الله خيراً جميعاً.

[ابداااع]

مقارنة حلوة
درست قبل سنوات في المعهد البريطاني مستوى واحد فقط
واستفدت منه
لكن قبل مادخلته درست في احد فروع المعهد السعودي لانه ايام المدرسة ماكنت افهم ولاشئ في الانجلش
واتعلمت المبادئ
وتعجبني اللهجة البريطانية افضلها عن الامريكية

[abu thamer]

مشاركات مميزة ورائعة ... استفدت منها الكثير ... وفق الله الجميع